Magpakita sing Pagtuo Para sa Kabuhi nga Wala sing Katapusan

“Maghupot sing pagtuo sa pag-amlig nga buhi sa kalag.”​—⁠HEBREO 10:⁠39.

1. Ano ang ginakilala sang Katoliko nga insiklopedia nahanungod sa paggamit sang Biblia sa tinaga nga “kalag”?

WALA gid nagasiling ang Biblia nga ang mga tawo may dimamalatyon nga kalag nga nagalampuwas sa lawas kon mapatay ini kag nagakabuhi sing dayon sa duog sang mga espiritu. Bisan ang New Catholic Encyclopedia nagabaton: “Ang ideya nga ang kalag nagapadayon sa pagkabuhi sa tapos sang kamatayon indi mahantop sa Biblia. . . . Ang kalag sa D[aan] nga T[estamento] wala nagakahulugan sing isa ka bahin sang tawo, kundi sang bug-os nga tawo​—⁠ang tawo subong isa ka buhi nga tinuga. Sing kaanggid, sa B[ag-ong] T[estamento] nagakahulugan ini sing tawhanon nga kabuhi: ang kabuhi sang isa ka indibiduwal.” Gani ang mga tawo wala nagapanag-iya sing mga kalag, kundi sila ang mga kalag.

2. (a) Sa diin nagsugod ang pagtuluuhan nga pagkadimamalatyon sang kalag? (b) Ano ang kamatuoran nahanungod sa kahimtangan sang tawo sa tapos sang kama­tayon?

² Subong ginpakita sang nagligad nga artikulo, ang pagpati sa pagkadimamalatyon sang kalag isa ka paganong ideya nga sarang mausoy pabalik sa una nga mga tion sang maragtas. Ang awtor sini amo ang isa nga nagsumpakil sa maathag nga ginsiling sang Dios nga ang tawo “mapatay nga totoo” kon maglalis sia. (Genesis 2:17) Amo yadto ang kaaway, si Satanas nga Yawa, ang nagsiling: “Dili kamo mapatay nga totoo.” (Genesis 3:4) Kag butig yadto. (Juan 8:44) Sang ulihi, ginsakdag ni Satanas ang doktrina nga pagkadimamalatyon sang tawhanon nga kalag. Apang ang kamatuoran nahanungod sa kahimtangan sang tawo sa tapos sang kamatayon amo ang ginpatalupangod sa inspirado nga Pulong sang Dios sa Manugwali 9:5: “Ang patay wala gid sing nahibaluan.”​—⁠Tan-awa man ang Roma 5:⁠12.

Ang Paglaum nga Kabuhi nga Wala sing Katapusan

3. Madamo ang ginasiling sang Biblia nahanungod sa ano nga paglaum?

³ Samtang maathag nga ginapakita sang Biblia nga wala sing butang nga subong sa dimamalatyon nga kalag, madamo ini sing ginasiling nahanungod sa kabuhi nga wala sing katapusan. Ang paglaum nga kabuhi nga wala sing katapusan isa anay ka sadsaran nga panudlo ni Jesus. Sia nagsiling: “Ini nagakahulugan sing kabuhi nga wala sing katapusan, ang ila pagkuha sing ihibalo tuhoy sa imo, ang lamang matuod nga Dios, kag sa isa nga imo ginpadala, si Jesucristo.” (Juan 17:3) Tuhoy sa ila nga nagapakita sing pagtuo sa Dios kag kay Cristo, si Jesus nagsiling: “Nagahatag ako sa ila sing kabuhi nga wala sing katapusan.” (Juan 10:28) Upod ang bug-os nga pagsalig, sia nagsiling: “Sia nga nagatuo may kabuhi nga wala sing katapusan. . . . Magakabuhi sia sing dayon.” (Juan 6:​47, 51) Kag nagsiling man sia: “Ginhigugma gid sang Dios ang kalibutan sa bagay nga ginhatag niya ang iya bugtong nga Anak, agod nga ang bisan sin-o nga magtuo sa iya indi mawala kundi may kabuhi nga wala sing katapusan.”​—⁠Juan 3:⁠16.

4. Ano ang ginsiling ni Jesus nahanungod sa paglaum sa palaabuton?

⁴ Sanglit wala sing dimamalatyon nga kalag nga nagapadayon sa pagkabuhi kon mapatay, paano matuman ang ginasaad sang Biblia nga kabuhi nga wala sing katapusan? Naghatag si Jesus sing dugang pa nga impormasyon nahanungod sini sang ginduaw niya sanday Marta kag Maria sa tapos mapatay ang ila utod nga si Lazaro. Sia nagsiling kay Marta: “Ako ang pagkabanhaw kag ang kabuhi. Sia nga nagapakita sing pagtuo sa akon, bisan pa mapatay sia, magakabuhi.” Ginpamangkot niya si Marta: “Nagatuo ka bala sini?” Sia nagsabat: “Huo, Ginuo; nagatuo ako nga ikaw ang Cristo nga Anak sang Dios.”​—⁠Juan 11:​25-27.

5, 6. Ano ang ginpasundayag sang pagbanhaw ni Jesus kay Lazaro?

⁵ Sa pagpasundayag nga sia, subong Anak sang Dios, ginhatagan sing gahom sa pagbanhaw sa patay, nagkadto si Jesus sa lulubngan ni Lazaro. Si Lazaro apat ka adlaw na nga patay, kag ang iya lawas nagahagas na. Walay sapayan, “[si Jesus] nagsinggit sa mabaskog nga tingog: ‘Lazaro, guwa ka!’ Ang tawo nga patay na nagguwa nga nasamburan sa mga kamot kag mga tiil sang mga isalambod sa lubong, kag ang iya guya naputos sing panapton. Si Jesus nagsiling sa ila: ‘Hubari sia, kag palakta.’ ” (Juan 11:​43, 44) Ang patay nga si Lazaro nabanhaw!

⁶ Si Lazaro wala ginbanhaw gikan sa langit ukon bisan diin sa duog sang mga espiritu. Wala sia magkadto sa duog sang mga espiritu sang mapatay sia kundi wala sia sing pangalibutan sa lulubngan, nga sa diin didto ang tanan nga minatay. (Salmo 146:​4; Juan 3:​13; Binuhatan 2:34) Indi makatarunganon hunahunaon nga ang dimamalatyon nga kalag ni Lazaro nagaagom sing langitnon nga kalipay kag dayon yadto nga kalag ginkuha sa langit agod mahiusa liwat sa iya dihimpit nga lawas sa duta agod magkabuhi sing makaisa pa sa isa ka kalibutan nga puno sing pag-antos, balatian, kag kamatayon. Apang bangod wala sia sa langit, ang iya pagpasag-uli sa kabuhi gin-abiabi, kay nagkahulugan ini sing dugang pa nga mga tinuig sang pagluntad para sa iya kag sing paghiusa liwat sa iya mga hinigugma. Sa ulihi, mapatay sia liwat.

7, 8. (a) Sa anong iban pa nga mga okasyon nagbanhaw si Jesus sing patay? (b) Ngaa ginhimo ni Jesus yadtong mga milagro sa pagpasag-uli sang mga tawo sa kabuhi?

⁷ Sang ginbanhaw ni Jesus ang isa ka dalagita nga napatay, ang iya mga ginikanan “yara sa tupad niya nga naurungan sing daku.” (Marcos 5:42) Apang, yadto nga dalagita napatay man liwat sang ulihi. Sang ginbanhaw ni Jesus ang napatay nga anak nga lalaki sang babayi nga balo sa Nain, “hinadlukan ang tanan, kag ginhimaya nila ang Dios.” (Lucas 7:16) Apang yadto nga tawo napatay man sang ulihi. Tuhoy sining mga milagro, ang The New International Dictionary of New Testament Theology nagapalig-on: “Sila nga ginbanhaw ni Cristo sa tion sang ministeryo sa duta napatay, kay ining pagbanhaw wala maghatag sing pagkadimamalatyon.”

⁸ Ngaa ginbanhaw sila ni Jesus gikan sa minatay? Indi sa paghatag sing kabuhi nga wala sing katapusan sadto nga tion, kundi agod ipasundayag nga sia ang Mesias kag agod ipakita kon ano ang mahimo niya sa gahom nga ginhatag sa iya sang Dios. Nagpalig-on ini sing pagtuo sa ginalauman nga pagkabanhaw kag sa dayon nga kabuhi sa idalom sang palaabuton nga paggahom sang langitnon nga Ginharian sang Dios sa mga kamot ni Cristo.​—⁠Mateo 6:​9, 10; Juan 11:​41, 42.

9. Paano nahangpan sing husto nanday Marta kag Pablo ang gintudlo ni Jesus nahanungod sa paglaum nga pagkabanhaw?

⁹ Nahibaluan ni Marta yadto nga paglaum bangod sang iya pagpakig-upod kay Jesus, kay nagsiling sia kay Jesus tuhoy kay Lazaro: “Nahibaluan ko nga banhawon sia sa pagkabanhaw sa katapusan nga adlaw.” (Juan 11:24) Nahibaluan niya nga ang pagkabanhaw matabo, indi sa iya (Lazaro) katapusan nga adlaw, kundi sa palaabuton pa, “sa katapusan nga adlaw”​—⁠sa Adlaw sang Paghukom, kon ang minatay banhawon sa idalom sang paggahom sang Ginharian sang Dios. Nahibaluan man ina ni apostol Pablo, kay sia nagsiling: “[Ang Dios] nagtangdo sing isa ka adlaw nga hukman niya ang napuy-an nga duta sa pagkamatarong.” (Binuhatan 17:31) Si Pablo nagsiling man: “Mahanabo ang pagkabanhaw sang mga matarong kag mga dimatarong.” (Binuhatan 24:15) Wala sia magsiling nga ang pagkabanhaw nagakahanabo na kundi “mahanabo” pa ini sa palaabuton​—⁠sa idalom sang paggahom sang Ginharian.

10. Ano ang ginkomento sang isa ka Pranses nga propesor nahanungod sa mga pagtuluuhan sang Cristiandad tuhoy sa pagkabanhaw kon ipaanggid sa maathag nga panudlo sang Biblia?

¹⁰ Sa libro nga Immortality of the Soul or Resurrection of the Dead? ang Pranses nga Protestante nga propesor nga si Oscar Cullmann nagsulat: “May daku nga kinatuhayan ang pagpaabot sang mga Cristiano sa pagkabanhaw sang mga patay kag ang pagpati sang mga Griego sa pagkadimamalatyon sang kalag. . . . Bisan pa ginsugpon sang ulihi sang Cristianismo ining duha ka pagpati, kag karon bug-os nga indi ini mahangpan sang kinaandan nga Cristiano, wala ako sing rason nga taguon ang ginakabig ko kag sang kalabanan nga eskolar subong amo ang kamatuoran. . . . Ang kabuhi kag ang ideya sang Bag-ong Testamento bug-os nga ginapangibabawan sang pagtuo sa pagkabanhaw. . . . Ang bug-os nga tawo, nga patay gid, ginabanhaw paagi sa bag-o nga buhat sang Dios sa pagtuga.”

Pagkabanhaw​—⁠Sa Diin?

11, 12. (a) Ano ang katuyuan sang Dios para sa mga tawo kag sa sining duta? (b) Paano ginpasundayag ni Jesus nga ang katuyuan sang Dios para sa duta wala magbalhin?

¹¹ Sang gintuga sang Dios ang mga tawo, ginhatag niya sa ila ang duta subong ila dayon nga puluy-an kag gintuyo niya nga tugbon ining planeta sing matarong nga kaliwatan sang katawhan. (Genesis 1:​26-28; Salmo 115:16) Ginapatuhuyan sang Biblia si Jehova subong “ang Manughuman sang duta kag Manugtukod sini, Sia ang Isa nga nagpalig-on sini, nga wala magtuga sini sa wala sing pulos, nga naghuman sini agod puy-an.”​—⁠Isaias 45:⁠18.

¹² Walay sapayan sang linibo ka tuig sang pagkadihimpit kag kamatayon kutob sang pagrebelde sang tawo, katuyuan gihapon sang Dios nga ang duta mangin dayon nga puluy-an sang tawo: “Ang mga matarong magapanag-iya sang duta, kag magapuyo sila sa sini sing dayon.” (Salmo 37:29) “Malipayon ang mga malum-ok sing hunahuna, sila magapanubli sang duta.” (Mateo 5:5) Sa amo, sang ginbanhaw ni Jesus ang mga patay, ginbanhaw niya sila diri mismo sa duta, kag sa gilayon nakilal-an sila sang iban subong ang mga indibiduwal nga napatay. Nagapalig-on ini nga sa idalom sang paggahom sang Ginharian ang mga patay banhawon sa duta agod may kahigayunan nga mabuhi sing dayon sa sini. (Bugna 20:​12, 13) Magatuman ina sang katuyuan sang Dios para sa mga tawo kag para sa duta.​—⁠Isaias 46:​9-11; 55:​11; Tito 1:​1, 2.

13. Ano nga palaligban ang nagaatubang sa mga iglesia sang Cristiandad, kag paano nila ginapanikasugan nga lubaron ini?

¹³ Apang, sanglit ang mga iglesia sang Cristiandad nagapati sa pagkadimamalatyon sang kalag, nagahatag ini sa ila sing palaligban: Paano nila mapahisanto ang pagkabanhaw sang “bug-os nga tawo,” subong sang ginpasundayag ni Jesus, sa ila pagpati sa dimamalatyon nga kalag nga nagaluntad na sa langit ukon sa impierno? Ang The Catholic Encyclopedia nagasiling: “Ang ­Fourth Lat­er­an Coun­cil nagatudlo nga ang tanan nga tawo, ginpili ukon ginsikway, ‘mabuhi liwat upod ang ila kaugalingon nga mga lawas nga ila karon ginadala.’ ” Nagadugang pa ini: “Bangod ang lawas amo ang kaupod sa mga krimen sang kalag, kag amo ang kaupod sa iya mga kaayuhan, daw ginapangayo sang hustisya sang Dios nga ang lawas mag-ambit sa silot kag padya sang kalag.” Suno sa sini nga pagpati, ang lawas mahiusa liwat sa kalag sa langit ukon sa impierno. Daw ano kalawig? “Ang nabanhaw nga lawas sang mga santo kag mga makasasala pagahatagan sing pagkadimamalatyon,” pangangkon sina nga libro.

14. Paano gintinguhaan sang isa ka Jesuita nga manunulat nga ipaathag ang pagtamod sang Cristiandad sa pagkabanhaw sang lawas?

¹⁴ Sa libro nga The Future Life, sang Jesuita nga si J. C. Sasia, aton mabasa: “Busa ang kabuhi sa langit puno man sing mga kalipay paagi sa nahimaya nga mga sentido [sang lawas nga nahiusa sa kalag].” Tuhoy sa lawas nga nahiusa sa ila kalag sa impierno, ina nga libro nagapangangkon: “Sa impierno, sa tapos sang pagkabanhaw [sang lawas], ang tagsa ka sentido sang lawas sang tawo may kaugalingon nga silot . . . Ang sentido sa pagbatyag ukon pagtandog amo ang labi nga paantuson, bangod paagi labi na sa mga sala sang unod nga napaakig sang mga sinikway ang Dios. . . . Ang ila pagpakig-upod sa ila lawas mangin kabangdanan para sa ila sang dugang pa nga mga pag-antos kag mga kabudlayan.”

15. Ngaa mapasipalahon ang itudlo nga ginapaantos sang Dios ang katawhan sa impierno sing dayon?

¹⁵ Sa amo, ang pagbaton sa paganong ideya tuhoy sa pagkadimamalatyon sang kalag nagbukas sang dalan nga batunon man sang Cristiandad ang paganong ideya tuhoy sa masakit nga pagpaantos sa mga kalag​—⁠kag bisan sa mga lawas⁠—​sa impierno sing dayon. Apang, tuhoy sa dumaan nga buhat sa pagsunog sing mga bata subong mga halad sa dimatuod nga mga dios, si Jehova nagsiling: “Ila . . . ginasunog sa kalayo ang ila mga anak nga lalaki nga mga halad nga sinunog kay Baal, butang nga wala ko pag-isugo ukon pag-ihambal, kag wala mag-abot sa akon tagipusuon.” (Jeremias 19:5) Gani isa ka pagpasipala ang itudlo nga ginapaantos sang Dios ang katawhan sing dayon, samtang maathag nga ginapakita sang iya kaugalingon nga Pulong nga ang dimahinulsulon nga mga nagahimo sing sala pagalaglagon, indi na magluntad. “Ang tagsa ka kalag nga indi magpamati sa sad­tong Manalagna [Jesus] pagalaglagon sing bug-os.”​—⁠Binuhatan 3:​23; tan-awa man ang Mateo 10:​28; Lucas 17:​27; Juan 3:​16; 2 Pedro 2:​12; Judas 5.

Pagkadimamalatyon

16. Ano ang ginatudlo sang Biblia nahanungod sa pagkadimamalatyon?

¹⁶ Apang, wala bala nagatudlo ang Biblia nga ang mga tawo dalhon sa langit agod makatigayon didto sing dimamalatyon nga kabuhi? Huo, nagatudlo ini. Apang wala ini sing kahilabtanan sa tawhanon nga dimamalatyon nga mga kalag. Ang pagkadimamalatyon resulta sang pagkabanhaw sang isa ka tawo subong isa ka espiritu nga tinuga (subong ni Jesus) kag indi bangod may dimamalatyon sia nga kalag nga nagpadayon sa pagkabuhi sa pagkapatay. Ang palaabuton nga padya nga pagkadimamalatyon gintanyag sa pila ka matutom kag tulad-Cristo nga mga tawo kag natigayon lamang sang si Cristo naggahom sa Ginharian sa langit, indi sa gilayon sa tapos sang pagkayab ni Cristo sa langit sang nahaunang siglo.​—⁠Salmo 110:​1; 1 Corinto 15:​53, 54.

17. Pila ang makatigayon sing pagkadimamalatyon, kag ano ang ila bahin sa katuyuan sang Dios para sa duta?

¹⁷ Dugang pa, ina nga paglaum gintanyag sa pila lamang sa tawhanon nga pamilya. Gintawag ini ni Jesus nga isa ka “diutay nga panong.” (Lucas 12:32) Ining grupo, 144,000 sa kadamuon, ginabanhaw padulong sa langitnon nga kabuhi subong dimamalatyon nga espiritu nga mga tinuga agod maggahom sa ibabaw sang duta upod kay Cristo sa iya langitnon nga Ginharian. (2 Pedro 3:​13; Bugna 7:​4; 14:​1, 4; 20:4) Ang duta nga ila ginagamhan puy-an, sa ulihi, sang nahimpit nga mga tawo, wala sing duhaduha minilyonmilyon sila. Madamo sa ila ang mga tawo nga nagbalik sa duta paagi sa “pagkabanhaw sang matarong kag dimatarong.” (Binuhatan 24:15) Apang, may iban pa nga makatigayon sing kabuhi sa bag-ong kalibutan luwas sa mga ginbanhaw. Sin-o ini sila?

“Indi Na Gid Mapatay Liwat”

18. Dugang sa paglaum nga pagkabanhaw para sa patay nga katawhan, anong makatilingala nga butang ang gintagna ni Jesus?

¹⁸ Samtang ang pat-od nga paglaum sang mga patay amo ang pagkabanhaw, may isa pa ka dalayawon nga paglaum sa aton tion. May kaangtanan ini sa ginsiling ni Jesus kay Maria. Sa tapos magsiling: “Sia nga nagapakita sing pagtuo sa akon, bisan pa mapatay sia, magakabuhi [sa pagkabanhaw],” si Jesus nagdugang pa, “kag ang bisan sin-o nga nagakabuhi kag nagapakita sing pagtuo sa akon indi na gid mapatay.” (Juan 11:​25, 26) Sa sining ulihi nga ginhambal, gintagna ni Jesus ang isa ka makatilingala nga butang: Magaabot ang tion nga ang mga tawo nga nagakabuhi indi na mapatay! Apang san-o ina maabot?

19. (a) Sa anong hut-ong sang tion matuman ang paglaum nga indi na gid mapatay? (b) Paano ginalaragway sang Biblia ang mga may paglaum nga indi na gid mapatay?

¹⁹ Ang aton adlaw karon amo ang tion nga matuman ina nga saad! Ginapakita sang tanan nga pamatuod nga malapit na gid kita sa katapusan sining malaut nga kalibutan. (Mateo 24:​3-14; 2 Timoteo 3:​1-5, 13) Sa amo, ang mga tawo nga nagapakita karon sing pagtuo sa Dios kag sa iya Anak may makakulunyag nga paglaum nga maluwas sa katapusan sining sistema kag magpadayon sa pagkabuhi sa bag-ong kalibutan sang Dios​—⁠indi na gid mapatay! Ginapatuhuyan ini sila sa Bugna 7:​9, 14 subong “dakung kadam-an, nga wala sing tawo nga makaisip, gikan sa tanan nga pungsod kag tribo kag katawhan kag hambal . . . [nga] nagguwa sa dakung kapipit-an,” nga gin-amligan sang Dios bangod sang ila pagpakita sing pagtuo. Ginpatuhuyan ni Jesus ang nagapakari nga katapusan sining malaut nga sistema karon subong “dakung kapipit-an nga wala pa sing subong nga nahanabo kutob sa ginsuguran sang kalibutan tubtob karon, wala, kag indi na gid mahanabo.”​—⁠Mateo 24:​21; tan-awa man ang Hulubaton 2:​21, 22; Salmo 37:​10, 11, 34.

20, 21. Paano ang minilyon karon nagapakita sing pagtuo sa Dios kag kay Cristo, kag ano ang indi kinahanglan sang madamo sa ila?

²⁰ Sa bug-os nga kalibutan, minilyon sang dakung kadam-an nga luyag magkabuhi sing dayon sa duta ang nagapakita sing pagtuo sa mga saad sang Dios kag sa isa nga iya ginhatagan sing gahom nga mangin “ang pagkabanhaw kag ang kabuhi,” si Jesucristo. Kag gindedikar nila ang ila kaugalingon sa Dios, ginasimbulohan ini paagi sa bawtismo sa tubig. (Mateo 28:​19, 20) Ginakilala nila nga utang nila sing bug-os ang kaluwasan sa “Dios, nga nagalingkod sa trono, kag sa Kordero,” si Jesucristo.​—⁠Bugna 7:⁠10.

²¹ Ang dakung kadam-an nga makalampuwas sa katapusan sining kalibutan indi magakinahanglan sing pagkabanhaw gikan sa minatay bangod sila “indi na gid mapatay”! Nagahimo ka bala sing mga tikang nga mangin isa sa sining grupo? Kon amo, daw ano ka makatilingala kag tumalagsahon nga pribilehiyo ang bukas sa imo​—⁠ang makalampuwas sa katapusan sang malaut nga sistema ni Satanas kag pasudlon sa matarong nga bag-ong dag-on nga magadala sa imo sing himpit nga panglawas kag kabuhi nga wala sing katapusan sa paraiso nga duta! (Lucas 23:​43; Bugna 21:​4, 5) Paagi sa pagtuon kon ano ang kabubut-on sang Dios kag pagbatas sa paghimo sini, ginapasundayag mo nga ikaw ‘indi ang sahi nga nagaisol padulong sa kalaglagan.’ Ikaw man makatigayon sing ‘pagtuo nga magaamlig sa kalag.’​—⁠Hebreo 10:​39; 1 Juan 2:​15-17; Bugna 7:⁠15.

Mga Pamangkot Para sa Repaso

◻ Ano ang matuod nga paglaum sang mga patay?

◻ Ngaa ang pagpati sang Cristiandad sa pagkabanhaw sang lawas isa ka insulto sa Dios?

◻ Ano ang ginatudlo sang Biblia nahanungod sa pagkadimamalatyon?

◻ Anong makatilingala nga paglaum ang matigayon karon sang katawhan?