Isa ka Resolusyon
Ang tumalambong sa “Balaan nga Hustisya” nga mga Kombension walay duhaduha nga mas madamo sang sa nagligad nga tuig, sang 6,443,597 ang nagtambong sa 1,098 ka lokasyon sa bug-os nga kalibutan, upod ang 93,822 nga nabawtismuhan. Ang pamulongpulong, “Ang Malaut nga ‘Makihilawason’ ” nga ginhatag sa tanan nga “Balaan nga Hustisya” nga mga Kombension, ginsundan sang pagpaguwa, sa kapin sa 20 ka hambal, sing matahom sang laragway nga 320-pahina nga libro nga Revelation—Its Grand Climax at Hand! Siling sang humalambal sa iya mga tagpalamati: “Gamita sing maayo ini nga libro sa inyo personal kag kongregasyon nga pagtuon. Gamita man ini sa pagpahibalo sa kalibutan nga ang Babilonia nga Daku ginpamatbatan, nga ang mga pungsod nagaatubang karon sa Armagedon, kag nga ang dakung talipuspusan malab-ot sa halangdon nga paggahom sa Ginharian ni Jehova ni Cristo kag sang iya nobya. Malipay kamo sa pagpamati kag sa pagtuman sining mga butang, ‘kay ang gintangdo nga tion malapit na’!”—Bugna 1:3.
Kami, nga kutub sang 1914 nagakabuhi sa “adlaw sang Ginuo” kag sa sining tion sang balaan nga paghukom, nagakasadya sa pinakadaku sa tanan nga mga pribilehiyo, nga amo ang pag-alagad sa Soberanong Ginuong si Jehova sa idalom sang iya Hari sang mga hari, si Jesucristo. (Bugna 1:10) Subong MGA SAKSI NI JEHOVA, kita nagapanaksi nga:
(1) ATON GINAKANGIL-ARAN ang pasipala nga ginhatag sang Babilonia nga Daku, kag sang Cristiandad labi na, sa ngalan sang isa ka matuod kag buhi nga Dios, si Jehova. Sa aton bahin, ATON GINATINDUGAN sing bug-os tagipusuon, ang pinamulong sang Bugna 4:11: “Takus ka, Jehova, kag Dios namon, sa pagbaton sang himaya kag dungog kag gahom.”
(2) ATON GINAKANGIL-ARAN ang pagsakdag sang Cristiandad sa Babilonianhon nga mga panudlo, sing talalupangdon ang trinidad nga dios, ang pagkadimamalatyon sang tawhanon nga kalag, dayon nga pag-antos sa impierno, kalayuhon nga purgatoryo, kag pagsimba sa mga imahen—subong sang kay Madonna kag sang krus. Nahisanto sa Bugna 22:18, 19, ATON MALIG-ON NGA GINASUNOD ang nasulat nga Pulong sang Dios kag ang tanan nga ginaunod sini.
(3) ATON GINAKANGIL-ARAN ang batok sa Dios nga mga pilosopiya kag mga buhat, nga kinaandan katama sa Cristiandad, subong sang ebolusyon, pagtayhon sing dugo, aborsion, pagbutig, kakagud, kag pagkadibunayag. Sa aton pagsimba kag dalanon sang pagkabuhi, ATON PADUNGGAN ang aton Manunuga, si Jehova nga Dios, ang Labing Gamhanan, nga ang mga dalanon ginlaragway sa Bugna 15:3 subong “matarong kag matuod.”
(4) ATON GINAKANGIL-ARAN ang indi pagsunod sang Cristiandad sa mga mensahe ni Jesus sa pito ka kongregasyon sa Bugna kapitulo 2 kag 3 sa mga butang subong sang sektaryanismo, idolatriya, pakighilawas, Jezebel nga impluensia, pagkaalabaab, kag kakulang sing pagbantay. Sa aton bahin ATON PAMATIAN KAG TUMANON kon ano ang “ginasiling sang espiritu sa mga kongregasyon.”
(5) ATON GINAKANGIL-ARAN ang imoralidad kag pagkamatinuguton sang Cristiandad kag sang iya klero, kag aton ginaabiabi ang maathag nga paghukom ni Jehova nga ginasiling sa Bugna 21:8 nga yadtong nagapadayon sa ila kahigkuan—mga makihilawason, mga butigon, kag kaangay sina—pagalaglagon sing bug-os. BUG-OS TAGIPUSUON NATON NGA GINASAKDAG ang talaksan sang Biblia sa sekso, pag-asawahay, kag pagkabuhi sang pamilya.
(6) ATON GINAKANGIL-ARAN ang siniglo na kadugay nga espirituwal nga prostitusyon sang klero sang Babilonia nga Daku sa pagpuhon kaupod sa kalibutanon nga mga gumalahom agod matigayon ang gahom, manggad, kag mapiguson nga paggahom sa kinaandan nga mga tawo. NAKAPAMAT-OD KITA sa pagbulig sa mga bunayag sing tagipusuon sa pagtuman sa panawagan sang anghel sa Bugna 18:4: “Guwa ka sa iya, katawhan nakon.”
(7) ATON GINAKANGIL-ARAN ang mabug-at nga sala sa dugo bangod sang kapin sa 100 milyones ka kabuhi nga ginsakripisyo sa inaway sa sining siglo lamang, tungod sang pagpakighilawas sang daku nga makihilawason sa mga kagamhanan sa politika. NALIPAY KITA nga ang gintangdo nga tion malapit na para ipatuman sang Dios ang hudisyal nga silot sa Babilonia nga Daku, subong sang maathag nga ginasiling sa Bugna 18:21-24.
Subong mga Saksi ni Jehova, GINAKABIG NATON NGA KALIPAY KAG PRIBILEHIYO ang ipahibalo sa kalibutan nga sang 1914 “ang ginharian sang kalibutan nangin ginharian sang aton Ginuo [nga si Jehova] kag sang iya Cristo.” (Bugna 11:15) NAKAPAMAT-OD KITA sa pagbantala nga walay kahadlok sang ginpahayag nga mga paghukom ni Jehova sa Babilonia nga Daku kag sa pagpaandam nahanungod sa paghilapit sang inaway sang Dios sa Armagedon. DETERMINADO KITA sa pagpalanog, sa mabaskog nga tingog kag “sa tagsa ka pungsod kag tribo kag hambal kag katawhan,” sang maayong balita nga “ang bag-ong langit kag ang bag-ong duta” malapit na sa kabulahanan sang matinumanon nga katawhan. (Bugna 14:6; 21:1) NALIPAY KITA nga subong resulta sining pagbantala, ang dakung kadam-an sang kapin sa tatlo ka milyon gikan sa tanan nga pungsod nahiusa karon kaupod naton sa palibot sang globo. Kaupod sang anghel nga nagalupad sa tungatunga sang langit, ibantala naton: “Kahadluki ninyo ang Dios kag hatagi sia sing himaya, kay nag-abot na ang takna sang iya paghukom, kag simbaha ang Isa nga naghimo sang langit kag duta kag sang dagat kag mga tuburan sang tubig.”—Bugna 14:7.
Mga Pamangkot sa Pagtuon sa “Isa ka Resolusyon”:
1. Sa ano karon nagakasadya ang mga Saksi ni Jehova?
2. Sa kada isa sang pito ka punto sang Resolusyon, ihatag ang (a) ginakangil-aran sang mga Saksi ni Jehova kag ang (b) positibo nga pamat-od nga ginahimo sang mga Saksi.
3. (a) Ano ang kalipay kag pribilehiyo sang mga Saksi ni Jehova? (b) Ano ang ginapamat-od sang mga Saksi? (c) Ano man ang determinado nga himuon naton? (d) Sa anong pagkasadya kag pagpahayag nagapakigbahin ang mga Saksi ni Jehova?