“Dayawa ang Ngalan ni Jehova”

Sang Septiembre 2, 1986, ang Demokratiko nga Republika sang Alemanya (Nasidlangan nga Alemanya) nagpaguwa sing serye sang mga selyo nga nagalarawan sang maragtason nga sensilyo sang Alemanya. Ang una sa mga serye makita sa ubos. Ang sensilyo nga ginalarawan napetsahan sing 1633. Apang, ang labi nga makawiwili amo ang apat ka nagaidlak nga Hebreong karakter nga natigib sa sensilyo. Ano ang kahulugan sini? Ang Briefmarkenwelt, isa ka Aleman nga magasin nahanungod sa pagtipon sang lainlain nga sahi sang selyo, nagasiling: “Ang duha ka anghel, nga nagakabit sa ibabaw sang larawan sang banwa, may ngalan nga Jehova sa tunga nila.”

Sang ika-16 kag ika-17 ka siglo, ginahimo sing kinaandan ina nga mga sensilyo sa Europa. Ang Aleman nga ensiklopedia nga napetsahan 1838 nagasiling: “Ang termino nga Je­ho­vah-coins nagalakip sang tanan nga sensilyo kag medalya nga nagalarawan sang tinaga יהוה, ang Jehova, nga nagaidlak, bisan nagaisahanon ukon kaupod sang tinaga nga Jesus, . . . sing masami upod ang motto nga nagapatuhoy sa sini; bangod makita ini sa madamong Ta­lers [pilak nga mga sensilyo nga ginpaguwa sang lainlain nga estado sa Alemanya sang ika-15 kag ika-19 ka siglo], ginklase sila sa idalom sang ngalan nga Je­ho­vah-ta­lers.”

Busa, ang kalabanan nga mga tawo nga nagagamit sang mga selyo wala makahibalo nga ang Hebreong mga letra nagarepresentar sa ngalan sang Dios. Apang ang mga Saksi ni Jehova nalipay sa pagpakita sini nga bahin sang selyo kag nagapaathag sang kahulugan kag importansia sang ngalan ni Jehova. Gani, gikan sa wala ginapaabot nga paagi nabuligan sila sa ‘pagdayaw sa ngalan ni Jehova.’—Salmo 135:1.