Sin-o ang mga Abyan sang Dios?

Si Jesucristo amo ang Anak ni Jehova kag amo ang iya pinakasuod, pinakapalangga nga abyan. Antes sia mangin tawo sa duta, si Jesus nabuhi na sa langit subong isa ka gamhanan nga espiritu nga tinuga. (Juan 17:5) Nian nagkari sia sa duta agod tudluan ang mga tawo sing kamatuoran tuhoy sa Dios. (Juan 18:37) Ginhatag man niya ang iya tawhanon nga kabuhi agod luwason ang matinumanon nga mga tawo gikan sa sala kag kamatayon. (Roma 6:23) Si Jesus amo karon ang Hari sa Ginharian sang Dios, isa ka langitnon nga panguluhan nga magadala sing Paraiso sa sini nga duta.—Bugna 19:16.

Ang mga anghel mga abyan man sang Dios. Ang mga anghel wala magsugod sa pagkabuhi subong mga tawo sa duta. Gintuga sila sa langit antes ginhimo sang Dios ang duta. (Job 38:4-7) Minilyon ang mga anghel. (Daniel 7:10) Luyag sining langitnon nga mga abyan sang Dios nga tun-an sang mga tawo ang kamatuoran tuhoy kay Jehova.—Bugna 14:6, 7.

May mga abyan man ang Dios sa duta; ginatawag niya sila nga mga saksi niya. Ang isa ka testigo sa korte nagasugid sang iya nahibaluan tuhoy sa isa ka tawo ukon sa isa ka butang. Ang mga Saksi ni Jehova nagasugid sa iban sang ila nahibaluan tuhoy kay Jehova kag sa iya katuyuan. (Isaias 43:10) Kaangay sang mga anghel, luyag sang mga Saksi nga buligan ikaw sa pagtuon sang kamatuoran tuhoy kay Jehova. Luyag nila nga mangin abyan man ikaw sang Dios.