“Ang Cristo Amo ang Gahom sang Dios”

1-3. (a) Ano nga makahaladlok nga eksperiensia ang naagyan sang mga disipulo sa Dagat sang Galilea, kag ano ang ginhimo ni Jesus? (b) Ngaa nagakaigo ang ginsiling ni apostol Pablo nga “ang Cristo amo ang gahom sang Dios”?

KINULBAAN ang mga disipulo. Nagatabok sila sa Dagat sang Galilea sang gulpi lang nag-unos. Sigurado nga nakaeksperiensia na sila sing mga unos sa sini nga linaw, kay ang iban sa ila sagad gid nga mga mangingisda.a (Mateo 4:18, 19) Pero isa ini ka “mabaskog nga unos,” kag nag-alimbukad dayon ang dagat. Ginhingagaw sang mga disipulo nga kontrolon ang sakayan, pero mabaskog gid ang unos. Ang dalagku nga mga balod “nagbasya sa sakayan,” amo nga amat-amat ini nga nagkapan. Bisan pa nagakinagula sila, nagakatulog si Jesus sa ulin, nga kapoy gid bangod sang bilog nga adlaw nga pagpanudlo sa mga tawo. Sa kahadlok nga basi maglugdang sila, ginpukaw sia sang mga disipulo, nga nagapakitluoy: “Ginuo, luwasa kami, mapatay na kita!”—Marcos 4:35-38; Mateo 8:23-25.

² Wala mahadlok si Jesus kay nakahibalo sia nga may gahom sia nga pakalmahon ang unos. Gani ginsabdong niya ang hangin kag ang dagat: “Hipos! Maglinong ka!” Nagtuman dayon ang hangin kag ang dagat, nagpuas ang unos, nagkalma ang mga balod, kag “naglinong ini.” Hinadlukan gid ang mga disipulo. “Sin-o gid bala ini?” pamangkutanay nila. Sa pagkamatuod, ano nga klase sang tawo ang makasabdong sa hangin kag sa dagat nga daw nagasaway lang sa isa ka salawayon nga bata?—Marcos 4:39-41; Mateo 8:26, 27.

³ Pero si Jesus indi isa ka ordinaryo nga tawo. Gingamit ni Jehova ang iya gahom sa tumalagsahon nga paagi para buligan si Jesus kag para mabuligan man ni Jesus ang iban. Si apostol Pablo gingiyahan sang balaan nga espiritu sa pagsiling: “Ang Cristo amo ang gahom sang Dios.” (1 Corinto 1:24) Sa ano nga mga paagi ang gahom sang Dios ginpakita paagi kay Jesus? Kag ano ang epekto sa aton kabuhi sang paggamit ni Jesus sing gahom?

Ang Gahom sang Bugtong nga Anak sang Dios

4, 5. (a) Ano nga gahom kag awtoridad ang ginhatag ni Jehova sa iya bugtong nga Anak? (b) Ano ang ginhatag ni Jehova sa iya Anak para mahimo niya ang iya asaynment bilang Batid nga Manugpangabudlay?

⁴ Binagbinaga ang gahom ni Jesus antes sia mangin tawo. Gingamit ni Jehova ang iya “wala katapusan nga gahom” sang gintuga niya ang iya bugtong nga Anak, nga nakilala nga si Jesucristo. (Roma 1:20; Colosas 1:15) Pagkatapos sadto, ginhatagan ni Jehova ang iya Anak sing daku nga gahom kag awtoridad, sang gingamit niya ang Iya anak sa pagtuga sang tanan nga butang. Parte sa Anak, ang Biblia nagasiling: “Ang tanan nga butang nagluntad paagi sa iya, kag wala sing bisan isa ka butang nga nagluntad nga indi paagi sa iya.”—Juan 1:3.

⁵ Indi naton maintiendihan kon daw ano kadaku nga asaynment ang ginpahimo kay Jesus. Imadyina ang gahom nga kinahanglanon para tugahon ang minilyon ka gamhanan nga mga anghel, ang pisikal nga uniberso upod ang binilyon ka galaxy sa sini, kag ang duta upod ang bugana nga sarisari nga kabuhi sa sini. Para mahimo ini, ginhatag ni Jehova sa iya Anak ang pinakagamhanan nga puersa sa uniberso, nga amo ang balaan nga espiritu sang Dios. Nalipay gid ang Anak nga sia ang Batid nga Manugpangabudlay, nga gingamit ni Jehova sa pagtuga sang tanan nga iban pa nga mga butang.—Hulubaton 8:22-31.

6. Sa tapos sia mapatay sa duta kag mabanhaw, ano nga gahom kag awtoridad ang ginhatag kay Jesus?

⁶ Makabaton bala ang bugtong nga Anak sing dugang pa nga gahom kag awtoridad? Sa tapos si Jesus mapatay sa duta kag mabanhaw, sia nagsiling: “Ginhatag sa akon ang bug-os nga awtoridad sa langit kag sa duta.” (Mateo 28:18) Huo, ginhatagan si Jesus sing ikasarang kag kinamatarong sa paggamit sing gahom sa bilog nga uniberso. Bilang “Hari sang mga hari kag Ginuo sang mga ginuo,” may awtoridad sia nga ‘laglagon ang tanan nga panguluhan kag ang tanan nga awtoridad kag gahom,’ sa langit kag sa duta nga nagapamatok sa iya Amay. (Bugna 19:16; 1 Corinto 15:24-26) Ang Dios “wala magbilin sang bisan ano nga butang nga wala mapasakop” kay Jesus, luwas lang kay Jehova mismo.—Hebreo 2:8; 1 Corinto 15:27.

7. Ngaa makasiguro kita nga indi gid pag-abusuhan ni Jesus ang gahom nga ginhatag sa iya ni Jehova?

⁷ Dapat bala kita mabalaka nga basi abusuhan ni Jesus ang iya gahom? Indi gid! Ginahigugma gid ni Jesus ang iya Amay kag indi sia maghimo sing bisan ano nga makapaakig sa iya. (Juan 8:29; 14:31) Nahibaluan ni Jesus nga wala gid ginaabusuhan ni Jehova ang iya wala sing limitasyon nga gahom. Nasaksihan ni Jesus nga si Jehova nagapangita sing mga kahigayunan “agod ipakita ang iya kusog para sa ila nga ang tagipusuon bug-os sa iya.” (2 Cronica 16:9) Ang matuod, palangga man ni Jesus ang mga tawo pareho sa iya Amay, gani makasalig kita nga gamiton pirme ni Jesus ang iya gahom para sa kaayuhan. (Juan 13:1) Amo gid sina pirme ang ginhimo ni Jesus. Binagbinagon naton kon paano niya gingamit ang iya gahom sang ari sia sa duta kag kon ngaa ginhimo niya ini.

“Gamhanan sa . . . Pulong”

8. Sa tapos sia mahaplasan, ginhatagan si Jesus sing gahom nga himuon ang ano, kag paano niya gingamit ang iya gahom?

⁸ Posible nga wala maghimo sing mga milagro si Jesus sang bata pa sia sa Nazaret. Pero nagbag-o ini sa tapos sia mabawtismuhan sang 29 C.E., sang mga 30 anyos sia. (Lucas 3:21-23) Ang Biblia nagasugid sa aton: “Ginhaplasan sia sang Dios sing balaan nga espiritu kag ginhatagan sing gahom, kag naglibot sia sa kadutaan nga nagahimo sing maayo kag nagapang-ayo sa tanan nga ginapabudlayan sang Yawa.” (Binuhatan 10:38) Ang mga tinaga nga “nagahimo sing maayo” nagakahulugan nga gingamit ni Jesus sing husto ang iya gahom. Sa tapos sia mahaplasan, sia nangin “isa ka manalagna nga gamhanan sa buhat kag pulong.”—Lucas 24:19.

9-11. (a) Sa diin si Jesus pirme nagpanudlo, kag ngaa indi ini mahapos sadto? (b) Ngaa nagdayaw ang mga tawo sa pagpanudlo ni Jesus?

⁹ Paano si Jesus nangin gamhanan sa pulong? Pirme sia nagapanudlo sa gua. Halimbawa sa higad sang mga linaw kag sa mga bakulod pati man sa mga dalan kag sa mga tiendahan. (Marcos 6:53-56; Lucas 5:1-3; 13:26) Puede gid maghalin ang iya mga tagpalamati kon wala sila nawili sa iya mga ginatudlo. Sadto nga tion wala pa sing naimprinta nga mga libro, gani dapat gid tandaan sang mga tagpalamati ang iya ginsiling. Bangod sini, dapat gid nga ang pagpanudlo ni Jesus makawiwili, mahapos maintiendihan, kag madali tandaan. Pero nahimo ini tanan ni Jesus. Halimbawa, binagbinaga ang iya Sermon sa Bukid.

¹⁰ Isa ka aga, sang 31 C.E., nagtipon ang mga tawo sa isa ka bakulod malapit sa Dagat sang Galilea. Ang iban naghalin pa sa Judea kag Jerusalem, nga 100 asta 110 ka kilometro ang kalayuon. Ang iban pa gid naghalin sa baybayon sang Tiro kag Sidon, sa aminhan. Madamo nga masakiton ang nagpalapit kay Jesus para tandugon sia, kag ginpang-ayo niya sila tanan. Sang mapaayo niya ang tanan nga may malala nga balatian, nagpanudlo sia. (Lucas 6:17-19) Sang makatapos sia sa paghambal, nagdayaw sila sa ila nabatian. Ngaa?

¹¹ Pagligad sang mga tinuig, ang isa nga nakabati sadto nga sermon nagsulat: “Ang mga tawo nahayanghag sa iya paagi sang pagpanudlo, kay nagatudlo sia sa ila kaangay sang tawo nga may awtoridad.” (Mateo 7:28, 29) Mabatyagan sang mga tawo ang gahom sang ginasiling ni Jesus. Nagahambal sia bilang representante sang Dios kag ginbase niya ang tanan niya nga panudlo sa Pulong sang Dios. (Juan 7:16) Ang ginahambal ni Jesus maathag, ang iya mga laygay makapakumbinsi, kag ang iya mga argumento indi mabais. Ginbuligan niya ang iya tagpalamati nga maintiendihan ang kabangdanan sang ila mga problema kag nalab-ot gid sini ang ila tagipusuon. Gintudluan niya sila kon paano mangin malipayon, kon paano mangamuyo, kon paano pangitaon ang Ginharian sang Dios, kag kon paano magtukod para sa isa ka malig-on nga palaabuton. (Mateo 5:3–7:27) Ang iya mga ginsiling nagpahulag sa mga nagapangita sang kamatuoran kag pagkamatarong. Handa sila nga “ipanghiwala” ang ila kaugalingon kag talikdan ang tanan para sundon sia. (Mateo 16:24; Lucas 5:10, 11) Pamatuod gid ini sa gahom sang mga ginsiling ni Jesus!

“Gamhanan sa Buhat”

12, 13. Ano ang buot silingon nga si Jesus “gamhanan sa buhat,” kag ano ang sarisari nga mga milagro nga ginhimo niya?

¹² Si Jesus “gamhanan [man] sa buhat.” (Lucas 24:19) Ang mga Ebanghelyo nagasugid sing sobra sa 30 ka sarisari nga milagro nga ginhimo niya, tanan paagi sa ‘gahom ni Jehova.’b (Lucas 5:17) Linibo ka tawo ang nakabenepisyo sa mga milagro ni Jesus. Binagbinaga ang duha lang ka milagro. Ginpakaon niya ang 5,000 ka lalaki kag sang ulihi ang 4,000 pa gid ka lalaki. Upod ang mga babayi kag kabataan, posible nga linibo pa gid ka tawo ang nakabenepisyo!—Mateo 14:13-21; 15:32-38.

¹³ Sarisari nga mga milagro ang ginhimo ni Jesus. May awtoridad sia sa mga demonyo, amo nga mahapos lang nga napagua niya sila. (Lucas 9:37-43) May gahom sia sa pisikal nga mga elemento, amo nga nahimo niya ang tubig nga alak. (Juan 2:1-11) Imadyina ang katingala sang iya mga disipulo sang “nakita nila si Jesus nga nagalakat sa dagat.” (Juan 6:18, 19) May gahom sia sa balatian, amo nga naayo niya ang may mga diperensia sa lawas, ang may nagalukmatlukmat nga mga balatian, kag ang may grabe nga mga balatian. (Marcos 3:1-5; Juan 4:46-54) Ginhimo niya ini nga mga pagpang-ayo sa sarisari nga paagi. Ang iban gin-ayo nga malayo kay Jesus, samtang ang iban naman gintandog mismo ni Jesus. (Mateo 8:2, 3,5-13) Ang iban gin-ayo dayon, ang iban naman amat-amat.—Marcos 8:22-25; Lucas 8:43, 44.

14. Sa ano nga mga sitwasyon ginpakita ni Jesus nga may gahom sia sa pagdula sang kamatayon?

¹⁴ Talalupangdon nga si Jesus may gahom nga dulaon ang kamatayon. Sa tatlo ka narekord nga okasyon, ginbanhaw niya ang mga patay. Ginbalik niya ang 12 anyos nga dalagita sa iya mga ginikanan, ang bugtong nga anak sa iya balo nga iloy, kag ang isa ka hinigugma nga utod nga lalaki sa iya mga utod nga babayi. (Lucas 7:11-15; 8:49-56; Juan 11:38-44) Wala sing sitwasyon nga nabudlayan si Jesus. Ginbanhaw niya ang 12 anyos nga dalagita sa hiligdaan wala lang madugay sa tapos ini mapatay. Ginbanhaw niya ang anak nga lalaki sang isa ka balo nga babayi nga ara na sa teheras, sang adlaw mismo nga napatay ini. Kag ginbanhaw niya si Lazaro sa lulubngan bisan apat ka adlaw na ini nga napatay.

Responsable, May Konsiderasyon sa Paggamit sang Gahom, kag Indi Korap

15, 16. Ano ang ebidensia nga wala gingamit ni Jesus ang iya gahom para sa iya kaugalingon?

¹⁵ Kon ang gahom ni Jesus ginhatag sa isa ka indi perpekto nga manuggahom, indi bala posible gid nga abusuhan ini? Pero si Jesus wala sing sala. (1 Pedro 2:22) Indi sia korap, indi ambisyuso, ukon dalok. Ini nga mga kinaiya ara sa indi perpekto nga mga tawo kag amo ini ang rason nga ginagamit nila ang ila gahom para halitan ang iban.

¹⁶ Ginagamit ni Jesus ang iya gahom para sa kaayuhan sang iban kag indi para sa iya kaugalingon. Sang ginagutom sia, wala niya ginhimo nga tinapay ang mga bato para may makaon sia. (Mateo 4:1-4) Ang iya diutay nga pagkabutang ebidensia nga wala niya ginpanguartahan ang iya gahom. (Mateo 8:20) May mga ebidensia pa nga naghimo sia sang mga milagro kay gusto niya buligan ang iban. Isa pa, nagasakripisyo sia kon maghimo sia sing mga milagro. Sang gin-ayo niya ang mga masakiton, ang gahom naggua sa iya. Mabatyagan gid niya kon maggua ang gahom sa iya, bisan pa isa lang ang iya ginaayo. (Marcos 5:25-34) Pero, nagpasugot sia nga tandugon sia sang tanan nga tawo, kag nag-ayo sila. (Lucas 6:19) Ebidensia ini nga nagaulikid gid sia sa iban!

17. Paano ginpakita ni Jesus nga responsable sia sa paggamit sang iya gahom?

¹⁷ Responsable si Jesus sa paggamit sang iya gahom. Wala gid sia maghimo sing mga milagro para magpadayawdayaw lang ukon magpakitakita. (Mateo 4:5-7) Wala sia maghimo sing mga tanda para lang pasundan ang gusto ni Herodes nga maghimo sia sing milagro. (Lucas 23:8, 9) Imbes nga ipanugid sa iban ang iya gahom, pirme ginapaandaman ni Jesus ang iya mga gin-ayo nga indi manugid kay bisan sin-o. (Marcos 5:43; 7:36) Indi niya gusto nga magpati ang mga tawo nga sia ang Mesias bangod lang nagahimo sia sing mga milagro.—Mateo 12:15-19.

18-20. (a) Ngaa gingamit ni Jesus ang iya gahom sa pagpang-ayo? (b) Ano ang masiling mo sa paagi ni Jesus sa pag-ayo sa isa ka bungol nga tawo?

¹⁸ Ining gamhanan nga tawo, nga si Jesus, indi gid pareho sa tawo nga mga manuggahom nga wala nagasapak sa mga kinahanglanon kag pag-antos sang iban. May pag-ulikid si Jesus sa mga tawo. Naluoy gid sia bisan makita lang ang mga nagaantos, gani ginapaumpawan niya sila. (Mateo 14:14) May konsiderasyon sia sa ila ginabatyag kag kinahanglanon, kag ginagamit niya ang iya gahom bangod palangga niya sila kag nabalaka sia sa ila. Ang isa ka makatalandog nga halimbawa mabasa sa Marcos 7:31-37.

¹⁹ Sa sini nga okasyon, nakita sang madamo nga tawo si Jesus kag gindala nila sa iya ang madamo nga nagamasakit, kag sila tanan ginpang-ayo niya. (Mateo 15:29, 30) Pero isa ka tawo ang ginpili ni Jesus para hatagan sing espesyal nga konsiderasyon. Ini nga tawo bungol kag halos indi makahambal. Mahimo nga nabatyagan ni Jesus nga grabe ang kakulba ukon kahuya sini nga tawo. Gani gindala sia ni Jesus palayo sa mga tawo, pakadto sa isa ka pribado nga lugar. Dayon naggamit si Jesus sing pila ka tanda para ipabalo sa tawo ang gusto niya himuon. “Ginbutang niya ang iya mga tudlo sa mga dulunggan sang tawo, kag nagdupla sia kag gintandog niya ang dila sang tawo.”c (Marcos 7:33) Sa tapos sini, nagtangla si Jesus sa langit kag nagginhawa sing madalom kag nagpangamuyo. Ini nga mga buhat daw nagasiling nga, ‘Ang gusto ko himuon sa imo matabo bangod sang gahom halin sa Dios.’ Sang ulihi, si Jesus nagsiling: “Magbukas ka.” (Marcos 7:34) Gani, nakabati na liwat ang tawo kag nakahambal na sia sing normal.

²⁰ Kanami gid mabal-an nga sang gingamit ni Jesus ang iya gahom halin sa Dios para ayuhon ang mga nagaantos, nagpakita gid sia sing empatiya sa ila ginabatyag! Makapalig-on gid nga gintugyan ni Jehova ang Mesianikong Ginharian sa isa ka Manuggahom nga may pag-ulikid kag konsiderasyon.

Ginapakita sang mga Milagro ni Jesus Kon Ano ang Iya Himuon sa Palaabuton

21, 22. (a) Ano ang ginapakita sang mga milagro nga ginhimo ni Jesus? (b) Bangod kontrolado ni Jesus ang natural nga mga puersa, ano ang mapaabot naton sa iya paggahom sa Ginharian?

²¹ Ang mga milagro nga ginhimo ni Jesus sa duta mga sampol pa lang sang matahom nga mga butang nga himuon niya kon maghari na sia diri sa duta. Sa bag-ong kalibutan sang Dios, magahimo liwat si Jesus sing mga milagro, pero sa bilog nga kalibutan na! Binagbinaga ang pila sa makahalawhaw nga mga butang nga mapaabot naton.

²² Kay-uhon ni Jesus ang tanan nga halit nga nahimo sa duta. Dumduma nga ginpakalma niya ang isa ka unos. Gani, sigurado gid nga kon maggahom na ang Cristo sa Ginharian, indi na mahadlok ang mga tawo nga mahalitan sila sang mga bagyo, linog, paglupok sang bulkan, ukon iban pa nga kalamidad. Bangod si Jesus ang Batid nga Manugpangabudlay, nga gingamit ni Jehova sa pagtuga sang duta kag sang tanan nga kabuhi sa sini, nabal-an gid niya ang tanan parte sa duta. Nahibaluan niya kon ano ang himuon para indi maguba ang duta bisan pa istaran ini sang mga tawo. Sa iya paggahom, ining bilog nga duta mangin Paraiso.—Lucas 23:43.

23. Bilang Hari, paano ihatag ni Jesus ang kinahanglanon sang mga tawo?

²³ Mahatag bala ni Jesus ang kinahanglanon sang mga tawo? Napakaon ni Jesus ang linibo asta nga nabusog sila paagi sa diutay lang nga pagkaon. Nagapasalig ini sa aton nga sa iya paggahom wala na sing magutman, kay ang tanan may bastante na nga pagkaon. (Salmo 72:16) May gahom man sia nga ayuhon ang mga balatian. Ang mga bulag, apa, baldado, kag piang nga mga tawo magaayo kag indi na gid magmasakit liwat. (Isaias 33:24; 35:5, 6) May ikasarang man sia sa pagbanhaw sa mga patay. Gani bilang Hari sa langit, banhawon niya ang minilyon ka tawo nga gusto gid buhion sang iya Amay.—Juan 5:28, 29.

24. Samtang ginabinagbinag naton ang gahom ni Jesus, ano ang dapat naton tandaan, kag ngaa?

²⁴ Samtang ginabinagbinag naton ang gahom ni Jesus, tandaan naton nga ginailog gid sang Anak ang iya Amay. (Juan 14:9) Gani, ang paggamit ni Jesus sang gahom maathag nga nagapakita sa aton kon paano ginagamit ni Jehova ang iya gahom. Halimbawa, pensara ang parte sa mapinalanggaon nga pag-ayo ni Jesus sa isa ka aruon. Bangod sang kaluoy, gintandog ni Jesus ang tawo kag nagsiling: “Luyag ko!” (Marcos 1:40-42) Paagi sa kasaysayan pareho sini, daw nagasiling si Jehova, ‘Amo sina ang paggamit ko sang akon gahom!’ Sigurado nga gusto mo gid dayawon kag pasalamatan ang aton labing gamhanan nga Dios bangod ginagamit niya ang iya gahom sa mahigugmaon nga paagi.