Paghalad sa mga Bata—Indi Halin sa Dios
SA GUWA sang kuta sang Jerusalem, sadtong una nga panahon may isa ka lugar nga ginatawag Tofet. Didto anay nga ang apostata nga mga Israelinhon, lakip sanday Hari Ahaz kag Manases, nagbuhat sang makangilil-ad nga batasan sang paghalad sa bata. Sang ulihi, gin-untat sang matutom nga hari nga si Josias ang buhat paagi sa paghimo sa Tofet nga isa ka lugar nga indi nagakabagay para sa relihioso nga mga seremoniya.—2 Hari 23:10; 2 Cronica 28:1-4; 33:1, 6.
Ngaa gintawag ini nga lugar nga Tofet? Ang ginhalinan sang tinaga ginabaisan, apang makawiwili nga talupangdon ang ginsiling sang Judiyong eskolar nga si David Kimhi (c. 1160-c. 1235) nahanungod sa lugar. Nagahinun-anon sang 2 Hari 23:10, diin ginsambit ang Tofet, nagsulat sia: “Ang ngalan sang lugar diin ginapaagi nila [sa kalayo] ang ila mga anak kay Moloc. Ang ngalan sang lugar amo ang Tofet, kag gintawag kuno ini sing amo sini bangod sa tion sang pagsimba nagasaot sila kag nagapatokar sing mga tamburina [Hebreo, tup·pimʹ] agod indi mabatian sang amay ang singgit sang iya bata kon ginapaagi nila sia sa kalayo, kag agod ang iya tagipusuon indi pagtublagon kag kuhaon niya sia sa ila kamot. Kag ining lugar isa ka nalupyakan nga ginapanag-iyahan sang isa ka tawo nga nagahingalan kay Hinnom, kag gintawag ini nga ‘Nalupyakan ni Hinnom’ kag ‘Nalupyakan sang Anak ni Hinnom’ . . . Ginhigkuan ni Josias ina nga lugar, ginhimo ini nga isa ka dimatinlo nga lugar, nga halabuyan sang mga bangkay kag tanan nga higku, agod indi na liwat mag-abot sa tagipusuon sang tawo nga paagihon sa kalayo ang iya anak nga lalaki kag ang iya anak nga babayi kay Moloc.”
Sa moderno nga tion, ang dios nga si Moloc isa na lang ka maragtason nga kalangkag, kag walay duhaduha nga madamo ang nabudlayan sa paghangop kon ngaa ginpatay sang mga tawo ang ila mga anak tungod sa iya. Apang, ang mga hamtong sa karon daw handa gihapon sa pagpatay sa ila mga kabataan kon luyag nila. Sa sining siglo, minilyon ka pamatan-on ang ginhalad sa halaran sang inaway. Kada tuig, dimasugid nga minilyon ka wala mabun-ag nga lapsag ang hungod nga ginapatay sa mga aborsion, madamo sa ila bangod ang pagpanamkon sa ila resulta sang kaswal nga sekso ukon bangod ang pagbun-ag sa ila magaupang sa estilo sang pagkabuhi sang ila mga ginikanan. Busa, ining mga kabataan ginhalad sa mga dios sang seksuwal nga kahilwayan kag materyalismo.
Si Jehova nagsiling nga ang pagsunog sa mga kabataan kay Moloc makangilil-ad. (Jeremias 7:31) Tuhay bala ang pagtamod niya sa wala sing kaluoy nga pagpatay sa mga kabataan sa aton kaliwatan?
[Laragway sa pahina 31]
Paghalad sa bata sa butig nga dios nga si Moloc, subong sang ginlaragway 75 ka tuig ang nagligad sa “Photo-Drama of Creation”
Ang Nalupyakan ni Hinnom karon, nagatan-aw pa nasidlangan