Gindala si Pablo sa Roma

Ang ikatlo nga paglakbay ni Pablo sa pagbantala natapos sa Jerusalem. Gindakop sia didto kag ginpriso. Isa ka gab-i, si Jesus nagsiling sa iya paagi sa palanan-awon: ‘Makadto ka sa Roma kag magbantala didto.’ Halin sa Jerusalem, gindala si Pablo sa Cesarea, kag didto sia ginpriso sing duha ka tuig. Sang ginbista sia sa atubangan ni Gobernador Festo, si Pablo nagsiling: ‘Dapat ang Cesar ang maghukom sa akon, sa Roma.’ Si Festo nagsiling: “Sa Cesar ka nag-apelar; sa Cesar ka makadto.” Ginpasakay si Pablo sa barko pakadto sa Roma, kag gin-updan sia sang duha ka Cristiano nga utod nga si Lucas kag si Aristarco.

Sang ara na sila sa dagat, naabtan sila sang mabaskog nga bagyo nga naglawig sing inadlaw. Abi na gid sang tanan mapatay na sila. Pero si Pablo nagsiling: ‘May anghel nga naghambal sa akon sa damgo: “Indi ka magkahadlok Pablo. Makalab-ot ka sa Roma, kag indi maano ang tanan nga kaupod mo sa barko.” Magpakaisog kamo! Indi kita mapatay.’

Nagpadayon ang bagyo sing 14 ka adlaw. Sang ulihi, may nakita sila nga isla. Isla ini sang Malta. Nagbara ang barko kag nawasak, pero ang tanan nga 276 ka tawo sa barko nakalab-ot sa takas kag naluwas sa katalagman. Ang iban naglangoy kag ang iban nag-uyat sa mga bahin sang nawasak nga barko asta makalab-ot sa baybayon. Gin-atipan sila sang mga taga-Malta kag naghimo sing dabok para makapainit-init sila.

Pagligad sang tatlo ka bulan, gindala sang mga soldado si Pablo sa Roma sakay sa lain nga barko. Pag-abot niya didto, may mga kauturan nga nagkadto didto para makita sia. Sang nakita sila ni Pablo, nagpasalamat sia kay Jehova kag nagpakaisog. Bisan pa priso si Pablo, gintugutan sia nga mag-istar sa gin-arkilahan nga balay samtang ginaguardiahan sang soldado. Duha ka tuig sia nga nagtener didto. Nagakadto didto ang mga tawo para makita sia, kag ginabantalaan niya sila parte sa Ginharian sang Dios kag ginatudluan sila parte kay Jesus. Naghimo man si Pablo sang mga sulat para sa mga kongregasyon sa Asia Minor kag Judea. Matuod gid nga gingamit ni Jehova si Pablo para mapalapnag ang maayong balita sa mga pungsod.