Makabenepisyo Ka sa Bag-o nga Katipan

1. Ano ang duha ka bahin sang sugo kay Jeremias nga iya gintuman?

MAY duha ka bahin ang sugo si Jehova kay Jeremias. Ang una amo ang ‘paggabot, pagrumpag, paglaglag, kag pagguba.’ Ang ikaduha amo ang ‘pagpatindog kag pagtanom.’ Natuman niya ang una paagi sa pagpadayag sang kalautan sang matinaastaason nga mga Judiyo, nga nagapahayag sang paghukom sang Dios sa ila kag sa Babilonia. Pero may upod nga paglaum ang tagna ni Jeremias. Gintagna niya ang pagpatindog sang luyag sang Dios nga patindugon kag pagtanom sang tuyo Niya nga itanom. Halimbawa, natuman ni Jeremias ang ikaduha nga bahin sang iya asaynment sang gintagna niya ang pagpauli sang mga Judiyo sa ila dutang natawhan.—Jer. 1:10; 30:17, 18.

2. Ngaa hukman ni Jehova ang iya katawhan, kag paano?

² Ang pagpahayag ni Jeremias sing pagpasag-uli wala nagakahulugan nga kunsintidor ang Dios ukon ikompromiso niya ang iya talaksan sa hustisya. Hukman gid niya ang balingag nga mga Judiyo. (Basaha ang Jeremias 16:17, 18.) Sang panahon ni Jeremias, pila lang sa Jerusalem ang “nagapakita sing hustisya” ukon “tawo nga matutom,” gani naubos na ang pasensia ni Jehova. Nagsiling sia: “Nakapoy na ako sa pagpakita sing kaluoy.” (Jer. 5:1; 15:6, 7) Ini nga mga Judiyo ‘naghimo sing mga sala nga ginhimo anay sang ila mga katigulangan nga wala magtuman’ sa pulong ni Jehova. Isa pa, ginpaakig nila ang Dios paagi sa ila pagpakighilawas sa butig nga mga dios. (Jer. 11:10; 34:18) Tadlungon ni Jehova ang iya katawhan sa “nagakaigo nga paagi,” agod ang pila mahimo makamarasmas kag magbalik sa iya.—Jer. 30:11; 46:28.

3. Ngaa dapat mo binagbinagon ang mga tagna parte sa bag-o nga katipan?

³ Ginpatagna sang Dios kay Jeremias ang butang nga may daku kag dayon nga mga benepisyo—ang bag-o nga katipan. Madamo kita sing rason kon ngaa dapat naton binagbinagon ining matahom nga bahin sang tagna ni Jeremias. Ibulos ini sa katipan nga ginhimo sa Israel sang nakagua na sila sa Egipto, nga ginpatung-an ni Moises. (Basaha ang Jeremias 31:31, 32.) Sang ginsugdan ang Panihapon sang Ginuo, ginsambit ni Jesucristo ining bag-o nga katipan, gani dapat kita mangin interesado sa sini. (Luc. 22:20) Ginpatuhuyan ini ni Pablo sang nagsulat sia sa mga Hebreo. Ginkutlo niya ang tagna ni Jeremias kag ginpadaku ang importansia sang bag-o nga katipan. (Heb. 8:7-9) Pero ano gid bala ang bag-o nga katipan? Ngaa importante gid ini? Sin-o ang nadalahig sa sini, kag paano ka makabenepisyo sa sini? Tan-awon naton.

NGAA KINAHANGLAN ANG BAG-O NGA KATIPAN?

4. Ano ang nahimo sang Kasuguan nga katipan?

⁴ Para mahangpan ang bag-o nga katipan, dapat naton mahangpan ang katuyuan sang daan nga katipan, ang Kasuguan nga katipan. Madamo ini sing nabulig sa pungsod nga nagahulat sa ginsaad nga Binhi, nga magapakamaayo sa tanan nga pungsod. (Gen. 22:17, 18) Sang ginbaton sang mga Israelinhon ang Kasuguan nga katipan, ginkabig sila nga “hamili nga katawhan” sang Dios. Sa sini nga katipan, ang tribo ni Levi amo ang magaalagad subong saserdote sang pungsod. Sang nakigkatipan si Jehova sa Israel sa Bukid Sinai, ginsambit niya ang “ginharian sang mga saserdote kag balaan nga pungsod” pero wala sia naghambal kon san-o kag sa ano nga paagi ini magaabot. (Ex. 19:5-8) Sang wala pa ini nag-abot, ginpakita sang daan nga katipan nga indi masarangan tumanon sing bug-os sang mga Israelinhon ang Kasuguan. Gani napadayag sini ang ila mga sala. Sa idalom sang Kasuguan, dapat maghalad ang mga Israelinhon sing regular para itabon sa ila mga sala. Pero maathag nga kinahanglan nila ang isa ka himpit nga halad nga indi na pagsuliton. Kinahanglan gid ang dayon nga kapatawaran sa kasal-anan.—Gal. 3:19-22.

5. Ngaa nagtagna si Jehova sing bag-o nga katipan?

⁵ Mahangpan naton kon ngaa gin-inspirar gihapon sang Dios si Jeremias nga magtagna parte sa bag-o nga katipan bisan ginapatuman pa ang Kasuguan nga katipan. Bangod sang iya gugma kag kaayo, gusto ni Jehova nga maghimo sing permanente nga bulig para sa tanan nga pungsod. Paagi kay Jeremias, nagsiling ang Dios parte sa mga sakop sini nga katipan: “Patawaron ko ang ila kasaypanan, kag indi ko na pagdumdumon ang ila sala.” (Jer. 31:34) Bisan ginsaad ini sang panahon pa ni Jeremias, ang benepisyo sini para sa tanan nga katawhan. Paano?

6, 7. (a) Ano ang ginabatyag sang iban sa ila mga kasal-anan? (b) Ngaa mapalig-on ka sa pagbinagbinag sa bag-o nga katipan?

⁶ Indi pa kita himpit kag masami nga matalupangdan naton ini. Mailustrar ini sa isa ka utod nga nagapakigbato sa iya personal nga problema. Nagsiling sia: “Kon mapaslawan ako, nagalalain gid ako. Pamatyag ko daw indi ako makabawi sa akon nahimo. Nabudlayan ako mangamuyo. Sugdan ko ini paagi sa pagsiling, ‘Jehova, ambot lang kon pamatian mo ako, pero . . .’” Ang pila nga napaslawan ukon nakasala nagabatyag nga daw ginabalabagan sang “panganod” ang ila mga pangamuyo kag indi makalab-ot sa Dios. (Pan. 3:44) Ang iban natublag sang ila mga sala sang una, bisan pa tinuig na ang nagligad. Bisan gani ang huwaran nga mga Cristiano makahambal sing mga butang nga ginahinulsulan nila.—Sant. 3:5-10.

⁷ Indi kita dapat maghunahuna nga indi gid kita makasala. (1 Cor. 10:12) Ginbaton ini bisan ni Pablo. (Basaha ang Roma 7:21-25.) Sa sini nga kahimtangan, dapat naton dumdumon ang bag-o nga katipan. Nagsaad ang Dios nga ang isa ka bahin sang bag-o nga katipan amo ang indi niya pagdumdom sang aton mga sala. Daku gid ini nga benepisyo! Napalig-on gid si Jeremias sang gintagna niya ini, kag mapalig-on man kita samtang nagadamo ang aton natun-an parte sa bag-o nga katipan kag sa mga benepisyo sini.

ANO ANG BAG-O NGA KATIPAN?

8, 9. Ano ang ginsakripisyo ni Jehova para mapatawad ang mga sala?

⁸ Kon makilala mo sing maayo si Jehova, mas mahangpan mo kon daw ano sia ka mainayuhon kag maluluy-on sa di-himpit nga mga tawo. (Sal. 103:13, 14) Sa pagtagna sa bag-o nga katipan, ginpadaku ni Jeremias nga ‘patawaron ni Jehova ang ila kasaypanan’ kag indi na ini pagdumdumon. (Jer. 31:34) Mahimo nga natingala si Jeremias kon paano ina himuon sang Dios. Pero, nahangpan niya nga ang bag-o nga katipan nagapahangop sang kasugtanan, ukon kontrata sang Dios sa mga tawo. Gani, paagi sa sina nga katipan, tumanon ni Jehova ang iya ginpatagna kay Jeremias, lakip na ang kapatawaran. Sa ulihi pa ipahayag sang Dios ang iban nga detalye parte sa iya katuyuan, lakip na ang pagahimuon sang Mesias.

⁹ Mahimo may kilala ka nga mga ginikanan nga wala nagadisiplina sa ila mga bata. Kaanggid bala sa ila si Jehova? Indi gid! Maathag ini sa pagpatuman sa bag-o nga katipan. Imbes nga kalimtan lang ang mga sala, ginasunod gid sang Dios ang iya talaksan sang hustisya paagi sa pag-aman sing legal nga basihan para sa kapatawaran, bisan pa daku ini nga sakripisyo sa iya bahin. Mahangpan naton ini sa pagbinagbinag sa sulat ni Pablo parte sa bag-o nga katipan. (Basaha ang Hebreo 9:15, 22, 28.) Ginsambit ni Pablo ang “kahilwayan paagi sa gawad” kag nagsiling nga “luwas kon may ginbubo nga dugo wala sing kapatawaran nga mahanabo.” Pero indi ini paghalad sing dugo sang toro ukon kanding nga ginahalad suno sa Kasuguan. Ang bag-o nga katipan nagpanghikot paagi sa dugo ni Jesus. Pasad sa sining himpit nga halad, ‘mapatawad ni Jehova ang ila kasal-anan’ sing dayon. (Binu. 2:38; 3:19) Apang sin-o ang yara sa sining bag-o nga katipan kag makatigayon sina nga kapatawaran? Indi ang pungsod sang mga Judiyo. Nagsiling si Jesus nga isikway sang Dios ang mga Judiyo, ang mga nagahalad sing mga sapat suno sa Kasuguan, kag hatagan Niya sing atension ang iban nga pungsod. (Mat. 21:43; Binu. 3:13-15) Amo ini “ang Israel sang Dios” nga ginahuman sang hinaplas nga mga Cristiano. Ang Kasuguan nga katipan ginhimo para sa tunga sang Dios kag sa kinaugali nga Israel, samtang ang bag-o nga katipan sa tunga naman ni Jehova nga Dios kag sang espirituwal nga Israel, kag si Jesus amo ang Manugpatunga sini.—Gal. 6:16; Roma 9:6.

10. (a) Sin-o ang “kaliwat” ni David? (b) Paano makabenepisyo ang mga tawo gikan sa “kaliwat”?

¹⁰ Gintawag ni Jeremias ang Isa nga magaabot, ang Mesias, subong “kaliwat” ni David. Nagakaigo gid ini. Nagapanagna pa si Jeremias sang nautod ang harianon nga kaliwat ni David. Pero may paglaum pa nga mapasag-uli ini. Sang ulihi, nabun-ag si Jesus sa kaliwatan ni Hari David. Gintawag sia “si Jehova ang Aton Pagkamatarong,” nga nagapakita nga importante gid sa Dios ang pagkamatarong. (Basaha ang Jeremias 23:5, 6.) Gintugutan ni Jehova ang iya bugtong nga Anak nga mag-antos kag mapatay. Suno sa iya katarungan, iaplikar ni Jehova ang balor sang halad gawad sang “kaliwat” ni David subong basihan sang kapatawaran. (Jer. 33:15) Bangod sini, napahayag ang pila ka tawo nga ‘matarong para sa kabuhi’ kag ginhaplasan sang balaan nga espiritu, kag nangin bahin sang bag-o nga katipan. Huo, importante gid sa Dios ang pagkamatarong, kay bisan ang iban nga indi direkta nga bahin sini nga katipan makabenepisyo man subong sang aton makita.—Roma 5:18.

11. (a) Sa diin nasulat ang kasuguan sang bag-o nga katipan? (b) Ngaa ang “iban nga mga karnero” interesado sa kasuguan sang bag-o nga katipan?

¹¹ Luyag mo bala mahibaluan ang iban pa nga aspekto sang bag-o nga katipan? Ang isa sa daku nga kinatuhayan sini sa Mosaikong Kasuguan nga katipan amo ang ginsulatan sini. (Basaha ang Jeremias 31:33.) Ang Napulo ka Sugo sang Kasuguan nga katipan ginsulat sa tapitapi nga bato, nga nadula sang ulihi. Sa kabaliskaran, gintagna ni Jeremias nga ang kasuguan sang bag-o nga katipan isulat sa tagipusuon sang mga tawo, kag magapabilin ini. Ang mga bahin sa bag-o nga katipan amo ang mga hinaplas, nga nagasunod gid sa sini nga kasuguan. Kamusta naman ang mga indi direkta nga bahin sa bag-o nga katipan, ang “iban nga mga karnero” nga may paglaum nga mabuhi sing dayon sa duta? (Juan 10:16) Ginapabaloran man nila ang kasuguan sang Dios. Kaangay sila sang mga dumuluong nga nagapuyo sa Israel, nga nagsunod kag nakabenepisyo sa Mosaikong Kasuguan.—Lev. 24:22; Num. 15:15.

12, 13. (a) Ano ang kasuguan sang bag-o nga katipan? (b) Sa idalom sang “kasuguan ni Cristo,” ngaa wala ka napilitan lang nga alagdon ang Dios?

¹² Paano mo sabton kon may mamangkot, ‘Ano ining kasuguan nga nasulat sa tagipusuon sang mga hinaplas?’ Ini nga kasuguan gintawag man nga “kasuguan ni Cristo.” Una ini nga ginhatag sa espirituwal nga Israel, ang mga yara sa bag-o nga katipan. (Gal. 6:2; Roma 2:28, 29) Masumaryo “ang kasuguan ni Cristo” sa isa ka tinaga: gugma. (Mat. 22:36-39) Paano ini nasulat sa tagipusuon sang mga hinaplas? Paagi sa ila pagtuon sa Biblia kag pagpangamuyo kay Jehova. Dapat ini mangin regular nga bahin sang kabuhi sang tanan nga matuod nga Cristiano kay bahin ini sang matuod nga pagsimba. Amo man sini ang himuon sang mga indi sakop sa bag-o nga katipan pero luyag nga makabenepisyo sa sini.

¹³ “Ang kasuguan ni Cristo” ginpatuhuyan nga “himpit nga kasuguan nga nagadala sang kahilwayan” kag “kasuguan sang hilway nga katawhan.” (Sant. 1:25; 2:12) Madamo ang natawo sa idalom sang Mosaikong Kasuguan, pero wala sing natawo sa idalom sang bag-o nga katipan ukon kasuguan ni Cristo. Wala ginpilit nga mag-alagad sa Dios ang mga matinumanon sa kasuguan ni Cristo. Sa baylo, nalipay sila nga mahibaluan nga masulat sa tagipusuon ang kasuguan sang Dios kag ang dayon nga kaayuhan sang katipan nga gintagna ni Jeremias matigayon sang mga tawo karon.

ANG MGA MAKABENEPISYO SA BAG-O NGA KATIPAN

14. Sin-o ang makabenepisyo sa bag-o nga katipan?

¹⁴ Sang natun-an nga 144,000 lang ang yara sa bag-o nga katipan, mahimo maghunahuna ang iban nga sila lang ang makabenepisyo sa sini. Kay man, mga hinaplas lang ang nagapakig-ambit sa emblema kon Memoryal, sa diin ang alak nagarepresentar sa “dugo sang katipan.” (Mar. 14:24) Pero dumduma nga ang yara sa bag-o nga katipan mga kaupod ni Jesus subong “binhi” ni Abraham, nga paagi sa sini pakamaayuhon ang tanan nga pungsod. (Gal. 3:8, 9, 29; Gen. 12:3) Gani paagi sa bag-o nga katipan, tumanon ni Jehova ang iya saad nga pakamaayuhon ang tanan nga tawo paagi sa “binhi” ni Abraham.

15. Ano ang gintagna nga katungdanan sang mga hinaplas?

¹⁵ Si Jesucristo, ang panguna nga bahin sang binhi ni Abraham, nagaalagad subong Mataas nga Saserdote, kag nag-aman sia sing himpit nga halad para mapatawad ang kasaypanan kag kalapasan. (Basaha ang Hebreo 2:17, 18.) Pero madugay na nga gintagna sang Dios ang “ginharian sang mga saserdote kag balaan nga pungsod.” (Ex. 19:6) Sa kinaugali nga Israel, ang mga saserdote naghalin sa isa lang ka tribo, kag lain naman nga tribo ang ginhalinan sang mga hari. Gani paano magluntad ang ginsaad nga pungsod sang mga hari kag saserdote? Ang una nga sulat ni Pedro ginhimo para sa mga ginpakabalaan sang espiritu. (1 Ped. 1:1, 2) Ginpatuhuyan niya sila subong “harianon nga mga saserdote, balaan nga pungsod, katawhan nga ginapanag-iyahan sing pinasahi.” (1 Ped. 2:9) Gani ang mga hinaplas sa bag-o nga katipan magaalagad subong mga saserdote nga kaupod ni Cristo. Hunahunaa kon ano ang buot silingon sina! Adlaw-adlaw naton ginapakigbatuan ang sala, nga ‘nagagahom sa aton subong hari.’ Naeksperiensiahan man ini sang magaalagad subong kaupod nga mga saserdote. (Roma 5:21) Nabatyagan nila ang balatyagon sang mga nakasala kag nagpakigbato man sila sa sini. Gani kaupod sila ni Cristo nga makasimpatiya sa aton pagpakigbato sa huyog nga magpakasala.

16. Anong pagpalig-on ang natigayon sang “dakung kadam-an” sa Bugna 7:9, 14?

¹⁶ Sa Bugna 7:9, 14, nakita ang “dakung kadam-an” nga “nagasuksok sang puti nga malaba nga panapton,” nga nagapatuhoy sa ila matinlo nga tindog sa atubangan sang Dios. Para maluwas sa “dakung kapipit-an,” ginatipon na karon ang dakung kadam-an. Gani bisan karon, may matarong na sila nga tindog sa atubangan sang Dios. Ginpahayag sila nga matarong subong mga abyan ni Jehova. (Roma 4:2, 3; Sant. 2:23) Isa gid ini ka pagpakamaayo! Kon bahin ka sang dakung kadam-an, makasalig ka nga buligan ka gid sang Dios sa imo pagpanikasog nga magpabilin nga matinlo sa iya atubangan.

17. Ano ang buot silingon nga wala na ‘ginadumdom’ ni Jehova ang mga sala?

¹⁷ Ano ang matabo sa mga sala sang mga ginakahamut-an sang Dios? Subong sang nasambit na, nagsiling si Jehova paagi kay Jeremias: “Patawaron ko ang ila kasaypanan, kag indi ko na pagdumdumon ang ila sala.” (Jer. 31:34) Amo sini ang ginhimo sang Dios sa mga hinaplas pasad sa halad ni Jesus. Sing kaanggid, patawaron man sang Dios ang sala sang dakung kadam-an pasad sa “dugo sang katipan.” Nagsiling si Jeremias nga indi na “pagdumdumon” sang Dios ang mga sala, pero wala ini nagapahangop nga malipaton ang Dios kag indi na niya madumduman ang mga sala. Sa baylo, nagapahangop ini nga kon ang isa nadisiplina kag napatawad na, daw gindula sang Dios sa iya panulok ang mga sala. Dumduma ang sala ni Hari David may kaangtanan kay Bat-seba kag Urias. Gindisiplina sia kag nag-antos bangod sa iya mga sala. (2 Sam. 11:4, 15, 27; 12:9-14; Isa. 38:17) Pero wala ginhuptan sang Dios ang mga sala ni David. (Basaha ang 2 Cronica 7:17, 18.) Suno sa bag-o nga katipan, kon napatawad na ni Jehova ang sala pasad sa halad ni Jesus, wala na niya ini ginadumdom pa.—Ezeq. 18:21, 22.

18, 19. Ano ang ginasiling sang bag-o nga katipan parte sa pagpatawad?

¹⁸ Ginapadaku pa gid sang bag-o nga katipan ang dalayawon nga pagpakig-angot ni Jehova sa mga makasasala—mga hinaplas nga bahin sang katipan kag mga may dutan-on nga paglaum. Makasalig ka nga kon mapatawad na ni Jehova ang imo mga sala, indi na niya ini pagdumdumon. Gani, may matun-an kita sa saad sang Dios nga bag-o nga katipan. Pamangkuta ang imo kaugalingon, ‘Ginailog ko bala si Jehova paagi sa indi pagsambit sang mga sala sang iban sa akon nga napatawad ko na?’ (Mat. 6:14, 15) Maaplikar ini sa diutay ukon dalagku nga mga sala, subong sang pagpakighilahi sang Cristianong tiayon. Kon patawaron sang inosente nga tiayon ang mahinulsulon nga makihilahion, indi na niya dapat ‘pagdumdumon pa ang iya sala.’ Indi ini mahapos, pero isa ini sa mga paagi para mailog naton si Jehova.a

¹⁹ Maaplikar man naton ini sa na-disfellowship nga naghinulsol kag nakapanumbalik. Ano abi kon inang tawo nga nagbalik sa kongregasyon amo ang nagdaugdaug ukon nagpasipala sa imo? Paano ang Jeremias 31:34 makaimpluwensia sa aton hunahuna kag reaksion? Patawaron bala naton ang nakasala kag indi na pagdumdumon ang iya sala? (2 Cor. 2:6-8) Amo gid sini ang dapat himuon sang mga nagasunod sa bag-o nga katipan.

MGA PAGPAKAMAAYO SANG BAG-O NGA KATIPAN KARON KAG SA PALAABUTON

20. Ano ang kinatuhayan sang imo pagtamod sa pagtamod sang madamo nga tawo sang panahon ni Jeremias?

²⁰ Sang panahon ni Jeremias, madamo nga Judiyo ang nagasiling: “Si Jehova indi maghimo sing maayo, kag indi man sia maghimo sing malain.” (Sof. 1:12) Bisan pa may ihibalo na sila kon sin-o gid si Jehova, nagabatyag sila nga indi sia maghulag, kag wala man sia nagapaabot nga magsunod sila sa bisan ano nga mga talaksan. Pero nakahibalo ka nga nakita sang Dios ang tanan. May matinahuron ka nga kahadlok sa Dios amo nga ginalikawan mo gid ang paghimo sing malain. (Jer. 16:17) Nahibaluan mo man nga si Jehova amo ang halangdon nga Amay. Nahibaluan niya ang aton maayo nga mga buhat, nakita man ini sang iban ukon wala.—2 Cron. 16:9.

21, 22. Ngaa indi na kinahanglan pa nga hambalan ka: ‘Kilalaha si Jehova’?

²¹ Ang isa pa ka importante nga bahin sang bag-o nga katipan amo: “Ibutang ko ang akon kasuguan sa sulod nila, kag isulat ko ini sa ila tagipusuon. Kag mangin Dios nila ako, . . . Indi na nila pagtudluan ang ila isigkatawo ukon ang ila utod, nga nagasiling, ‘Kilalaha ninyo si Jehova!’ kay sila tanan makakilala sa akon.” (Jer. 31:33, 34) Ginapakita sang mga hinaplas karon sa duta nga yara sa ila ang kasuguan sang Dios. Ginahigugma nila ini nga kamatuoran, sa baylo nga magsalig sa mga panudlo sang bisan sin-o nga tawo. Malipayon man nga ginapaambit nila ang ihibalo sang Biblia sa dakung kadam-an. Bangod sini nakilala kag ginahigugma sang mga may dutan-on nga paglaum si Jehova. Ginasunod nila ang iya panuytoy kag nagasalig sa iya mga saad. Mahimo nga amo ka man sini. Nakilala mo sia subong isa ka Persona kag may personal nga kaangtanan sa iya. Daku gid ini nga pagpakamaayo!

²² Paano mo mapabakod ang imo kaangtanan kay Jehova? Pat-od nga madumduman mo ang mga higayon nga ginsabat ang imo mga pangamuyo. Nakabulig ini para magtudok pa gid ang imo apresasyon sa iya. Mabatyagan mo ang iya pagsakdag kon madumduman mo ang teksto nga nakabulig sa imo para malandas ang isa ka kabudlayan. Pabalori ina nga mga eksperiensia. Samtang padayon mo nga ginatun-an ang Biblia, nagadugang man ang imo ihibalo sa iya—kag nagapadayon man ang mga pagpakamaayo.

23. Paano ang ihibalo kay Jehova magahilway sa imo sa indi nagakaigo nga pagtublag sang konsiensia?

²³ Pero mabatyagan naton karon ang isa pa ka pagpakamaayo sang bag-o nga katipan. Wala na kita ginatublag sang aton konsiensia bangod nahibaluan naton nga nagapatawad si Jehova pasad sa sina nga katipan. Halimbawa, ang pila nga nagpahulog antes makahibalo sang mga talaksan sang Dios mahimo nga makonsiensia kag mangasubo bangod sang hungod nga pagpatay sang wala pa nabun-ag nga lapsag. Amo man sini ang ginbatyag sang iban nga nakapatay sa tion sang inaway. Ang halad gawad ni Jesus, ang panguna nga bahin sang bag-o nga katipan, amo ang sadsaran sang pagpatawad sa matuod nga mga mahinulsulon. Bangod sini, kumbinsido bala kita nga kon ginpatawad na ni Jehova ang aton mga sala, wala na niya ini ginadumdom? Gani dapat man naton kalimtan ang mga sala nga ginpatawad na ni Jehova.

24. Ngaa napalig-on ka sang Jeremias 31:20?

²⁴ Maathag ang pagkamapinatawaron sang Dios sa Jeremias 31:20. (Basaha.) Dinekada antes sang panahon ni Jeremias, ginsilutan ni Jehova ang napulo ka tribo sang aminhan nga ginharian sang Israel (ginarepresentaran sang Efraim, ang prominente nga tribo) bangod sang idolatriya. Gintapok sila. Pero palangga sang Dios ina nga katawhan. Ginhigugma niya sila subong “isa ka anak nga hamili.” Kon madumduman niya sila, ‘nagahibi ang iya tagipusuon’ nga nagapakita sang iya pagpalangga sa ila. Maangot naton ini nga kasaysayan sa bag-o nga katipan, nga nagapakita nga mapinatawaron si Jehova sa mga mahinulsulon.

25. Ngaa nagapasalamat ka kay Jehova sa bag-o nga katipan?

²⁵ Ang saad ni Jehova nga pagpatawad pasad sa bag-o nga katipan ipatuman sing bug-os sa Isa ka Libo ka Tuig nga Paggahom ni Cristo. Si Jesucristo, kag ang 144,000 ka kaupod nga saserdote, magapasag-uli sa matutom nga mga tawo sa kahimpitan. Pagkatapos sang katapusan nga pagtilaw, ang katawhan mangin bug-os na nga katapo sang pamilya ni Jehova sa uniberso. (Basaha ang Roma 8:19-22.) Sa sulod sang mga siglo, nagaantos ang tanan bangod sa sala. Pero sa sina nga tion maagom sang mga tawo “ang mahimayaon nga kahilwayan sang mga anak sang Dios,” kag hilway sa sala kag kamatayon. Gani paagi sa mahigugmaon nga kahimusan sang bag-o nga katipan, saligi nga mabaton mo ang madamo nga pagpakamaayo. Makabenepisyo ka karon kag sa palaabuton gikan sa “kaliwat” ni David kag matigayon ang “pagkamatarong sa sini nga duta.”—Jer. 33:15.