Sin-o ang mga Kaaway sang Dios?

Ang panguna nga kaaway sang Dios amo si Satanas nga Yawa. Sia isa ka espiritu nga tinuga nga nagrebelde kay Jehova. Si Satanas padayon nga nagapakig-away sa Dios kag nagatuga sing daku nga kagamo sa katawhan. Si Satanas malaut. Butigon sia kag manugpatay.—Juan 8:44.

Ang iban nga espiritu nga mga tinuga nagbuylog kay Satanas sa iya pagrebelde sa Dios. Ginatawag sila sang Biblia nga mga demonyo. Kaangay ni Satanas, ang mga demonyo mga kaaway sang mga tawo. Luyag nila halitan ang mga tawo. (Mateo 9:32, 33; 12:22) Laglagon ni Jehova si Satanas kag ang iya mga demonyo sing dayon. Malip-ot na lang ang tion nga nabilin sa ila sa paggamo sa mga tawo.—Bugna 12:12.

Kon luyag mo mangin abyan sang Dios, indi mo dapat himuon ang luyag ni Satanas nga himuon mo. Ginadumtan ni Satanas kag sang mga demonyo si Jehova. Mga kaaway sila sang Dios, kag luyag nila himuon ikaw nga mangin kaaway sang Dios. Dapat ka magdesisyon kon sin-o ang pahamut-an mo—si Satanas ukon si Jehova. Kon luyag mo ang kabuhi nga walay katapusan, dapat ka magdesisyon nga himuon ang kabubut-on sang Dios. Si Satanas may madamo nga pahito kag paagi sa paglimbong sa mga tawo. Ginapatalang niya ang kalabanan nga tawo.—Bugna 12:9.