Ang Ika-100 ka Tuig nga Anibersaryo nga Dulumdumon

ANG katawhan sang Dios may pribilehiyo nga makita ang madamu modernong-adlaw nga mga milagro. Ang talalupangdon sa sini amo ang pagtubo sang tugob-globo nga organisasyon nga ginagamit karon ni Jehova sa pagpahayag sang iya ngalan sa bug-os nga duta. Nagsugod ini sa ­Pitts­burgh sadtong temprano sang katuigan 1870 paagi sa isa ka diutay nga grupo sang hanuot nga mga estudyante sang Biblia. Madasig sila nga nagmuad amo nga sang ulihi nagakaigo ang maghuman sang legal nga korporasyon agod atipanon ang nagasangkad nga organisasyon. Busa, ang ­Zion‘s ­Watch Tow­er ­Tract So­ci­ety nangin korporasyon sang Disiembre 13, 1884, sa idalom sang mga kasugoan sang Com­mon­wealth of Penn­syl­vania.

Sining karon, sang Sabado, Oktubre 6, 1984, ang ika-100 tuigan nga miting sang mga katapo sang korporasyon—nakilal-an karon nga ­Watch Tow­er Bi­ble and ­Tract So­ci­ety of Penn­syl­vania—ginhiwat sa Pitts­burgh. Isa gid ka pinasahi nga okasyon! Subong nga ang importante nga mga hitabo sang dumaan nga tion ginadumdom, nagakaigo man nga tandaan sang mga Saksi ni Jehova ining ika-100 ka tuig nga anibersaryo sang ­Watch Tow­er So­ci­ety sing isa ka pinasahi nga pagtipon. Busa sarang sila makahatag sing mga pasalamat kag pagdayaw sa Soberanong Ginuong Jehova, nga nag-amlig kag nagbantay sa sining nagasangkad nga organisasyon sa magamo nga tinuig sang nagligad nga siglo.—Josue 4:4-8, 20-24; Ester 9:20-22; Salmo 23:1-6.

Miting sang Korporasyon

Sa gilayon sang alas dies sang aga sang Oktubre 6, ang tuigan nga miting sang korporasyon sang Sosiedad ginbuksan sa Co­rao­polis As­sem­bly ­Hall of Je­ho­vah’s Wit­ness­es sa Pitts­burgh. Sa tunga sang mga organisasyon sang kalibutan, ang mga miting sang korporasyon masami nga naplano na, nahanungod lamang sa negosyo nga okasyon. Apang ini nga miting lain.

Tuhoy sa 429 ka katapo sang korporasyon, 259 ang nagtambong sing personal kaupod sang ila mga bisita—ang isa ka asambleya nga may kadamuon nga 1,615 ka mga tawo. Naglakbay sila pakadto sa miting gikan sa 53 ka lainlain nga pungsod—gikan sa nalapta nga mga duog subong sang Alaska, Antigua, Argentina, Australia, Austria, kag iban pa sa alpabeto tubtob sa Zimbabwe. Ang pormal nga pagpili sa apat ka direktor sang Sosiedad ginsundan sang makapakud sa espirituwal nga pamulongpulong. Ang isa sini, pasad sa tuigan nga teksto nga ginpili sang mga Saksi ni Jehova para sa 1985, ang 2 Timoteo 4:5, nga nagalaygay sa tanan: “Tumana sing bug-os ang imo ministeryo.”

Ginsugdan ini sing makapulokaw nga pamulongpulong sang 91-anyos nga presidente sang Sosiedad, si F. W. ­Franz. Nagsiling sia nga wala pa gid sia anay malipay subong sang, mga 65 sang nagligad, kaupod kay J. F. Ru­ther­ford, nabatian niya sing una ang prase nga “organisasyon sang Dios.” Sa tapos maasoy ang pag-uswag sang organisasyon sa duta, nagpabutyag sia sing pasalamat nga amo ini ang ika-100 ka tuig nga ang organisasyon ni Jehova naggamit sang nangin korporasyon nga Sosiedad agod dalhan kita sing nagaluwas-kabuhi nga impormasyon sa Kasulatan. Ang tingog ni Utod ­Franz makusog nga nagbaskog samtang iya ginkutlo ang katapusan nga bersikulo sang mga Salmo, nga nagasiling, ‘Ang tagsa ka butang nga nagaginhawa—padayawa ini kay Jah—HALLELUJAH!’

‘Si Jehova Kaupod sang Iya Katawhan’

Ang talalupangdon utudnon nga gugma kag pagkamaabiabihon ginpasundayag sang mga kongregasyon sa Pitts­burgh sang mga Saksi ni Jehova. (Hebreo 13:1, 2) Ang nagasakripisyo sa kaugalingon nga igtalupangod ginhatag agod iaman ang manamit nga pagkaon, ang dalayonan kag mga transportasyon, kag ang tagsa ka detalye sang organisasyon gin-atipan agod ihanda ang bantog nga ­Three Riv­ers Sta­dium sang Pitts­burgh para sa tatlo ka oras nga miting sa gab-i nga nagsunod.

Daw subong ini sang yuhom sang pagkahamuot gikan kay Jehova nga ang panahon sa sining adlaw sang tigragas maayo. Busa, ang kadam-an sang 37,733 sa istadyum sarang makapamati sing masulhay kag sing may apresasyon. Ang tie line nga mga telepono nagdala sang programa sa 34 ka As­sem­bly ­Halls of Je­ho­vah’s Wit­ness­es sa Estados Unidos kag sa Canada, diin 59,715 pa ang namati—nagahimu sang kabilogan nga 97,448 ka tumalambong. Sila tanan ginhatagan sing mga kopya sang maduagon 32-ka-pahina katulad sing broch­ure nga programa subong handumanan sa malipayon nga hitabo.

Ang sesyon sa gab-i ginsugdan sang makalilipay nga ambahanon kag pangamuyo. Nian ang napulo ka katapo sang Nagagahom nga Hubon sang mga Saksi ni Jehova nakigbahin upod sa madamu iban pa madugay na nga mga alagad ni Jehova sa pagpauswag sa tema: “Si Jehova Napamatod-an Pirme nga Kaupod sang Iya Katawhan.” Subong sang ginasiling sang broch­ure sang programa: “Sa pagkamatuod, may yara daku nga pamatuod nga si Jehova napamatod-an nga kaupod sang iya katawhan kag iya ginpakamaayo kag ginlig-on ang hilikuton sa ila kamut—nahimu paagi sa ­Watch Tow­er So­ci­ety. Busa, nahisuno sa panghunahuna sang Salmo 78:2-7, nagakaigo nga gamiton naton ini nga okasyon nga isugid sa bag-ong kaliwat ‘ang mga kadayawan ni Jehova . . . kag ang iya matahom nga mga butang nga iya nahimu.’”

Amo gid sina ang nahimu sang programa! Gintinguhaan ni Hitler kag sang apostata nga mga relihionista nga dulaon ang mga Saksi ni Jehova “kaangay sang bitik,” apang ina nga mga nagapamatok nadula na, subong sang pirme nagakatabo, “kaangay sang yelo sa adlaw.” Ginalaragway sang manugbadbad sang Biblia nga gi Good­speed ang nahaunang-siglo nga mga Cristiano subong “nagabadbad kag nagabantala nga mga tawo.” Kag matuod man ini sa ika-20 ka siglo nga mga Saksi! Sa 105 ka tuig nga natapos sang 1984, ining mga Cristiano nagbalhag, sa 200 kag kapin ka pamulong, sang 8.8 bilyon ka mga Biblia, mga libro, mga polyeto, mga magasin kag mga ­tract. Ang New ­World Trans­la­tion sang bilog nga Biblia, ukon sa magkubos sang Griegong Kasulatan, gin-imprinta sa 14 ka pamulong tubtob sa kabilogan nga 51,034,000 ka kopya. Sa dili madugay ang de-bulsa nga edisyon sini nga Biblia, kag subong man ang daku sing letra nga edisyon sa apat ka tomo, matigayon. Gani, ang ­Watch Tow­er So­ci­ety padayon nga mangin panguna sa pagbalhag sa Biblia.

Ang broch­ure nagsiling: “Ang pamatuod sang kalidad sang matutom nga mga lalaki nga nag-alagad kaupod sa ­Watch Tow­er So­ci­ety makit-an sa katunayan nga sa panag-on sang 100 ka tuig apat lamang ka tawo ang nag-alagad sa responsable nga posisyon sang pagka-presidente sang Sosiedad.” Halangdon nga ang organisasyon ni Jehova nagapadulong sa iya katapusan nga kadalag-an. Subong sang ginkomento ni Martin Poet­zing­er, nga naghupot sang integridad sa siam ka tuig sa mga kampo konsentrasyon sang Nazi: “Magpabilin kay Jehova kag kay Cristo kag sa organisasyon ni Jehova, kag makita mo ining madinalag-on nga kadalag-an sa ibabaw sang tanan nga mga nagapamatok.”

Ang katapusan nga humalambal sadto nga gab-i, si presidente F. W. ­Franz, naglaragway sa sining ika-100 ka tuig nga adlaw subong “isa ka okasyon nga indi makopya.” Matuod gid! Nagarepaso sa makalilipay nga maragtas sang Sosiedad, gindumdom ni Utod ­Franz ang ginsiling ni J. F. Ru­ther­ford, ang ikaduha nga presidente, nga napatay sang 1942. Wala madugay antes sia mapatay, nagsiling sia, “Bueno, Fred, daw subong nga para sa akon ang dakung [kadam-an] indi gid man tuman kadaku.” Si Utod ­Franz nagkomento: “Napatay sia sing temprano.” Sadto nga tion ang mga Saksi ni Jehova nagadamu lamang sing 100,000 sa bug-os nga kalibutan. Karon, sing literal, ‘minilyon sadtong indi na mapatay,’ ang gindugang sa kadamuon sining matutom nga mga alagad.

Naghinakop si Utod ­Franz paagi sining mga pulong: “Napahulag kita sa pagsiling sing nahiusa: ‘Ang tanan magtawag kay Jehova nga Dios nga Soberano sang Uniberso.’” Paagi sa nagaguob nga pamalakpak ang tanan nga nagtambong nagpabutyag sang ila bug-os tagipusuon nga pag-ugyon. Pagkatapos sang katapusan nga ambahanon kag pangamuyo nagpauli sila sa ila tumandok nga mga pungsod kag mga kongregasyon nga may makalilipay nga determinasyon nga magpadayon sa hilikuton ni Jehova tubtob sa katapusan.