Report sang mga Manugbantala sang Ginharian
Ang Kamatuoran sang Biblia Nagdaug Batok sa Tradisyon
MAHIMO nga madalom ang gamot sang relihioso nga tradisyon. Minilyon ang nagabatyag nga malain ang pagbag-o sang relihion. Mahimo gid nga amo sini ang ginbatyag ni Saulo, nga nangin si apostol Pablo, kay sia nagsiling: “Kapin ako kakugi para sa mga tradisyon sang akon ginikanan [sang sa madamo sang akon mga katubotubo].” Apang sang ginpakita sa iya ang kamatuoran, nagbag-o sia gikan sa Judaismo kag nangin isa ka Cristiano. (Galacia 1:13-16) Madamo karon ang nakarealisar nga ang kamatuoran sang Biblia nagagikan sa tuburan nga mataas pa sa tradisyon. Talupangda kon paano ang kamatuoran sang Biblia nagdaug sa Italya.
Ang isa ka babayi nagpaathag: “Ang akon utod nga babayi kag ako nagdaku sa isa ka daku nga pamilya nga may madugay na nga Katoliko nga mga tradisyon, kag debotado gid kami nga mga Katoliko. Pagligad sang tion, namana ako. Nian napatay ang akon bana, kag nagkabuhi ako subong isa ka balo sa madamo nga tuig upod sa akon kabataan. Ang akon hinablos nagatudlo sing katekismo, kag pirme niya ginapamangkot ang pari sing mga pamangkot tuhoy sa Biblia, apang wala sia makabaton sing makaalayaw nga mga sabat.
“Samtang nagaduaw ako sa amon banwa, nasumalang ko sa nahauna nga tion ang mga Saksi ni Jehova kag nagbaton ako sing pagtuon sa Biblia. Ginyaguta ako sang tanan ko nga Katoliko nga kaupod anay bangod sang akon pagtuon sang Biblia. Apang, wala ako magluya. Sa nahauna nga tion, nakatigayon ako sang akon kaugalingon nga Biblia, kag wala sing bisan sin-o nga makakuha sini sa akon. Ang akon utod nga babayi nagdampig man kay Jehova, kag kubos sa duha ka tuig, kami nga duha ginbawtismuhan.
“Naghibi ako sang magbulag ako sa nahauna nga tion gikan sa iglesia bangod nahadlok ako sa pagbiya sa mga tradisyon nga nanggamot sa akon sing 76 ka tuig. Apang malipayon ako karon sa paglakat sa mga dalanon ni Jehova kag ginhimo ko ang labi nga masarangan ko sa pagbulig sa iban nga makaguwa sa espirituwal nga kadudulman!”—Ipaanggid ang 1 Pedro 2:9.
Gintadlong sang Isa ka Barbero ang Sayop nga Panghunahuna
Ang isa ka barbero sa Hapon maluyagon maghambal nahanungod sa mga demonyo kag mga UFO’s samtang ginaguntingan niya ang buhok sang iya mga suki. Apang, sang magsugod sia sa pagtuon sang Biblia, narealisar niya kon daw ano ka makatalagam ini nga buhat. Gani gin-agda niya sa baylo ang iya mga suki nga magbuylog sa iya sa pagtuon sang Biblia. Nagpanaksi sia sa lamharon nga mga suki nahanungod sa pagpanuga. Kada semana nagaorder sia sing mga Biblia kag mga kopya sang libro nga Mahimu Ka Mabuhi sing Dayon sa Paraiso sa Duta gikan sa Saksi nga nagatuon upod sa iya agod ipahamtang niya sa iya mga suki.
Bisan indi pa sia Saksi, nakapahamtang sia sing kapin sa 30 ka set sang Biblia kag Mabuhi sing Dayon nga libro sa tion sang iya nahauna nga tuig sang pagtuon. Kapin sa 25 ka tawo ang nagsugod sa pagtuon subong resulta sang iya dipormal nga pagpanaksi. Kon kaisa tubtob sa napulo ka tawo ang nagapakigbahin sa iya grupo nga pagtuon sang Biblia. Karon pito sang iya ginapanaksihan kon ginaguntingan niya ang ila buhok ang nagtadlong sang ila sayop nga panghunahuna kag bawtismado na nga mga Saksi ni Jehova!