Pagtan-aw sa “Tanda” nga May Paghangop

“Sang sia naglingkod sa Bukid sang Olibo, nagpalapit sa iya sing pahain ang mga disipulo, nga nagasiling: ‘Isugid sa amon, San-o bala mahanabo ini, kag ano bala ang tanda sang imo presensia kag sang konklusion sang sistema sang mga butang?’”—MATEO 24:3.

1. Ngaa ang nagapatay-ug sa kalibutan nga mga hitabo kutob sang 1914 indi aksidente, kag ano ang ginpamangkot sang mga apostoles ni Jesus sa iya?

ANG nagapatay-ug sa kalibutan nga mga hitabo kutob sang Inaway Kalibutanon I sang 1914-18 indi aksidente. Gintagna na ini sang nagligad nga 19 ka siglo ni Jesucristo. Ginsugiran niya ang iya 12 ka apostoles nahanungod sa madamung makatilingala nga mga butang nga magaabot, kag bangod sina nga namangkot sila: “Isugid sa amon, San-o bala mahanabo ini, kag ano bala ang tanda sang imo presensia kag sang konklusion sang sistema sang mga butang?”—Mateo 24:3.

2. Ngaa luyag mahibaloan sang mga apostoles ang labi pa sang sa kon ano ang mahanabo antes malaglag ang Jerusalem sang 70 C.E.?

² Luyag mahibal-an sadtong mga apostoles ang labi pa sa kon ano ang mahanabo sa ulot sadto nga tion kag sa kalaglagan sang Jerusalem. Si Jesus wala magbalik sing makita ukon dimakita sa sadtong makahalapay nga tion. Ukon nga ang sistema sang mga butang nga nagluntad kutob sang Anaw natapos sang malaglag ang Jerusalem sang 70 C.E. Sa katunayan, ang “tanda sang [dimakita] nga presensia [ni Jesus] kag ang konklusion sang sistema sang mga butang” magaluntad pagkatapos pa sang dutan-on nga pagkabuhi sang iya mga apostoles.

3. (a) Ano ang nagapakita nga “ining maayong balita sang ginharian” wala ginbantala sang mga relihion sang Cristiandad pagkatapos sang apostoliko nga apostasya? (b) Mapaslawan bala ang Ginharian sang Dios kon mapaslawan ang Nasyones Unidas?

³ Paagi sa matagnaon nga mga parabola nahanungod sa Ginharian sang Dios, ginsugiran ni Jesus ang iya apostoles tuhoy sa relihioso nga pagrebelde nga mahanabo pagkatapos sang iya pagbalik sa langit kag sa pagkapatay nila. Sa bug-os nga panag-on sadtong apostasya, may yara bala bug-os kalibutan nga pagbantala ‘sining maayong balita sang ginharian’? (Mateo 24:14) Pat-od nga indi paagi sa mga relihion sang Cristiandad, kay sang talipusposan sang Disiembre 1918 ang Fed­e­ral Coun­cil of the Church­es of ­Christ sa Amerika nagbayaw sa ginbuko anay nga Liga de Nasyones subong ang “politikal nga ekspresyon sang Ginharian sang Dios sa duta.” Apang, walay sapayan sang relihioso nga pag-ugyon ang Liga napaslawan sang magdabdab ang Inaway Kalibutanon II sang 1939. Apang bangod sina nga kapaslawan, napaslawan bala ang matuod nga Ginharian sang Dios? Wala! Wala ini mapaslawi bisan pa nga ang nagtal-us sa Liga, ang Nasyones Unidas, napaslawan sang ulihi. Sa baylo, inang balaan nga Ginharian magalaglag sa Nasyones Unidas, bisan pila man kadamu nga langitnon nga anghel ang kinahanglan agod himuon ini!

4. Ngaa ang hilikuton nga pagbantala sang Ginharian mangin bahin sang “tanda”?

⁴ Ang tanan nga nasambit na nagabulig sa pagpaposible sang mas maathag nga paghangop sa sining importante nga katunayan: Bangod sang pagsabat sa pangabay para sa “tanda” nga ginsilingan ni Jesus ang iya mga sumulunod: “Ining maayong balita pagaibantala sa bug-os napuy-an nga duta nga panaksi sa tanan nga pungsod; kag ugaling magaabot ang katapusan.” (Mateo 24:14) Nagakahulugan ini nga inang bug-os kalibutan nga pagbantala sang Ginharian mangin bahin sang grupo nga “tanda” nga magatanda sang “konklusion sang sistema sang mga butang.” Mangin ang makita nga pamatuod man ini sang dimakita nga “presensia” ni Jesucristo. Kon paano ginpasunodsunod ni Jesus ang mga hitabo antes sang iya tagna sa hilikuton nga pagbantala sang Ginharian talalupangdon. Sing bahin nagsiling sia:

5. Ano ang pila ka bahin sang “tanda” nga ginsambit ni Jesus antes gintagna ang bug-os kalibutan nga pagbantala sang Ginharian?

⁵ “Makabati kamo sing mga inaway kag mga kinonokono sang mga inaway; talupangda nga indi kamo magkalisang. Kay ini kinahanglan nga mahanabo, apang indi pa ang katapusan. Kay ang pungsod magatindog batok sa pungsod kag ang ginharian batok sa ginharian, kag may mga tiggulutom kag mga linog sa nagakalainlain nga duog. . . . Kag bangod ang kalautan magabuad, ang gugma sang kalabanan magabugnaw. Apang ang nagapadayon tubtob sa katapusan maluwas.”—Mateo 24:6-13.

6. Ngaa ang mga bahin sang “tanda” indi lamang kasugpon sang natabo na anay?

⁶ Matuod, may yara na anay inaway, kakulang sing pagkaon, linog, kag pamiste sa mga siniglo sang aton Kumon nga Dag-on tubtob sang 1914. (Lucas 21:11) Apang, wala sing makapaanggid sa kon ano ang natabo kutob sang magtakop ang Panag-on sang mga Gentil sadtong importante nga tuig. Ang internasyonal nga inaway nga nagdabdab sing makakilibot sang tig-ilinit sang 1914 nangin isa ka inaway militar diin 28 ka pungsod ang nakigbahin sang ulihi. Kaupod sa sinang tawhanon nga kagubot nag-abot ang kinaugali nga mga linog. Yara ang kakulang sing pagkaon, ukon gutom, kag sang katapusan nga tuig sadtong inaway kalibutanon nag-abot ang katulad sa makawat nga pamiste nga gintawag Spa­nish in­fluen­za nga nagkutol sang kabuhi sang kapin sa 20,000,000 ka tawo. Ini tanan indi lamang kasugpon sang nagakatabo na anay nga mga butang. Pamuno ini sang mga serye sang hitabo nga nagahuman sang “tanda” nga ining sistema sang mga butang yara na sa iya gintagna nga “panag-on sang katapusan.” (Daniel 12:4) Ang katapusan nga tolon-an sang Biblia—ang Apokalipsis, ukon Bugna—nagapat-od sini.

7. Ngaa ang tolon-an sang Bugna ginrekord, kag ano ang kahulugan sang madamung butang nga “ginpresentar . . . sa tagna”?

⁷ Si apostol Juan, nga nakabaton sang Bugna, ginsugo nga isulat ini tungod sa pinasahi nga katuyoan. Ano nga katuyoan? Amo ini: “Agod ipakita sa mga ulipon [sang Dios] ang butang nga dapat mahanabo sing madali.” Kag sa katapusan sang Bugna si Ginuong Jesucristo nagsiling: “Huo; nagakari ako sa madali.” Sa sina, si Juan nagsabat: “Amen! Kari ka, Ginuong Jesus.” Busa madamung mga butang nga “ginpresentar . . . sa tanda,” sa pagkatabo nila sa maragtas, ang magapamatuod nga nagakabuhi na kita sa “panag-on sang katapusan” sining sistema sang mga butang. (Bugna 1:1; 22:20) Huo, nagabulig ini sa aton nga matan-aw ang grupo nga “tanda” sing may paghangop.

8. Sin-o ang nagasakay sa “kabayo nga maputi,” kag san-o sia gin-awtorisahan sang Dios nga makig-away batok sa iya mga kaaway?

⁸ Sa Bugna kapitulo 6 makita ang kasaysayan sang kon ano ang ginatawag nga pagsakay sang “apat ka manugkabayo sang Apokalipsis.” Una nga nagguwa amo ang nagasakay sa “kabayo nga maputi,” ang ginhimaya nga si Jesucristo, nga nagalakat agod makig-away batok sa iya mga kaaway. Gin-awtorisahan sia sang Dios nga himuon ini sa pagtakop sang Panag-on sang mga Gentil, sang ang mga kaaway ni Jesus sa langit kag sa duta magapasakop kuntani sa iya pagginahom.—Salmo 2:1-12.

9. Ano ang ginalaragway sang nagasakay sa (a) ang kabayo nga “pula nga luto”? (b) ang kabayo nga “maitom”? (c) ang kabayo nga “maluspad”?

⁹ Ang nagasakay sa “pula nga luto” nga ikaduhang kabayo nagalaragway sa pungsodnon nga inaway, kay ang hinganiban militar, ang “dakung espada,” ginhatag sa iya. Sa ikatlo, “ang kabayo nga maitom,” nagasakay ang isa nga nagalaragway sa kakulang sing pagkaon. Paano naton ini mahibaloan? Bangod nagadala sia sing timbangan nga magasukub sa mga kinahanglanon nga mga suplay nga pagkaon sa mataas nga bili. Ang ikap-at nga nagsakay, sa masakiton tan-awon “maluspad nga kabayo,” nagalaragway sang pamiste, kay ang kasaysayan nagasiling: “Ang isa nga nagasakay sa sini may ngalan nga Kamatayon. Kag ang Hades [ang lulubngan] nagasunod sa iya.” Matuod, ining ikap-at nga nagasakay ginhatagan sing awtoridad nga “magpamatay paagi sa malaba nga espada” sang inaway “kag paagi sa kakulang sang pagkaon . . . kag paagi sa sapat nga mapintas sang duta.” Apang, sing talalupangdon, gin-awtorisahan man sia nga magabiktima para sa lulubngan (Hades) paagi sa “makamamatay nga kasisit-an.”—Bugna 6:1-8.

10. Ano ang mahanabo sa tapos mabuksan ang ikalima kag ikan-um nga pat-in, kag ano ang batunon sang mga pumuluyo sang duta?

¹⁰ Sa tapos makit-an ni apostol Juan yadtong mga palanan-awon nga magatanda sang “konklusion sang sistema sang mga butang,” nakita niya nga ginbuksan ang ikalima kag ikan-um sang matagnaon nga pat-in. Sa sadto nga punto, nakita niya ang palanan-awon tuhoy sa makahaladlok indi kinaandan nga hitabo nga nagsugod paagi sa “dakung linog.” Sang ulihi, ang mga pumuluyo sang duta obligado nga magabaton: “Ang dakung adlaw sang kasingkal [nanday Jehova nga Dios kag Jesucristo] nag-abot.” Ang pagtakop sinang simbuliko nga adlaw sang kasingkal magakahulugan nga ang katapusan nag-abot sang ulihi sa mga nagasakdag sini nga kalibutan.—Bugna 6:9-17.

Pagtipon Sadtong Nahamut-an Para sa Kaluwasan

11. Ano nga ilustrasyon ang ginhatag ni Jesus agod ipakita ang pagkapat-od sang kon ano ang gintagna niya nahanungod sa “presensia” kag sang “konklusion sang sistema sang mga butang”?

¹¹ Sang ginhatag ang “tanda” sang iya “presensia kag sang konklusion sang sistema sang mga butang,” si Jesus nagsiling: “Karon sa higuera magtuon kamo sing paanggid sini: Kon ang iya sanga manglumbay kag maghumlad ang iya mga dahon, mahibaloan ninyo nga malapit na ang tingadlaw. Amo man, kon makita ninyo tanan ining butang, mahibal-an ninyo nga sia malapit sa mga gawang na. Sa pagkamatuod nagasiling ako sa inyo nga ining kaliwatan indi magtaliwan tubtob nga tanan ining butang mahanabo. Ang langit kag duta magataliwan, apang ang akon mga pulong indi magtaliwan.”—Mateo 24:32-35.

12, 13. (a) Ano ang indi buot silingon sang Judiyong pungsodnon nga kapahamakan sang 70 C.E.? (b) Tuhoy sa ano ang kapahamakan isa ka matagnaon nga tipo? (c) Gani, ano ang padayon nga gintagna ni Jesus nahanungod sa iya pagkari?

¹² Sang ginlaglag sang mga Romano ang Jerusalem kag ang iya templo sang 70 C.E. subong gid sang gintagna ni Jesus, ining makahaladlok nga kapipit-an sa mga Judiyo wala nagkahulugan nga nagkari na sia sa ikaduhang tion kag ang iya dimakita nga presensia nagsugod. (Mateo 24:15-21) Sanglit ginagamit sang Biblia ang dumaan nga Jerusalem subong tipo, inang makakilibang nga kapahamakan sang 70 C.E. isa gid ka matagnaon nga tipo. Naglaragway ini sa diutay nga bahin sa kon ano ang mahanabo sa bug-os kalibutan nga kasangkaron pagkatapos nga magtakop ang Panag-on sang mga Gentil sang 1914 kag busa pagkatapos si Jesucristo aktuwal nga nagsugod sang iya dimakita nga presensia. Amo ina kon ngaa si Jesus nagsiling man:

¹³ “Sa gilayon sa tapos sang kapipit-an sadtong mga adlaw ang adlaw padulmon, kag ang bulan indi maghatag sang iya kapawa, kag ang mga bituon magakahulog gikan sa langit, kag ang mga kagamhanan sa mga langit uyugon. Kag magapahayag ang tanda sang Anak sang tawo sa langit, kag nian magakasubo ang tanan nga kabikahan sa duta, kag makita nila ang Anak sang tawo sa ibabaw sang mga panganud sa langit nga may gahom kag daku nga himaya. Kag magapadala sia sang iya mga manugtonda sa mabaskog nga tunog sang budyong, kag magatipon sila sang iya mga pinili gikan sa apat ka hangin, tubtob sa isa ka ukbong sang langit tubtob sa isa.”—Mateo 24:29-31.

14. Ano nga katipan kag halad ang ginapatuhoyan sa Salmo 50:5?

¹⁴ Ang gintagna nga pagtipon sa sadtong “mga pinili” sa konklusion sang sistema sang mga butang amo ang katumanan sang sugo sang Dios: “Tipona sa akon sing tingob ang akon mga matutom, ang mga nagapakigkatipan sa akon sa halad.” (Salmo 50:5) Sanglit gintawag ini ni Jehova nga “nagapakigkatipan sa akon,” indi ini isa ka dedikasyon nga ginahimu sang isa ka indibiduwal sa Dios sang mangin isa sia ka Cristiano kag ginapalig-on niya ini paagi sa pagsakripisyo sang iya kaugalingon. Indi, ini nga pagpakigkatipan ni Jehova kag sang “mga matutom” amo ang ginsaad nga “bag-ong katipan” sang Dios upod sa panimalay sang espirituwal nga Israel. Ang halad nga sa diin inang bag-ong katipan napasad amo ang halad-gawad sang “Anak sang tawo,” si Jesucristo.—Jeremias 31:31-34; Mateo 24:30.

15. Sin-o ang “mga matutom,” kag nagaalagad sila karon subong ano sa kalibutan?

¹⁵ Ang “mga matutom” nga ginpasulod sa bag-ong katipan ginahuman sang espirituwal nga Israelinhon. (Lucas 22:19, 20) Ginpangabay sang Dios ang pagtipon nga mahanabo agod nga sarang niya mausisa yadtong gintipon, mahamut-an ang matutom kag masikway yadtong wala nagapanghikot suno sa ila pangangkon nga pagpakigkatipan sa iya, ang bag-ong katipan. (Salmo 50:16) Kutob sang Inaway Kalibutanon I, ang pamatuod amo nga ang Cristiandad, nga nga nagaangkon nga yara sa bag-ong katipan, wala napamatod-an nga kalahamut-an kay Jehova nga Dios. Kabaliskaran katama amo ang diutay nga nagkalabilin sang tunay dedikado, bawtismado nga mga disipulo sang Manugpatunga sang bag-ong katipan, si Jesucristo. Napamatod-an sila nga amo ang espirituwal nga Israelinhon. Ining matutom nga mga sumalakdag sang bag-ong katipan amo ang “mga pinili” nga gintipon mismo sang Anak sang Dios paagi sa iya mga manugtonda. Ginatuman nila ang mga obligasyon sang bag-ong katipan, “nagapakigkatipan sa akon,” subong sang pagtawag sa sini sang Dios. Bangod sang ila ginahimu bilang pagsakdag sa Ginharian sang Dios paagi kay Jesucristo, nangin isa sila ka ‘tanda’ sa bug-os nga kalibutan.—Isaias 8:18; Hebreo 2:13, 14.

16. (a) San-o may yara espirituwal nga pagpasag-uli sa nagkalabilin sang “mga matutom”? (b) Sa parabola sang napulo ka ulay, sin-o ang Nobyo, kag sin-o ang nagahuman sa iya simbuliko nga nobya?

¹⁶ Para sa sinang nagkabilin sang “mga matutom,” may yara espirituwal nga pagpasag-uli sadtong temprano nga bahin sang “konklusion sang sistema sang mga butang.” Amo ini ang talalupangdon nga bahin sang “tanda” nga gintagna ni Jesus sa iya daku nga tagna. Para sa nagkalabilin, ang panahon para sa sina nga pagpasag-uli amo ang isa nga may daku nga kasadya, kasadya nga kaangay sa iya sang lima ka mainandamon, ukon maalam, nga mga ulay nga ginpabugtaw sing singgit sa tungang-gab-i: “Yari karon ang nobyo! Guwa kamo sa pagsugat sa iya.” (Mateo 25:1-6) Yadtong masadya nga pagpasag-uli natabo sang tigpamulak sang 1919, sang ang hinaplas nga nagkalabilin nasugdan nga maulian gikan sa mga epekto sang bug-os kalibutan nga paghidait kag pagtublag nga naeksperiensiahan nila sa madulom nga panag-on sang Inaway Kalibutanon I. Ang Nobyo sa parabola sang napulo ka ulay, amo, siempre, si Jesucristo, kag ang iya simbuliko nga nobya amo ang iya matutom nga kongregasyon sang 144,000 ka katapo nga magaupod sa iya sa langitnon nga Ginharian. (Bugna 14:1-4) Ginapakita sang kronolohiya sang Biblia kag sang modernong mga koresponsal nga ang Nobyo nga Hari nagkadto sa espirituwal nga templo sang tigpamulak sang 1918. Nian ginsugdan niya nga banhawon gikan sa minatay ang matutom nga katapo sang espirituwal nga nobya kag ipahiusa sila sa iya sa langitnon nga Ginharian. Subong pagpabutyag sang nagkalabilin sang nobya, nga ginlaragway sang mainandamon nga mga ulay, ang Bugna 19:7 nagasiling: “Magkalipay kita kag magkasadya sing lakas, kag maghimaya sa iya kay ang kasal sang Kordero nag-abot kag nakaaman na ang iya nobya.”

17. (a) Ngaa ang ‘mainandamon nga ulay’ nga klase nagakalipay? (b) Ano ang gindala sang mainandamon nga mga ulay, kag busa sarang makahimu sing ano?

¹⁷ Huo, ang panahon sang espirituwal nga pagpasag-uli sa ‘mainandamon nga ulay’ nga klase kag ang paghangop nila sa kahulugan sang “tanda” nga nagsugod na magluntad sang 1914 amo ang okasyon nga magakasadya sing daku. Nian maaplikar sa ila ang pinamulong: “Malipayon ang mga ginaagda sa panihapon sang kasal sang Kordero.” (Bugna 19:9) Sa parabola ni Jesus, ang lima ka mainandamon nga mga ulay nagdala sing reserba nga suplay sang lana agod masindihan uli ang ila mga suga kag busa makabuylog sa malipayon nga prosesyon sa kasal nga may nasindihan nga suga. Sang mag-abot ang Nobyo, ang “mga ulay nga handa nagsulod upod sa iya sa sining sinalusalo sa kasal kag gintakop ang ganhaan.”—Mateo 25:1-10.

18. (a) Pagkatapos sang Inaway Kalibutanon I, ang hinaplas nga nagkalabilin may bastante gihapon sang makapasanag nga Pulong sang Dios kag sang iya balaan nga espiritu sa sulod nila nga himuon ang ano? (b) Ano ang ginpahibalo sa ila nahauna pagkatapos sang inaway nga kombension?

¹⁸ Matuod sa laragway sang lima ka mainandamon nga mga ulay, ang hinaplas nga nagkalabilin nagpadayon sa paghatag sing masanag kag makalilipay nga pag-abiabi sa langitnon nga Nobyo, ang tion nga ang pagpakasal niya sa iya nobya nga kongregasyon nag-abot na. Pagkatapos sang ila makatulublag sa espirituwal nga mga inagihan sadtong Inaway Kalibutanon I, may yara gihapon sila bastante sang nagapasanag nga Pulong sang Dios kag sang iya balaan nga espiritu sa sulod nila subong “suludlan nga duta” sa pagpasindi uli sang ila hilikuton nga pagpasanag sa katawhan nahanungod sa Ginharian sang Dios paagi sa iya Nobyo-Hari. (2 Corinto 4:7) Sing nahisuno, sang Septiembre 1-8, 1919, ang ‘mainandamon nga ulay’ nga klase naghiwat sang ila nahaunang internasyonal nga kombension sa Cedar ­Point, Ohio. Didto ang ginbuko nga pagbalhag sa bag-ong magasin, dugang sa The ­Watch Tow­er ginpahibalo. Ini nga bag-ong balasahon pagatawgon nga The Gold­en Age, ang ngalan nga nagalaragway sa sahi sang dag-on nga ginaagom sang napasag-uli nga mga katawhan sa Isa ka Libo ka Tuig nga Paggahom sang Nobyo-Hari nga si Jesucristo. Ina nga magasin ginabalhag gihapon karon, sa idalom sang ngalan nga ­Awake! (Magmata!)

19. (a) Paano ang ‘mainandamon nga ulay’ nga klase nangin talalupangdon nga bahin sang “tanda” sang “presensia” ni Jesus? (b) Sin-o karon ang mga malipayon sa duta?

¹⁹ Wala madugay pagkatapos sadto nga kombension, ang nahauna nga guwa sang The Gold­en Age—sadtong Oktubre 1, 1919—ginbalhag. Paagi sa sina nga balasahon kag sa iban nga publikasyon sang ­Watch Tow­er Bi­ble and ­Tract So­ci­ety ang matutom nga ‘ulay nga klase’ nagpadayon sang ila misyon nga pagsuga sa kalibutan. Ginsugdan nila ang tapos sang inaway nga hilikuton nga ‘pagbantala sining maayong balita sang Ginharian nga panaksi sa tanan nga pungsod’ antes ang katapusan sining sistema sang mga butang magaabot. (Mateo 24:14) Sa sining paagi ang hinaplas nga nagkalabilin, ang ‘mainandamon nga ulay’ nga klase, nangin talalupangdon nga bahin sang grupo nga “tanda” nga nagatanda sang dimakita nga “presensia” ni Jesus subong ginhatagan sing gahom nga Hari kag sang “konklusion sang sistema sang mga butang.” Inang makapasanag nga hilikuton dugang mabug-at nga pamatuod nga ang “panag-on sang katapusan” nagsugod sang matapos ang Panag-on sang mga Gentil sang 1914. Malipayon ang tanan sadtong may paghangop nga nagatan-aw sa sining gintagna nga bahin sang “tanda” upod ang importansia sini!

Paano Nimo Sabton?

◻ Sa ano bahin ang pagbantala sang Ginharian nga hilikuton?

◻ Sin-o ukon ano ang ginalaragway sang nagasakay sa maputi nga kabayo; sa pula nga luto nga kabayo; sa kabayo nga maitom; sa kabayo nga maluspad?

◻ Ang Judiyong pungsodnon nga kapahamakan sang 70 C.E. isa ka matagnaon nga tipo sang ano?

◻ Sin-o ang nagahuman sa ‘mainandamon nga ulay’ nga klase, kag ngaa magakasadya sila?

[Laragway sa pahina 14]

‘Isugid sa amon, ano bala ang tanda sang imo presensia?’