Mga Leksion Gikan sa Kasulatan: Abdias 1-21

Balaan nga mga Paandam nga Nagaapektar sa Imo

“ANG nagatandog sa inyo nagatandog sang tawotawo sang iya mata.” (Zacarias 2:8) Inang nagapaandam nga mga tinaga isa ka mensahe nga andaman sang tanan: Makita ni Jehova kon paano ginatratar sang mga pungsod ang iya katawhan. Apang, ano ang matabo sa isa ka pungsod nga wala nagapamati sa sinang balaan nga paandam kag mahaliton nga nagatandog sa katawhan sang Dios? Ang pinakamalip-ot nga tolon-an sa Hebreo nga Kasulatan, ang Abdias, nagasabat.

Ang Kalamidad Para sa Edom

Wala sing makapalagyo sa paghukom ni Jehova. Ang tagna ni Abdias, nga ginpamulong sang mga 607 B.⁠C.⁠E., nagatagna sang pagtabog sa mga Edominhon gikan sa ila duta walay sapayan sang ila daw malig-on nga posisyon didto “sa kabituonan.” Kag bisan pa wala ginsugid ang personal nga kabuhi sining manunulat sang Biblia, nagkabuhi sia suno sa kahulugan sang iya ngalan, “Alagad ni Jehova.” Paano? Paagi sa pagwali sa makahalapay nga paghukom. Kon mapukan ang Edom, atihon sia sing bug-os sang mga abyan nga nakigkatipan sa iya. Bisan ang iya mga mangin-alamon kag mga gamhanan indi makalampuwas.​—⁠1-9.

Laglagon sang Dios ang naghimo sing kasingki batok sa iya katawhan. Ano ang kabangdanan sang kalamidad sang mga Edominhon? Sulitsulit nga buhat sang kasingki batok sa mga anak ni Jacob, ang ila mga utod. Subong kaliwat ni Esau, ang mga Edominhon may labot sa mga Israelinhon. Apang, gin-ati nila ang ila mga himata, nagkasadya sing malaut sa pagkapukan sang Jerusalem, kag ang talipuspusan sini amo ang pagtugyan sa mga nakalampuwas sa kaaway. Busa, ang Edom nagpat-in sang iya kalaglagan.​—⁠10-16.

Ang Panimalay ni Jacob Ginpasag-uli

Ang mga saad ni Jehova pirme masaligan. Sang adlaw ni Abdias, si Jehova naggarantiya nga ang Iya katawhan magapanag-iya liwat sang ila duta kag sang dugang pa. Indi na bahinbahinon ang Israel. Ang panimalay ni Jacob, ang duha ka tribo nga ginharian sang Juda, mahiusa liwat sa panimalay ni Jose, ang napulo ka tribo nga naaminhan nga ginharian, sa paglamon sa Edom subong sang paglamon sang kalayo sa dagami kag sa pagpuyo sa teritoryo sang Edom. Nagatapos sa isa ka makapalig-on nga sulat, si Abdias nagsiling nga ang ginpasag-uli nga mga Israelinhon nahiusa nga magasimba sa ila Dios kag mangin iya mga sakop. Sa pagkamatuod, ang pagkahari mangin iya ni Jehova.​—⁠17-21.

Leksion para sa karon: Ang wala ginapamatii nga mga paandam nagaresulta sa makahalalit nga bunga. Busa, ang matigdas nga paandam ni Abdias sa Edom dapat magalanog sa dulunggan sang modernong-adlaw nga mga manugpamatok sang Dios: Ang mga nagapakig-away batok kay Jehova kag sa iya katawhan pagautdon sing dayon.

Mga Leksion Gikan sa Kasulatan: Jonas 1:​1⁠–​4:​11

LIKAWI ang kalamidad! Batona ang kaluoy! Paano? Paagi sa pagpamati sa leksion sang isa ka matuod nga sugilanon nga kapin na sa 2,800 ka tuig ang edad​—⁠ang tolon-an ni Jonas. Ginsulat sang mga 844 B.⁠C.⁠E. ni manalagna Jonas sang Galilea, puno ini sing espirituwal nga paghangop.

Si Jonas Nagapalagyo

Dapat kita magsalig kay Jehova sa pagsakdag sa aton sa pag-alagad sa iya. Apang, si Jonas nagpalagyo sa hatag-Dios nga hilikuton sa baylo nga nagsalig kay Jehova sa pagsakdag sa iya. Matuod, indi mahapos ang iya asaynment. Paandaman niya ang tuman kalaut nga Ninive nahanungod sa balaan nga kalamidad. Apang si Jonas nagkadto sa pihak nga direksion, sa Tarsis, nga sa karon amo ang Espanya. Sa paglakbay, ang unos nangin tuman kabaskog sa bagay nga ang kaluwasan sang sakayan kag sang tripulante daw imposible. Si Jonas nagtu-ad, gintagbong sia sang mga marinero sa dagat, kag ang dagat nagtinong. Ang manalagna ginlamon sang daku nga isda.​—⁠1:​1-17.

Ang mga alagad sang Dios makasalig nga sabton niya ang ila mga pangamuyo. Sa sulod sang isda, si Jonas nangayo sing bulig kay Jehova, mapangamuyuon nga nagpasalamat sa Dios tungod sang pagkalampuwas gikan sa dagat nga lulubngan, kag nagsaad sa pagbayad sang ginsaad niya. Sang ulihi, ginsuka sia sa mamala nga duta.​—⁠2:​1-10.

Si Jonas Nagkadto sa Ninive

Indi gid paglikawi ang asaynment gikan kay Jehova. Nakatuon sini nga leksion, ang nagapangalag-ag anay nga manalagna nag-abot sa “daku nga siudad.” Ginwali ni Jonas ang simple apang prangka nga paandam: “Kap-atan pa ka adlaw, kag ang Ninive laglagon.” Sa labing tumalagsahon nga pagbaliskad sang mga hitabo, ang mga taga-Ninive naghinulsul kag nakalikaw sang kalamidad.​—⁠3:​1-10.

Ang tawo indi makalatid sa kaluoy sang Dios. Naakig si Jonas bangod kay wala paglaglaga ang Ninive. Apang paagi sa isa ka tanum, gintudluan ni Jehova si Jonas nga magapakita Sia sing kaluoy suno sa Iya kahamuot.​—⁠4:​1-11.

Leksion para sa karon: Ang kalamidad mahimo malikawan paagi sa pagpamati sa balaan nga tagna! Iloga ang mga taga-Ninive. Pamatii sing mapainubuson si Jesucristo, ang manalagna nga mas daku pa kay Jonas.​—⁠Lucas 11:⁠32.

[Kahon sa pahina 30]

MGA TEKSTO SA BIBLIA GIN-USISA

o 7​—⁠Sa tion sang Biblia, ang “pagsalo sa pagkaon” upod sa isa sa pagkamatuod isa ka katipan sang pagpakig-abyan. Makahalam-ot gid! Ang mga Babilonianhon, “mga tawo nga nakigkatipan” sa mga Edominhon, mangin amo ang magalaglag sa ila. Matuod, gintugutan sang mga Babilonianhon sang adlaw ni Nabokodonosor ang Edom sa pag-ambit sa gin-ati sa Juda sa tapos nga nahapay ang Jerusalem. Apang sang ulihi bug-os nga ginpunggan sang Babilonianhon nga hari nga si Nabonidus ang ambisyon sa komersio kag sa negosyo sang Edom.

o 10​—⁠Ang Edom ginpamatbatan nga “utdon tubtob sa tion nga dinapat-od” bangod sang iya daku nga dumot kag matig-a nga kakulang sing kinaugali nga gugma sa iya utod nga pungsod, “ang mga anak ni Juda.” (Bersikulo 12) Inang pungsodnon nga paglaglag nagkahulugan nga ang isa ka Edominhon nga estado nga may pangulohan kag populasyon sa espisipiko nga geograpiko nga lokasyon mahimo nga madula sa nawong sang duta. Karon, wala sing katawhan nga nakilal-an nga gikan sa nasyonalidad sang Edom; nangin “subong sang wala sila.”​—⁠Bersikulo 16.

[Kahon sa pahina 31]

MGA TEKSTO SA BIBLIA GIN-USISA

o 1:​17​—⁠Bangod sang iya daku nga ulo kag tutonlan, ang sperm whale makasarang sa paglamon sa tawo. Bisan pa malaka lamang ang mga balyena sa Mediteraneo, ang mga sakayan nga nagapangdakop sang balyena nagdungka anay sa Joppa. Ang isda nga kilala sa pagsunod sa mga sakayan sa Mediteraneo kag sa pagkaon sang bisan ano nga ginahaboy sa dagat amo ang dakung puti nga bagis. Makasarang man ini sa paglamon sa tawo nga bilog. Apang, sa bahin ni Jonas, gingamit sang Dios ang “daku nga isda,” ayhan isa ka tinuga nga dikilala sa moderno nga siensia.

o 2:​1, 2​—⁠Pat-od gid nga si Jonas wala sa isa ka maayo nga kahimtangan agod magkomposo sing binalaybay samtang yara sa “tiyan sang isda.” Apang ginsulat niya sang ulihi ang iya inagihan. Gikan sa alibutod sang iya tagipusuon naghalin ang mga pulong nga kaangay sang yara sa Mga Salmo nga nagapabutyag sang iya balatyagon.​—⁠Ipaanggid ang 2:2 sa Salmo 120:1 kag 130:​1; 2:5 sa Salmo 69:⁠1.

o 3:​3​—⁠Ang kadakuon sang Ninive indi sobra. Bisan pa ang pamakud nga nagalibot sa sini mga 13 ka kilometro lamang sa kadakuon, ang ngalan sang siudad maathag nga naglakip sa iya mga uma, nga mahimo nagatuptop sing distansia nga mga 42 ka kilometro.

o 3:​10​—⁠Ang Hebreo nga tinaga nga ginbadbad nga “naghinulsul” nagakahulugan sing “pagbalhin sang hunahuna kon tuhoy sa nagligad (ukon gintuyo) nga buhat.” Busa, si Jehova ‘nagahinulsul’ ukon nagabalhin sang iya ­hunahuna nahanungod sa pagsilot sa makasasala nga mga tawo kon sila tunay nga magahinulsul.