Ang Kabuhi kag Ministeryo ni Jesus

Ginpaugdaw ni Jesus ang Kasubo sang Balo

SA TAPOS maayo ang suluguon sang kapitan, si Jesus nagkadto sa Nain, ang siudad nga kapin sa 20 ka milya (32 km) pa bagatnan-aminhan sang Capernaum. Gin-updan sia sang iya mga disipulo kag sang isa ka dakung kadam-an. Ayhan mga sirom na sang makalab-ot sila sa ilaya sang Nain, diin nasugata nila ang isa ka lubong. Ang bangkay sang pamatan-on nga lalaki ginadala paguwa sa siudad agod ilubong.

Ang kahimtangan sang iloy masubo gid katama, bangod isa sia ka balo kag amo ini ang iya bugtong nga anak. Sang mapatay ang iya bana, naumpawan sia sa katunayan nga may anak sia. Ang iya mga paglaum, mga handum, kag mga ambisyon nahugod sa buwas-damlag sang iya anak. Apang karon wala sia sing nakita nga kaumpawan. Daku gid ang iya kalisud samtang ginaupdan sia sang madamo nga tawo pakadto sa duog nga lulubngan.

Sang makita ni Jesus ang babayi, naluoy sia sa iya. Gani sing mapinalanggaon, apang sing malig-on nga nagapakita sing pagsalig, nagsiling sia sa iya: “Dili maghibi.” Ang iya ginhimo kag ginbuhat nagganyat sa igtalupangod sang kadam-an. Gani sang nagpalapit sia kag nagtandug sang liyaliya nga ginahamyangan sang bangkay, ang mga nagapas-an nagdulog. Ayhan nagapalibog ang tanan kon ano ang himuon niya.

Matuod nga yadtong mga kaupod ni Jesus nakakita sa iya nga nag-ayo sing milagruso sa madamong tawo nga masakiton. Apang wala pa nila sia makita nga nagbanhaw kay bisan sin-o gikan sa minatay. Mahimo bala niya ina? Nagapatungod sa bangkay, si Jesus nagsugo: “Pamatan-on, nagasiling ako sa imo, Bangon ka!” Kag ang patay nagbangon! Nagsugod sia sa paghambal, kag ginhatag sia ni Jesus sa iya iloy.

Sang makita sang mga tawo nga buhi matuod ang pamatan-on, nagsugod sila sa pagsiling: “Isa ka dakung manalagna naglutaw sa tunga naton.” Ang iban nagsiling: “Ang Dios nagduaw sang iya katawhan.” Madasig nga naglapnag ang balita nahanungod sining makatilingala nga buhat sa bug-os nga Judea kag sa bug-os nga palibot nga teritoryo.

Si Juan Bautista yara gihapon sa bilanggoan. Apang ang iya mga disipulo nagareport sa iya tuhoy sining tanan nga mga butang nga nakita nila nga ginahimo ni Jesus. Ano ang sabat ni Juan? Kag ano ang sabat sang madamo pa nga iban sa mga lugar nga ginhimoan ni Jesus sang iya mga milagro? Ang amon masunod nga guwa magasabat sina. ­Lucas 7:11-18.

◆ Ano ang natabo samtang nagahinampot si Jesus sa Nain?

◆ Paano naapektohan si Jesus sa iya nakita, kag ano ang ginhimo niya?

◆ Ano ang reaksion sang mga tawo sa milagro ni Jesus?