Ang Bugna kay Juan

Sang napriso si Juan sa isla sang Patmos, ginpakita sa iya ni Jesus ang sunodsunod nga 16 ka palanan-awon, ukon laragway, sang palaabuton. Ini nga mga palanan-awon nagapakita kon paano pakabalaanon ang ngalan ni Jehova, magakari ang iya Ginharian, kag ang iya kabubut-on matuman sa duta pareho sang sa langit.

Sa isa ka palanan-awon, nakita ni Juan si Jehova sa iya mahimayaon nga trono sa langit, nga napalibutan sang 24 ka gulang nga nagasuksok sing puti nga bayo kag may bulawan nga korona sa ila mga ulo. May mga kilat kag mga daguob nga nagahalin sa trono. Ang 24 ka gulang nagayaub kay Jehova kag nagasimba sa iya. Sa isa pa ka palanan-awon, nakita ni Juan ang daku nga kadam-an halin sa tanan nga pungsod, katawhan, kag mga lenguahe nga nagasimba kay Jehova. Ang Kordero, nga amo si Jesus, ang nagabantay sa ila kag nagadala sa ila sa tubig sang kabuhi. Sang ulihi, sa isa pa ka palanan-awon, si Jesus nagsugod sa paggahom bilang Hari sa langit, upod sa 24 ka gulang. Sa masunod nga palanan-awon, nakita ni Juan si Jesus nga nagapakig-away sa dragon, nga amo si Satanas, kag sa iya mga demonyo. Gintabog sila ni Jesus sa langit, kag ginhulog diri sa duta.

Dayon nakita ni Juan ang matahom nga paglaragway sa Kordero kag sa 144,000 nga nagatindog sa Bukid Sion. Nakita man niya ang anghel nga nagalupad sa palibot sang duta, nga nagasiling sa mga tawo nga kahadlukan ang Dios kag himayaon Sia.

Sa masunod nga palanan-awon, nagsugod ang inaway sa Armageddon. Sa sina nga inaway, nadaug ni Jesus kag sang iya mga soldado ang malaut nga sistema ni Satanas. Sa katapusan nga palanan-awon, nakita ni Juan ang matuod nga paghidait sa langit kag sa duta. Ginlaglag na sing bug-os si Satanas kag ang iya kaliwat. Ang tanan sa langit kag sa duta nagapakabalaan sa ngalan ni Jehova kag sia lamang ang ila ginasimba.