Ang Modernong Bantog nga mga Pag-abuso sa Gahom

SA KASUGOAN nga ginhatag paagi kay Moises, ang Manunuga makusog nga nagpakamalaut sa pagkuha sing hamham sang mga hukom. (Exodo 23:8; Deuteronomio 10:17; 16:19) Makita naton kon daw ano ka maalamon ina nga mga instruksion paagi sa pagtalupangod sa pila ka modernong mga kaso sang pag-abuso sa gahom sang mga opisyales.

Ang isa sina nagadalahig kay Hukom Martin T. Manton. Sadtong 1918 gintinguhaan niya nga pamatokan ang mga panikasog sang mga Estudyante sang Biblia, subong amo anay ang pagkilala sa mga Saksi ni Jehova, nga piyansiyahan si J. F. Ruth­er­ford kag ang pito niya ka kaupdanan. Ining walo ka Cristianong mga ministro ginsumbong sing pagpasilabot sa panikasog sa inaway kag ginbilanggo sa bilanggoan pederal sa Atlanta, Geor­gia. Ang hukmanan nga nagbista sang ila kaso ginahuman sang tatlo ka hukom, lakip kay Manton. Nagpamatok sia, apang ang duha pa ka hukom nagpasugot sa pangabay, kag ang dinagakaigo nga paghukom ginbaliskad.

Ano nga sahi sang hukom si Manton? Ginatawag sia sang prensa nga “ang pinakamataas sing ranggo nga opisyal sang hukmanan [sa Estados Unidos] nga masunod sa siam ka mga Huwes sang Korte Suprema.” Isa man sia sang labing kilala nga lego sang Amerika, ginhimo sia sang papa nga ­“Knight of St. Grego­ry.” Ang pagkapukan ni Manton nag-abot sang ginbilanggo sia kag ginpamatbatan sing kag duha ka tuig nga pagkabilanggo kag ginmultahan sing $10,000. Tungod sa ano? Tungod sang pagbaligya sa desisyon sang hukmanan. Kapin pa sa sina, maisog ang iya buot sa pagpangwarta sadtong nagaatubang sa iya, nagapamahog nga kon indi nila sia pagbayaran sing daku nga kantidad, magapamat-od sia batok sa ila. Ang The New York Times nagasiling nahanungod sa iya: “Ang pagpangwarta nagahalin sa Pederal nga hukmanan.” Daku gid nga pag-abuso sa gahom!

Mga tinuig sang ulihi isa pa gid ka bantog nga kaso ang nangibabaw nga nagadalahig kay Spiro Ag­new, bise-presidente sang Estados Unidos sang 1969-73. Ginsumbong sia sing pagdaya sa pangulohan sing mga linibo ka dolyar, kag gani naghalin sia. Sang talipusposan sang 1983, ginbayaran niya ang estado sang Maryland sing kapin sa $250,000 bangod sang ginbaton niya nga hamham.

Nian yara si Rich­ard M. Nixon, nga nagpili kay Agnew nga magdalagan subong bise-presidente. Ang komite sang Senado sang E.U. nga nagauyat sa kaso sang Water­gate nagrekomendar nga pahalinon si Nixon bangod sang tatlo ka rason: nga gin-abusohan niya ang iya gahom nga pagkapresidente; nga ginpunggan niya ang katarungan; kag nga ginlapas niya ang mga sub­poena. Nahibal-an ninyo nga naghalin sia sang Agosto 9, 1974, nga may duha ka tuig pa kag tunga nga nabilin sa iya pagkapresidente.

Ina nga pag-abuso sa gahom lapnag sa bug-os nga kalibutan. Halimbawa, ang magasin sang Can­a­da nga Maclean’s sang Hulyo 15, 1985, nagbalita tuhoy sa “wala sing kontrol nga sinalusalo sa sekso sa Parlia­ment Hill . . . kag sa indi awtorisado nga pinansial nga hamham.” Nagsugilanon ini nga sa isa ka sinalusalo ginsilingan sang senyor nga per­son­nel nga opisyal sang pangulohan ang isa ka 30-anyos nga babayi: “Kon indi mo pag-ubahon ang imo bayo, indi ka makatigayon sing obra.”

Sa sina man nga tion, ang internasyonal nga magasin sa balita nagbalhag sang artikulo “Ang Kalautan Nagapahinay sa Pagbalhin sang Tsina.” Ini nagreport: “Halos kada adlaw sining karon lang, ang opisyal nga prensa nagasugilanon tuhoy sa pinansial nga pagdaya, ang iban nagadalahig sa mataas sing ranggo nga mga opisyales.”

Sining karon lang, ang New Zealand Herald, sa idalom sang tig-ulo: “Ang Sumpa sang Kalautan Daku nga Katalagman sa ‘Mapalad nga Pungsod,’” nagbalita sang pagtamod sang isa ka nagretiro nga hukom: “Ang Australia, sa tungatunga sang katuigan 1980, manggaranon, masaligon kag malaut.” Ang artikulo nagsambit sa “isa ka sistema sang hustisya nga sang nagligad nga tuig nakakita sa hukom gikan sa pinakamataas nga hukmanan nga nagdangat sa bilanggoan kag nagasulat ini halos adlaw-adlaw sing makatilingala nga pamatuod tuhoy sa ginahimo sang polis.”

Maathag nga inang tanan nga nagaabuso sang gahom nagapasapayan sa prinsipio nga ginsiling ni Cristo: “Wala sing bisan ano nga natabonan nga indi magdayag, kag natago nga indi mahibaloan.”—Mateo 10:26.