“Padunggan Ninyo ang Subong Sina nga mga Tawo”

“Kilalaha ninyo ang subong nga mga tawo.”​—⁠1 CORINTO 16:⁠18.

1. Anong sahi sang mga tawo ang ginpadunggan ni apostol Pablo, kag ano ang ginsulat niya tuhoy sa isa sina nga Cristiano?

ANG mga tawo nga labi na nga ginpadunggan ni apostol Pablo amo yadtong handa sa paggamit sing bug-os sang ila kusog para kay Jehova kag sa ila mga kauturan. Tuhoy sinang masigkamanugpangabudlay, si Pablo nagsulat: “Hatagi ninyo sia sing kinabatasan nga pag-abiabi sa Ginuo sa bug-os nga kalipay; kag padunggan ninyo ang subong sina nga mga tawo, kay tungod sa buluhaton sang Ginuo diutay lang sia mapatay, nga nagabutang sang iya kalag sa katalagman.”​—⁠Filipos 2:​29, 30.

2. Kay sin-o kita dapat magpakita sing pinasahi nga patugsiling, kag ngaa?

² Sa karon, sa kapin sa 55,000 ka kongregasyon sang mga Saksi ni Jehova, madamong maayo nga Cristianong mga tawo ang dapat naton apresyahon bangod sang ila mapisan nga pagpangabudlay sa tunga sang ila mga kauturan. Nagapakita nga dapat naton padunggan ina nga mga tawo, si Pablo nagsiling: “Ginapakiluoy namon sa inyo, mga kauturan, nga tahuron ninyo ang mga nagapangabudlay sing lakas sa tunga ninyo kag nagadumala sa inyo sa Ginuo kag nagalaygay sa inyo; kag hatagi sila sing labaw sa kinaandan nga patugsiling sa gugma bangod sang ila buhat. Magpakighidaitay kamo.”​—⁠1 Tesalonica 5:​12, 13.

3. (a) Ano ang magabulig sa aton agod mangin mahidaiton sa isa kag isa? (b) Sa anong bahin dapat magpakita sing huwaran ang mga gulang?

³ Ang nagakaigo nga apresasyon para sa aton tanan nga mga kauturan nga lalaki kag babayi, kag labi na sa mapisan nga mga gulang, walay duhaduha nga isa ka importante nga butang sa mahidaiton nga pagkabuhi sa sulod sang aton mga kongregasyon. Sa sini, subong nga sa tanan nga bahin sang Cristianong pagkabuhi, ang mga gulang dapat mangin “mga huwaran sa panong.” (1 Pedro 5:​2, 3) Apang, samtang ang mga gulang nagakaigo nga ginapaabot nga apresyahon sang mga kauturan bangod sang ila lakas nga pagpangabudlay, dapat man sila magpahamtang sang huwaran sa pagpakita sing nagakaigo nga patugsiling sa isa kag isa.

“Pagpakita sing Kadungganan sa Isa kag Isa”

4, 5. (a) Ano ang nagapakita nga si apostol Pablo nag-apresyar sa mapisan nga mga gulang? (b) Ano ang ginsulat niya sa mga Cristiano sa Roma, kag ngaa ang iya mga pulong labi na nga naaplikar sa mga gulang?

⁴ Si apostol Pablo nagpahamtang sing maayong huwaran sa sining bahin. Subong sang nakita naton sa nauna nga artikulo, gintan-aw niya ang maayong mga butang sa iya mga kauturan nga lalaki kag babayi. Kag indi lamang nga ginpalig-on niya ang mga Cristiano nga higugmaon kag tahuron ang mapisan nga mga gulang kundi nagpakita man sia mismo sing nagakaigo nga apresasyon sa ila. Maathag nga ginpadunggan niya ang subong sina nga mga tawo.​—⁠Ipaanggid ang Filipos 2:​19-25, 29; Colosas 4:​12, 13; Tito 1:​4, 5.

⁵ Sa iya sulat sa mga Cristiano sa Roma, si Pablo nagsulat: “Sa gugma sang paghiliutod magpinalanggaay kamo. Sa pagpakita sing kadungganan sa isa kag isa magpanguna kamo. Indi magpabuyanbuyan. Magmainit sa espiritu. Alagda si Jehova.” (Roma 12:​10, 11) Sa pagkamatuod, ining mga pulong naaplikar sing una sa Cristianong mga gulang. Sila, sa tanan nga mga Cristiano, dapat magpanguna sa pagpakita sing kadungganan sa isa kag isa.

6. (a) Ano dapat ang likawan sang mga gulang nga himuon, kag ngaa? (b) Paano ginapadaku sang mga gulang ang pagsalig sang kongregasyon sa bug-os nga hubon sang mga gulang?

⁶ Ang mga gulang dapat maghalong nga indi makahimo sing nagamulay nga mga komento tuhoy sa mga masigkamanugtatap. Wala sing isa ka gulang ang may tanan sang Cristianong mga kinaiya sa pinakamataas nga kataason, kay ang tanan dihimpit. Ang iban nagalabaw sa pila ka kinaiya, apang mas maluya sila sa iban. Kon ang mga gulang may nagakaigo nga gugma sa mga kauturan kag pagpalangga sa isa kag isa, indi nila padakuon ang mga kaluyahon sang kada isa. Sa ila pagpakighambal sa mga kauturan, ipakita nila ang makusog nga mga punto sang ila mga masigkagulang. Paagi sa pagpanguna sa pagpakita sing kadungganan sa isa kag isa, ginapadaku nila ang pagsalig sang kongregasyon sa hubon sang mga gulang subong kabilugan.

Nagapangabudlay sing Tingob Subong Isa ka Hubon

7. Ano ang magabulig sa mga gulang sa pagpangabudlay sing tingob sa paghiusa, kag paano nila ipakita ini?

⁷ Sa tapos mahambalan ang tuhoy sa “mga dulot sa mga tawo” nga ginhimo ni Cristo sa iya kongregasyon sa duta upod ang pagtamod sa pagbag-o liwat sa mga kauturan kag para sa ministeryal nga buluhaton, si apostol Pablo nagsulat: “Sa gugma magtubo kita sa tanan nga butang sa iya nga amo ang ulo, si Cristo.” (Efeso 4:​7-15) Nagakilala nga si Cristo ang aktibo nga Ulo sang kongregasyon, kag nga ang mga gulang dapat magpasakop sa iya tuo nga kamot sang awtoridad, amo ang nagahiusa nga butang sa sulod sang tagsa ka hubon sang mga gulang. (Efeso 1:22; Colosas 1:18; Bugna 1:​16, 20; 2:⁠1) Pangabayon nila ang iya panuytoy paagi sa balaan nga espiritu, mga prinsipio sa Biblia, kag sa pagpanguna nga ginahatag sang Nagadumala nga Hubon sang “matutom kag mainandamon nga ulipon.”​—⁠Mateo 24:​45-47; Binuhatan 15:​2, 28; 16:​4, 5.

8. Ano ang dapat dumdumon sang mga gulang, kag paano nila ipakita ang kadungganan sa isa kag isa?

⁸ Kilalahon sang mga gulang nga si Cristo, paagi sa balaan nga espiritu, sarang makatuytoy sang hunahuna sang bisan sin-o nga gulang sa hubon sang mga gulang sa paghatag sing prinsipio sa Biblia nga kinahanglanon sa paglubad sa bisan anong kahimtangan ukon sa paghimo sing importante nga desisyon. (Binuhatan 15:​6-15) Wala sing isa ka gulang ang may kontrol sa espiritu sa sulod sang hubon. Ang mga gulang nagapakita sing kadungganan sa isa kag isa paagi sa pagpamati sing maayo kay bisan sin-o sa ila nga nagahambal nahanungod sa ginahambalan nga prinsipio sa Biblia ukon sa instruksion gikan sa Nagadumala nga Hubon.

9. (a) Anong espirituwal nga mga kinaiya ang magabulig sa manugtatap sa paglikaw nga dominahan ang iya mga masigkagulang? (b) Paano ginapakita sang isa ka gulang ang iya kaugalingon nga “makatarunganon,” kag paano ang unang-siglo nga nagadumala nga hubon nagpahamtang sing huwaran sa sining bahin?

⁹ Ang Cristianong kaugdang, kalulo, kag pagpaubos magapugong kay bisan sin-o nga gulang sa pagtinguha nga dominahon ang iya mga kauturan kag ipilit ang iya opinyon. (Hulubaton 11:2; Colosas 3:12) Ang isa ka Cristianong manugtatap mahimo nga may makusog katama kag hanuot nga mga pagtamod sa isa ka butang. Apang kon nakita niya nga ang iya mga masigkagulang may Makasulatanhon kag teokratikong mga rason sa pagsupak sa iya, sia ‘magagawi subong kubos’ kag magapakita sang iya kaugalingon nga “makatarunganon” paagi sa pagpasakop sa pagtamod sang kalabanan.* (Lucas 9:48; 1 Timoteo 3:⁠3) Sundon niya ang matahom nga huwaran nga ginpahamtang sang unang-siglo nga nagadumala nga hubon, nga, sa tapos sang Makasulatanhon nga paghinun-anon, kag sa idalom sang pagpanguna nga ginhatag ni Cristo paagi sa balaan nga espiritu, ‘nagpakamaayo sing tingob.’​—⁠Binuhatan 15:⁠25.

10. (a) Ano ang nagapamatuod nga ang pagtangdo sa hubon sang mga gulang sa tagsa ka kongregasyon isa ka napasad sa Biblia nga kahimusan? (b) Paano ginpaathag sang libro nga Organisado sa Pagtuman sang Aton Ministeryo ang mga bentaha sining kahimusan?

¹⁰ Ang pagtangdo sa hubon sang mga gulang sa tagsa ka kongregasyon sa pagpanguna napasad sa huwaran nga ginpahamtang sang dumaan nga Cristianong kongregasyon. (Filipos 1:1; 1 Timoteo 4:14; Tito 1:5; ipaanggid ang footnote sa tinaga “mga gulang” sa Tito 1:5 sa The Jerusalem Bible.) Nagatingob sang kaalam sining kahimusan, ang libro nga Organisado sa Pagtuman sang Aton Ministeryo (pahina 37) nagasiling: “Ang iban nga mga gulang mahimo mangin labi ka tumalagsahon sa isa ka kinaiya sang sa iban, samtang ang iban sa hubon nagalabaw sa mga kinaiya nga ang iban maluya. Ang epekto nian amo nga, sa kabilugan, ang hubon may yara sang tanan nga maayong mga kinaiya sa sulod niya nga kinahanglanon agod madumalahan sing maayo ang kongregasyon sang Dios.”

Pagtahod sa Isa kag Isa sa Tunga sang Hubon sang mga Gulang

11, 12. (a) Ngaa labi ang mahimo sang isa ka hubon sang mga gulang sang sa pagpanghikot sang mga katapo sini sing indibiduwal? (b) Paano ginpakig-angotan ni Cristo Jesus kag ni apostol Pablo ang mga hubon sang mga gulang, kag anong laygay ang ginhatag?

¹¹ Busa, ang hubon sang mga gulang isa ka Makasulatanhon nga hubon diin ang kabilugan nagarepresentar sing kapin pa sa kabug-osan sang mga bahin sini. Kon magtipon sila kag magpangamuyo para sa panuytoy ni Jehova paagi kay Cristo kag sa balaan nga espiritu, sarang sila makahimo sing mga desisyon nga wala kuntani matigayon kon ginsugilanon sila sing indibiduwal. Kon ang mga gulang nagatipon sing tingob, ang ila nanuhaytuhay nga mga kinaiya nagapanghikot kag nagapatubas sing mga resulta nga nagapakita sang pagtuytoy ni Cristo sa mga butang.​—⁠Ipaanggid ang Mateo 18:​19, 20.

¹² Ang katunayan nga si Cristo nagapakig-angot sa mga hubon sang mga gulang subong amo sini ginpakita sang mga mensahe nga ginpadala niya sa “pito ka bituon,” ukon “mga anghel sang pito ka kongregasyon” sa Asia Minor. (Bugna 1:​11, 20) Ang usa sadtong mga mensahe ginpadala sa kongregasyon sang Efeso paagi sa iya ‘anghel,’ ukon hubon sang gintangdo nga mga manugtatap. Mga 40 ka tuig sang una, si apostol Pablo nagpatawag sa hubon sang mga gulang sa Efeso sa pagkadto sa Mileto para sa pinasahi nga miting upod sa iya. Ginpahanumdom niya sila sa paghatag sing igtalupangod sa ila kaugalingon kag sa pagbantay sa kongregasyon.​—⁠Binuhatan 20:​17, 28.

13. Ngaa dapat hatagan sing igtalupangod sang mga gulang ang espiritu nga ginapakita nila sa sulod sang ila lokal nga hubon sang mga gulang kag sa ila kabug-osan nga kaangtanan sa iban nga mga hubon sang mga gulang?

¹³ Ang mga hubon sang mga gulang dapat maghatag sing partikular nga igtalupangod sa paghupot sing isa ka maayo kag positibo nga espiritu sa tunga nila kag sa sulod sang ila kongregasyon. (Binuhatan 20:30) Subong nga ang indibiduwal nga Cristiano nagapadayag sing isa ka partikular nga espiritu, ang mga hubon sang mga gulang kag ang bilog nga mga kongregasyon sarang man makapalambo sang partikular nga espiritu. (Filipos 4:23; 2 Timoteo 4:22; Filemon 25) Kon kaisa ang mga gulang nga nagatahod sa isa ka isa sa sulod sang ila kongregasyon nagapakita sing dipaghiusa sa iban nga hubon sang mga gulang. Sa mga siudad diin madamong kongregasyon ang nagatipon sa pareho nga tiliponan, kon kaisa may dipag-ugyonay sa ulot sang mga hubon sang mga gulang tuhoy sa mga iskedyul sang miting, mga dulunan sang teritoryo, mga instalasyon sa Kingdom Hall, kag iban pa. Ang mga prinsipio sang kaugdang, kalulo, pagpaubos, kag pagkamakatarunganon nga nagatuytoy sa mga gulang sa sulod sang tagsa ka hubon dapat magatuytoy sang kaangtanan sa tunga sang mga hubon sang mga gulang. Si apostol Pablo naglaygay: “Himuon ang tanan nga sa pagpalig-on.”​—⁠1 Corinto 14:⁠26.

Nagakaigo nga Pagtahod Para sa Nagalakbay nga mga Manugtatap

14. Sa anong iban pa nga kategoriya nagakaigo nga padunggan ang mga gulang, kag ngaa?

¹⁴ Ang isa pa ka napasad sa Biblia nga kahimusan nga nagapanghikot sa tunga sang mga kongregasyon sang mga Saksi ni Jehova amo ang pagduaw sa ila sing tayuyon sang nagalakbay nga mga gulang, nga ginatawag sirkito ukon distrito nga mga manugtatap. (Binuhatan 15:36; 16:​4, 5) Sila, sing talalupangdon, “mga tigulang nga nagadumala sing maayo.” Subong sang iban nga mga gulang, dapat sila “pag-isipon nga takus sa pilo nga kadungganan, labi na gid ang mga nagapangabudlay sa pagwali kag sa pagpanudlo.”​—⁠1 Timoteo 5:⁠17.

15. Anong laygay ang ginhatag ni apostol Juan nahanungod sa nagalakbay nga mga ebanghelisador?

¹⁵ Sa iya ikatlo nga sulat, ginmulay ni apostol Juan si Diotrefes bangod wala niya “pagbatona ang mga kauturan nga may pagtahod.” (Bersikulo 10) Ini nga mga utod mga nagalakbay nga Cristiano nga nagkadto “tungod sa ngalan [ni Jehova].” (Bersikulo 7) Maathag nga ginpadala sila subong mga ebanghelisador sa pagbantala sang maayong balita kag sa pagtukod sing mga kongregasyon sa mga banwa nga ginduaw nila. Si Juan nagsugo nga ining mapisan nga nagalakbay nga mga manugbantala dapat ‘makatigayon sa ila panlakatan subong nga nagakaigo sa Dios.’ (Bersikulo 6) Ang apostol nagdugang: “Gani, dapat ta sakdagon ang amo nga mga tawo, agod nga mangin masigkamanugpangabudlay kita sa kamatuoran.” (Bersikulo 8) Dapat sila batunon upod ang pagtahod.

16. Paano masunod sang tanan nga mga Cristiano karon ang huwaran ni Gayo sa “matutom nga buhat” nga ginhimo niya para sa unang-siglo nga mga ebanghelisador, kag ngaa nagakaigo ini?

¹⁶ Sing kaanggid sa karon, ang nagalakbay nga mga manugtatap nga ginapadala sang Nagadumala nga Hubon sa pagbantala sang maayong balita kag sa pagbulig sa mga kongregasyon dapat batunon sing maabiabihon kag upod ang pagtahod. Ining mga kauturan kag ang ila mga asawa (kon sila minyo, subong sang madamo sa ila) handa sa pagbiya sang pagkabuhi sa isa ka pat-od nga lugar. Nagalakbay sila sa lainlain nga lugar, masunson nga nagadepende sa pagkamaabiabihon sang mga kauturan para sa ila pagkaon kag katre nga matulugan. Kay Gayo, nga mahigugmaon nga nag-abiabi sa nagalakbay nga mga ebanghelisador sang unang siglo C.E., si Juan nagsulat: “Hinigugma, nagahimo ka sing matutom nga butang kon maghatag ka sing bisan ano nga pag-alagad sa mga kauturan, labi na gid sa mga dumuluong.” (3 Juan 5) Amo man sa karon, ang mga nagalakbay ‘tungod sa ngalan ni Jehova’ nagakaigo nga padunggan kag pakitaan sing gugma kag pagtahod.

17. Paano dapat ipakita sang mga gulang sa kongregasyon ang nagakaigo nga pagtahod sa nagaduaw nga mga tiglawas sang Nagadumala nga Hubon?

¹⁷ Ang mga gulang, labi na, dapat magpakita sing nagakaigo nga pagtahod para sa sining nagaduaw nga mga tiglawas sang Nagadumala nga Hubon. Ginapadala sila sa mga kongregasyon bangod sang ila espirituwal nga mga kinaiya kag sang ila eksperiensia, nga masunson nga mas masangkad sang sa madamong lokal nga mga gulang. Ang iban sining nagalakbay nga mga manugtatap mahimo nga mas bata sa edad sang sa iban nga mga gulang sa mga kongregasyon nga ginaduaw nila. Apang indi ini nagakaigo nga rason agod indi sila paghatagan sing nagakaigo nga pagtahod. Mahimo sila magbatyag nga kinahanglan punggan ang padasudaso nga pagrekomendar sang lokal nga mga gulang sa isa ka utod subong ministeryal nga alagad ukon gulang, nagadumdom sang paandam ni Pablo kay Timoteo. (1 Timoteo 5:22) Samtang ang nagaduaw nga manugtatap dapat maghatag sing nagakaigo nga patugsiling sa mga argumento nga ginahatag sang lokal nga mga gulang, ang lokal nga mga gulang dapat mangin handa sa pagpamati sa iya kag sa pagbenepisyo gikan sa iya mas masangkad nga eksperiensia. Huo, dapat sila “padunggan subong sina nga mga tawo.”​—⁠Filipos 2:⁠29.

“Kilalaha Ninyo ang Subong Sina nga mga Tawo”

18, 19. (a) Paano ginpabutyag ni Pablo ang iya apresasyon sa iya mga masigkamanugpangabudlay? (b) Anong huwaran ang nagapakita nga si Pablo wala magtanum sing kaakig sa iya mga kauturan?

¹⁸ Sa iya una nga sulat sa mga taga-Corinto, si Pablo nagsulat: “Karon ginalaygayan ko kamo, mga kauturan: nahibaluan ninyo nga ang panimalay ni Estefanas amo ang nahaunang mga bunga sa Acaya kag nagpanugyan sila sang ila kaugalingon sa pag-alagad sa mga balaan. Ginapakiluoy ko sa inyo nga kamo magapasakop sa amo nga mga tawo kag sa tagsa ka kabulig kag manugpangabudlay. Nagakalipay ako sa pag-abot ni Estefanas kag ni Fortunato kag ni Acaico, kay nagtal-us sila sa inyo. Ginpaumpawan nila ang akon espiritu kag ang inyo. Kilalaha ninyo ang subong nga mga tawo.”​—⁠1 Corinto 16:​15-18.

¹⁹ Daw ano katahom kag kaalwan ang panimuot ni Pablo sa iya mga kauturan, ang iban sa ila wala niya makilala sing maayo. Apang ginhigugma sila ni Pablo bangod ‘nagabulig’ kag ‘nagapangabudlay’ sila sing lakas sa ila mga panikasog nga alagaran ang mga balaan. Nagpahamtang man si Pablo sing dungganon nga huwaran paagi sa paglimot sang nagligad. Bisan pa nga ginpaslaw sia anay ni Juan Marcos sa iya unang misyonero nga paglakbay, sang ulihi mainit sia nga ginrekomendar ni Pablo sa kongregasyon sang Colosas. (Binuhatan 13:13; 15:​37, 38; Colosas 4:10) Sang ginbilanggo sa Roma, ginpangabay ni Pablo ang presensia ni Marcos bangod subong sang ginsiling niya, “[si Marcos] mapuslanon gid sa pag-alagad sa akon.” (2 Timoteo 4:11) Wala gid sing diutay nga pagtanum sang kaakig!

20. Paano dapat ipakita sang mga Cristiano, sa kabilugan, kag labi na sang mga gulang, nga ginaapresyar nila ang matutom nga mga manugtatap kag nga ‘ginapadunggan nila ang subong sina nga mga tawo’?

²⁰ Sa karon sa tunga sang katawhan sang Dios, madamong debotado nga mga manugtatap nga, kaangay kay Estefanas, nagaalagad sa ila mga kauturan. Matuod, may mga sayop sila kag mga kakulangan. Apang, sila ‘nagakooperar’ upod sa “matutom kag mainandamon nga ulipon” kag sa Nagadumala nga Hubon sini, kag ‘nagapangabudlay’ sing lakas sa pagbantala nga hilikuton kag sa pagbulig sa ila mga kauturan. Dapat kita ‘pirme magpasakop sang aton kaugalingon sa mga tawo nga subong sina,’ nagaapresyar sa ila bangod sang ila mga kinaiya, nga wala nagapangita sang ila mga kakulangan. Ang mga gulang dapat magpanguna sa pagpakita sing nagakaigo nga apresasyon kag pagtahod para sa ila mga masigkagulang. Ang mga gulang dapat magkooperar sa isa kag isa sa espiritu sang gugma kag paghiusa. Kilalahon sang tanan ang balor sinang matutom nga mga kauturan kag “padunggan [sila] subong sina nga mga tawo.”​—⁠Filipos 2:⁠29.

[Footnote]

Ang footnote sa New World Translation Reference Bible nagapakita nga ang tinaga nga “makatarunganon” sa 1 Timoteo 3:3 nagabadbad sang Griegong tinaga nga nagakahulugan sing literal nga “pagpasakop.”

Mga Punto sa Pagrepaso

◻ Anong sahi sang mga tawo ang labi na nga ginpadunggan ni Pablo, kag sin-o ang nagakabagay sang aton pinasahi nga patugsiling karon?

◻ Paano dapat ipakita sang mga gulang nga ginapadunggan nila ang isa kag isa?

◻ Ngaa labi pa ang mahimo sang hubon sang mga gulang sang sa pagpanghikot sang mga katapo sini sing indibiduwal?

◻ Sa anong mga bahin ginapakita sang hubon sang mga gulang nga ginapadunggan nila ang isa pa ka hubon sang mga gulang?

◻ Anong kategoriya sang mga gulang ang nagakabagay sang labi nga pagpadungog, kag paano ipakita ining nagakaigo nga pagtahod?

[Laragway sa pahina 15]

Ang mga gulang dapat magpakita sing nagakaigo nga apresasyon sa isa kag isa

[Laragway sa pahina 18]

Ipakita ang gugma kag pagtahod sa nagalakbay nga mga manugtatap