Kahulugan sang mga Balita
Ang mga Gurayguray sa Zebra
Ang “minilyon ka tuig sang ebolusyon” ang naghatag sa mga zebra sang iya mga gurayguray, siling sang Britanikong magasin nga World of Wildlife. Ang rason? Ang iban nga mga sientipiko nagasiling nga ang mga gurayguray nagtuhaw subong pakunokuno agod amligan ang sapat gikan sa mga nagapangaon. Daw nagadugang sing kredibilidad sa sini nga pagtamod amo ang katunayan nga ang mga gurayguray nagapatubas sing nagaburon nga epekto kon tan-awon gikan sa malayo. Apang, indi tanan nga mga tawo sa siensia ang nagaugyon. Si Dr. Gerrie de Graaff, sientipiko nga manuglaygay para sa magasin nga Curtos sang Bagatnan nga Aprika tuhoy sa ilahas nga mga sapat, nagsiling: “Indi naton mahaumhaum nga ginatan-aw sang mga sapat ang mga butang kaangay sang pagtan-aw naton.” Nagapaathag, ginpakita ni de Graff nga ang hublag sang mga zebra wala nagahisanto sa nagapakunokuno nga teoriya sang pagtuhaw sang gurayguray. Ngaa? Bangod ang mga zebra wala nagapanago subong sang mga sapat nga nagadepende sa pagpakunokuno sa duag. Magahod sila kag mapagsik kag madali makita bangod sang paghalab sa mga wayang.
Ginateoriya sang iban nga mga ebolusyonista nga ang madukot nga itom kag puti nga mga gurayguray sang zebra nagatuga sing nagapatalang nga hitsura. Suno kay de Graaff, ang isa ka pangatarungan amo nga “ang nagasalakay nga leon indi makakuha sing isa bangod nagaupod ini sa iban sa panong,” samtang “ang iban nagasiling nga ang leon nasilawan ukon sayop nga nakalkula ang ginahunahuna nga katapusan nga paglumpat sini.” Apang subong sang ginsiling niya, “ini nga mga teoriya napaslawan bangod sang opinyon nga ang mga leon nagapatay sa mga zebra.”
Sa paghinakop, ginbaton ni de Graaff nga, “tubtob karon, wala gid kami makahibalo kon ngaa ang zebra may mga gurayguray.” Apang, ang rason maathag sa mga estudyante sang Biblia. Sa Genesis 1:20-25 ginasugiran kita nga ang tanan nga mga sapat sa duta gintuga sang Dios “suno sa ila mga sahi.” Subong resulta, ang kinaugali nga proseso sa biolohiko ang responsable sa mga gurayguray sa zebra. Ina nga mga gurayguray bahin sang makatilingala nga pagkananuhaytuhay sing desinyo sa pagpanuga sang Dios.
Nagatrabaho nga mga Ministro?
Ang iban nga mga klerigo nagapaabot nga makita ang daku nga pagbalhin sa ila propesyon sa malapit nga palaabuton. Amo sini ang ginpabutyag sang isa ka Luterano nga pastor, si Jean-Pierre Jornod, sa Reformiertes Forum, isa ka Luterano nga balasahon nga ginabalhag sa Switzerland. Nagsiling sia: “Sa karon ginapakot ko nga ang pastor sa tuig 2000 sa kalabanan nga kaso may part-time nga obra dugang sa iya parokya.” Ngaa? Nagdugang sia: “Indi bangod sa pinansial nga mga rason, kundi sing pinakaimportante bangod ang katilingban may dugang nga pagkinahanglan sa mga pastor nga may ihibalo sa matag-adlaw nga pagkabuhi.”
Nagasaysay sing dugang sa sining kinahanglanon, si Jornod nagsiling: “Ang pastor sa tuig 2000 mangin isa ka lalaki ukon babayi nga pamilyar katama sa arte sang komunikasyon. Wala ako nagasiling nga sa sina nga tion wala na sing unod ang mga simbahan, apang ang pastor nga luyag sang mga tawo nga malab-ot magapahilayo sa simbahan, subong nga sing bahin amo ang nagakatabo karon. Busa, ang iya mensahe mangin mas maathag, mas halangpunon, kag mas direkta sa punto.”
Talalupangdon nga ang ginasuholan nga mga manugbantay indi anay kilala sa unang-siglo nga Cristianismo. Si apostol Pablo, halimbawa, nag-aman para sa iya kaugalingon pisikal nga mga kinahanglanon paagi sa isa ka sekular nga trabaho—paghimo sing tolda. Dugang pa, ginlab-ot niya ang katawhan sa tuman ka epektibo nga paagi, paagi sa pagtudlo sa ila “sa dayag kag sa pamalaybalay.” (Binuhatan 18:3; 20:20, 21, 33, 34) Kabaliskaran sa ginasuholan nga mga ministro karon, ang mga gulang, ukon mga manugbantay, sa tunga sang mga Saksi ni Jehova nagasunod gihapon sa sining Makasulatanhon nga sulundan sang unang-siglo nga mga Cristiano.