Ang mga Ministro sang Ginharian Nagaatubang sang Hangkat
“Nian, ano bala si Apolos? Huo, ano bala si Pablo? Mga ministro nga paagi sa ila nagtuo kamo.”—1 CORINTO 3:5.
ANG awtoridad sang mga ministro sang relihion ginahangkat karon. Labi na nga amo sini bangod ang politikal nga elemento sini nga kalibutan nagaliso batok sa relihion, lakip sa “Cristiano” nga relihion, nagakabig sini subong nagapangwarta nga daya. Bisan ang mga gradwado sa relihioso nga mga seminaryo wala ginkabig subong awtorisado nga mga ministro kag gindumilian sila sa mga pungsod nga nangin batok sa relihion. Huo, ang bug-os kalibutan nga emperyo sang butig nga relihion ginasalakay kag yara sa katalagman nga salakayon sa bug-os nga duta nga magakahulugan sang iya kahapayan. Gintagna ini sang balaan nga Awtor sang matuod nga pagsimba kag gintangdo ang iya natalana nga tion para sa katumanan sang iya tagna. Ang mga tinuga sa bug-os nga uniberso magabenepisyo gikan sa sining makatilingala nga hitabo!
2 Apang, ang indi pagkarelihioso indi magapabilin sing madugay sa pagdominar sa duta, apang ang ginbindikar nga Manunuga sang uniberso magapabilin! Huo, kag ang matuod nga relihion sining wala sing kamatayon kag Labing Mataas nga Dios magapabilin! Bangod sini, bisan pa ginapanghiwala sang binilyon ka tawo sang kalibutan ang mga katunayan, karon mismo ang nagabuhat sang matuod nga pagsimba sa Dios buhi kag aktibo sa duta. Ang masunod siniglo na sing edad nga pamulong matuod karon: “Ang iya dimakita nga kinaiya makita sing maathag kutob sa pagtuga sang kalibutan, bangod nahantop sila sing maathag sa mga butang nga nahimu, bisan ang iya walay katapusan nga gahom kag pagka-Dios, gani wala sila sing balibad.”—Roma 1:20.
3 Sang ginsulat ina nga pinamulong sang nahaunang siglo sang aton Kumon nga Dag-on, si Jehova nga Dios may mga ministro sa duta. Sa amo si apostol Pablo makasulat: “Nian, ano bala si Apolos? Ano bala si Pablo? Mga ministro nga paagi sa ila nagtuo kamo, suno sa ginhatag sang Ginuo sa tagsatagsa. Ako nagtanum, si Apolos nagbunyag, apang ang Dios nagpatubo.”—1 Corinto 3:5-9.
4 Si Jehova may mga ministro man sa duta karon. Apang wala niya ginagamit ang relihioso nga mga ministro sang Babilonia nga Daku, ang bug-os kalibutan nga emperyo sang butig nga relihion. Sa katunayan, madulaan sila sa ulihi sing trabaho. Mangin amo ina kon ang Babilonia nga Daku mismo pagahapayon. Nagatagna sini, ang Bugna 16:19 nagasiling: “Ang dakung siudad nabahin sing tatlo, kag ang mga siudad sang mga pungsod napukan; kag ang Babilonia nga Daku nadumdoman sang Dios, sa pagpainum sa iya sang tagayan sang kapintas sang iya kasingkal.”
5 Kamusta naman ang mga tawo nga nagapabilin nga matutom nga sumalakdag sang relihioso nga mga sistema nga ginaalagaran sang propesyonal nga mga ministro sang Babilonia nga Daku? Bueno, binagbinaga kon ano ang natabo sadtong gab-i sang 539 B.C.E. sang gindayaw ni Hari Belsasar kag sang iya gin-agda nga mga ginuo ang Babilonianhon nga mga dios sa talalupangdon nga sinalusalo bilang pagpamatok sa naglikop nga mga Medianhon kag Persianhon. Una, ang nagginansal ginpaandaman paagi sa milagro nga sulat sang kamut nga ila nakita sa dingding sang ila ginasalusalohan kag sa pagpatpat nga ila nabatian gikan sa manalagna ni Jehova nga si Daniel. Nian, bangod sang pagkapukan sang Babilonia sadto mismo nga gab-i, ang hari kag ang iban pa nga nagsinalusalo nga nagdayaw sa butig nga mga dios ginpatay sang naglikop nga mga kaaway. (Daniel, kapitulo 5) Ang kaanggid nga kapahamakan nagahulat sa mga ministro kag sa nagapabilin nga matutom sa relihioso nga mga sistema sang Babilonia nga Daku.
Ang mga Ministro sang Dios Hilingagawon nga Kinahanglan
6 Indi maduhaduhaan sing makatarunganon sang bisan sin-o ang katunayan nga nagakabuhi kita karon sa labing ital-ital nga panag-on sang maragtas sang tawo kutob sang tugob-globo nga Anaw sang adlaw ni Noe. (2 Timoteo 3:1-5) Gani importante nga may yara karon matuod nga mga ministro sang Dios ni Noe. Sa pagkamatuod, subong nga si Jehova naghatag sing mga paandam sa katawhan sang panahon ni Noe kag sa mga nagginansal sa sinalusalo ni Belsasar, may yara man Sia hilingagawon nga mensahe para sa tawhanon nga panimalay kutob sang 1914, sang ang nahauna nga kalibutanon nga inaway nagdabdab. Sing aktuwal, sa dakung kasangkaron, mga apat na ka dekada nga ginatudlo sang mga alagad sang Dios ina nga tuig nga nagatanda sang pagtakop sang Panag-on sang mga Gentil, nga nahanungod sini si Jesus nagsiling: “Ang Jerusalem tapakon sang mga Gentil, tubtob nga ang mga panag-on sang mga Gentil matuman.”—Lucas 21:24, King James Version.
7 Mga 53 ka tuig pagkaligad sang 1914, ukon tubtob sa Anum ka Adlaw nga Inaway sang 1967, ang dutan-on nga Jerusalem padayon nga gintapak sang indi Judiyo nga mga pungsod. Apang, maathag nga wala ginapatuhoyan ni Jesus ang karon nga Judiyong Jerusalem kundi kon ano ang ginarepresentar sina nga siudad tubtob sang 607 B.C.E. Kag ano ang ginarepresentar sini? Ti, ang Ginharian ni Jehova nga Dios paagi sa iya gintangdo nga Hari sang harianon nga balay ni David!—Lucas 1:32; 1 Cronica 29:11.
8 Pagaihatag ni Jehova nga Dios kay Jesucristo ang ginharian sang iya ginikanan nga si David. Sa atubangan ni Pilato subong hukom, ginsiling ni Jesus nga ang Iya Ginharian indi iya sini nga kalibutan, nagakahulugan nga mangin langitnon ini. (Juan 18:36) Sing makatarunganon, nian, ang palaabuton nga paglingkod ni Jesus sa Ginharian sa pagtakop sang Panag-on sang mga Gentil mahanabo sa dimakita nga mga langit. Sa amo ang paglingkod niya sa trono indi makita sang tawhanon nga mga mata, kag amo ina kon ngaa wala naton sia makita sing literal ukon sang Gentil nga mga pungsod nga napalingkod sa iya makatarunganon, hatag-Dios nga Ginharian sang 1914. Ang mga pungsod wala gid magpati nga natabo ini, walay sapayan sang kamatuoran nga ginabantala ini sang katawhan ni Jehova kutob sang katuigan 1870.
9 Wala nagasapak sa mensahe sang Ginharian, ang mga pungsod nadalahig sa inaway sang tigragas sang 1914. Subong sang gintagna sa Salmo 2:1-12, ginpamatod-an nila ang ila kaugalingon nga mga kaaway ni Jesus, nga nagdumili sa “paghalok” sa bag-o lang ginpalingkod nga Hari subong tanda sang ila pagpasakop kag katutom. Gani, nagakaigo nga tumanon ang Salmo 110:1, 2, diin aton mabasa: “Si Jehova nagsiling sa akon Ginuo: ‘Lingkod ka sa akon tuo tubtob nga mahimu ko ang imo mga kaaway nga imo palatungan.’ Si Jehova magapadala kutob sang Sion sang setro sang imo kusog, nga nagasiling: ‘Gahom ka sa tunga sang imo mga kaaway.’”
10 Ginpakita sang nagapamatok nga mga Judiyo ang ila kaawayon sa mga apostoles ni Jesus sang maglingkod si Jesus sa tuo sang Dios sa paghulat sang tion nga magasugod na sia sa paggahom sa tunga sang iya mga kaaway. (Binuhatan 4:24-26) Busa, ginsugdan sang ginhimaya nga si Jesucristo ang iya paggahom sa tunga sang iya mga kaaway sang magtakop ang Panag-on sang mga Gentil sang 1914. Gani sa sining ika-20 ka siglo, subong sang nagligad, sa tunga man sang mga kaaway nga si Jehova may mga manugdala sang iya mensahe, ang iya matuod nga mga ministro sang Ginharian. Mga saksi niya sila.—Isaias 43:10-12.
Pagpangapin sa Aton Kalipikasyon Subong mga Ministro
11 Sa tanan nga tion, kinahanglan nga pangapinan sang gintangdo sing tunay sang Dios nga mga ministro sang Ginharian ang ila awtorisasyon para sa ministeryo. Matuod gid ina sa mga Saksi ni Jehova sa sining ika-20 ka siglo. Ang ila kalipikasyon subong gintangdo nga mga ministro sang Dios ginahangkat kag wala ginapatihan. Ni sin-o? Labi na sang mga gradwado sa teolohiko nga mga seminaryo sang Cristiandad nga nakabaton sang sertipiko sang ordinasyon kag nangin ginabayaran nga mga klerigo. Ginkabig nila ang ila kaugalingon nga nakabutho kag kalipikado nga mangin eksklusibo nga propesyonal nga mga ministro sang Dios sang Biblia.
12 Amo man sini ang natabo sang nahaunang siglo C.E. Sa Romanong probinsia sang Galacia, bisan ang kalipikasyon sang inspirado nga manunulat sang katunga sang mga tolon-an sang Cristianong Griegong Kasulatan subong apostol ni Jesucristo ginhangkat, kay ginduhaduhaan ang pagkamaminatud-on sang gintudlo niya nga Cristianismo. Gani naobligar sia nga silingan ang mga taga-Galacia: “Natingala ako nga naghalin kamo sing tama kadali gikan sa Isa nga nagtawag sa inyo sa dibagay nga kaluoy ni Cristo kag nagaliso sa tuhay nga maayong balita. Indi nga may iban nga maayong balita; kundi may pila nga nagagamo sa inyo kag buot magpatiko sang maayong balita ni Cristo. Apang, bisan kami ukon ang anghel gikan sa langit magwali sa inyo sang maayong balita nga tuhay sa amon ginwali sa inyo, magmangin pinakamalaut sia. Subong sang sa siling namon anay, amo man ginasiling ko liwat karon, Kon ang bisan sin-o nga tawo nagawali sa inyo sang maayong balita nga tuhay sa nabaton ninyo, magmangin pinakamalaut sia.”—Galacia 1:6-9.
13 Matuod, wala maton-an sina nga manunulat, nga si apostol Pablo, ang Cristianong mga panudlo paagi sa personal nga pagpakigsugilanon kay Jesucristo ukon sa Iya 12 ka apostoles. Sang ulihi, naghinguyang matuod sing pila ka tion si Pablo upod kay apostol Pedro, ukon Cefas. (Juan 1:42; Galacia 1:18, 19) Apang bilang pagpangapin sa iya pagkanangin kalipikado nga ministro sang maayong balita gikan sa Dios paagi kay Cristo, masilingan ni Pablo ang dimationg nga taga-Galacia nga mga Cristiano: “Huo, sang nahantop nila ang dibagay nga kaluoy nga ginhatag sa akon, si Santiago kag si Cefas kag si Juan naghatag sa akon kag kay Bernabe sang tuo nga kamut sang pagpakig-ambit agod nga magkadto kami sa mga Gentil kag sila sa mga sirkunsidado.” (Galacia 2:9) Gani yadtong mga taga-Galacia mahimu nga namangkot: Kon ginkilala sang mga apostoles ni Jesus nga sanday Pedro, Santiago, kag Juan si Pablo subong manugdala sang matuod nga maayong balita, ano ang sadsaran naton nga hangkaton ang iya mensahe kag pahilayuan ini?
14 Apang kamusta ang katawhan ni Jehova karon? Bueno, sanglit ang isa ka tawo kaangay ni Pablo obligado sa pagpangapin sang iya mga kalipikasyon subong ministro sang Dios kag ni Cristo, ngaa makibot kita kon kita, subong dedikado, bawtismado nga mga Saksi ni Jehova, ginahangkat kag dapat pangapinan ang aton tindog subong mga ministro sang Ginharian? Siempre pa, subong sa kaso ni Pablo, inang wala sing sadsaran nga paghangkat sa aton mapamatod-an nga wala sing pulos.
Bisan si Jesus Ginhangkat
15 Si Ginuong Jesucristo mismo ginhangkat kag gin-atubang sang pagkaindi handa sang iya mismo katawhan nga batunon sia subong awtorisado nga ministro sang Dios. Halimbawa, aton mabasa: “Sang nagahinunga na ang piesta [sang mga tabernakulo], si Jesus nagtaklad pa templo kag nagpanudlo. Ang mga Judiyo natingala sini, nga nagasiling: ‘Paano bala nga nakahibalo ining tawo sang kaalam, nga wala gid sia makatuon?’” Gin-atubang ni Jesus ina nga hangkat, nga nagsiling: “Ang akon ginatudlo indi akon, kundi iya sang nagpadala sa akon. Kon ang bisan sin-ong tawo buot maghimu sang Iya kabubut-on, makahibalo sia kon ang panudlo gikan sa Dios ukon nagpamulong ako gikan sa akon kaugalingon. Ang nagapamulong sa iya kaugalingon nga pagbulut-an nagapangita sang iya kaugalingon nga himaya; apang ang nagapangita sang himaya sang nagpadala sa iya matuod, kag walay kabutigan sa iya.”—Juan 7:14-18.
16 Gintamod sang relihioso nga mga lider sang Judaismo si Jesus subong isa ka taga-Galilea lamang. Sa pagkamatuod, wala sila maghunahuna nga indi sia makahibalo magbasa bangod wala sia makaeskwela, kaangay halimbawa sa teolohiko nga seminaryo. Ginpakita na sa ila ni Jesus nga makabasa sia sang teksto sa Hebreong Kasulatan. (Lucas 4:16-21) Ang indi mabaton sang mga Judiyo sang Judea kag Jerusalem amo nga ining isa anay ka panday indi isa ka teologo kag indi mabilang upod sa mga escriba, mga Fariseo, kag mga Saduceo sang ila pungsod. Ngaa, nian, maisog nga makasiling sia nga nahibal-an niya ang buot silingon sang Hebreong Kasulatan kag kon paano ini naaplikar, nagahambal nga may awtoridad subong sang ginhimu niya? Amo ini ang naghimu sa mga Judiyo nga tuman ka bungol sa espirituwal agod pamatian ang mensahe sang balaan nga kamatuoran. Tuman sa ila ka bugalon sa pagbaton sa kon ano ang naghalin sa isa ka tawo nga wala makagradwar sa teolohiko nga eskwelahan.
“Tudloan ni Jehova”
17 Ginpasapayanan sadtong maalam sa kalibutan nga mga Judiyo ang Isa nga nagatudlo kay Jesus. Ti, ang kalantip mismo ni Jesus subong manunudlo naghalin sa “labing daku nga manunudlo sa tanan,” si Jehova nga Dios! (Job 36:22, Today’s English Version) Nagapatuhoy sa Dios sa sining kapasidad, si Jesus nagsiling: “Kon mabayaw ninyo ang Anak sang tawo, nian mahibaloan ninyo nga ako amo sia, kag nga ako wala nagahimu sang bisan ano sa akon kaugalingon nga pagbulut-an; kundi suno sa gintudlo sang Amay ginapamulong ko ining mga butang.” (Juan 8:28) Gani ginpamatod-an ni Jesus ang iya kaugalingon nga amo ang labing maayo nga estudyante sa bug-os uniberso nga eskwelahan sang labing mataas nga Manunudlo. Kadayawan ini sa Isa nga nagtudlo. Indi katingalahan nga ang mga taga-Nasaret nagsiling tuhoy sa ila anay kasimanwa: “Diin bala nagkuha ining tawo sining kaalam kag mga buhat nga gamhanan?”—Mateo 13:54.
18 Agod mahangpan ang Biblia, luyag kag kinahanglan naton ang labing maayo nga manunudlo, Kag ina nga manunudlo amo ang Manug-inspirar sinang dimatupongan nga Tolon-an. Nagahambal sa sadtong mga katapo sang dimakita, dutan-on nga organisasyon sinang Manunudlo sadtong tion nga nagkabuhi sia sa duta, si Jesus nagsiling: “Walay tawo nga makakari sa akon kon indi sia pagbuyokon sang Amay, nga nagpadala sa akon; kag banhawon ko sia sa katapusan nga adlaw. Nasulat na sa mga Manalagna, ‘Kag tudloan sila tanan ni Jehova.’ Ang tagsatagsa nga nakapamati kag nakatuon sa Amay nagakari sa akon.” (Juan 6:44, 45) Ginkutlo didto ni Jesus ang Isaias 54:13, nga mabasa: “Ang tanan mo nga anak tudloan ni Jehova, kag mangin daku ang paghidait sang imo mga anak.”
19 Walay sapayan, mamangkot kita: Kay sin-o “mga anak” ang “tudloan ni Jehova”? Inang matagnaon nga saad ginpanaad sa malaragwayon nga “babayi,” ang palaabuton nga iloy sang “mga anak,” ukon kabataan. Ining “iloy” amo ang isa nga ginpatuhoyan sang Isaias 54:1, diin nagasiling: “‘Mag-amba, O baw-as, ikaw nga wala mag-anak! Mag-amba kag magsinggit sing mabaskog, ikaw nga wala pagsakiti sa pag-anak, kay madamu pa ang mga anak sang binayaan sang sa mga anak sang nakasal nga asawa,’ siling ni Jehova.”
20 Sanglit si Jehova amo ang Isa nga nagapakighambal sa sining “babayi” kag mangin Manunudlo sang iya “mga anak,” sia man ang iya malaragwayon nga Bana, kag sia amo ang iya katulad babayi langitnon nga organisasyon. Ang iya “mga anak,” ukon kabataan mga estudyante sang “labing daku nga manunudlo sa tanan.” Sa pagkamatuod, importante nga yadtong “mga anak,” ang hinaplas nga mga sumulunod ni Jesus, kag ang ila mga kaupdanan, ang “dakung kadam-an,” padayon nga magaaplikar sang instruksion nga ginhatag ni Jehova. (Bugna 7:9) Amo gid ina ang isa ka paagi nga mapamatian ang laygay ni Pablo: “Usisaa ninyo ang inyo kaugalingon kon yara kamo sa pagtuo. Tilawi ninyo ang inyo kaugalingon.” (2 Corinto 13:5) Kon ang dedikado, bawtismado nga mga Cristiano padayon nga magahimu sini kag magapabilin nga makugi nga mga estudyante sang labing daku nga Manunudlo, kalipikado sila nga mangin mga ministro sang Ginharian nga awtorisado ni Jehova. Tan-awon naton sa masunod kon paano ginapamatod-an sang mga ministro sang Dios ang ila kalipikasyon.
Ano ang Masiling Mo?
◻ Paano mo mapamatod-an nga si Jehova may mga ministro sa duta?
◻ Ano ang ginarepresentar sang Jerusalem nga “tapakon sang mga Gentil”?
◻ Bangod wala pagsapaka sang pungsod ang Ginharian, ano ang ginhimu ni Jesus?
◻ Ngaa indi makatilingala nga ang ministeryal nga tindog sang mga Saksi ni Jehova ginahangkat?
◻ Ano ang napasapayanan sang Judiyong relihiosong mga lider nga naghangkat sa ikasarang sa pagpanudlo ni Jesus?
[Mga Pamangkot sa Pagtinuon]
1. (a) Sing relihioso, ano ang ginaduhaduhaan karon, kag ngaa? (b) Ano nga emperyo ang nabutang sa katalagman, kag ano ang mahanabo sa sini?
2. Tuhoy sa relihion, ano ang magapabilin kag ano ang indi?
3, 4. (a) Paano mapamatod-an nga si Jehova may mga ministro sa duta? (b) Paano naton nahibaloan nga ang relihioso nga mga ministro sang Babilonia nga Daku madulaan sa ulihi sing trabaho?
5. Ano ang natabo sa dumaan nga Babilonia sang 539 B.C.E., kag kamusta ang mga ministro kag ang iban pa nga sumalakdag sang mga relihion sang Babilonia nga Daku?
6. (a) Sa sining ital-ital nga panag-on, dapat nga may ano ang Dios para sa tawhanon nga panimalay? (b) San-o nagtakop ang Panag-on sang mga Gentil, kag ano ang ginasiling ni Jesus tuhoy sini?
7. (a) Tubtob san-o gintapak sang indi Judiyo nga mga pungsod ang dutan-on nga Jerusalem? (b) Ano ang ginapatuhoyan ni Jesus sang naghambal sia nga “tapakon sang mga Gentil” ang Jerusalem?
8. Kay sin-o ginhatag ni Jehova ang ginharian ni David, kag ngaa indi makita sang mga tawo ang gintagna nga paglingkod sa trono?
9. (a) Ano ang ginhimu sang mga pungsod nga wala nagasapak sang mensahe sang Ginharian? (b) Bangod sang ginhimu sang mga pungsod sang 1914, ano ang nangin nagakaigo?
10. (a) Sa idalom sang anong mga kahimtangan nagsugod si Jesus sa paggahom sang 1914? (b) Sin-o ang nagarepresentar kay Jehova sa ika-20 ka siglo?
11. Sin-o ang naghangkat sang awtorisasyon sang mga Saksi ni Jehova subong gintangdo sang Dios nga mga ministro sang Ginharian?
12. Ang awtorisasyon sang sin-ong kilala nga nahaunang siglo nga Cristiano ang ginhangkat, kag paano tamdon ang bisan sin-o nga nagadala sang tuhay nga maayong balita?
13. Ngaa wala pagduhaduhai sang mga taga-Galacia ang awtoridad ni Pablo?
14. Ngaa indi makatilingala nga ang ministeryal nga tindog sang mga Saksi ni Jehova ginahangkat?
15. Sin-o, nga mas mataas sing ranggo sang sa mga apostoles, ang ginhangkat man ang iya awtoridad sa pagpanudlo, kag sin-o ang naghatag sa iya sang iya awtoridad?
16. Ngaa ang relihiosong mga lider sang Judaismo nagbatyag nga may rason sila sa pagduhaduha sa ikasarang sa pagpanudlo ni Jesus?
17. May kaangtanan kay Jesucristo, ano nga Manunudlo ang napasapayanan sang Judiyong relihioso nga mga lider, kag ano nga sahi sang estudyante si Jesus?
18. (a) Ano nga sahi sang manunudlo ang luyag naton? (b) Ano ang ginsiling ni Jesus tuhoy sa labing daku nga Manunudlo kag yadtong gintudloan Niya?
19. Kay sin-o “mga anak” ang tudloan ni Jehova?
20. Tuhoy sa 2 Corinto 13:5, ano ang dapat nga himuon sing padayon sang dedikado nga mga Cristiano, kag ano ang kahilabtanan sini sa ila kalipikasyon subong mga ministro sang Ginharian?