Ano ang Paglaum sang mga Patay?

ISA ka pamilya ang naglakbay pakadto sa nasidlangan nga baybayon sang Bagatnan nga Aprika para magbakasyon. Ang mga ginikanan sang asawa yara sa pihak nga salakyan sa unahan. Sang hinali, ang goma naglupok. Samtang nagahanda sila agod islan ini sa kilid sang dalan, isa ka hubog nga tsuper ang nagdalasa sa duha ka salakyan. Ang tigulang nga lalaki kag ang iya asawa napatay. Ang lamharon nga lalaki napatay pila ka adlaw sang ulihi. Ang iya asawa nabalian sing gusok kag may iban pa nga samad. Ang iya lapsag nag-agom sing nagaparalisar nga halit sa utok.

Isa gid ka trahedya para sa sining makaluluoy nga pamilya! Nagpalamuypoy si Carolann, ang utod nga babayi sang lamharon nga asawa, sang nabatian niya ang balita. Ang mga trahedya subong sini nagakatabo sa tanan nga pungsod. Ang nasub-an nga mga himata kag mga abyan masunson nagapamangkot, ‘Napatay gid bala ang patay,’ ukon . . .

‘Buhi Bala ang Patay?’

Halos tanan nga relihion nagatudlo nga ang kalag dimamalatyon. Gani, ang ila mga sumulunod nagapati nga ang mga patay wala gid mapatay kundi nagakabuhi gihapon sa langit, sa purgatoryo, ukon sa impierno. Subong sang ginatudlo sa madamong relihion, ang mga yara sa impierno nagaantos sing makahaladlok sa walay katapusan. Apang ginapaantos gid bala sang Dios sang gugma ang iya mga tinuga?​—⁠1 Juan 4:⁠8.

Wala, apang paano naton mapat-od? Binagbinaga sing maayo ang masunod nga pamatuod sa Biblia. “Si Jehova nga Dios naghimo sang tawo gikan sa yab-ok sang duta kag naghuyup sa iya ilong sang ginhawa sang kabuhi, kag ang tawo nangin buhi nga kalag.” (Genesis 2:7) Ining inspirado nga pinamulong nagasiling bala nga ang unang tawo, si Adan, ginhatagan sing kalag? Wala, sia nangin kalag, isa ka buhi nga tawo. Ginkompirma ini ni apostol Pablo, nga nagsulat: “Ang nahaunang tawo, si Adan, subong sang ginasiling sang kasulatan, nangin buhi nga kalag.” Si Pablo nagbalikwat gikan sa Genesis.​—⁠1 Corinto 15:​45, The Jerusalem Bible.

Mahimo bala mapatay ang tawhanon nga kalag? Si manalagna Ezequiel nagsulat: “Ang tanan nga kalag​—⁠akon. Subong sang kalag sang amay amo man ang kalag sang anak​—⁠akon. Ang kalag nga nagapakasala​—⁠ini mismo mapatay.” (Ezequiel 18:​4, 20; Manugwali 9:​5, 10) Sing maathag, kon ang kalag patay, nian ang tawo wala sing hinalung-ong, busa wala nagaantos. Sa iya unang pamulongpulong publiko pagkatapos sang Pentecostes 33 C.⁠E., si apostol Pedro nagsiling: “Sa pagkamatuod, ang tagsa ka kalag nga indi magpamati sa sadtong Manalagna [si Jesus] laglagon gikan sa tunga sang katawhan.” Gani ang kalag mamalatyon.​—⁠Binuhatan 3:⁠23.

Mabuhi Pa Bala Liwat ang Patay?

Ang tanan nga nagapati nga ang Biblia matuod nakahibalo nga si Jesus napatay kag ginbanhaw sa ikatlong adlaw. (Binuhatan 10:​39, 40) Paano ini natabo? Paagi sa gahom sang balaan nga espiritu sang Dios.

Tumalagsahon bala ang pagkabanhaw ni Jesus? Indi. Subong sang ginsulat ni Pablo sa kongregasyon sang Corinto: “Si Cristo nabanhaw, ang panganay sang mga nagakatulog sa kamatayon. Sanglit kay bangod sa tawo nag-abot ang kamatayon, bangod man sa tawo ang pagkabanhaw . . . kay Cristo.” (1 Corinto 15:​20-22) Gani, madamo ang banhawon gikan sa minatay. Si Jesus nagsiling man: “Dili kamo matingala sini, kay ang takna magaabot nga ang tanan nga yara sa handumanan nga mga lu­lubngan magapamati sang iya tingog kag magaguwa, ang mga nakahimo sing maayo sa pagkabanhaw nga sa kabuhi.” (Juan 5:​28, 29) Nagagarantiya ini sang pagkabanhaw sa minilyon.

Kon ang paathag sa ibabaw nagpukaw sang imo interes sa pagkabanhaw, mahimo ka mamangkot, ‘Para kay sin-o ang pagkabanhaw, kag san-o?’ Binagbinagon naton inang importante nga mga pamangkot.