Mapatihan Mo Bala ang Biblia?

“WALA gid sing peligro sa pagsiling nga kon may makilala ka nga wala nagapati sa ebolusyon, ina nga tawo ignorante, buangbuang ukon hanginon.” Ano ang epekto sa imo sining ginhambal sang biologo nga si ­Richard Dawkins? Kon nagapati ka sa Biblia, mahimo gid nga nagapati ka sa pagpanuga sa baylo nga sa teoriya sang ebolusyon. Nagakahulugan bala ina nga, subong isa ka tawo nga nagapati sa Biblia, ignorante ka, buangbuang, ukon hanginon?

Binagbinaga man ining ginsiling: “Indi maduhaduhaan nga napamatud-an sang mga eskolar sang Bag-ong Testamento nga si Jesus sang nahaunang Cristianong mga dokumento sa pila ka kasangkaron isa ka piksion sang Cristianong imahinasyon.” Ining mga pulong sa The Weekend Australian ginhambal ni Dr. Robert W. Funk, isa ka propesor sang unibersidad tuhoy sa relihioso nga mga pagtuon kag awtor sang pila ka libro tuhoy sa relihioso nga interpretasyon.

Nagtukod si Dr. Funk sing isa ka proyekto nga ginatawag Jesus Seminar, isa ka grupo sang kapin sa isa ka gatos ka eskolar sang Biblia nga sing tingob gin-usisa nila ang mga ginpamulong ni Jesus nga nareport sa Biblia. Lakip sa iban nga mga butang, naghinakop sila nga ang Pangamuyo sang Ginuo wala ginkomposo ni Jesus; nga si Jesus wala magsiling nga ang mga mahagop magapanubli sang duta ukon nga ang mga mahidaiton tawgon nga mga anak sang Dios; kag sia wala magsiling: “Ako ang pagkabanhaw kag ang kabuhi. Sia nga nagatuo sa akon . . . indi gid mapatay.”​—⁠Juan 11:​25, 26; Mateo 5:​5, 9; 6:​9, 10.

Bisan pa mahimo nga makibot ka sa ila mga ginhinakop, indi ini tumalagsahon. Resulta ini sila sang modernong pagmulay sa Biblia, kag madugaydugay na nga gintudlo sa relihioso nga mga seminaryo ang mga ideya nga kaanggid sa sini. Mahimo nga naanad ka na sa pagpamati nga ang Biblia ginasumpakil sang mga sientipiko. Apang kon ginaduhaduhaan sang relihioso nga mga lider ang pagkamaminatud-on sang rekord sang Biblia, mahimo magapalibog ka kon bala tion na nga binagbinagon liwat ang imo posisyon. Makatarunganon bala nga magpati sa Biblia samtang madamo nga intelektuwal sa latagon sang relihion ang wala nagapati sa sini?