Nalab-ot Sini ang Tagipusuon

Isa ka iloy gikan sa Virginia, E.⁠U.⁠A. ang nagsulat: “May yara kami singko-anyos nga bata, si Keith. Sa sini nga panag-on sang iya pagkabata, indi sia mahunahunaon sa relihion. Wala ini nagakahulugan nga indi sia mabuot nga bata. Tuman sa iya ka mahigugmaon kag malulo kag nagapamati sa iya konsiensia. Apang masunson sia nga wala nagasapak sa mga paghambalanay sa Biblia ukon ginabag-o niya sa gilayon ang topiko. Gani nangamuyo kami sing pagpailob kag nangita sing iban nga mga paagi sa pagpatudok sang espirituwal nga mga kamatuoran sa iya malum-ok nga tagipusuon.

“Interesado gid sia sa mga sugilanon. Nag-abot ang libro nga Bible Stories kag masunod ang mga tape. Ginhatagan sia sang iya lola sing cas­sette play­er. Gintudluan namon sia kon paano ini gamiton. Karon sa sulod sang inoras sa isa ka tion, nagalingkod sia nga ginauyatan ang libro, nagasunod sa mga ­tape.

“Ang tion sa pagtulog kinabatasan na diri nga pagsugid sing sugilanon. Sini nga gab-i nagsiling ako nga tuman gid sa akon kakapoy, apang ayhan mahimo nga sia ang magasugilanon sa akon. Nangabay ako sing isa ka sugilanon sa Biblia. Handurawa ang akon kalipay sang ginsugid niya sa akon ang nahanungod kay Job, nian ang kay David kag kay Goliat, nian ang kay Rut kag kay Noemi. Sang makalab-ot sia sa bahin diin ginhigugma gid sing daku ni Noemi si Jehova, nagyuhum sia kag nagsiling, ‘Amo sina ang akon paborito nga bahin!’

“Nag-abot ang dugang nga pagpakamaayo sang narealisar ko nga ginailog man niya ang tono, ang punc­tua­tion, kag ginapraktis ang mas maayo nga istilo sa paghambal! Kag ginabalikwat niya ining mga sugilanon sing letra por letra! Salamat, salamat, salamat sa inyo!”

Sa pagkamatuod, sarang madumduman sang magagmay nga bata ang labi pa sang sa ginahunahuna mo kon interesado sia. Nasapwan sang madamong pamilya nga ang My Book of Bible Stories, upod ang rekording sang libro sa mga cas­sette ­tape, amo gid ang ginakinahanglan sa pagpukaw sang interes. Mabaton ninyo ang mga cas­sette tape ukon ang tomo sang My Book of Bible Stories, ukon ang duha, paagi sa pagsulat kag pagpadala sa kaupod nga kupon.

Tseke ang isa ukon ang duha sa masunod, kag ipadala ang husto nga amot:

[ ] Palihog padalhi ako, nga nabayaran na ang selyo, sing kaki vin­yl nga album upod ang apat ka cas­sette tape sang My Book of Bible Stories. Naglakip ako sing ₱120. (Sa guwa sang Pilipinas, sulati ang lokal nga sanga sang Watch Tower para sa bili.)

[ ] Palihog padalhi ako sing may laragway 256-ka-pahina nga My Book of Bible Stories (matigayon man sa Hiligaynon), nga sa sini naglakip ako sing ₱42.