Mga Pamangkot Gikan sa mga Bumalasa

◼ Si Judas bala ang ginapatuhuyan ni Jesus sang ginsilingan niya si Pilato: “Busa ang nagtugyan sa akon sa imo may daku pa nga sala”?​—⁠Juan 19:⁠11.

Mahimo nga daw ginapatuhuyan diri ni Jesus si Judas ukon ang isa ka partikular nga tawo. Madamong may kasal-anan nga mga tawo ang naulamid sa mga hitabo nga nagdul-ong sa pagdala kay Jesus kay Pilato kag pag-atubang sa kamatayon.

Mahimo nga si Judas ang magasulod una sa hunahuna bangod inang malain nga apostol nangin traidor. (Juan 6:​64, 71; 12:​4-6) Nakigkita si Judas sa pangulong mga saserdote, nga maluyag sa ‘pagpatay’ kay Jesus. Ginbayaran nila si Judas sing 30 ka bilog nga pilak agod luiban sia. (Lucas 22:​2-6) Sing dimapangduhaduhaan, nian, nakasala sing daku si Judas kon tuhoy sa kamatayon ni Jesus.

Apang indi lamang si Judas ang nagpahanabo sang kamatayon ni Jesus. Ginsugyot ni Caifas nga mataas nga saserdote ang iban nga ipapatay si Jesus. (Juan 11:​49, 50) Ginsugid ni Mateo nga sang nagligad “ang puno nga mga saserdote kag ang bug-os nga Sanhedrin” nagtagudili kay Jesus, nagpanghikot sila subong isa ka grupo. “Ang tanan nga puno nga mga saserdote kag tigulang sang katawhan nagsinapul batok kay Jesus sa pagpatay sa iya. Kag gingapus nila sia, kag gindala sia kag gintugyan sia kay Pilato nga pangulo puod.” (Mateo 26:​59-65; 27:​1, 2) Dugang pa, sang matukiban ni Pilato nga si Jesus wala sing sala, “ang kadam-an” nagpangabay nga si Barrabas ang buy-an. Sa kabaliskaran, nahanungod kay Jesus nagsinggit sila: “Ilansang sia!”​—⁠Mateo 27:​20-23; Juan 18:⁠40.

Busa mahimo nga indi lamang isa ka ispisipiko nga indibiduwal ang ginapatuhuyan ni Jesus sang magsiling sia kay Pilato: “Busa ang nagtugyan sa akon sa imo may daku nga sala.” (Juan 19:11) Bisan pa si Judas, “ang anak sang kalaglagan,” labi na nga nagpas-an sang daku nga sala, madamo pa nga iban ang nakig-ambit sa sala nga pagpatay kay Jesus. (Juan 17:12) Amo sina kon ngaa sa adlaw sang Pentecostes si apostol Pedro nagpangabay sa mga Judiyo nga maghinulsol sa ila mabug-at nga sala batok sa Anak sang Dios. (Binuhatan 2:​36-38) Ina nga mga Judiyo bahin sang isa ka pungsod nga dedikado sa Dios ni Jesus, si Jehova. Ginhatag niya sa ila ang mga tagna nga nagpakilala kay Jesus subong ang Mesias. Kag nakita sang madamo sa ila ang mga milagro ni Jesus. Gani pat-od nga mas daku ang sala nila sang sa di-Judiyo nga opisyal nga nagpahibalo nga si Jesus wala sing sala.​—⁠Juan 18:⁠38.

◼ Ano ang punto sang magsiling si Jehova kay Ezequiel nga ang iya guya mangin matig-a, kaangay sang mga guya sang mga Judiyo?

Si Ezequiel amo ang manalagna sang Dios, nagaalagad sa tunga sang mga Judiyo nga gindala nga bihag pakadto sa Babilonia. Ayhan naghunahuna ang mga bihag nga si Jehova sa bisan paano gilayon nga magaluwas sa ila bangod sila ang iya pinili nga katawhan. Wala nila pagbatuna ang kamatuoran nga ang natabo sa ila resulta sang iya pagkadikahamuot sa ila.

Busa sang ginsugo ni Jehova si Ezequiel nga “magpamulong sa ila sang akon mga pulong,” indi ini isa ka mahapos nga asaynment. Sa paghanda sa manalagna ang Dios nagpaandam nga “indi sila magpamati sa imo, kay indi sila magpamati sa akon; kay ang bug-os nga panimalay sang Israel may agtang nga bat-olan kag matig-a sing tagipusuon.”​—⁠Ezequiel 3:​4, 7.

Sa sini nga punto ginsilingan sang Dios si Ezequiel: “Yari karon! ginpatig-a ko ang imo guya batok sa ila mga guya kag ginpatig-a ang imo agtang batok sa ila mga agtang. Ginhimo ko ang imo agtang subong sang diamante nga matig-a pa sa santikan. Dili magkahadlok sa ila.”​—⁠Ezequiel 3:​8, 9.

Ang katawhan batinggilan kag mabinatuon. (Ezequiel 2:⁠6) Madaug bala nila ukon mapahog ang mensahero sang Dios? Indi. Bangod ginasakdag sia sang Dios, si Ezequiel indi dapat magmangin mas mahumok sang sa ila. Ang santikan isa ka matig-a katama nga bato, nga mas matig-a pa sang sa salsalon. Kon ang batinggilan kag mabinatuon nga mga Judiyo sarang mapaanggid sa santikan, si Ezequiel amo man. Sing labi pa, mangin subong sia sang diamante, ang pinakatig-a sa mga mineral, tuman ini katig-a nga sarang sini makurisan ang santikan.​—⁠Jeremias 17:​1, 2.

Wala gid ini nagakahulugan nga ang katawhan sang Dios karon dapat magkabig nga maayo ang magmangin matigdas kag disensitibo sa balatyagon sang iban, ukon matig-a sing tagipusuon sa paghimo sang kon ano ang banta nila nga husto. Talupangda kon ano ang ginlaygay ni apostol Pedro nahanungod sa balatyagon: “Kamo tanan mag-isa sing espiritu, mapatugsilingon, mahigugmaon sa kauturan, malulo sa tagipusuon, mapainubuson sing hunahuna, dili magbalos sing malaut sa malaut ukon pasipala sa pasipala, kundi, sa baylo, magpakamaayo.”​—⁠1 Pedro 3:​8, 9.

Ang kaluoy sa iban amo ang isa sa panguna nga mga motibo sa pagpaambit naton sang maayong balita sang Ginharian sa iban. (Mateo 9:​36-38) Apang kon makasugata kita sing dipagsapak, pagsikway, ukon pagpamatok, indi kita mag-untat sa pagbantala sang mensahe sang Dios para sa panahon naton. Nagalakip ina sang pagbantala nga sa dili madugay “nagatimalus sa mga wala nagakilala sa Dios kag sa mga wala nagatuman sang maayong balita sang aton Ginuong Jesus.” (2 Tesalonica 1:​6-9) Indi kita dapat magkahadlok ukon mag-isol. Sa sining kahulugan sarang kita mangin diamante katig-a kaangay kay Ezequiel.