Brosyur nga May Bag-o nga Dagway

ANG impormasyon sa masunod nga artikulo ginpresentar sa bug-os nga duta sa tion sang 1986 nga “Balaan nga Paghidait” nga Distrito nga Kombension sang mga Saksi ni Jehova. Ginasumaryo namon diri ang dugang pa makawiwili nga mga komento nga ginhimo sang humalambal:

“Toloka! Ginahimo Ko nga Bag-o ang Tanan nga Butang.” Amo ina ang titulo sang isa ka polyeto nga ginbalhag sang Watch Tower Society sadto sang 1959. Ini nga sahi sang polyeto ginpangabay sang mga misyonero sa Hapon. Nabatyagan ang pagkinahanglan didto sa isa ka publikasyon nga magapresentar sang mensahe sang Ginharian sa isa ka maathag kag simple nga paagi para sa kaayuhan sang katawhan nga wala sing ihibalo sa Biblia. Sa idalom sang pagdumala sang Watch Tower Society, kapin sa 30 ka misyonero ang nagpakigbahin sa pagkomposo sang polyeto. Nahatag bala sining bag-o nga polyeto ang kinahanglanon sang ginhimo ini nga una nga instrumento sa pagsugod sing bag-o nga mga pagtuon sa Hapon?

Ang mga resulta nagahambal para sa ila kaugalingon. Sang ginpaguwa ang “Toloka!” nga polyeto, ang kataason sang manugbantala sang Ginharian sa Hapon 1,390. Sa karon, 114,480 ka manugbantala ang kataason. Halos tanan sini sa ila una nga ginton-an sa Biblia paagi sa “Toloka!” nga polyeto. Sa nagligad nga 27 ka tuig, kapin sa 8,750,000 ka kopya sining polyeto ang napahamtang sa Hapon lamang nga hambal. Kag sa nagligad nga 20 ka tuig, nagreport ang Hapon sing bag-ong kataason sang mga manugbantala sang Ginharian sa kada bulan luwas sa duha. Bisan pa wala sing duhaduha nga may iban pa nga kabangdanan sa sining maayong pag-uswag, indi maduhaduhaan nga ang daku nga kabangdanan amo ang paggamit sa “Toloka!” nga polyeto sa pagsugod sang pagtuon sa Biblia.

Ginpasibu na karon sa tion ining polyeto, suno sa mga kinahanglanon karon, kag ginpaguwa sa “Balaan nga Paghidait” nga kombension subong kadaku sa magasin nga brosyur nga may 32 ka pahina. Gindugang ang bag-o nga bahin nga may topiko “Kalautan—Ngaa Ginapahanugotan Ini sang Dios?” Dugang pa, ang nagahingapos nga mga parapo ginliwat agod palig-unon ang estudyante nga makig-upod sa organisasyon ni Jehova. Ang publikasyon nagaguwa karon nga may dalagku, madali basahon nga letra kag may pila ka makatudlo nga mga ilustrasyon. Ang matahom kag bag-o nga hapin sini nga apat sing duag ginlaragway sa ginpagamay nga kadakuon sa pihak nga bahin.

Sa Sidlangan lamang bala gamiton ining bag-o nga brosyur, “Toloka!” Ginahimo Ko nga Bag-o ang Tanan nga Butang!,”? Wala sing duhaduha nga mangin epektibo gid ini didto. Apang, ginapatihan nga ang “Toloka!” nga brosyur mangin mapuslanon sa bug-os nga kalibutan sa pagsugod sing pagtuon sa Biblia. Halos 30 ka tuig na ang nagligad sugod sang una nga ginbalhag ang orihinal nga polyeto. Sadto nga tion, ang ihibalo sa Biblia nagnubo gid, bisan sa kadutaan nga nagapangangkon nga Cristiano. Sa baylo nga mamati sa ila mga ginikanan sing bantog nga mga sugilanon gikan sa Biblia, ang bag-ong kaliwatan nagdaku nga ang ila mga mata kag mga dulunggan nagatapik sa telebisyon, nga ginapasulod ang bisan ano nga matanyag sang kalibutan. Ini, upod ang iban pa nga pangganyat sang buang-sa-kalipay nga kalibutan, nagkuha sang hamili nga mga oras nga mahimo gamiton kuntani para sa espirituwal nga pagtubo. Diutay lamang ang nahibaloan sang modernong kaliwatan, sa Cristiandad ukon sa iban nga duog, nahanungod sa Pulong sang Dios. Kinahanglan sini ang ‘gatas sang Pulong,’ nga maathag nga ginaunod sa “Toloka!” nga brosyur.—Hebreo 5:12.

Sa bug-os nga kalibutan, may yara mga tawo nga ang ila tagipusuon may huyog sa pagkamatarong kag malipay sa pagtuon kon paano sila makilal-an upod sa “dakung kadam-an” nga maluwas sa Armagedon. (Bugna 7:9, 14) Sa aton pag-alagad sa balay kag balay, mahimo masapwan naton nga madamo ang naluyag sa matahom nga hapin sang brosyur kag sang makabibihag nga paglaragway sang Paraiso sa nagabukas nga mga parapo. Sa pagduaw liwat, sarang naton magamit ang madamo nga kasulatan nga nasambit bilang supurta sa amo nga mga parapo sa pagpakita nga ining paglaum indi lamang damgo. Nian, paagi sa isa ka regular nga pagtuon sa Biblia, nga ginagamit ang “Toloka!” nga brosyur, mabuligan naton sila sa pagsugod sa dalanon padulong sa kabuhi. Subong sang ginsiling ni Jesus sa pangamuyo sa iya Amay: “Ini nagakahulugan sing kabuhi nga walay katapusan, nga pagkilalahon ka nila, ang lamang matuod nga Dios, kag ang isa nga imo ginpadala, si Jesucristo.”—Juan 17:3.

Kabay nga gamiton naton tanan sing makugi ang “Toloka!” nga brosyur sa pag-iwag sang kamatuoran sang Ginharian, ang “dakung kadam-an” nagabuylog sa nagkalabilin nga mga hinaplas sang harianon nga pagkasaserdote sa ‘pag-iwag sang ila kapawa sa atubangan sang mga tawo.’ (Mateo 5:16) Kabay nga mahimaya sing bug-os ang kilala nga ngalan sang Soberanong Ginuong Jehova. Kabay nga ipakita sa tanan nga tion nga ang mga saad ni Jehova nga Dios, nga Manunuga sang langit kag duta, “masaligan kag matuod.” Sia ang nagasiling gikan sa iya trono sa langit: “Toloka! ginahimo ko nga bag-o ang tanan nga butang.”—Bugna 21:5.

Ang brosyur nga “Toloka! Ginahimo Ko nga Bag-o ang Tanan nga Butang” upod ang kaupod nga brosyur nga The Government That Will Bring Paradise kag ang The Divine Name That Will Endure Forever ipadala sa imo kon pangabayon mo, bilang baylo sa amot nga ₱12.60. Mag-order palihog gikan sa nagakaigo nga direksion nga nalista sa pahina 2.