Madulom Bala ang Palaabuton sang mga Tigulang?

“NANGIN pamatan-on ako,” siling ni Hari David. “Kag karon tigulang na.” (Salmo 37:25) Sang panahon sang Biblia ang mga tigulang nga ginatahod minoridad lamang. Apang, kon magpadayon ang huyog sa karon, mahimo nga sa dili madugay ang mga tigulang indi na minoridad kag wala man ginatahod.

Sa Estados Unidos lamang, ginabanta nga 26 milyones ka tawo ang lampas na sa 65 anyos. Sa tuig 2040 mahimo nga ining kadamuon magdamo sing tatlo ka pilo! Suno sa magasin nga Asiaweek, ang iban nga mga pungsod sang Asia “nagapaabot nga ang kadamuon sang ila mga tigulang magadoble sa magaabot nga napulo ka tuig.” Apang, ang posibilidad sa palaabuton nga halos malabawan sang mga tigulang ang mga pamatan-on sa kadamuon wala nagapatimaan sing maayo para sa mga tigulang. Madamo na sa karon ang nagakabuhi sa kaimulon kag wala sing balay. Ang iban ginapabay-an tubtob magluya sa mga ospital ukon sa mga puluy-an para sa mga tigulang—isahanon, wala ginaduaw, kag wala ginaatipan. Ang makapakibot nga mga kaso sang pagpatumbaya kag pag-abuso ginareport bisan sa mga pungsod nga sa diin ang mga ginikanan kinabatasan nga ginatahod.

Si G. M. Ssenkoloto nagsulat para sa magasin nga World Health: “Isa ka tradisyon sa kalabanan nga pungsod sang Aprika, kag sa pagkamatuod sa kalabanan sang Ikatlo nga Kalibutan, nga atipanon sang tagsa ka pamilya ang iya tigulang nga mga babayi. Ang babayi nga wala sing kabataan nga magaatipan sa iya ginaatipan sang mga kaingod ukon sang minuro sa kabilugan.” Apang, nagreport sia: “Nagabalhin ang madugay na nga mga prinsipio. Ang makahalalit nga mga puersa sang ekonomiya, ang sayop nga paggamit sa duna nga mga manggad, ang paghandum sa materyal nga mga butang, ang pagtinguha nga tahuron kag kilalahon—ini tanan nga butang nagauna sa positibo nga mga prinsipio sang tradisyon tuhoy sa pagsakdag sa mga tigulang.”

Sa amo ang mga pulong sang manunulat sa Biblia nga si Agur nagamatuod sa daku nga kasangkaron: “May kaliwatan nga nagapakamalaut sa ila amay kag wala nagapakamaayo sa ila iloy.” (Hulubaton 30:11) Huo, ang mga tigulang ginahulog gikan sa ila anay kahimtangan nga ginapadunggan. Madamo ang nagatamod sa ila subong pabug-at sa katilingban sa baylo nga bulig. Sa daku nga bahin, ang ila palaabuton daw madulom.

Apang, paano ginatamod sang mga Cristiano ang mga may-edad? Ginahuptan bala nila gihapon ang “positibo nga mga prinsipio sang tradisyon” nahanungod sa ila?