Kon Ngaa Dapat Mo Mahibal-an ang Kamatuoran Tuhoy kay Abraham
SI Abraham—isa bala ka baganihan sang mitolohiya ukon matuod nga manalagna? Daw ano ka importante ang sabat sa sina nga pamangkot? Suno sa kronolohiya sang Biblia, si Abraham nagkabuhi sang nagligad nga mga 4,000 ka tuig. Busa ang iban mahimo mangatarungan, ‘Ano ang importansia kon sia bala nagaluntad ukon wala?’
Ti, katunga sang pumuluyo sang kalibutan natungod sa mga relihion nga nagapangangkon nga nagapati kay Abraham. Ginalista sang 1988 Britannica Book of the Year ang 32.9 porsiento sang kalibutan subong Cristiano, 17.2 porsiento Muslim, kag 0.4 porsiento Judiyo, kag si Abraham amo ang nagapangibabaw nga pigura sa sining tatlo ka relihion. Sa pagkamatuod, dapat handumon nga pat-uron sang sinsero nga mga tumuluo gikan sa sining mga pagtuluohan nga ang gintudlo sa ila nahanungod kay Abraham amo ang kamatuoran. Bisan ang mga natungod sa iban nga mga relihion ukon ang mga nagapangangkon nga wala sila sing relihion dapat mangin interesado. Ngaa?
Bangod nagasiling ang Biblia nga si Abraham isa anay ka manalagna. (Genesis 20:7) Isa ina ka tinaga sa Biblia nga ginagamit sa paglaragway sa humalambal sang Dios nga may mensahe para sa iban nga mga tawo. Kon si Abraham isa ka matuod nga manalagna, ang tanan magabenepisyo. Ngaa? Bangod ang mensahe nga iya nabaton nagaunod sing maayong balita para sa tanan nga katawhan. (Galacia 3:8) Suno sa Biblia, ang Dios nagsaad kay Abraham: “Ang tanan nga pamilya sang duta pat-od nga magapakamaayo sang ila kaugalingon paagi sa imo.”—Genesis 12:3.
Isa ina ka makahalawhaw nga saad, kag nabatian ini ni Abraham sa dimagkubos duha ka magkatuhay nga okasyon. (Genesis 18:18; 22:18) Agod tumanon ini, banhawon sang Dios gikan sa minatay ang mga tiglawas sang mga pamilya nga napatay. Ang kabuhi para sa ila nga banhawon mangin pagpakamaayo gid kay ang kalabanan sa ila magabalik sa isa ka kahimtangan sa duta nga kaanggid sa Paraiso nga nadula sang tawo sa ginsuguran. Sa tapos sina, tudluan sila kon paano matigayon ang pagpakamaayo nga kabuhi nga walay katapusan.—Genesis 2:8, 9, 15-17; 3:17-23.
Kon, sa pihak nga bahin, si Abraham isa lamang ka karakter sang mitolohiya, wala sing sadsaran ang pagpati sa dalayawon nga saad nga nabaton niya. Dugang pa, kon ang mga saad sang Biblia indi masaligan, ang iban mahimo mangatarungan nga ihugod sing bug-os ang ila kaugalingon sa pagpangalipay karon. Subong ginsulat sang isa sang nahaunang mga Cristiano: “Kon ang mga patay indi pagbanhawon, ‘magkaon kita kag mag-inom, kay buwas mapatay kita.’ ”—1 Corinto 15:32.
Busa, may rason gid ikaw nga usisaon ang pamangkot, Si Abraham bala isa lamang ka baganihan sang mitolohiya ukon isa bala sia ka matuod nga manalagna? Mahimo makibot ka kon mahibal-an mo kon ano ang ginsiling sang kilala nga mga klerigo sang ika-19 nga siglo nahanungod sini. Samtang, ang mga arkeologo nakakutkot sing makatilingala nga mga tukib nga nagahangkat sadto nga mga pagtamod sang mga klerigo.