Masibud nga Pagpalapit sa Dios

“AKO amo ang dalan kag ang kamatuoran kag ang kabuhi. Walay nagaabot sa Amay kundi paagi sa akon,” siling ni Jesucristo. Nagdugang sia: “Sa pagkamatuod nagasiling ako sa inyo, Kon magpangayo kamo sing bisan anong butang sa Amay ihatag niya ini sa inyo sa akon ngalan.”​—⁠Juan 14:​6; 16:⁠23.

Apang, sa sulod sang mga siglo, ang mga relihion sang Cristiandad, labi na ang Iglesia Romana Katolika, paagi sa iya doktrina sang kalayuhon nga impierno, purgatoryo, kag Trinidad, nagpasibud sang “dalan.” Si Jesus ginlaragway, indi subong kinabubut-on nga manugpatunga para sa makasasala nga mga tawo, kundi subong lapsag nga ginakugos ukon subong kalahadlukan nga hukom, nga mas luyag magkondenar kag magsilot sa mga makasasala sang sa magluwas sa ila. Paano, nian, ang makasasala makapalapit sa Dios?

Ang libro nga The Glories of Mary (1750) nagapaathag. Nagapaanggid kay Jesus sa nagadabdab nga adlaw sang hustisya, ang ika-13 ka siglo nga papa nga si Innocent III nagsiling: “Ang bisan sin-o nga yara sa kagab-ihon sang sala, magtangla sang iya mga mata sa bulan, magpakiluoy kay Maria.” Kay Maria, iloy ni Jesus, isa pa ka manugpatunga ang gin-imbento. Ayhan paagi sa iya impluensia subong iloy, ang kahamuot mahimo matigayon gikan kay Jesus kag gikan sa Dios. Busa, sa pinamulong ni Lau­rence Justinian, ika-15 nga siglo nga klerigo, si Maria nangin “ang taytay padulong sa paraiso, ang gawang padulong sa langit, ang labing matuod nga manugpatunga sa tunga sang Dios kag sang tawo.”

Bangod sang sobra nga pagdayaw sa iya, sang ulihi indi lamang “Birhen Maria” ang pagtamod sa iya kundi nangin ang “Balaan nga Reyna, Iloy sang Kaluoy,” nga tuman ka imakulada kag ginpakataas sa bagay nga tuman man sa iya ka sagrado para palapitan sing direkta. May isa pa bala ka manugpatunga nga makita? Kamusta ang iya iloy?

Bangod mahipos ang Biblia sa sini, ginpangita ang sabat sa iban. Ang Apokripa nga libro nga Prot­evangelium of ­James nagasugid sang sugilanon ni Anne (ukon Anna), asawa ni Joa­quim, nga wala sing anak pagligad sang madamong tinuig sang pag-asawahay. Sang ulihi, nagpakita sa iya ang isa ka anghel kag nagpahibalo nga magaanak sia. Sang ulihi, nangin iloy kuno sia ni “Birhen Maria.”

Busa nag-utwas ang kulto ni “Saint” Anne. Ang mga altar kag mga simbahan ginpatindog sa kadungganan niya. Ang pagsimba kay “Saint” Anne naglapnag sa Europa sang ika-14 nga siglo.

“Nangin masibud gid ang relihion!” siling sang libro nga The Story of the Reformation. “Ang mga tawo nangamuyo kay Anne nga nagpatunga kay Maria nga nagpatunga sa iya Anak nga nagpatunga sa Dios para sa makasasala nga mga tawo. Indi ini mapatihan, apang amo ina ang sari sang disparatis nga ang kalag sang tawo ginbuhi.” Kon amo, yari ang isa pa ka kaso nga ang mga pulong ni Jesus nagakaigo nga maaplikar: “Ginapakawalay pulos ninyo ang pulong sang Dios tungod sang inyo pinalatonlaton nga sugid.”​—⁠Marcos 7:⁠13.

[Ginkuhaan sang Laragway 21]

The Metropolitan Museum of Art. Dulot ni Benjamin Altman, 1913. (14.40.633)