Disiembre

May gahom bala si Jehova nga banhawon ang mga patay? Huo. Kay man, sia “ang Labing Gamhanan.” (Bug. 1:8) Gani may gahom sia nga mapierde ang bisan ano nga kaaway lakip ang kamatayon. (1 Cor. 15:26) Ari ang isa pa ka rason kon ngaa makasalig kita nga masarangan sang Dios nga banhawon ang mga patay: Wala sing limitasyon ang iya memorya. Halimbawa, ginatawag niya ang kada bituon sa ila ngalan. (Isa. 40:26) Ginadumdom man niya ang mga napatay. (Job 14:13; Luc. 20:38) Madumduman niya ang tanan nga detalye parte sa iya mga banhawon, lakip ang ila hitsura kag personalidad, ang ila mga eksperiensia sa kabuhi, kag ang ila memorya. Makasigurado gid kita nga matuman ni Jehova ang iya promisa nga banhawon ang mga patay. Nabal-an naton nga gusto gid niya nga himuon ini kag may gahom sia nga tumanon ini. Ari ang isa pa ka rason kon ngaa masaligan naton ang promisa sang Dios nga pagkabanhaw: May mga tawo na nga ginbanhaw si Jehova sang una. Sang panahon sang Biblia, ginhatagan niya sang gahom ang pila ka matutom nga tawo, lakip si Jesus, nga magbanhaw sang mga patay. w23.04 9 ¶7-9

Kon mataktikanhon kita kag malulo sa aton paghambal, mas daku man ang tsansa nga pamatian kita sang mga tawo kag makapadayon kita sa pag-istorya sa ila. Siempre, kon gusto lang sang isa ka tawo nga debatihon kita ukon pakalainon ang aton mga ginapatihan, dapat naton untaton ang pag-istorya sa iya. (Hulu. 26:4) Pero indi man amo sini ang kalabanan nga tawo. Ang matuod, madamo ang gusto magpamati sa aton. Madamo gid sang benepisyo kon panikasugan naton nga mangin malulo. Mangamuyo kay Jehova nga hatagan ka sang kusog para makapabilin ka nga malulo kon ginakuestyon sang iban ang imo mga ginapatihan ukon ginapakalain ka nila. Tandai nga makabulig ang kalulo para malikawan ang pagbaisay sang duha ka tawo bisan pa indi pareho ang ila mga ginapatihan. Kag kon panikasugan mo nga mangin malulo kag matinahuron sa imo pagsabat, posible nga mapalig-on mo ang iban nga bag-uhon ang ila opinyon parte sa aton kag sa mga kamatuoran sa Biblia. Gani mangin ‘handa pirme nga pangapinan’ ang imo mga ginapatihan, kag ‘himua ini nga may kalulo kag tudok nga pagtahod.’ (1 Ped. 3:15) Kon himuon mo ini, mapakita mo nga mabakod ka. w23.09 19 ¶18-19

Ari ang apat nga puede naton himuon para mapakita ang pagkamapinasensiahon. Una, ang mapinasensiahon nga tawo indi dali maakig. Kon na-stress sia ukon may ginhimo ang iban nga posible magpaakig sa iya, kalmado lang sia kag wala sia nagabalos. (Ex. 34:6) Ikaduha, ang mapinasensiahon nga tawo makahulat sing kalmado. Kon may ginahulat sia kag madugay ini mag-abot, ginatinguhaan niya nga indi maugot ukon indi mairitar. (Mat. 18:​26, 27) Ikatlo, ang mapinasensiahon nga tawo wala nagapadasudaso. Wala niya ginapadalian ang iya mga ulubrahon bisan pa importante ini katama. Sa baylo, ginaplanuhan niya sing maayo ang iya dapat himuon. Dayon, nagapain sia sang bastante nga tion para mahimo niya sing maayo ang iya ulubrahon. Ikap-at, ginatinguhaan sang mapinasensiahon nga tawo nga mabatas ang iya mga problema kag wala sia nagareklamo. Ginabatas niya ang iya mga problema kag ginatinguhaan niya nga padayon nga mag-alagad sing malipayon kay Jehova. (Col. 1:11) Bilang katawhan ni Jehova, dapat naton himuon ining apat ka butang para mangin mapinasensiahon kita. w23.08 20-21 ¶3-6

Ginausisa ni Jehova ang aton tagipusuon. Amo ini ang isa ka importante nga rason kon ngaa dapat naton amligan ang aton malaragwayon nga tagipusuon. Makita ni Jehova ang indi makita sang iban parte sa aton kag kabalo sia kon ano gid kita nga klase sang tawo. Ang iya mga laygay makabulig sa aton nga magkabuhi sing wala sing katapusan. Kag kon pirme naton ini hunahunaon, palanggaon niya kita. (Juan 4:14) Makabulig man ini sa aton nga indi magpaimpluwensia sa kabutigan ni Satanas kag sang mga tawo, kag indi pag-ilugon ang indi maayo nga mga paggawi sang malain nga mga tawo. (1 Juan 5:​18, 19) Kon mangin suod pa gid kita kay Jehova, mas palanggaon kag tahuron pa gid naton sia. Bangod indi naton gusto nga masakitan ang aton Amay, ginakaugtan na naton bisan ang pagpamensar pa lang sang paghimo sang sala. Amo ini ang ginsiling ni Marta nga isa ka sister sa Croatia sang ginsulay sia nga maghimo sang imoral: “Daw indi ako makapamensar sing maayo kag nabudlayan ako nga punggan ang akon kaugalingon para indi ako makahimo sang sala. Pero naamligan ako sang akon kahadlok kay Jehova.” Paano? Nagsiling si Marta nga ginpamalandungan niya ang indi maayo nga resulta kon maghimo sia sang imoral. Amo man sini ang dapat naton himuon. w23.06 20-21 ¶3-4

Kabalo si Jesus nga katuyuan ni Jehova nga pakabalaanon ang Iya ngalan, ukon pamatud-an Niya nga indi matuod ang mga kabutigan nga ginsugid parte sa Iya. Gani gintudluan sang aton Agalon ang iya mga sumulunod nga ipangamuyo ini: “Amay namon nga yara sa langit, pakabalaanon ang imo ngalan.” (Mat. 6:9) Nahangpan ni Jesus nga amo ini ang pinakaimportante nga isyu nga nagadalahig sa tanan nga tinuga. Sa tanan nga tinuga sa bilog nga uniberso, si Jesus ang may pinakamadamo nga ginhimo para pakabalaanon ang ngalan ni Jehova. Pero sang gindakop si Jesus sang iya mga kaaway, gin-akusahan nila sia nga ginpasipalahan kuno niya ang ngalan sang iya Amay. Sigurado gid nga para kay Jesus, ang pagpasipala sa balaan nga ngalan sang iya Amay amo ang pinakadaku nga sala. Gani naglalain gid sia kay posible sentensiahan sia sa sala nga gin-akusar sa iya. Posible nga amo ini ang panguna nga rason kon ngaa nakabatyag si Jesus sang “daku nga kasakit” antes sia gindakop.​—Luc. 22:​41-44. w24.02 11 ¶11

Sa palumba para sa kabuhi, dapat mas palangga naton si Jehova kag si Jesus sangsa aton mga paryente. (Mat. 10:37) Pero indi buot silingon sini nga puede lang nga indi na naton paghimuon ang aton mga obligasyon sa aton pamilya. Kay man, para malipay sa aton ang Dios kag ang Cristo, dapat naton himuon ini nga mga obligasyon. (1 Tim. 5:​4, 8) Kon himuon naton ini, mangin mas malipayon kita. Kabalo si Jehova nga mangin malipayon ang mga pamilya kon nagapalanggaanay ang bana kag ang asawa, kon ginarespeto nila ang isa kag isa, kon ginapalangga kag ginahanas sang mga ginikanan ang ila kabataan, kag kon ginatuman sang kabataan ang ila mga ginikanan. (Efe. 5:33; 6:​1, 4) Kon isa ikaw ka bana, asawa, ukon bata, magsalig sa mga laygay sang Biblia. Indi maghimo sang mga desisyon nga nabase lang sa imo emosyon, sa kustombre sa inyo lugar, ukon sa ginasiling sang mga eksperto. Gamita ang aton mga publikasyon nga nabase sa Biblia. May mga panugda ini kon paano mo maaplikar ang mga prinsipio sa Biblia. w23.08 28 ¶6-7

Dapat magtuon ang mga sister sang mga ikasarang nga makabulig sa ila. Samtang bata pa ang isa ka babayi, madamo sia sing matun-an nga mga ikasarang. Ang pila sa sini makabulig gid sa iya sa bilog niya nga kabuhi. Ang halimbawa sini amo ang pagtuon kon paano magbasa kag magsulat sing maayo. May pila ka kultura nga nagasiling nga indi na kinahanglan nga tun-an pa sang mga babayi kon paano magbasa kag magsulat. Pero, importante ini nga mga ikasarang para sa tanan nga Cristiano. (1 Tim. 4:13) Gani bisan pa mabudlay, padayon gid nga magtuon kon paano magbasa kag magsulat sing maayo. Ano ang mga benepisyo kon maayo ka magbasa kag magsulat? Makabulig ini nga mga ikasarang para makakita ka sang obra. Makabulig man ini para matun-an mo sing maayo ang Biblia kag matudlo ini sa iban. Kag kon ginabasa mo ang Biblia kag ginapamalandungan ini, mabaton mo ang pinakamaayo nga benepisyo nga amo ang mangin suod pa gid kay Jehova.​—1 Tim. 4:15. w23.12 20 ¶10-11

Pangabaya si Jehova nga buligan ka nga madaug ang pagsulay. Bangod indi kita perpekto, dapat naton padayon nga pakigbatuan ang pagsulay nga maghimo sang malain. Ginahimo ni Satanas ang tanan para mabudlayan pa gid kita nga pakigbatuan ini. Ang isa ka paagi nga ginagamit niya para higkuan ang aton panghunahuna amo ang indi maayo nga mga kalingawan. Kon mahigkuan ang aton panghunahuna, mangin mahigko kita sa panulok ni Jehova kag posible makahimo kita sang serioso nga sala. (Mar. 7:​21-23; Sant. 1:​14, 15) Kinahanglan naton ang bulig ni Jehova para madaug naton ang pagsulay nga maghimo sang malain. Sang gintudluan ni Jesus ang iya mga disipulo kon paano mangamuyo, ginlakip niya ini nga pangabay: “Buligi kami agod indi kami madaug sang pagsulay, kag luwasa kami sa isa nga malauton.” (Mat. 6:13) Gusto ni Jehova nga buligan kita, pero dapat naton pangabayon ang iya bulig. Pagkatapos naton pangamuyo, dapat man naton likawan ang mga butang nga makasulay sa aton. w23.05 6-7 ¶15-17

Kon ginapabaloran sang mag-asawa ang ila kaangtanan sa ila Amay sa langit, iaplikar nila dayon ang iya mga laygay. Kon himuon nila ini, malikawan nila kag masarangan ang mga problema nga posible makadula sang ila gugma sa isa kag isa. Kon mabakod ang kaangtanan sang isa ka tawo kay Jehova, ginapanikasugan niya nga ilugon si Jehova. Ginatinguhaan man niya nga ipakita ang mga kinaiya ni Jehova, pareho sang kaayo, pagkamapinasensiahon, kag pagkamapinatawaron. (Efe. 4:32–5:1) Kon ipakita sang mag-asawa ini nga mga kinaiya, magabakod ang ila gugma sa isa kag isa. Ang isa ka sister nga si Lena, nga sobra 25 ka tuig na nga kasal, nagsiling: “Kon palangga sang isa ka tawo si Jehova, mahapos lang palanggaon kag respetuhon ini nga tawo.” Binagbinaga ini nga halimbawa sa Biblia. Sang nagpili si Jehova kon sin-o ang mangin ginikanan sang Mesias, madamo sia sang puede pilion sa kaliwatan ni David. Pero ginpili niya si Jose kag si Maria. Ngaa? Bangod mabakod ang ila kaangtanan kay Jehova, kag kabalo si Jehova nga unahon nila sia sa ila pag-asawahay. w23.05 21 ¶3-4

Perpekto ang aton Lider nga si Jesus, pero indi perpekto ang mga brother nga ginagamit niya nga magpanguna diri sa duta. Gani posible may mga tion nga nabudlayan kita nga tumanon sila, ilabi na kon daw indi naton gusto himuon ang ginapahimo nila sa aton. Naeksperiensiahan ini ni apostol Pedro. Isa ka bes, nag-alang-alang sia nga tumanon ang ginsugo sa iya sang isa ka anghel. Ginsugo sia nga kaunon ang mga sapat nga indi matinlo suno sa Mosaikong Kasuguan. Pero indi lang makaisa kundi tatlo ka beses sia nga nagsiling nga indi niya ini mahimo. (Binu. 10:​9-16) Ngaa? Para kay Pedro, daw indi mapatihan ang ginasugo sa iya. Sa bahin naman ni apostol Pablo, gintuman niya ang Cristiano nga mga gulang nga lalaki sa Jerusalem. Para mapakita niya nga ginatuman niya ang Kasuguan, ginsilingan nila sia nga updon niya sa templo ang apat ka lalaki kag tinluan niya ang iya kaugalingon paagi sa seremonya. Kabalo si Pablo nga wala na ginapatuman sa mga Cristiano ang Kasuguan. Kag wala man sia sing ginhimo nga malain. Pero, “pagkadason nga adlaw gin-upod ni Pablo ang mga lalaki kag gintinluan nila ang ila kaugalingon paagi sa seremonya.” (Binu. 21:​23, 24, 26) Bangod nagtuman si Pablo, wala naguba ang paghiusa sang mga kauturan.​—Roma 14:​19, 21. w23.10 10 ¶15-16

Posible nga indi mo gid mahunahuna nga importante ang kahadlok para indi maguba ang inyo pag-abyanay sang imo suod nga abyan. Pero, ang mga gusto mangin suod nga abyan ni Jehova dapat nga “nagakahadlok sa iya.” Bag-uhan man kita ukon madugay na nga nagaalagad kay Jehova, dapat pirme kita magkahadlok sa iya. Pero ano ang buot silingon sang pagkahadlok sa Dios? Kon palangga naton ang Dios kag ginatinguhaan naton nga indi makahimo sang bisan ano nga posible makaguba sang aton kaangtanan sa iya, ginapakita sini nga may maayo kita nga sahi sang kahadlok sa iya. Amo sini nga sahi sang “kahadlok sa Dios” ang ginpakita ni Jesus. (Heb. 5:7) Wala gid sia nagbatyag sang indi maayo nga sahi sang kahadlok kay Jehova. (Isa. 11:​2, 3) Sa baylo, palangga gid niya si Jehova kag gusto niya nga tumanon sia. (Juan 14:​21, 31) Pareho kay Jesus, tudok gid ang aton pagtahod kay Jehova bangod mahigugmaon Sia, maalam, matarong, kag gamhanan. Kabalo man kita nga palangga niya kita kag importante sa iya ang aton pagtuman sa iya mga ginatudlo. Masubuan gid si Jehova kon indi naton sia pagtumanon, pero malipay gid sia kon tumanon naton sia.​—Sal. 78:41; Hulu. 27:11. w23.06 14 ¶1-2; 15 ¶5

Sang nagbakod ang paggahom ni Hari Uzias, nalipatan niya nga si Jehova ang nagpabakod sa iya kag nagbulig sa iya nga mag-uswag. Ano ang matun-an naton sa sini? Dapat naton pirme dumdumon nga naghalin kay Jehova ang mga pagpakamaayo kag mga pribilehiyo nga nabaton naton. Indi naton dapat pag-ipadayaw ang aton mga hinimuan. Sa baylo, dapat naton pasalamatan si Jehova kag ihatag naton sa iya ang tanan nga kadungganan. (1 Cor. 4:7) Dapat kita mangin mapainubuson, kag dumdumon naton nga kinahanglan naton ang disiplina bangod indi kita perpekto. Ang isa ka brother nga mga 60 anyos nagsulat: “Natun-an ko nga indi dapat maglain ang akon buot kon ginasaway ako sang iban. Sang gindisiplina ako bangod sa nahimo ko nga sala, ginpanikasugan ko nga maghimo sang mga pagbag-o kag padayon ko nga ginhimo ang akon bug-os nga masarangan sa pag-alagad kay Jehova.” Kon may ara kita kahadlok kay Jehova kag padayon kita nga mangin mapainubuson, mangin malipayon gid kita.​—Hulu. 22:4. w23.09 10 ¶10-11

Madamo sang ginbatas ang mga Cristiano sang una. Magluwas sa mga problema nga kinaandan nga ginabatas sang mga tawo, may iban pa gid sila nga mga problema. Madamo sa ila ang ginhingabot sang mga lider sang relihion sang mga Judiyo, sang mga opisyal sang Roma, kag pati sang ila mga pamilya. (Mat. 10:21) Kag dapat nila siguraduhon nga indi sila maimpluwensiahan sang mga ginatudlo sang mga apostata nga nagaguba sang paghiusa sang kongregasyon. (Binu. 20:​29, 30) Matutom ini nga ginbatas sang mga Cristiano sang una. (Bug. 2:3) Ano ang nakabulig sa ila? Ginpamalandungan nila ang mga halimbawa sa Kasulatan parte sa pagbatas, pareho sa halimbawa ni Job. (Sant. 5:​10, 11) Nangamuyo sila nga pabakuron sila. (Binu. 4:​29-31) Kag nagpokus sila sa maayo nga mga resulta kon magbatas sila. (Binu. 5:41) Kon regular naton nga tun-an kag pamalandungan ang mga halimbawa sang mga nagbatas nga mabasa sa Pulong sang Dios kag sa aton mga publikasyon, makabatas man kita. w23.07 3 ¶5-6

Indi gid kita pagbiyaan ni Jehova kag ni Jesus. Pagkatapos ginpanghiwala ni apostol Pedro si Jesus, kinahanglan ni Pedro maghimo sang importante nga desisyon. Magauntat bala sia sa pagsunod kay Jesus, ukon padayon sia nga magaalagad bilang iya disipulo? Nangamuyo si Jesus kay Jehova nga kabay pa nga indi magluya ang pagtuo ni Pedro. Ginsugid ni Jesus kay Pedro ang parte sa sini nga pangamuyo, kag ginsilingan niya si Pedro nga sigurado sia nga masarangan ni Pedro nga pabakuron ang iya mga kauturan sa ulihi. (Luc. 22:​31, 32) Sigurado gid nga sa kada tion nga madumduman ni Pedro ang mga ginsiling ni Jesus, nagapalig-on ini sa iya. Kon kinahanglan naton maghimo sang importante nga desisyon, posible gamiton ni Jehova ang aton mahigugmaon nga mga manugbantay para buligan kita nga magpabilin nga matutom. (Efe. 4:​8, 11) Ginhatagan ni Jehova si Pedro kag ang iban pa nga mga apostoles sang ila materyal nga mga kinahanglanon, gani hatagan man Niya kita sini kon unahon naton sa aton kabuhi ang pagbantala. w23.09 24-25 ¶14-15

Makita ni Jehova ang tanan nga kaayo nga ginapakita naton sa iban bisan pa nga gamay lang ang aton ginhimo. Para kay Jehova, daw pareho lang nga naghalad kita sa iya kag may utang sia sa aton. Ginapabaloran gid niya ini nga halad kag bayaran gid niya kita. Kon isa ikaw ka ministeryal nga alagad ukon gulang sadto, ginadumdom ni Jehova ang imo mga ginhimo sang una kag ang imo gugma nga nagpalig-on sa imo nga himuon ini. (1 Cor. 15:58) Nakita man niya ang gugma nga padayon mo nga ginapakita sa iban. Gusto ni Jehova nga mas higugmaon pa gid naton sia kag ang iban. Mapabakod naton ang aton gugma kay Jehova paagi sa pagbasa kag pagpamalandong sa iya Pulong kag paagi sa regular nga pagpangamuyo sa iya. Mas higugmaon pa gid naton ang aton mga kauturan paagi sa pagbulig sa ila. Samtang nagabakod ang aton gugma, mangin suod pa gid kita kay Jehova kag sa aton mga kauturan. Kag mangin abyan naton sila asta sa wala sing katapusan. w23.07 10 ¶11; 11 ¶13; 13 ¶18

Ang kada isa amo ang dapat magdesisyon parte sa kon paano niya atipanon ang iya kaugalingon. Kon mapabulong ang isa ka Cristiano, dapat niya sundon ang mga kasuguan sang Biblia nga dapat maglikaw sa dugo kag sa espiritismo. (Binu. 15:20; Gal. 5:​19, 20) Pero kon wala sing may nalapas nga kasuguan ang isa ka paagi sang pagbulong, ang kada isa amo ang magadesisyon para sa iya kaugalingon. Posible nga may paagi sang pagbulong nga mas gusto naton kay nagapati kita nga amo ini ang pinakaepektibo, pero dapat naton respetuhon ang desisyon sang aton mga kauturan parte sa ila gusto nga paagi sang pagbulong. Gani, dapat naton tandaan ining apat ka punto: (1) Ang Ginharian sang Dios lang ang makadula sang tanan nga balatian. (Isa. 33:24) (2) Dapat “kumbinsido” ang isa ka Cristiano kon ano ang pinakamaayo para sa iya. (Roma 14:5) (3) Wala naton ginahukman ang iban ano man ang ila desisyon kag ginalikawan naton nga masandad sila sa aton. (Roma 14:13) (4) Nagapakita sang gugma ang mga Cristiano kag nahangpan nila nga mas importante ang paghiusa sang kongregasyon sangsa ila mga opinyon.​—Roma 14:​15, 19, 20. w23.07 24 ¶15

Palangga mo bala si Jehova? Sigurado gid nga palangga mo sia. Kay man, madamo ang nagapalangga sa iya halin pa sang una. (Sal. 104:​33, 34) Naghimo pa gani sang mga sakripisyo ang madamo sa ila para maalagad nila si Jehova. Ang halimbawa sa sini amo ang mga Nazareo sa Israel sang una, ukon ang mga gindedikar. Ang mga Nazareo amo ang mga Israelinhon nga naghimo sang pila ka sakripisyo para maalagad nila si Jehova sa pinasahi nga paagi. Suno sa Mosaikong Kasuguan, puede makahimo sing pinasahi nga panaad ang isa ka lalaki ukon isa ka babayi nga magkabuhi bilang Nazareo sa sulod sang ginpat-od nga tion. (Num. 6:​1, 2) Nalakip sa sini nga panaad, ukon sagrado nga promisa, ang pagtuman sa pila ka pagsulundan nga indi kinahanglan tumanon sang iban nga mga Israelinhon. Ti, ngaa nagdesisyon ang iban nga mga Israelinhon nga mangin Nazareo? Posible gid nga napalig-on sila nga himuon ini bangod palangga gid nila si Jehova kag nagapasalamat gid sila sa madamo niya nga pagpakamaayo.​—Deut. 6:5; 16:17. w24.02 14 ¶1-2

Sa Biblia, ginagamit sa masami ang Hebreo nga tinaga nga gin-translate nga “mainunungon,” ukon “mainunungon nga gugma,” para ilaragway ang gugma sang Dios para sa iya mga alagad. Amo man ini nga tinaga ang gingamit para ilaragway ang gugma nga ginapakita sang mga alagad sang Dios sa isa kag isa. (2 Sam. 9:​6, 7) Gusto ni Jehova nga mangin mainunungon man kita sa iya. Kag samtang nagaligad ang tion, masarangan naton nga mangin mas mainunungon pa gid sa iya. Binagbinaga kon paano ini naeksperiensiahan ni Daniel. Madamo nga beses nga natilawan ang pagkamainunungon ni Daniel kay Jehova. Sang sobra na sia 90 anyos, naeksperiensiahan niya ang isa sa pinakamabudlay nga pagtilaw sa iya pagkamainunungon. Akig kay Daniel ang mga opisyal nga nagaalagad sa hari kag wala nila ginarespeto ang Dios ni Daniel. Gani may ginplano sila para ipapatay si Daniel. Ginkumbinsi nila ang hari nga magpagua sang sugo nga magatilaw sang pagkamainunungon ni Daniel. Kay sin-o gid bala sia mainunungon? Sa iya Dios ukon sa hari? Para mapakita ni Daniel nga mainunungon sia sa hari kag para indi sia pagsilutan, indi sia dapat magpangamuyo kay Jehova sa sulod sang 30 ka adlaw. Pero wala nagkompromiso si Daniel.​—Dan. 6:​12-15, 20-22. w23.08 5 ¶10-12

Gusto ni Jehova nga padayon naton nga pakitaan sing gugma ang aton mga kauturan. Kon naglain ang aton buot sa isa ka utod bangod sa iya ginhimo, dapat naton hunahunaon nga indi niya ini hungod. Wala lang niya napakita ang pila ka maayo nga mga kinaiya, pero ginapanikasugan man niya nga sundon ang mga prinsipio sa Biblia. (Hulu. 12:18) Palangga sang Dios ang iya matutom nga mga alagad bisan pa may mga kaluyahon sila. Bisan pa makahimo kita sang mga sala, ginakabig niya kita gihapon nga iya mga abyan kag wala sia nagahinakit sa aton. (Sal. 103:9) Importante gid nga ilugon naton ang aton mapinatawaron nga Amay. (Efe. 4:32–5:1) Tandaan man naton nga samtang nagahilapit ang katapusan, dapat magpabilin kita nga suod sa aton mga kauturan. Mapaabot naton nga mas magabudlay pa gid ang mga paghingabot nga maeksperiensiahan naton. Posible pa gani nga prisuhon kita bangod sang aton mga ginapatihan. Kon matabo ina, mas kinahanglan pa gid naton ang aton mga kauturan.​—Hulu. 17:17. w24.03 15-16 ¶6-7

Mabasa sa Biblia ang kasaysayan sang mga pamatan-on nga nagpanikasog gid nga mangin suod kay Jehova. Nalipay si Jehova sa ila, kag nangin malipayon sila. Ang isa sa ila amo si David. Sang bata pa sia, nagdesisyon sia nga simbahon ang Dios. Sang ulihi, nangin isa sia ka matutom nga hari. (1 Hari 3:6; 9:​4, 5; 14:8) Kon tun-an mo ang kabuhi ni David, mapalig-on ka sang iya halimbawa nga mag-alagad sing matutom kay Jehova. Puede mo man tun-an ang halimbawa ni Marcos ukon ni Timoteo. Pamatan-on pa lang sila sang nag-alagad sila kay Jehova, kag padayon nila ini nga ginhimo sing matutom. Nalipay gid si Jehova sa ila desisyon. Ano ayhan ang mangin kabuhi mo sa ulihi? Nagadepende ini sa kon ano ang ginahimo mo sa imo kabuhi subong. Kon magsalig ka kay Jehova imbes nga sa imo kaugalingon nga paghangop, buligan ka niya nga makahimo sang maayo nga mga desisyon. Kag mangin malipayon ka gid sa imo kabuhi. Tandai nga ginapabaloran ni Jehova ang imo mga ginahimo para sa iya. Gani alagara ang aton mahigugmaon nga Amay sa langit kay amo ini ang pinakamaayo nga mahimo mo sa imo kabuhi. w23.09 13 ¶18-19

Kabalo si apostol Pablo nga indi perpekto ang iya mga kauturan. Halimbawa, sang nagaumpisa pa lang sia nga magpakig-upod sa mga kauturan sa kongregasyon, indi sila magpati nga isa sia ka disipulo. (Binu. 9:26) Sang ulihi, ginguba sang iban ang iya reputasyon paagi sa pagsugid sing indi maayo parte sa iya. (2 Cor. 10:10) Nasaksihan ni Pablo ang indi maayo nga ginhimo sang isa ka gulang nga posible nagpasandad sa iban. (Gal. 2:​11, 12) Kag naglain gid ang buot ni Pablo kay Marcos nga isa sa mga suod niya nga kaupod. (Binu. 15:​37, 38) Puede kuntani himuon ni Pablo nga rason ang bisan diin man sa sini para likawan ang mga nagpasandad sa iya. Pero, padayon niya nga ginpabaloran ang iya mga kauturan kag padayon sia nga nag-alagad sing matutom kay Jehova. Ano ang nakabulig kay Pablo nga magpadayon? Palangga ni Pablo ang iya mga kauturan. Bangod palangga niya sila, wala sia nagpokus sa ila mga kaluyahon. Sa baylo, nagpokus sia sa ila maayo nga mga kinaiya. Bangod man sa gugma ni Pablo, nahimo niya ang ginsambit sa teksto subong nga adlaw. w24.03 15 ¶4-5

Madamo nga kasaysayan sa Biblia ang nagapakita nga importante ang kalulo. Binagbinaga ang halimbawa ni Isaac. Sang nag-istar sia sa Gerar nga sakop sang mga Filistinhon, nahisa sa iya ang iya mga kaingod kag gintampukan nila ang mga bubon nga ginkutkot sang mga alagad sang iya amay. Wala sila ginbais ni Isaac. Sa baylo, nagsaylo si Isaac sa malayo nga lugar upod sa iya panimalay kag nagkutkot sia didto sang mga bubon. (Gen. 26:​12-18) Pero gin-angkon man sang mga Filistinhon ang tubig sa sini nga lugar. Bisan pa sang ila ginhimo, kalmado lang si Isaac. (Gen. 26:​19-25) Ano ang nakabulig sa iya nga mangin kalmado bisan pa indi maayo ang ginahimo sa iya sang iban? Sigurado gid nga nakatuon sia sa halimbawa sang iya mga ginikanan. Nakita niya nga ginpabaloran ni Abraham ang paghidait, kag nakita man niya “ang malinong kag malulo nga espiritu” ni Sara.​—1 Ped. 3:​4-6; Gen. 21:​22-34. w23.09 15 ¶4

Ginpadala ni Jehova sa duta ang iya panganay nga Anak para tudluan ang mga tawo parte sa Ginharian kag para ihatag ang iya kabuhi para luwason kita sa sala kag kamatayon. Dayon ginbanhaw ni Jehova si Jesus para mangin Hari sang Ginharian sang Dios sa langit. Amo ini ang panguna nga tema sang Biblia: Mabindikar ang ngalan ni Jehova samtang ginatuman niya ang iya katuyuan para sa duta, kag gamiton niya ang iya Ginharian nga ginagamhan sang Cristo para matuman ini. Indi pagbag-uhon ni Jehova ang iya katuyuan. Ang matuod, nagpromisa sia nga matuman gid ini. (Isa. 46:10 footnote; Heb. 6:​17, 18) Sa ulihi, mangin paraiso ang duta kag ‘magakabuhi diri sing wala sing katubtuban’ ang perpekto kag matarong nga mga kaliwat nanday Adan kag Eva. (Sal. 22:26) Pero indi lang amo sini ang himuon ni Jehova. Ano gid bala ang katuyuan ni Jehova? Pahanabuon niya nga mahiusa ang tanan niya nga alagad sa langit kag sa duta. Paagi sa sini, magapasakop ang tanan sa iya paggahom kag mangin mainunungon sila sa iya. (Efe. 1:​8-11) Indi bala nga dalayawon gid ang paagi ni Jehova sa pagtuman niya sang iya katuyuan? w23.10 20 ¶7-8

Wala madugay pag-abot sa Jerusalem sang mga Judiyo nga naghalin sa Babilonia, naapektuhan sila sang problema sa ekonomiya, sang kinagamo sa pulitika, kag sang pagpamatok. Bangod sini, nabudlayan ang iban nga magpokus sa pagkay-o sang templo ni Jehova. Gani, ginsugo ni Jehova ang iya duha ka manalagna nga sanday Hageo kag Zacarias nga palig-unon ang katawhan nga mangin mapisan sa ila pagsimba kay Jehova. Napalig-on gid sila sa sini nga mga manalagna. (Hag. 1:1; Zac. 1:1) Pero pagligad sang halos 50 ka tuig, nagluya liwat ang mga Judiyo. Gani halin sa Babilonia, nagkadto sa Jerusalem si Esdras, nga isa ka eksperto nga manugkopya sang Kasuguan, para palig-unon ang katawhan sang Dios nga unahon sa ila kabuhi ang pagsimba kay Jehova. (Esd. 7:​1, 6) Nakabulig gid sa katawhan sang Dios sang una ang mga tagna nanday Hageo kag Zacarias nga padayon nga magsalig kay Jehova bisan pa may mga nagapamatok sa ila. Makabulig man ini sa aton subong nga magsalig nga buligan gid kita ni Jehova sa mabudlay nga mga sitwasyon.​—Hulu. 22:19. w23.11 14 ¶2-3

Paano naton mapakita ang aton gugma sa aton mga kauturan? Ang isa ka paagi amo ang paglugpay sa ila. Kag ‘padayon naton nga malugpayan ang isa kag isa’ kon may kaluoy kita sa isa kag isa. (1 Tes. 4:18) Paano naton padayon nga mapabakod ang aton gugma sa isa kag isa? Paagi sa pagpatawad sa mga sala sang aton mga kauturan bisan pa mabudlay ini himuon kon kaisa. Ngaa importante gid nga ipakita naton subong ang aton gugma sa isa kag isa? Talupangda ang rason nga ginsiling ni Pedro: “Ang katapusan sang tanan nga butang malapit na. Gani, . . . maghigugmaanay kamo sing tudok.” (1 Ped. 4:​7, 8) Ano ang mapaabot naton nga matabo samtang nagahilapit ang katapusan sining malain nga kalibutan? Amo ini ang gintagna ni Jesus nga matabo sa iya mga disipulo: “Dumtan kamo sang tanan nga pungsod bangod sa akon ngalan.” (Mat. 24:9) Para mabatas naton ini nga dumot, dapat nahiusa kita pirme. Kon ginahigugma naton ang aton mga kauturan, indi gid kita mabahinbahin ni Satanas.​—Fil. 2:​1, 2. w23.11 13 ¶18-19

Gamhanan gid ang mga kamatuoran sa Pulong sang Dios. Tumalagsahon ang mga resulta sang aton pagtudlo sa mga tawo sang kamatuoran parte kay Jehova. Nangin maathag sa ila nga kabutigan gali ang mga ginasugid ni Satanas, kag amat-amat nila nga nakita ang dalayawon nga mga kinaiya sang aton Amay. Gindayaw nila sia bangod indi matupungan ang iya gahom. (Isa. 40:26) Natun-an nila nga magsalig sa iya bangod perpekto niya nga ginapakita ang katarungan. (Deut. 32:4) Nakabulig sa ila ang iya indi matungkad nga kaalam. (Isa. 55:9; Roma 11:33) Kag naumpawan sila sang natun-an nila nga ang Dios gugma. (1 Juan 4:8) Samtang nagasuod sila kay Jehova, mas nagabakod ang ila pagsalig nga may paglaum sila nga mabuhi sing wala sing katapusan bilang iya mga anak. Isa gid ka daku nga kadungganan para sa aton nga buligan ang mga tawo nga mangin suod sa aton Amay. Kon ginahimo naton ini, ginakabig kita ni Jehova bilang iya “mga masigkamanugpangabudlay.”​—1 Cor. 3:5. w24.02 12 ¶15

Naga-Bible study ka bala, ukon Saksi bala ang imo mga ginikanan? Gusto mo bala magpabawtismo? Kanami gid sang gusto mo himuon. Pero antes ka magpabawtismo, dapat mo anay idedikar ang imo kaugalingon kay Jehova. Paano mo idedikar ang imo kaugalingon kay Jehova? Mangamuyo ka sa iya para magpromisa sa iya nga sia lang ang imo simbahon kag unahon mo ang iya kabubut-on. Magapromisa ka kay Jehova nga padayon mo sia nga palanggaon “sa bug-os mo nga tagipusuon kag sa bug-os mo nga kalag kag sa bug-os mo nga hunahuna kag sa bug-os mo nga kusog.” (Mar. 12:30) Ikaw lang kag si Jehova ang nakabalo kon magdedikar ka sa iya. Pero kon magpabawtismo ka, himuon ini sa atubangan sang mga tawo para mabal-an nila nga nakadedikar ka na. Isa ka serioso nga promisa ang imo pagdedikar kay Jehova. Gusto ni Jehova nga tumanon mo ang imo promisa, gani dapat mo gid ini tumanon.​—Man. 5:4. w24.03 2 ¶2; 4 ¶5

May mga problema ang tanan nga mag-asawa. Ang Biblia prangka nga nagasiling nga makaeksperiensia sang “kapipit-an sa unod” ang mga mag-asawa. (1 Cor. 7:28) Ngaa? Bangod pareho nga indi perpekto ang bana kag asawa, lainlain ang ila mga kinaiya, kag lainlain ang ila gusto kag indi gusto. Posible nga lainlain ang ila kultura kag gindak-an. Posible nga may mga kinaiya ang ila asawa ukon bana nga wala nila nakita antes sila nagpakasal. Puede bangdan sang problema sa pag-asawahay ang bisan diin man sa sini. Kay man, imbes nga batunon nga may sala sila nga duha kag dapat sila magbuligay para masolbar ang ila problema, posible nga basulon nila ang isa kag isa. Posible pa gani nga mahunahuna nila nga mas maayo kon magbulagay na lang sila ukon magdiborsio. Pero amo bala ini ang solusyon? Indi. Gusto ni Jehova nga tahuron sang mga mag-asawa ang iya kasuguan parte sa pag-asawahay bisan pa mabudlay pakigbagayan ang ila asawa ukon bana. w24.03 16 ¶8; 17 ¶11

Padayon ka nga nagtuon bisan pa nabawtismuhan ka na, gani mas nakilala mo pa gid si Jehova, mas ginpalangga mo pa gid sia, kag nagbakod pa gid ang imo pagsalig nga matuman gid ang imo paglaum nga mabuhi sing wala sing katapusan sa paraiso sa duta. (Heb. 5:13–6:1) Posible gid nga naeksperiensiahan mo ang ginasiling sang Roma 5:​2-4. Ginbatas mo ang sarisari nga mga kabudlayan, gani kumbinsido ka nga nalipay sa imo ang Dios. Kag bangod kabalo ka nga palangga ka niya kag nalipay sia sa imo, mas nagbakod ang imo pagsalig nga mabaton mo gid ang iya mga ginpromisa. Kon ikumparar sang una, mas mabakod subong ang imo pagsalig nga matuman gid ang imo paglaum. Gani mas ginapabaloran mo pa gid ini. Daku gid ang nangin epekto sini sa tanan nga bahin sang imo kabuhi, gani naghimo ka sang mga pagbag-o. Ginbag-o mo kon paano mo ginatratar ang imo pamilya, kon paano ka nagahimo sang mga desisyon, kag kon paano mo ginagamit ang imo tion. May isa ka importante gid nga punto nga ginsiling si apostol Pablo parte sa imo paglaum. Nagsiling sia nga kon nalipay sa imo ang Dios, makasalig ka nga matuman gid ang imo paglaum.​—Roma 15:13. w23.12 12-13 ¶16-19

Kon makaeksperiensia kita sang mabudlay nga problema, posible nga daw indi naton mahangpan ang aton ginabatyag, ginahunahuna, kag reaksion. Posible nga gulpi lang nagabag-o ang aton emosyon, kag daw pareho kita sa isa ka barko nga ginalinggilinggi sang mga balod. Ti, paano kita ginabuligan ni Jehova kon daw indi naton mahangpan ang aton ginabatyag? Nagapasalig sia nga palig-unon niya kita. Kon may bagyo, delikado gid ini sa barko kay posible ini magtakilid bangod sang mga balod. Bangod sini, madamo nga barko ang may ginatawag nga stabilizer. Ginabutang ini sa idalom sang barko sa magtimbang nga kilid sini. Makabulig ini para magbalanse ang barko, gani malikawan ang aksidente kag mangin komportable ang mga pasahero sa ila pagbiyahe. Pero, mas makabulig ini nga mga stabilizer kon nagalakat ang barko. Sing kaanggid, palig-unon kita ni Jehova kon padayon man kita nga maglakat, ukon padayon kita nga mag-alagad sing matutom sa iya, bisan pa may problema kita. w24.01 22 ¶7-8

Kon nahadlok ka, pamangkuta ang imo kaugalingon, ‘Ano ang mga nahimo na ni Jehova?’ Pamalandungi ang iya mga gintuga. Halimbawa, “tan-awa” kon paano ginaatipan ni Jehova ang mga pispis kag ang mga bulak bisan pa nga wala niya sila gintuga suno sa iya larawan kag indi sila makasimba sa iya. Kon pamalandungan mo ini, magabakod ang imo pagsalig sa iya nga atipanon ka man niya. (Mat. 6:​25-32) Binagbinaga man ang mga ginhimo ni Jehova para sa iya mga alagad. Puede mo tun-an ang parte sa isa ka karakter sa Biblia nga may tumalagsahon nga pagtuo, ukon puede mo basahon ang isa ka eksperiensia sang alagad ni Jehova sa aton tion subong. Pamalandungi man kon paano ginpakita ni Jehova nga palangga ka niya. Paano ka niya ginbuligan nga matun-an ang kamatuoran? (Juan 6:44) Paano niya ginsabat ang imo mga pangamuyo? (1 Juan 5:14) Paano ka nagabenepisyo adlaw-adlaw sa halad-gawad sang iya pinalangga nga Anak?​—Efe. 1:7; Heb. 4:​14-16. w24.01 4 ¶6; 7 ¶17