‘Maglakat sing Mahim-ong sa Sining Naandan nga Dalanon’
“Sa kasangkaron sang aton pag-uswag, magpadayon kita sa paglakat sing mahim-ong sa sining naandan nga dalanon.”—FILIPOS 3:16.
1, 2. (a) Paano ang huaran nga mga pamatan-on tuboran sang pagpalig-on? (b) Apang, ano nga mga pamangkot tuhoy sa ila ang nagsulod sa hunahuna?
SANG sulosobra pa lang sa duha ka tuig si Alisa, ginpahalipay niya ang tanan paagi sa pagsaulo sang mga ngalan sang tanan nga 66 ka tolon-an sang Biblia, pagsambit sang mga ngalan sang 12 ka apostoles, kag paglaragway paagi sa kumpas sang siam ka bunga sang espiritu sang Dios. (Mateo 10:2-4; Galacia 5:22, 23) Sang ika-lima na sia ka grado sa eskwelahan, nagahiwat na sia sing semanal nga pagtuon sang Biblia upod sa isa ka bata nga babayi sa ikatlo nga grado, nga, nagpainteresado man sa iya magulang nga utod nga lalaki sa Biblia. Si Alisa kag ang iya abyan nagpahamtang sing lalambuton para sa ila kaugalingon. Ginapaabot nila nga mangin magkaupod sa bug-os tion nga hilikuton sa pagbantala subong espesyal payunir sa pila ka adlaw.
2 Sa pagkamatuod, makalilipay para kay bisan sin-o sa aton nga makilala ang mga kabataan kasubong nila, kag ayhan ikaw man. Sa amo man nga tion, walay sapayan, mamangkot kita: Mangin ano gid sila pagdaku nila? Magapadayon bala sila sa ila espirituwal nga pagtubo tubtob malab-ot nila ang ila lalambuton? Ukon mabalabagan bala sila sang iban nga mga butang kag magtupa sa higad dalan?
Padayon nga Pag-uswag
3. Sin-o ang nagakinahanglan nga mag-uswag?
3 Sing hayag ina nga mga kabataan nagakinahanglan sing daku nga espirituwal nga pag-uswag antes nila malab-ot ang ila lalambuton. Apang mga bata lamang bala ukon mga bag-ohan ang nagakinahanglan nga mag-uswag? Sa katunayan, kinahanglan lamang bala ang pag-uswag tubtob ang isa nakalambot na sa espirituwal nga pagkahamtong ukon nangin kalipikado na sa pila ka mga pribilehiyo? Indi. Binagbinaga si apostol Pablo. Sa baylo nga maayawan na sa iya hinimoan, nagsiling sia sa iya sulat sa mga taga-Filipos: “Indi nga naagom ko na ini ukon nahimpit na ako, kundi ginahimud-osan ko nga magpadayon man ako sa bagay nga ako ginpasad man ni Cristo Jesus.”—Filipos 3:12.
4. Ano nga “lalambuton” ang ginhimud-osan ni apostol Pablo?
4 Sing maathag, wala nagahambal si Pablo nahanungod sa pagtigayon sing pagkahamtong, kay walay duhaduha nga isa na sia ka hamtong nga Cristiano. Apang nagsiling sia nga “ginahimud-osan” niya ang pila ka butang nga wala pa niya “maagom.” Ano ini? Si Pablo padayon sa pagpaathag: “Nagapadayon ako padulong sa lalambuton tungod sa padya sang langitnon nga pagtawag nga yara kay Cristo Jesus.” (Filipos 3:14) Ang lalambuton nga iya ginahimud-osan indi lamang ang Cristianong pagkahamtong ukon kalipikasyon sa pila ka posisyon, kundi sing mas daku pa. Para sa iya kag para sa iya masigka hinaplas nga mga Cristiano, amo ini ang “langitnon nga pagtawag,” ang paglaum nga magkabuhi sing langitnon kon mabanhaw.
5. (a) Ngaa ang dalayon nga pagtubo kinahanglan? (b) Ano ang ginalakip sang “paglimot sang tinalikdan”?
5 Nagabulig ini sa aton nga makita ang rason nga magpadayon sa pagtubo kag maglambo sa espirituwal bisan ano na kita kadugay sa kamatuoran. Kon ang isa nagauswag tubtob lamang sa punto nga makabig nga hamtong, ukon tubtob lamang sa punto nga makalipikar sa pila ka pinasahi nga pribilehiyo, anong mapinadayunon nga benepisyo ang yara sa iya? Ang pagkahamtong kag pinasahi nga pribilehiyo indi garantiya nga nalambot na naton ang katapusan nga lalambuton—ang kabuhi nga walay katapusan. Sa baylo, dapat naton himuon ang ginhimu ni apostol Pablo: ‘Kalimtan ang tinalikdan kag maghimulat ayon sa naunhan.’ (Filipos 3:13) Indi lamang nga dapat naton biyaan ang dimapuslanon nga butang nga ginhimu anay naton antes naton mahibaloan ang kamatuoran kundi dapat man kita maghalong nga indi maayawan sa kaugalingon sa kon ano ang aton nahimu kutob sadto nga tion. Sa iban nga hambal, indi kita dapat magsalig sa mga kadungganan kundi nga magpadayon sing abanse sa walay langan. Ginahimu mo bala ini, ukon ikaw bala, bangod sang isa ka rason, nagahinay?—Tan-awa ang 1 Corinto 9:26.
6. Nagapaanggid sang Filipos 3:12 sa 3:15, ano ang masiling tuhoy sa pag-uswag?
6 Nagahunahuna sini nga posibilidad, si Pablo nagpadayon: “Nian, subong nga ang madamu sa aton mga hamtong, maghunahuna sing subong; agod nga bisan sa anong butang tuhay kamo sing panghunahuna, ina man ipahayag sang Dios sa inyo.” (Filipos 3:15) Sing nauna pa, sa bersikulo 12, ginpakita ni Pablo nga wala niya ginkabig ang iya kaugalingon nga “nahimpit na.” Apang nagsiling sia diri nga “subong nga ang madamu sa aton mga hamtong,” ukon, “mga himpit.” (Kingdom Interlinear) Wala ini nagasumpakilay. Sa baylo, nagapakita lamang ini nga bisan ang hamtong nga mga Cristiano kasubong ni Pablo dapat magpanumdom nga wala pa nila malambot ang katapusan nga lalambuton, kag dapat sila magpadayon sa pag-uswag agod malamb-ot ini. Amo ina kon ngaa gintingob niya ini sa sini nga paagi: “Sa bisan ano nga paagi, sa kasangkaron sang aton pag-uswag, magpadayon kita sa paglakat sing mahim-ong sa sining naandan nga dalanon.”—Filipos 3:16.
Mahim-ong nga Dalanon
7. Ano nga “dalanon” ang ginalaygay ni Pablo sa mga Cristiano himuon?
7 Sang ginpalig-on ni Pablo ang mga Cristiano “sa paglakat sing mahim-ong sa sining naandan nga dalanon,” ginasilingan bala niya sila nga pangabudlayan ang komportable nga talaksan sang hilikuton kag magpabilin sa sini tubtob mag-abot ang tion para sa ila nga batunon ang ila padya? Ang paghimu sini mangin kaangay sang ginhimu sang ulipon sa ilustrasyon ni Jesus nga naglubong sang isa ka talento nga ginhatag sa iya sang iya agalon kag naghulat lamang sa pagbalik sang iya agalon. (Mateo 25:14-30) Bisan pa nga wala madula sang ulipon ang talento ukon mag-untat sa iya pag-alagad, gintawag sia nga “ulipon nga walay pulos” kag ginsikway sang agalon. Sa pagkamatuod wala kita ginasilingan ni Pablo nga padayunon lamang ang kon ano na ang natigayon naton sa kahadlok nga basi nga madula naton ini. Nagahambal sia tuhoy sa pag-uswag. Sa pagsiling nga “dalanon,” maathag nga ginahunahuna ni Pablo ang napahamtang nga kurso sang abanse nga paghublag, isa nga kaangay sang isa ka soldado nga wala lamang nagatindog sing tiso kundi nagamartsa sing abante.
8. Sa ano kita dapat magkabalaka nahanungod sa aton pag-alagad sa Dios?
8 Ang laygay ni Pablo dapat magabulig sa aton nga mahibaloan ang importansia sang pagpanikasog sing dalayon kag lakas sa pag-abante, sa pag-uswag, kag pag-ayo pa gid sang aton kaugalingon sa pag-alagad kay Jehova. “Sa kasangkaron sang aton pag-uswag,” kon bala mga gulang, mga ministeryal nga suluguon, mga payunir, ukon mga manugbantala, ang aton panguna nga kabalak-an dapat nga amo ang pagpauswag sang kalidad kag, kon mahimu, sang kantidad sang aton pag-alagad. Dapat kita maghalong nga indi mahulog sa pareho nga panghunahuna sang delingkwente nga mga Israelinhon sang adlaw ni Malaquias nga naghunahuna nga ginapasaylo sila sa paghalad sing manubo nga mga halad kay Jehova. Apang ano ang balatyagon ni Jehova sa sini? “Huo, gindala ninyo ini [ang piang kag masakiton nga halad] subong dulot,” siling niya. Nian nagdugang sia: “Malipay bala ako sini sa imo kamut?”—Malaquias 1:13.
9. Paano ang laygay ni Pablo sa Roma 12:6-8, 11 may labot sa pag-uswag?
9 Sa kabaliskaran, dapat naton binagbinagon sing serioso ang aton pag-alagad sa Dios. Subong sang ginpahanumdom ni Pablo sa mga taga-Roma, bisan ano man nga pribilehiyo sang pag-alagad ang ginhatag sa aton, dapat naton ini ‘apresyahon,’ “nga may kahanuot katama” kag indi ‘magligoy sa aton ginahimu.’ (Roma 12:6-8, 11) Ang pagligoy amo ang pagdayandayan nga wala sing kaladtoan, nga wala sing abante nga hulag padulong sa bisan anong espesipiko nga lalambuton. Sing makawiwili, ang Griegong tinaga nga gingamit diri literal nga nagakahulugan sing “tamaran,” ang labing nagakaigo nga paglaragway. Ginapakita sang report nga, bisan nga makasarang sa paghulag sing madasig, sa sulod sang panag-on nga 168 ka oras, ang isa ka tamaran nagatulog ukon nagapabilin nga wala sing ginahimu sa 139 ka oras—83 porsiento sang tion. Indi kalatingalahan nga ginlaygayan kita nga indi “magmatamad,” kundi nga “magmapagsik sa espiritu” kag “mag-alagad kay Jehova”! Ano ang makabulig sa aton nga himuon ini?
10. Ngaa dapat kita mangin interesado sing hanuot sa laygay ni Pablo kay Timoteo sa 1 Timoteo 4:12-16?
10 Sa 1 Timoteo 4:12-16 si apostol Pablo naghatag sing detalyado sang mga butang nga dapat himuon ni Timoteo agod ang iya pag-uswag “madayag sa tanan nga tawo.” Sadto anay, si disipulo Timoteo indi na bata ukon bag-ohan pa. Sa katunayan, sadto anay nakapangabudlay na sia sing suod kaupod ni Pablo sa kapin sa napulo ka tuig kag may yara na madamudamu nga responsabilidad kag awtoridad nga gintugyan sa iya sa Cristianong kongregasyon, walay duhaduha bangod sang pag-uswag nga nahimu na niya sadto nga tion. Apang, ginhatagan gihapon sia ni Pablo sina nga laygay. Sing maathag, nagakaigo sa aton tanan nga pamatian sing labi pa ang ginsiling ni Pablo.
Mangin huaran sa pulong kag sa pagginawi
11, 12. (a) Anong nahaunang bahin ang dapat naton hatagan sing igtalupangod sa paghimu sing pag-uswag? (b) Ngaa mas importante ini sang sa pag-uswag sa ihibalo ukon ikasarang?
11 Una, sa bersikulo 12, si Pablo nagsiling: “Dili pagpatamaya ang bisan sin-o sa imo pagkapamatan-on. Kundi magmangin huaran ka sa mga nagatuo sa pulong, sa pagginawi, sa gugma, sa pagtuo, sa kaputli.” Ini nga listahan nagapahanumdom sa aton sang “bunga sang espiritu,” nga gindetalye ni Pablo sa Galacia 5:22, 23. Sin-o ang makapanghiwala nga ang kada isa sa aton nagakinahanglan nga magpatubas sini nga bunga sing labi pa sa aton kabuhi? Kalabanan sa aton nagapanikasog sing daku nga maton-an kag masaulo ang siam ka mga bunga sang espiritu, kag matudloan ang mga bata kag mga bag-ohan nga himuon man ina. Apang ginapanikasogan bala naton sing lakas nga palambuon ini? Ginpakita ni Pablo nga yadtong mga hamtong dapat nga mangin huaran sa sining mga bagay. Sa pagkamatuod, isa ini ka bahin sang aton kabuhi diin kita tanan madali nga makauswag.
12 Sa isa pa ka kahulugan, ayhan, ining mga kinaiya labi pa nga nagapakita sang aton espirituwal nga pag-uswag sang sa ihibalo kag kalantip, bangod ang nauna mga produkto sang espiritu sang Dios, samtang ang naulihi masami nga may kahilabtanan sa kinaugali nga mga ikasarang kag edukasyon sang isa. Ang mga escriba kag mga Fariseo sang adlaw ni Jesus batid kaayo sa mga Kasulatan, kag ginatuman nila sing maid-id ang masibud nga mga detalye sang Kasugoan. Apang, ginpakamalaut sila ni Jesus, nga nagasiling: “Kailo kamo, mga escriba kag mga Fariseo, mga salimpapaw! kay nagahatag kamo sing ikapulo sang hirbabuena kag sang ani sang komino, apang ginbayaan ninyo ang mga pagsulondan sang Kasugoan nga dalagku pa, ang katarungan kag ang kaluoy kag ang pagtuo.” (Mateo 23:23) Importante gid para sa aton nga magpadayon nga mag-uswag sa pagpalambo sining “dalagku pa” nga mga bagay sa aton kabuhi!
Mag-ukod sa pagbasa, sa paglaygay, kag sa pagpanudlo
13. Paano ang gintangdoan nga mga manugtatap makabenepisyo gikan sa laygay ni Pablo sa 1 Timoteo 4:13?
13 Masunod, ginlaygayan ni Pablo si Timoteo nga “padayon nga mag-ukod [sang iya kaugalingon] sa pagbasa sa dayag, sa paglaygay, sa pagpanudlo.” (1 Timoteo 4:13) Bisan diin sa iya sulat, ginapatuhoyan ni Pablo si Timoteo subong hamtong kag matutom nga ministro. (Filipos 2:20-22; 2 Timoteo 1:4, 5) Apang ginlaygayan niya si Timoteo nga magpadayon nga hatagan sing igtalupangod ining kinahanglanon nga mga responsabilidad sang mga manugtatap. Kon isa ikaw ka gintangdoan nga manugtatap sa kongregasyon, imo bala ‘padayon nga ginaukod ang imo kaugalingon’ sa sini nga bagay? Halimbawa, ginabinagbinag mo bala sing serioso ang mga panugda nga ginhatag sa Theocratic Ministry School Guidebook kag ginapangabudlayan mo bala ang imo mga kaluyahon, ukon ginabatyag mo bala nga ini laygay para lamang sa mga bag-ohan? Ginaton-an mo bala ang Biblia kag ang mga publikasyon sang Sosiedad sing maayo amo kon ngaa ikaw “makalaygay, sa bug-os nga pagbatas kag arte sa pagpanudlo”? —2 Timoteo 4:2; Tito 1:9.
Dili pagpatumbayai ang hiyas sang pag-alagad
14. Paano naton mapakita ang pag-uswag sa patag sang aton ministeryo?
14 Samtang pila lamang ang gintangdoan nga magpanudlo sa kongregasyon, ang tanan nga Cristiano gintangdoan ni Jesus nga makigbahin sa hilikuton nga pagpanaksi sang Ginharian kag paghimu-disipulo. (Mateo 24:14; 28:19, 20) Nagadalahig ini sa pagtudlo sa mga bunayag sing tagipusuon sang kamatuoran sang Biblia, nagalaygay sa ila nga maghimu sing mga pagbalhin sa ila kabuhi kag magtindog sa kiliran ni Jehova. Ikaw bala ‘padayon nga nagaukod sang imo kaugalingon’ sa pagpauswag sang imo ikasarang sa pagministeryo? Maukod bala nga imo ginaaplikar ang mga panugda nga ginahatag sang Ang Aton Ministeryo sa Ginharian kag sang semanal nga Miting sa Serbisyo agod nga ‘himuon ang hilikuton sang ebanghelista, nagatuman sing bug-os sang imo ministeryo’?—2 Timoteo 4:5.
15. Ano ang “hiyas” ni Timoteo, kag kamusta kita karon?
15 Ginhatagan anay ni Pablo si Timoteo sining pahanumdom: “Dili pagpatumbayai ang hiyas nga yara sa imo nga ginhatag sa imo paagi sa tagna sang gintakdongan sang mga gulang sang ila mga kamut.” (1 Timoteo 4:14) Sing hayag, paagi sa pagpanghikot sang balaan nga espiritu, si Timoteo ginhatagan kag sang ulihi gintangdoan sang pila ka pinasahi nga pag-alagad sa Cristianong kongregasyon. (1 Timoteo 1:18; 2 Timoteo 1:6) Sing kaanggid, madamu karon sa kongregasyon ang nagpalambo sang hatag-Dios nga mga ikasarang, nagresulta sa pagkatangdo sa ila subong nagalakbay nga mga manugtatap, mga misyonero, regular ukon espesyal nga mga payunir, mga gulang kag iban pa. Bisan pa wala sing pinasahi nga pagtagna ukon pagtakdong sang kamut ang nadalahig, ang laygay nga “dili pagpatumbayai ang hiyas nga yara sa imo” naaplikar sa kaanggid man nga kusog.
16. Ano ang makapugong sa aton gikan sa pagpatumbaya sa aton “hiyas”?
16 Ang pagpatumbaya sa pila ka butang, suno sa diksionaryo, nagakahulugan sing paghatag sing diutay nga igtalupangod sa sini ukon indi paghimu sini bangod sang pagkadimahalungon. Kon ang isa ka butang nangin kinaandan na, mahapos nga patumbayaan ini. Mahanabo ini kon mag-untat na kita sa paghimu sing pag-uswag ukon pag-abante, kag ginahimu ang aton mga asaynment sing pasapayan. Busa, makabenepisyo kita gikan sa ginsiling ni Pablo sa Colosas 3:23, 24: “Bisan ano ang inyo himuon, himua ini ninyo sing bug-os tagipusuon subong nga kay Jehova, kag indi nga sa mga tawo, nga nakahibalo nga magabaton kamo gikan kay Jehova sing tumbas sang panublion. Ginaalagad ninyo ang Agalon, si Cristo.”
Ang Dalayon nga Panikasog Nagadala sing mga Pagpakamaayo
17. Paano lamang naton makita ang resulta sang aton mga panikasog?
17 Kon hatagan naton sing suod nga igtalupangod ang mga bagay nga ginhambalan sa hitaas, makasalig kita nga indi kita mahulog sa siod sang pagpatumbaya ukon pagpaayaw sa kaugalingon. “Himua ining mga katungdanan; ukuri ini sila, agod nga ang imo pag-uswag makita sang tanan,” siling ni Pablo. (1 Timoteo 4:15) Ang “pag-uswag,” siempre pa, indi amo ang katuyoan sang pagpakitakita ukon pagpahamuot sa iban. Kon kita, pamatan-on kag tigulang, nagatubo kag nagalambo sa espirituwal, magadala kita sing kalipay kag pagpalig-on sa tanan nga nagapakig-upod sa aton, subong sang bata nga si Alisa kag sang iya abyan, nga ginsambit kaina sa sining artikulo.
18. Anong doble nga pagpakamaayo ang nagahulat sa aton kon iaplikar naton sing makugi ang laygay ni Pablo?
18 Ang doble nga pagpakamaayo nagahulat sa aton kon iaplikar naton sing makugi ang laygay ni Pablo. “Talupangda ang imo kaugalingon kag ang imo pagpanudlo,” siling ni Pablo. “Magpabilin sa sini nga butang, kay paagi sa paghimu mo sini maluwas mo ang imo kaugalingon kag yadtong nagapamati sa imo.” (1 Timoteo 4:16) Huo, paagi sa dalayon nga pag-usisa sang aton kaugalingon kon bala ginahimu naton ang ginatudlo naton sa iban, kon sayuron, nga mag-uswag, magtubo, kag maglambo sa espirituwal, malikawan naton ang kasubo sang ‘sikwayon.’ (1 Corinto 9:27) Sa baylo, ang malipayon nga palaabuton sang kabuhi sa ginsaad nga Bag-o nga Kahimusan sang Dios ginapasalig sa aton kag sa nabuligan naton sing malipayon. Sa amo, para sa pagpakamaayo sa aton kag para sa pagpakamaayo sa iban, kag para sa kadayawan ni Jehova nga Dios: ‘Magpadayon kita sa paglakat sing mahim-ong sa sining naandan nga dalanon’!—Filipos 3:16.
Nadumduman Mo Bala?
◻ Ano nga katapusan nga “lalambuton” ang dumdumon naton? Paano naton himud-osan ini? (Filipos 3:12, 13)
◻ Ano ang “dalanon” nga dapat naton laktan? (Filipos 3:16)
◻ Ngaa padayon naton nga pauswagon ang Cristianong pagginawi kag pulong? (1 Timoteo 4:12)
◻ Paano ang mga gulang kag ministeryal nga mga suluguon kag ang iban pa makapauswag sang ila ikasarang sa pagpanudlo? (1 Timoteo 4:13)
◻ Ano ang dapat naton himuon agod indi mapatumbayaan ang “hiyas” nga gintugyan sa aton? (1 Timoteo 4:14)
[Laragway sa pahina 14]
Si Alisa kag ang iya ginaton-an sang Biblia may tulumuron nga mag-alagad sa bug-os tion