“Tilipon Kamo”
GINHAMBAL ni Jeremias ang mga pulong sa ibabaw, sang may kalamidad nga nagaatubang sa dumaan nga Jerusalem kag Juda. Hilingagawon sadto nga ang mahinulsulon kag matuod nga mga sumilimba ni Jehova matipon para sa kaluwasan. Sa karon man, ang apostata nga Cristiandad malapit na malaglag sa “daku nga pagkahulog,” upod sa bug-os pangkalibutan nga emperyo sang dimatuod nga relihion. Bisan pa ang tuig naglawig pa kutob sang 1914, sang ang mga klero sang Cristiandad nagsakdag sing bug-os sa nagadanaw nga dugo sang Inaway Kalibutanon I, “ang nagadabdab nga kaakig ni Jehova wala mag-ugdaw” subong sang tion sang paghari sang mga hari sang Juda kutob sa nakasala sa dugo nga si Manases tubtob sa wala sing pagtuo nga si Sedequias. Dapat karon pangitaon sang mga mahagop sang duta si Jehova agod maluwas.—Jeremias 4:5-8; 2 Hari 24:3, 4; Sofonias 2:2, 3.
Paano ginahatag ang modernong-adlaw nga paandam? Ang magasin nga imo karon ginabasa nangin isa ka epektibo nga instrumento. Sing padayon kutob sang 1879, ining magasin, kaangay sang bantay sa iya lalantawan, nagpatalupangod sang nagapakari nga pagkapukan sang dimatuod nga relihion nga ginlaragway sang Babilonia, kag sang mahidaiton nga Milenyo nga Paghari ni Cristo nga magasunod. (Isaias 21:6-12; Bugna 20:2, 3; 21:1-4) Kutob sa una nga guwa sini nga 6,000 ka kopya sa Ingles, nag-uswag ini tubtob Ang Lalantawan—Nagabantala sang Ginharian ni Jehova ginasirkular karon sa bug-os nga globo sa 12,315,000 ka kopya sa 103 ka hambal. Dugang pa, ang pormat sini ginpauswag sa pagligad sang tinuig. Ginaimprinta na ini karon sa apat ka duag sa 21 ka hambal, ang iban nga edisyon nagaguwa man sa makagalanyat nga porma, subong nagakaigo sa importante nga misyon sang magasin.
Bangod sang pag-uswag sang produksion, nangin kinahanglanon nga himuon ang pag-imprinta sa nanuhaytuhay nga duog, amo kon ngaa ginadumalahan ini karon sang mga pabrika nga ginapalakat sang Sosiedad sa 35 ka sanga sa guwa sang Estados Unidos. Dugang pa, kutob sang Enero 1987, ang mga edisyon sang amon kaupod nga magasin nga Awake! nga ginaimprinta sa Estados Unidos, Brazil, Britanya, Canada, Denmark, Finland, Alemanya, Italya, kag Hapon magaguwa sa apat ka duag. Sa Estados Unidos nangin posible ini sang gin-instalar ang tatlo ka MAN-Roland high-speed nga rotary press para sa magasin sa pabrika sang Watchtower Farms sa Wallkill, Nueva York.
Ang sanga sang Sosiedad sa Hapon nagagamit man sing tatlo ka high-speed nga makina sa pagpatubas sing mga Biblia, mga libro, kag mga magasin sa pila ka hambal sa Asia. Dugang pa, ining sanga maalwan man nga nagsupurta sang mga sanga sa Australia, Korea, kag Bagatnan nga Aprika sa pagsangkap sa ila sing four-color nga mga makina, amo kon ngaa ining tatlo ka sanga nagauswag karon padulong sa pag-imprinta sing apat sing duag nga magasin.
Sa sulod sang nagligad nga tinuig, ang mga sanga sang Sosiedad nagpaambitay sing manggad, nga ginpangunahan sang ulong-talatapan sang organisasyon. Sa amo madamo ang nabuligan suno sa kinahanglanon, kon bala sa pagtukod ukon sa pagpasangkad sang mga tinukod sang sanga, pagsangkap sini, ukon paggasto para sa importante gid nga hilikuton sa pagbantala sa latagon. Ining proseso sa “pag-alangay,” nga nangin posible bangod sang maalwan nga mga amot sang mga Saksi ni Jehova sa bug-os nga duta, bugana nga ginpakamaayo ni Jehova.—2 Corinto 8:12-15.