“May Kaugalingon Na Kami Karon nga Kingdom Hall”
MADAMO ang ginbalhag nahanungod sa madali natukod nga mga Kingdom Hall sa mga pungsod subong sang Gran Britanya, Canada, kag Estados Unidos. Apang, ang wala mahibal-i tanto, amo ang katunayan nga ang madali natukod nga mga duog sang pagsimba para sa mga Saksi ni Jehova mga dekada na nga ginapatindog sa ginatawag nga nagauswag nga mga pungsod.
Sa kadutaan sang Aprika masami nga ang lokal nga mga Saksi nagapatindog sing temporaryo nga pasilidad para sa mga distrito nga kombension sa sulod sang mga semana lamang. Ginagamit ini indi lamang subong mga duog para sa mga miting kag pasilungan gikan sa mainit nga adlaw sang tropiko kundi subong man mga dalayunan para sa mga delegado. Kaanggid man sini nga mga eksperiensia ang masugid nahanungod sa Sentral nga Amerika.
Halimbawa, sa Siudad sang Guatemala, Guatemala, ang amot nga $200 ginpadala sa Kongregasyon sang mga Saksi ni Jehova sa Vivibien. Sang gintanyag sang isa ka lokal nga Saksi ang iya lote sa uma, namat-od ang mga Saksi nga gamiton ang amot sa pagtukod sing diutay nga tinukod nga sarang magamit para sa ila mga miting.
Kawayan ang gamiton subong dingding tubtob sa kataason nga 1.5 metros; kag bukas ang ibabaw agod may hangin nga makasulod. Gindesisyonan nga ang takus sang tinukod mangin 4 metros por 6 metros. Sang ginduaw sang mga gulang sang kongregasyon ang duog, nakibot sila sang makakita sila sing pila ka kawayan nga tanom sa atubangan sang lote, nga 6 metros tubtob 9 metros sa kataason kag 8 sintemetros tubtob 13 sintemetros sa diametro. ‘Ngaa indi naton umpisahan na sa masunod nga Sabado?’ siling nila.
Sang masunod nga gab-i sang Mierkoles, ginhimo ang plano sa pagtukod. Sang Huebes, ang isa ka utod nagbakal sing sin nga inug-atop, ang isa pa sing kahoy, kag ang isa pa gid sing mga lansang. Pag-abot sang Huebes sang hapon ang kahoy nautod na sa kinahanglan nga kadakuon, kag ginsugdan nila ang paghimo sing A nga sahi sang balayan nga pasagi nga may gin-amot nga salsalon nga mga plantsa. Sang Biernes sang gab-i handa na ang mga pasagi.
Sang kaagahon sang Sabado, ginhakot sang trak ang mga pasagi kag iban pa nga kahoy, ang mga atop, kag ang mga lansang padulong sa minuro. Gindul-ong man sang apat ka salakyan ang mga 50 ka lalaki, mga babayi, kag kabataan sa minuro. Sang alas 8:00 s.a. nag-abot na ang tanan.
Ang buho nga gintigib sa matig-a nga bato sang bulkan amo ang ginbutangan sang mayor nga mga haligi. Antes sini, nagbakal ang mga Saksi sa tag-iya sang mga tanom nga kawayan sing 50 ka kawayan sa 12 ka cent ang tagsa—$6 sa kabilugan. Sa gilayon, ginpulod ang kawayan. Ginlagari ini sang kamot sa 1.5 metros nga kalabaon kag gintunga sa tunga.
Samtang ginaplastar ang mga pasagi, ang iban nga mga kamot nagalansang sang natunga nga kawayan sa nagabangday nga mga pasagi, tunga sa guwa kag tunga sa sulod, agod nga ang matahom nga bilog nga kawayan magapuni sang nasulod nga mga dingding subong man sang naguwa. Masunod, gintakod ang mga atop samtang ang iban nagpanghakot sing mga bato kag mga balas agod tapanon ang salog. Sa wala pa magsirom ang 12 ka oras nga tinukod nahuman na, kag ang kauturan nagpauli sa siudad nga malipayon.
Sang ulihi, ang pine needle nga mga dahon gintabon sa duta nga salog, kag ang pila ka pilupilo nga mga bangko kag kawayan nga mga pulungkuan gikan sa wala magamit nga kawayan ginplastar. Handa na karon ang Kingdom Hall para sa nahauna nga miting.
Sa madamo nga kadutaan sang tropiko—Aprika, Pasipiko kag mga isla sang Caribbean, Asia, Mexico, Sentral kag Bagatnan nga Amerika—nga sa diin ayhan isa ka milyon ka mga Saksi ni Jehova ang nagapuyo, inang simple nga mga tinukod nagdala sing kalipay sa lokal nga mga Saksi bangod makasiling sila: “May kaugalingon na kami karon nga Kingdom Hall.”