Maglakat nga May Pagsalig sa Pagkapangulo ni Jehova
“Magpakabakud kag magpakaisog. Dili magkahadlok ukon malisang sa ila, kay si Jehova nga imo Dios amo ang nagaupod sa imo. Indi sia magpabaya sa imo ukon magbiya sa imo.”—DEUTERONOMIO 31:6.
1. Paano ginpamatod-an ni Jehova nga isa sia ka dimatupongan nga pangulo sang mga Israelinhon?
SI Jehova napamatod-an nga dimatupongan nga pangulo sang ginpaguwa niya ang mga Israelinhon gikan sa kahiolipnan sang Egipto. Indi lamang nga gintuytoyan niya sila sa kamingawan kundi ginhatagan niya sila sing pagkaon kag ilimnon kag ginhatagan sila sing wala nagakasayop nga instruksion. Gani ang mga Levita sang kaadlawan ni Nehemias nakasiling: “Ikaw [Jehova nga Dios], sa imo bugana nga mga kaluoy wala magbiya sa ila sa kamingawan. Ang haligi nga panganud wala magbulag sa ibabaw nila sa adlawon sa pagtuytoy sa ila dalanon, kag ang haligi nga kalayo sa kagab-ihon sa pagpakita sa ila sing kapawa kag sang dalanon nga ila paglaktan. Kag ikaw naghatag man sang imo maayong espiritu sa pagtudlo sa ila, kag wala magpugong sang imo manna gikan sa ila baba, kag naghatag sa ila sing tubig nga sa ila kauhaw. Kag ginsakdag mo sila sing kap-atan ka tuig sa kamingawan. Kag wala sila makulangi sing bisan ano. Ang ila mga panapton wala magdaan, kag ang ila mga tiil wala magbanog.”—Nehemias 9:19-21.
2. Ngaa mapalig-on ni Moises ang mga Israelinhon nga “magpakabakud kag magpakaisog”?
2 Paagi sa disiplina nga ginahimu upod ang amaynon nga kalulo, ang Balaan nga Manunudlo nagtudlo sa mga Israelinhon kon ano ang buot silingon sang mangin makatarunganon kag matarong. Ginhimu niya ang tanan para sa ila pinakamaayo nga intereses. Bisan pa sang magkumod sila kag magrebelde, mabinatason sia kag wala magbiya sa ila. Labi na sang gin-atubang sila sang madamu nga hangaway sang kaaway nga naghatag si Jehova sing pamatuod sang malantipon nga pagkapangulo kag naghapay sa mga nagsalakay. Si Moises naghambal sang kamatuoran sang ginpalig-on niya ang mga Israelinhon paagi sa sining mga pulong: “Magpakabakud kag magpakaisog. Dili magkahadlok ukon malisang sa ila, kay si Jehova nga imo Dios amo ang nagaupod sa imo. Indi sia magpabaya sa imo ukon magbiya sa imo.” (Deuteronomio 31:1, 6) Ang Dios “nagaupod” sa ila kon sila magtuo. Daw ano ka daku nga rason para sa aton nga maglakat nga may pagsalig sa pagkapangulo ni Jehova!
Mga Paandam Gikan sa Nagligad
3. Wala madugay sa tapos mahilway gikan sa kahiolipnan sa Egipto, paano ginpakita sang katawhan sang Israel ang pagkawalay kabalaslan kag pagkawalay pagsalig kay Jehova?
3 Apang, ang mga eksperiensia sang mga Israelinhon nagahatag sing paandam para sa aton. Bisan pa ginhilway sila gikan sa kahiolipnan sang Egipto sa malip-ot lamang nga tion, sulitsulit sila nga nagpakasala batok sa ila dimakita nga Pangulo. Samtang yadto si Moises sa Bukid sang Sinai nga nagabaton sang Kasugoan, ginpakita nila ang ila pagkawalay kabalaslan sa tanan nga nahimu ni Jehova sa ila. Gin-ingosan nila si Aaron nga maghimu sing bulawan nga baka kag simbahon ini sila sa kon ano ang ginatawag ni Aaron nga “kapiestahan kay Jehova.” (Exodo 32:1-6) Ang napulo sang 12 ka espiya nga ginpadala agod tiktikan ang Canaan napamatod-an nga wala sing pagtuo, si Josue kag si Caleb lamang ang nagpalig-on sa katawhan nga magpadayon sa pagsulod sa duta kag kuhaon ini. Apang ang Israel wala magpanghikot nga may pagtuo sa Dios, nga busa nagmando nga ang tanan nga mga lalaki “kutob sa duha ka pulo ka tuig ang edad paibabaw,” luwas sa tribo ni Levi kag sang matutom nga sanday Caleb kag Josue, mapatay sa 40-ka-tuig nga panag-on sa kamingawan. (Numeros 13:1–14:38; Deuteronomio 1:19-40) Sa pagkamatuod, ini tanan nagapaandam sa aton batok sa kaanggid man nga pagkawalay kabalaslan kag pagkawala sing pagsalig sa pagkapangulo ni Jehova!
4. Paano ang maragtas sang Israel nagapakamatarong sa kapahamakan nga natabo sa Juda, Jerusalem, kag sa templo sang 607 B.C.E.?
4 Bisan pa nga ang mga Israelinhon naglibotlibot sa kamingawan sa 40 ka tuig, wala sila pagpabay-i ni Jehova. Padayon sia nga nakig-away sa ila mga inaway. Sang mapatay si Moises kag si Josue, ang Dios naghatag sing mga hukom agod luwason ang iya katawhan gikan sa mapiguson nga mga kaaway. Apang sadto anay ang katawhan sang Israel naghimu sang kon ano ang matarong sa ila kaugalingon nga mga mata, kag nagbugana ang malinapason nga kasingki, imoralidad, kag idolatriya. (Mga Hukom 17:6–19:30) Sang ulihi, sang nangayo sila sing tawhanon nga hari agod mangin kaangay sang palibot nga mga pungsod, ginhatag ni Jehova ang ila pangabay apang ginpaandaman sila sa mga resulta. (1 Samuel 8:10-18) Apang, bisan ang paghari sang panimalay ni David wala magpaayaw sa katawhan, kag ang napulo ka tribo nagrebelde sa mga kaadlawan ni Rehoboam. (1 Hari 11:26–12:19) Dugang pa, ang ideya mismo sang pagpangulo sang Dios sa ila nadula sa painoino sang kalabanan. Ang kalaglagan sang Jerusalem kag sang templo kag subong man ang pagkapukan sang ginharian sang Juda sa mga kamut sang taga-Babilonia sang 607 B.C.E. nagakabagay gid nga paghukom sa katawhan nga wala maglakat nga may pagsalig sa pagkapangulo ni Jehova. Isa gid ini ka paandam para sa aton!
Ang Pagkapangulo ni Jehova sa Bag-o nga Pungsod
5. Ano ang gin-aman ni Jehova sa persona ni Jesus, kag ano ang himuon ni Jesus?
5 Kaangay sang dumaan nga mga Israelinhon, ang ulihi nga mga alagad ni Jehova naglakat sa lainlain nga mga sirkunstansia, apang pirme niya sila gintuytuyan. Sang si Jesus sang Nasaret nagpabawtismo sa tubig sang 29 C.E., ang Dios nag-aman sing Manalagna kag Pangulo nga mas daku sang sa kay Moises. Subong Mesias, tuytuyan niya ang katawhan paguwa gikan sining malaut nga kalibutan nga yara sa gahom ni Satanas. (Mateo 3:13-17; Daniel 9:25; Deuteronomio 18:18, 19; Binuhatan 3:19-23; 1 Juan 5:19) Apang ano nga katawhan? Ti, yadtong mga Judiyo kag ang mga iban pa nga nagtuluo sa Mesias nga gin-aman sang dakung langitnon nga Pangulo, si Jehova nga Dios!
6. (a) Ngaa ang mga sumulunod ni Jesus makabantala kag makaatipan sa nagauswag nga organisasyon? (b) Ngaa nga sang ulihi daw subong bala nga ang kapawa sang kamatuoran sang Biblia napalong?
6 Gintudloan ni Jesus ang iya mga sumulunod sang makatilingala nga kamatuoran sang Dios kag ginhatagan niya sila sing kinahanglanon nga instruksion para sa pag-alagad. (Lucas 10:1-16) Sa amo sang gintapos ni Cristo ang iya pag-alagad kag ginpresentar ang iya kaugalingon subong halad tungod sa makasasala nga katawhan, nagbilin sia sing mga sumulunod nga nahanas sa pagpadayon sang hilikuton nga pagbantala kag sa pagdumala sang hilikuton sang nagauswag nga organisasyon sadtong nagatuo sa iya. Sadtong panag-on sang mga apostoles, may yara makusog nga paghingabot. Apang ang kamut ni Jehova yara kaupod sang iya katawhan, kag ang ila mga kabudlayan gintimbangan sang makatilingala nga pagdugang sa kadamuon sang mga tumuluo. (Binuhatan 5:41, 42; 8:4-8; 11:19-21) Sang mapatay ang mga apostoles ni Jesus kag ang ila kaupod nga mga manugpangabudlay, ang nagaangkon nga mga sumulunod ni Cristo napaidalom sa pagginahom sang mapintas kag bugalon nga mga klerigo kag mga hari. (Binuhatan 20:28-30) Sanglit ini nga kahimtangan nagpadayon sing mga 15 ka siglo, daw subong bala nga ang kapawa sang kamatuoran sang Biblia napalong.
7. San-o kag paano ginpalig-on liwat ni Jehova ang iya pagkapangulo, kag ano ang ginbuyagyag niya sa iya modernong-adlaw nga mga alagad?
7 Apang, kaangay sang ‘isa ka tingog nga nagasinggit sa kamingawan,’ nagguwa ang panawagan: ‘Ang Ginharian malapit na!’ (Ipaanggid ang Isaias 40:3-5; Lucas 3:3-6; Mateo 10:7.) Sang talipusposan nga bahin sang ika-19 ka siglo, ginpahayag liwat ni Jehova ang iya pagkapangulo kag nagsugod sa pagtawag sang iya matuod nga mga sumilimba paguwa sining malaut nga kalibutan kag sa iya Babilonianhon nga mga sistema sang relihion. (Bugna 18:1-5) Paagi sa iya nasulat nga Pulong kag balaan nga espiritu, ginbuyagyag sang Dios sa iya modernong-adlaw nga mga alagad nga ang tuig 1914 gintandaan sang katapusan sang wala upang nga paggahom sang Gentil nga mga pungsod kag sang langitnon man nga pagpalingkod sa ginhimaya nga si Jesucristo, ang ginpili sang Dios subong Hari sa ibabaw sang bug-os nga katawhan.—Lucas 21:24; tan-awa ang 1975 Yearbook of Jehovah’s Witnesses, mga pahina 34-37.
8. (a) Gani, ano ang gin-organisar? (b) Sin-o ang nagbuylog sa hinaplas nga mga sumulunod ni Jesus, kag paano nangin maathag ang pagkapangulo sang Dios kag ni Cristo?
8 Gani, ang isa ka bag-o nga pungsod nga ginahuman sang nagkalabilin sang espirituwal nga Israel gin-organisar, dugang nga naghatag sing kapawa sa mga katuyoan sang Dios kag nahanas sing bug-os sa pag-alagad. Sang ulihi, ining hinaplas nga mga sumulunod ni Cristo ginbuylogan sang kadam-an sang mga tumuluo nga may dutan-on nga paglaum. Karon, sing tingob, ining tanan nga mga Saksi ni Jehova malipayon nga nagabantala sang iya ngalan kag sang Ginharian sa kaukbongan sang duta. (Isaias 66:7, 8; Galacia 6:16; Bugna 7:4, 9, 10) Sa organisado nga hilikuton sang mga Saksi, ang pagkapangulo ni Jehova kag sang iya harianon nga Anak maathag gid, labi na sa sabat sang minilyon ka bunayag-sing-tagipusuon nga mga tawo nga nangin malig-on nga sumalakdag sang pagginahom sang Ginharian. Bahin ka bala sining malipayon nga kadam-an nga nagalakat nga may pagsalig sa pagkapangulo ni Jehova?—Miqueas 4:1, 2, 5.
9. Anong bug-os kalibutan nga asosasyon ang nagluntad, kag upod ang anong panimuot sa pagkapangulo sang Dios kag sang teokratikong pagginahom?
9 Sa ulihi, ang mga sumulunod ni Jesus mangin mga saksi niya “tubtob sa ukbong sang duta.” (Binuhatan 1:6-8; Marcos 13:10) Sing nahisuno, ang mga Saksi ni Jehova nagabantala karon sang maayong balita sang Ginharian sa bug-os nga duta, kag yadtong “gintangdoan sa kabuhing walay katapusan” nagabaton sang kamatuoran nga may malipayon nga tagipusuon. Nangin bahin sila sang bug-os kalibutan nga asosasyon sang espirituwal nga kautoran nga mga lalaki kag kautoran nga mga babayi nga malipayon nga nagbaton sang pagkapangulo sang Dios kag nagpasakop sang ila kaugalingon sa teokratikong pagginahom. (Binuhatan 13:48; 1 Pedro 2:17) Kaangay nila, ikaw bala may bug-os nga pagsalig nga si Jehova nga Dios kag ang iya Hari-Anak, nga si Jesucristo, nagatuytoy sini nga organisasyon sang mga manugbantala sang Ginharian?
Pagbantay Batok sa Pagkawalay Pagsalig
10. Ano nga paandam ang magapahulag sa isa ka Cristiano nga usisaon sing maayo ang iya kaugalingon?
10 Mahimu bala nga ang mga nagabaton sang tanan nga mga pagpakamaayo nga nagresulta bangod sang pagkapangulo ni Jehova mahulog sa siod sang pagkawalay pagtuo kag pagsalig sa iya? Huo, kay ginpaandaman kita: “Andam kamo, mga kautoran, basi nga may isa sa inyo nga may malaut nga tagipusuon sang pagkadimatinuohon nga nagapahilayo sa inyo sa buhi nga Dios; apang maglinaygayay kamo adlaw-adlaw, samtang ginatawag pa nga ‘Adlaw,’ agod nga wala sa inyo nga magtig-a bangod sang pagkadaya sang sala.” (Hebreo 3:12, 13) Busa, dapat usisaon sing maayo sang tagsa ka Cristiano ang iya kaugalingon.
11. (a) Sa anong mga paagi nga ang mga konsiensia sang isa mahimu nga magtig-a? (b) Ano ang natabo sa iban sang nahaunang siglo C.E.?
11 Ang konsiensia sang isa mahimu nga magatig-a amo kon ngaa wala sia sing nakita nga sayop sa pila ka dalanon nga wala nahisuno sa espiritu sang Cristianismo kag nagapakita sing pagkawalay pagtuo kag pagsalig kay Jehova. Halimbawa, ang iban mahimu mahulog sa siod sang pagpaanggid sa materyalistiko nga mga paghimud-os ukon sang pag-una pa sini sa pag-alagad nila sa Dios. Ang iban mahimu nga mangin imoral ukon mahimu nga magatamay sa responsable nga mga lalaki sang kongregasyon. Sang nahaunang siglo C.E., ang “mga didiosnon” nga nagsulod sa kongregasyon “nagadagta sang unod kag nagapakawalay pulos sang pagkaginuo kag nagatamay sang mga mahimayaon” nga nagaabaga sang mga responsabilidad sa kongregasyon. (Judas 4-8, 16) Yadtong butig nga mga Cristiano nadulaan sing matuod nga pagtuo kay Jehova kag sa iya pagkapangulo. Kabay nga indi gid ina matabo sa aton!
12. (a) Ano ang ginapasapayanan sang independiente kag rebelyuso nga espiritu? (b) Ano nga pagpaanggid ang yara sa ulot ni Core kag ni David?
12 Naupdan sing masami sang ‘pagpakawalay pulos sang pagkaginuo’ amo ang hilway kag rebelyuso nga espiritu nga wala nagasapak sang katunayan nga si Jehova nagatuytoy sang iya organisasyon. Ini nga espiritu may makahaladlok nga mga resulta para kay Core kag sa iban pa nga naghangkat anay sa hatag-Dios nga awtoridad nanday Moises kag Aaron. (Numeros 16:1-35) Apang daw ano gid nga kabaliskaran ang makita naton kay David! Kontento sa paghulat sa Dios sa pagtadlong sang mga sala, wala pagpatya ni David ang iya malaut nga kaaway nga si Hari Saul bangod sia “ginhaplas ni Jehova.” (1 Samuel 24:2-7) Huo, gintangdo ni Jehova si Moises, si Aaron, si Saul, si David, si Jesucristo, kag iban pa. Sing kaanggid, sa organisasyon sang Dios karon ginahimu ang mga pagtangdo sa pag-alagad nga nahisuno sa Makasulatanhon nga mga kinahanglanon kag sa idalom sang panuytoy sang balaan nga espiritu ni Jehova.—1 Timoteo 3:1-13; Tito 1:5-9; Binuhatan 20:28.
13. (a) Ngaa dapat kita magpasalamaton sa pagkapangulo ni Jehova? (b) Katulad kay sin-o dapat kita maglakat, kag upod ang ano nga panimuot?
13 Sanglit ‘wala sa tawo ang pagtuytoy sang iya mga tikang,’ dapat kita magpasalamaton bangod sang pagkapangulo ni Jehova. (Jeremias 10:23) Si Abraham kag ang iya debotado nga asawa nga si Sara nagtuman sa Dios kag nagpanghikot nga may pagtuo. Si Boaz kag si Rut nagtuman sa balaan nga mga kahimusan. Huo, kag madamu pa iban nga matutom nga mga lalaki kag mga babayi ang malipayon nga nagbaton sang panuytoy ni Jehova. (Hebreo 11:4-38; Rut 3:1–4:17) Nian, kaangay sang dumaan nga mga alagad sang Dios, dapat naton likawan ang independiente nga espiritu, nagakooperar sing malipayon upod sa teokratiko nga organisasyon sang Dios, kag nagalakat nga may bug-os nga pagsalig sa pagkapangulo ni Jehova.
Masinaligon nga “Itungtong kay Jehova ang Imo Lulan”
14. Ano ang makabulig sa aton nga makapangandam batok sa rebelyuso nga espiritu?
14 Ano ang makabulig sa aton, subong matutom nga mga Saksi ni Jehova, nga makapangandam batok sa rebelyuso nga espiritu? Bueno, una kinahanglan naton nga kilalahon nga sayop ang mangin rebelyuso kag matinaastaason nga sikwayon ang mga panuytoy sang Dios. (Nehemias 9:16, 28-31; Hulubaton 11:2) Sarang kita makapangamuyo sa aton langitnon nga Amay subong sang ginhimu ni David, nga nangabay: “Punggi man ang imo alagad gikan sa matinaastaason nga mga buhat; dili sila pagpagahoma sa akon. Nian mangin matarong ako, kag mangin hilway ako sa dakung paglalis.” (Salmo 19:13) Mabinuligon man nga dumdumon kon daw ano ka daku nga gugma ang ginpakita ni Jehova sa aton. Magapadugang ini sang aton gugma sa iya kag magapahulag sa aton nga batunon ang iya pagkapangulo sa tanan nga tion.—Juan 3:16; Lucas 10:27.
15. Ano nga dalanon ang ginarekomendar kon ang isa ka utod magahunahuna nga wala sia pagtangdoa subong ministeryal nga suluguon ukon manugtatap bangod malain ang buot sang mga gulang sa iya?
15 Dapat naton dumdumon ang katunayan nga ang Dios amo ang nagatuytoy sang iya organisasyon, bisan pa nga ang paglakat nga may pagsalig sa pagkapangulo ni Jehova indi pirme mahapos. Sa pag-ilustrar: Halimbawa ang isa ka utod magahunahuna nga wala sia pagtangdoi subong ministeryal nga suluguon ukon manugtatap bangod ang mga gulang may malain nga buot sa iya. Sa baylo nga maghulag sa paagi nga makatublag sa paghidait sang kongregasyon, dapat niya dumdumon nga si Jehova amo ang nagatuytoy sang teokratiko nga organisasyon. Gani, mahimu nga ang utod magapangayo sing paathag sa mapainubuson, mahidaiton nga paagi. (Hebreo 12:14) Daw ano ka maalamon para sa iya nga kilalahon ang bisan ano pa nga kaluyahon nga ginapatalupangod sa iya kag mapinangamuyuon nga panikasogan nga mag-uswag! Pagkatapos sina, sarang niya matugyan ang mga bagay sa kamut ni Jehova, nagadumdom sang pinamulong: “Itungtong kay Jehova ang imo lulan.” (Salmo 55:22) Sa ulihi kag samtang nagakalipikar kita sa espirituwal, pat-uron ni Jehova nga hatagan kita sing madamu nga hilimuon sa pag-alagad sa iya.—Ipaanggid ang 1 Corinto 15:58.
16. Bisan pa kon ginhimuan kita sing sala sa sulod sang kongregasyon, anong dalanon ang himuon naton, kag ngaa?
16 Bisan pa kon ginhimuan kita sing sala sang isa ka utod nga lalaki ukon sang isa ka utod nga babayi, magahatag bala ina sa aton sing makatarunganon nga kabangdanan nga mag-untat na sa pagpakig-upod sa kongregasyon? Sa amo makatarunganon bala nga mag-untat kita sa paghimu sing balaan nga pag-alagad kay Jehova? Indi, kay ina nga buhat indi pagkatutom sa Dios kag pagkawalay kabalaslan sa iya pagkapangulo. Magapakita ini nga wala naton ginahigugma ang aton masigka tumuluo sa bug-os nga duta. (Mateo 22:36-40; 1 Juan 4:7, 8) Dugang pa, kon bugtuon naton ang aton integridad kay Jehova, magahatag ina kay Satanas sing rason nga yaoyaohon ang Dios—ang isa ka butang nga indi gid naton luyag!—Hulubaton 27:11.
17. (a) Ano ang magabulig sa aton nga mahuptan ang aton pagsalig sa pagkapangulo ni Jehova sa iya organisasyon? (b) Ano ang mangin eksperiensia sadtong padayon nga nagalakat nga may pagsalig sa pagkapangulo ni Jehova?
17 Gani, nian, ‘pakamaayuhon naton si Jehova kag indi pagkalipatan ang tanan nga mga ginhimu sang Isa nga nagapurongpurong sang aton kabuhi sing mahigugmaon nga kalulo kag kaluoy.’ (Salmo 103:2-4) Kon dumdumon naton pirme ang aton mahigugmaon nga Dios kag magpanghikot nahisuno sa iya Pulong, mahuptan naton ang makusog nga pagsalig sa iya wala nagakapaslawan nga pagkapangulo. (Hulubaton 22:19) Ang pagtalikod kay Jehova kag sa iya organisasyon, ang pagsikway sa panuytoy sang “matutom kag mainandamon nga ulipon,” kag ang pagsalig lamang sa personal nga pagbasa sang Biblia kag pagpatpat mangin kaangay sang isa ka kahoy sa kigas nga duta. Apang sa kabaliskaran, ang tawo nga nagasalig sa aton Dakung Pangulo, si Jehova, “sia mangin subong sang kahoy nga natanum sa luyo sang mga tubig, nga nagapakalapkap sang iya mga gamut sa ubay sang suba; kag indi mahadlok kon mag-abot ang kainit, kay ang iya dahon nangin hilaw.” Dugang pa, “sa tuig sang tingadlaw indi sia maghimud-os, kag indi mag-untat sa pagpamunga” sa himaya sang Dios. (Mateo 24:45-47; Jeremias 17:8) Mangin amo ina ang imo ginpakamaayo nga eksperiensia kon malig-on nga magpadayon ka sa paglakat nga may pagsalig sa pagkapangulo ni Jehova.
Masabat Mo Bala?
◻ Sa anong paagi napamatod-an si Jehova nga isa ka dimatupongan nga pangulo sang mga Israelinhon?
◻ Tuhoy sa pagkapangulo sang Dios, ano nga mga paandam ang ginahatag sang dumaan nga Israel?
◻ Sa ibabaw ni sin-o nagapangulo karon si Jehova?
◻ Ano ang magabulig sa aton agod makapangandam batok sa pagkawasi sing pagsalig sa pagkapangulo ni Jehova?
◻ Bisan pa kon ginhimuan kita sing sala sa sulod sang kongregasyon, dapat nga ano ang aton mangin panimuot sa pagkapangulo ni Jehova?
[Laragway sa pahina 17]
Sang 607 B.C.E. ginhapay yadtong wala nagalakat nga may pagsalig sa pagkapangulo ni Jehova. Daw ano ka maalamon nga pamatian ang paandam!
[Laragway sa pahina 19]
Si Abraham, si Sara, si David, si Jesus, kag ang iban pa naglakat nga may pagsalig sa pagkapangulo ni Jehova. Amo man bala ina ang paglakat mo?