Maglakat Subong Gintudluan ni Jehova

“Tudlui ako, O Jehova, sang imo dalanon. Magalakat ako sa imo kamatuoran. Bug-osa ang akon tagipusuon sa pagkahadlok sa imo ngalan.”—SALMO 86:11.

1, 2. Ano ang nagapahulag sa mga Saksi ni Jehova nga pangindian ang pagtayhon sing dugo?

“AYHAN husto ang mga Saksi ni Jehova sa pagdumili nga gamiton ang dugo nga mga produkto, kay matuod nga ang madamong mga ahente nga may ikasarang sa pagtuga sing balatian sarang maliton paagi sa gintayhon nga dugo.”​—⁠Pranses nga medikal nga pamantalaan nga Le Quotidien du Médecin, Disiembre 15, 1987.

² Ang iban mahimo magasiling nga nataboan lamang nga ang mga Saksi ni Jehova nagpangindi sa pagtayhon sing dugo antes nahibaluan sing lapnag kon daw ano ini ka makatalagam, makamamatay pa. Apang ang tindog sang mga Saksi ni Jehova sa dugo indi aksidente lamang, ukon sugo nga gin-imbento sang indi kilala nga sekta, isa ka tindog nga tuga sang kahadlok nga basi ang dugo indi matinlo. Sa baylo, ang mga Saksi nagapangindi sa dugo bangod sang determinasyon nila nga maglakat sing matinumanon sa atubangan sang ila Dakung Instruktor​—⁠ang Dios.

3. (a) Ano ang balatyagon ni David nahanungod sa pagsandig kay Jehova? (b) Anong resulta ang ginapaabot ni David bangod sang pagsalig sa Dios?

³ Si Hari David, nga nagbatyag sang iya pagsandig sa Dios, determinado nga magpatudlo sa iya kag ‘maglakat sa iya kamatuoran.’ (Salmo 86:11) Ginlaygayan anay si David nga kon likawan niya ang magpakasala sa dugo sa itololok sang Dios, ang iya ‘kalag bugkuson sa binugkos sang kabuhi upod ni Jehova.’ (1 Samuel 25:​21, 22, 25, 29) Samtang ginabugkos sang mga tawo ang bilidhon nga mga butang agod amligan kag tipigan ini, ang kabuhi ni David sarang man maamligan kag matipigan sang Dios. Nagbaton sang maalamon nga laygay, wala gintinguhaan ni David nga luwason ang iya kaugalingon paagi sa personal nga mga panikasog kundi nagsalig sa Isa nga ginkautangan niya sang iya kabuhi: “Ipakita mo sa akon ang banas sang kabuhi. Sa imo atubangan yara ang kabug-osan sang kalipayan; sa imo tuo yara ang mga kalipayan sa gihapon.”​—⁠Salmo 16:⁠11.

4. Ngaa luyag ni David nga matudluan ni Jehova?

⁴ Bangod sina nga panimuot, si David wala nagbatyag nga personal sia nga makapili kon diin nga balaan nga mga sugo ang importante ukon kinahanglan tumanon. Ang iya panimuot amo: “Tudlui ako, O Jehova, sang imo dalanon, kag tuytuyi ako sa banas nga matarong.” “Tudlui ako, O Jehova, sang imo dalanon. Magalakat ako sa imo kamatuoran. Bug-osa ang akon tagipusuon sa pagkahadlok sa imo ngalan. Dayawon ko ikaw, O Jehova nga Dios nakon, sa bug-os ko nga tagipusuon.” (Salmo 27:​11; 86:​11, 12) Kon kaisa ang paglakat sa kamatuoran sa atubangan sang Dios daw indi kombeniente ukon magakahulugan sing daku nga sakripisyo, apang luyag ni David magpatudlo sa husto nga banas kag maglakat sa sini.

Gintudluan Nahanungod sa Dugo

5. Ano ang mahimo nga nahibaluan ni David nahanungod sa tindog sang Dios sa dugo?

⁵ Talalupangdon nga kutob sa pagkabata, si David gintudluan sang pagtamod sang Dios sa dugo, nga ang pagtamod indi relihioso nga tanhaga. Sang ang Kasuguan ginbasa sa katawhan, nabatian ini ni David: “Ang kalag sang unod yara sa dugo, kag ginhatag ko ini sa inyo sa ibabaw sang halaran sa paghimo sing katumbasan tungod sa inyo mga kalag, kay ang dugo amo ang nagahimo sing katumbasan bangod sang kabuhi. Busa nagsiling ako sa katawhan sang Israel: ‘Wala sing tawo sa inyo nga magkaon sing dugo ukon wala sing bisan sin-o nga dumuluong nga nagapanlugayaw sa tunga ninyo nga magkaon sing dugo.’”​—⁠Levitico 17:​11, 12; Deuteronomio 4:10; 31:⁠11.

6. Paano nga may yara dalayon nga kinahanglanon para ang mga alagad sang Dios tudluan nahanungod sa dugo?

⁶ Tubtob ginagamit sang Dios ang Israel subong iya gintipon nga katawhan, ang maluyag sa pagpahamuot sa iya kinahanglan tudluan nahanungod sa dugo. Busa ang Israelinhon nga mga bata nga lalaki kag babayi sang lainlain nga kaliwatan gintudluan. Apang magapadayon bala ina nga pagpanudlo pagkatapos ginbaton sang Dios ang kongregasyon sang mga Cristiano, nagahimo sa ila nga “Israel sang Dios”? (Galacia 6:16) Huo. Ang pagtamod sang Dios sa dugo wala magbalhin. (Malaquias 3:6) Ang iya ginsugid nga tindog nahanungod sa indi paggamit sing sayop sang dugo nagluntad sa wala pa ginpatuman ang Kasuguan nga katipan, kag nagpadayon ini pagkatapos nga natapos ang Kasuguan.​—⁠Genesis 9:​3, 4; Binuhatan 15:​28, 29.

7. Ngaa importante sa aton ang pagkanatudluan sang Dios nahanungod sa Dios?

⁷ Ang pagtahod sa dugo importante sa Cristianismo. ‘Indi bala ina isa ka pagpasobra?’ ipamangkot sang iban. Apang, ano ang importante sa Cristianismo kon indi ang halad ni Jesus? Kag si apostol Pablo nagsulat: “Sa iya [Jesus] may pagtubos kita paagi sa iya dugo, nga amo ang kapatawaran sang aton mga paglapas, suno sa kamanggaran sang iya dibagay nga kaluoy.” (Efeso 1:7) Ang The Inspired Letters, nga ginbadbad ni Frank C. Laubach, nagbadbad sang bersikulo: “Ang dugo ni Cristo ginbayad tungod sa aton kag karon Iya kita.”

8. Paano ang “dakung kadam-an” nagasandig sa dugo para sa kabuhi?

⁸ Ang tanan nga nagalaum sa paglampuwas sa nagahilapit nga “dakung kapipit-an” kag sa pag-agom sang mga pagpakamaayo sang Dios sa paraiso nga duta nasandig sa ginpatulo nga dugo ni Jesus. Ang Bugna 7:​9-14 nagalaragway sa ila kag nagasiling nahanungod sa kon ano ang ginhimo nila: “Ini amo sila ang nagguwa sa dakung kapipit-an, kag ginbunakan nila ang ila mga panapton nga malaba kag ginpaputi sila sa dugo sang Kordero.” Talupangda ang ginasiling diri. Wala ini nagasiling nga sila nga nakalampuwas sa kapipit-an ‘nagbaton kay Jesus’ ukon ‘nagtuo sa iya,’ bisan pa importante ini nga mga butang. Ginhatag sini ang isa pa ka tikang kag nagsiling nga “ginbunakan nila ang ila mga panapton kag ginpaputi sila sa dugo [ni Jesus].” Ina bangod kay ang iya dugo may balor sa paggawad.

9. Ngaa ang pagtuman kay Jehova nahanungod sa dugo serioso katama?

⁹ Ang apresasyon sa sining balor nagabulig sa mga Saksi ni Jehova sa pagpamat-od nga indi paggamiton sing sayop ang dugo, bisan pa hanuot nga magasiling ang isa ka manugbulong nga ang pagtayhon kinahanglanon. Mahimo sia magpati nga ang posible nga mga benepisyo sang pagtayhon nagalabaw sa mga katalagman sa lawas nga ginahatag mismo sang dugo. Apang indi mapasapayanan sang Cristiano ang daku pa nga katalagman, ang katalagman nga mawasi ang kahamuot sang Dios bangod sang pagpasugot sa sayop nga paggamit sing dugo. Nagsiling anay si Pablo nahanungod sa ‘nagpakasala sing kinabubut-on sa tapos nila nabaton ang sibu nga ihibalo sang kamatuoran.’ Ngaa mabug-at gid ina nga sahi sang sala? Bangod ‘ginsikway [niya] ang Anak sang Dios kag . . . nagkabig nga may ordinaryo nga balor ang dugo sang katipan nga ginpakabalaan niya.’​—⁠Hebreo 9:16-24; 10:26-29.

Buligi ang Iban nga Matudluan

10. Ano ang sa likod sang aton determinasyon nga maglihi sa dugo?

¹⁰ Kita nga nagaapresyar sa halad gawad ni Jesus nagahalong nga indi makasala, nga nagasikway sang nagaluwas sing kabuhi nga balor sang iya dugo. Paagi sa pagbinagbinag sini sing maayo, nahibaluan naton nga ang simple nga pagpasalamat sa Dios para sa kabuhi dapat magpahulag sa aton nga isikway ang bisan ano nga pagkompromiso sang iya matarong nga mga kasuguan, nga nagasalig kita nga ginhatag ini nga ang ginahunahuna amo ang aton labing maayo nga kaayuhan​—⁠ang aton nagadugay nga labing maayo nga kaayuhan. (Deuteronomio 6:24; Hulubaton 14:​27; Manugwali 8:12) Apang, kamusta ang aton mga anak?

11-13. Ano ang sayop nga pagtamod sang iban nga Cristianong mga ginikanan nahanungod sa ila kabataan kag sa dugo, kag ngaa?

¹¹ Walay sapayan nga ang aton mga anak mga lapsag pa ukon bata pa kaayo sa paghangop, sarang sila matamod ni Jehova nga Dios nga matinlo kag kalahamut-an sa sadsaran sang aton debosyon. (1 Corinto 7:14) Matuod nga ang mga lapsag sa isa ka Cristianong panimalay indi pa makahangop kag makapili nahanungod sa pagtuman sang sugo sang Dios sa dugo. Apang, ginahimo bala naton ang aton bug-os nga masarangan agod tudluan sila nahanungod sining importante nga butang? Dapat ina binagbinagon sing maayo sang Cristianong mga ginikanan, kay ang iban nga mga ginikanan may sayop nga panimuot nahanungod sa ila mga anak kag sa dugo. Nagahunahuna ang iban nga indi nila kontrolado kon bala pagatayhunan ang ila menor-de-edad nga anak. Ngaa sayop ini nga pagtamod?

¹² Madamong mga pungsod ang may mga kasuguan ukon mga ahensia sang gobierno sa pag-amlig sa ginpabay-an kag gin-abusuhan nga mga kabataan. Ang mga kabataan sang mga Saksi ni Jehova wala ginapatumbayaan ukon ginaabusuhan sang ang mga ginikanan namat-od nga indi pagpatayhunan ang ila palangga nga anak, sa amo man nga tion nagapangabay nga gamiton ang tal-us nga mga terapiya nga mahatag sang modernong medisina. Bisan sa medikal nga punto-de-vista, indi ini pagpabaya ukon pag-abuso, nagabinagbinag sang ginabaton nga mga katalagman sang terapiya nga pagtayhon. Isa ini ka pagpadapat sang kinamatarong nga timbangon ang mga katalagman nga nadalahig kag nian pilion ang pagbulong.⁠a Apang, ang iban nga mga doktor naggamit sang legal nga mga probisyon sa pagpangayo sing awtorisasyon nga ipilit ang wala ginapasugti nga pagtayhon.

¹³ Ang iban nga mga ginikanan, nakahibalo nga mahapos para sa mga doktor ang pagtigayon sang pagsakdag sang hukmanan agod matayhunan sing dugo ang isa ka bata, nagabatyag nga indi nila ini kontrolado, nga wala sing sarang ukon kinahanglan nga himuon ang mga ginikanan. Daw ano gid ka sayop ina nga pagtamod!​—⁠Hulubaton 22:⁠3.

14. Paano sanday David kag Timoteo gintudluan kutob sa ila pagkabata?

¹⁴ Nakita naton nga si David gintudluan sang dalanon sang Dios kutob sang bata pa sia. Nagsangkap ina sa iya agod tamdon ang kabuhi subong regalo halin sa Dios kag hibaluon nga ang dugo nagalaragway sang kabuhi. (Ipaanggid ang 2 Samuel 23:​14-17.) Si Timoteo gintudluan sang panghunahuna sang Dios “kutob sang pagkalapsag.” (2 Timoteo 3:​14, 15) Wala bala kamo nagaugyon nga bisan pa sanday David kag Timoteo ubos sa ginakabig nga legal nga edad karon sang pagkahamtong, dapat nila ipabutyag sing maayo ang ila kaugalingon sa mga hulusayon may kaangtanan sa kabubut-on sang Dios? Sa kaanggid, antes mangin hamtong, ang lamharon nga mga Cristiano karon dapat tudluan sang dalanon sang Dios.

15, 16. (a) Ano ang pagtamod nahanungod sa mga kinamatarong sang mga menor-de-edad sa iban nga mga lugar? (b) Ano ang nagdul-ong sa pagtayhon sing dugo sa isa ka menor-de-edad?

¹⁵ Sa iban nga mga lugar ang ginatawag nga hamtong nga menor-de-edad ginahatagan sing mga kinamatarong pareho sa mga adulto. Pasad sa edad ukon hamtong nga panghunahuna, ukon sa duha, ang isa ka pamatan-on mahimo tamdon subong hamtong na sa paghimo sang iya kaugalingon nga desisyon sa medikal nga pagbulong. Bisan pa sa kon diin indi ini kasuguan, mahimo hatagan sing bug-at sang mga hukom ukon mga opisyal ang luyag sang isa ka pamatan-on nga sarang makapabutyag sing maathag sang iya malig-on nga desisyon nahanungod sa dugo. Busa, kon ang isa ka pamatan-on indi makapaathag sing maayo kag sing hamtong sang iya mga pagpati, ayhan ang hukmanan magapamat-od kon ano ang daw labing maayo, subong abi para sa isa ka lapsag.

¹⁶ Isa ka pamatan-on nga lalaki ang uluuntat nga nagtuon sang Biblia sa sulod sang mga tinuig apang wala nabawtismuhi. Walay sapayan nga pito ka semana na lamang ang magaligad kag yara na sia sa edad nga matigayon ang “kinamatarong sa pagdumili sang medikal nga pagbulong para sa iya kaugalingon,” ang isa ka ospital nga nagabulong sa iya para sa kanser nagkuha sang pagsakdag sang hukmanan agod tayhunan sia batok sa luyag niya kag sang iya mga ginikanan. Gin-usisa sia sang maalam nga hukom nahanungod sa pagtuluuhan niya sa dugo kag ginpamangkot sang sadsaran nga mga pamangkot, subong sang mga ngalan sang nahaunang lima ka tolon-an sa Biblia. Indi mahingalanan ukon mahatag sang pamatan-on nga lalaki ang makahalaylo nga pamatuod nga nahangpan niya kon ngaa nagapangindi sia sa dugo. Sa masubo, ginsugo sang hukom ang pagtayhon, nga nagakomento: “Ang iya pagpangindi sa pagtayhon sing dugo wala napasad sa isa ka hamtong nga paghangop sa iya kaugalingon nga relihiosong pagtuluuhan.”

17. Anong tindog ang ginhimo sang isa ka 14-anyos nga bata nga babayi nahanungod sa pagtayhon sing dugo, kag ano ang resulta?

¹⁷ Mangin tuhay ang matabo para sa isa ka menor-de-edad nga gintudluan sing maayo sang dalanon sang Dios kag aktibo nga nagalakat sa Iya kamatuoran. Isa ka lamharon nga Cristiano ang may pinasahi nga sahi sang kanser. Ang bata nga babayi kag ang iya mga ginikanan nakahangop kag nagbaton sang haganhagan nga chemo­therapy gikan sa isa ka espesyalista sa isa ka kilala nga ospital. Apang, gindala sa hukmanan ang kaso. Ang hukom nagsulat: “Si D.P. nagpamatuod nga batuan niya ang pagtayhon sing dugo sa tanan niya nga masarangan. Ginkabig niya ang pagtayhon nga paghingalit sa iya lawas kag ginpaanggid ini sa paglugos. Ginpangabay niya ang Hukmanan nga tahaon ang iya ginpili kag pahanugutan sia nga magtener [sa ospital] nga wala ginamando sang Hukmanan ang pagtayhon sing dugo.” Ang Cristianong panudlo nga nabaton niya nagbulig sa iya sa sining mabudlay nga tion.​—⁠Tan-awa ang kahon.

18. (a) Anong malig-on nga tindog ang ginhimo sang nagamasakit nga bata nga babayi nahanungod sa pagbaton sing dugo? (b) Ano ang gindesisyon sang hukom nahanungod sa pagbulong sa iya?

¹⁸ Isa ka 12-anyos nga babayi ang ginbulong tungod sang leukemia. Ang ahensia nga nagaatipan sang kaayuhan sang mga bata nagdala sini sa hukmanan agod ipilit sa iya ang pagtayhon sing dugo. Ang hukom nagdesisyon: “Ginsugid ni L. sa sining hukmanan sing maathag kag sa katunayan nga paagi nga, kon panikasugan nga tayhunan sia sing dugo, batuan niya ina nga pagtayhon sa tanan nga kusog nga masarangan niya. Nagsiling sia, kag ginapatihan ko sia, nga magasinggit kag magabato sia kag nga gabuton niya ang ginatuslok nga kagamitan sa iya butkon kag magapanikasog sa pagpierde sang dugo sa bag nga yara sa ibabaw sang iya katre. Indi ako magahimo sing mando nga magabutang sa sining bata sa sina nga kabudlayan . . . Sa sini nga pasyente, ang pagbulong nga ginatugda sang ospital magabulong sang balatian sa pisikal nga kahulugan lamang. Indi ini magabulong sang iya emosyonal nga mga kinahanglanon kag sang iya relihioso nga pagtuluuhan.”

Mga Ginikanan​—⁠Magtudlosing Maayo

19. Anong pinasahi nga obligasyon ang dapat himuon sang mga ginikanan sa ila mga kabataan?

¹⁹ Inang mga eksperiensia nagadala sing makusog nga mensahe para sa mga ginikanan nga nagahandum nga ang tanan sa ila pamilya magakabuhi nahisuno sa sugo sang Dios sa dugo. Ang isa ka rason kon ngaa si Abraham abyan sang Dios amo nga nakahibalo Sia “suguon [sang patriarka] ang iya kabataan kag ang iya panimalay sa ulihi niya agod nga bantayan nila ang dalanon ni Jehova sa paghimo sing pagkamatarong.” (Genesis 18:19) Amo man bala ini sa Cristianong mga ginikanan karon? Kon ikaw isa ka ginikanan, ginatudluan mo bala ang imo palangga nga mga kabataan sa paglakat sa dalanon ni Jehova agod pirme sila mangin “handa sa pag-apin sa atubangan sang tanan nga nagapamangkot . . . sing rason para sa paglaum sa [sini], apang himua ini nga may pagpaubos kag tudok nga pagtahod”?​—⁠1 Pedro 3:⁠15.

20. Ano gid ang luyag naton nga mahibaluan kag patihan sang aton mga kabataan nahanungod sa dugo? (Daniel 1:​3-14)

²⁰ Bisan pa maayo para sa aton mga kabataan ang makahibalo nahanungod sa mga katalagman sang balatian kag sang iban pa nga mga katalagman sang pagtayhon sing dugo, ang pagtudlo sa aton kabataan sang himpit nga sugo sang Dios sa dugo wala gid nagakahulugan nga tinguhaan ipatudok sa ila ang kahadlok sa dugo. Halimbawa, kon ang hukom magapamangkot sa bata nga babayi kon ngaa indi niya luyag magpatayhon sing dugo kag ang sabat niya amo nga ginahunahuna niya nga ang dugo tuman ka makatalagam ukon makahaladlok, ano ang mangin epekto? Ang hukom magahinakop nga indi lamang sia hamtong kag nahadlok katama, bisan pa nga basi sia nahadlok sa appen­dectomy amo kon ngaa magahibi sia kag magabato sini nga operasyon walay sapayan nga nagapati ang iya mga ginikanan nga labing maayo ini para sa iya. Dugang pa, nakita naton kaina nga ang pangunang rason kon ngaa ginapamatukan sang mga Cristiano ang mga pagtayhon sing dugo indi kay ang dugo mahigko kundi nga ini hamili sa aton Dios kag Manughatag-sing-Kabuhi. Dapat ina mahibaluan sang aton mga kabataan, pati na nga ang posible nga mga katalagman sang dugo sa lawas nagahatag sing dugang nga bug-at sa aton relihioso nga tindog.

21. (a) Ano ang dapat mahibaluan sang mga ginikanan nahanungod sa ila mga kabataan kag sa pagtamod sang Biblia sa dugo? (b) Paano mabuligan sang mga ginikanan ang ila mga kabataan may kaangtanan sa dugo?

²¹ Kon kamo may mga kabataan, nakapat-od bala kamo nga nagaugyon sila kag sarang makapaathag sang napasad sa Biblia nga tindog sa pagtayhon sing dugo? Nagapati gid bala sila nga ining tindog kabubut-on sang Dios? Kombinsido bala sila nga ang paglapas sa sugo sang Dios mabug-at katama sa bagay nga nagabutang ini sa katalagman sang paglaum sang isa ka Cristiano para sa kabuhi nga walay katapusan? Ang maalamon nga mga ginikanan magarepaso sining mga butang upod sa ila mga kabataan, bata man sila ukon halos mga adulto na. Ang mga ginikanan mahimo makahiwat sing mga sesyon sa pag-ensayo diin ang kada pamatan-on pamangkuton sang mahimo nga ipamangkot sang isa ka hukom ukon opisyal sa ospital. Ang tuyo indi amo ang pagpaliwatliwat sing de-makina sang ginpili nga mga katunayan ukon mga sabat. Mas importante nga nahibaluan nila kon ano ang ila ginapatihan, kag kon ngaa. Huo, sa bista sa hukmanan, ang mga ginikanan kag ang iban mahimo magapresentar sang impormasyon nahanungod sa mga katalagman sang dugo kag sang pagkamatigayon sang tal-us nga mga terapiya. Apang ang mahimo tinguhaan sang isa ka hukom ukon opisyal nga mahibaluan gikan sa pagpakigsugilanon sa aton mga kabataan amo sa kon bala hamtong nga nahangpan nila ang ila kahimtangan kag mga pililian kag kon bala may kaugalingon man sila nga mga kabilihanan kag malig-on nga kombiksion.​—⁠Ipaanggid ang 2 Hari 5:​1-4.

22. Ano ang mangin permanente nga resulta sang aton pagkanatudluan sang Dios nahanungod sa dugo?

²² Dapat naton tanan apresyahon kag malig-on nga tumanon ang pagtamod sang Dios sa dugo. Ang Bugna 1:5 nagalaragway kay Cristo subong ang isa nga ‘nagahigugma sa aton kag nagbuhi sa aton gikan sa aton mga sala paagi sa iya kaugalingon nga dugo.’ Paagi lamang sa pagbaton sa balor sang dugo ni Jesus nga matigayon naton ang bug-os kag mapinadayunon nga kapatawaran sang aton mga kasal-anan. Ang Roma 5:9 maathag nga nagasiling: “Busa, sanglit karon ginpakamatarong kita paagi sa iya dugo, labi pa nga maluwas kita sa kasingkal sang Dios paagi sa iya.” Daw ano ka maalamon, nian, para sa aton kag para sa aton kabataan ang tudluan ni Jehova sa sining butang kag mangin determinado sa paglakat sa iya dalanon sing dayon!

[Footnote]

Yabi nga mga Punto sang Pagtudlo

◻ Ano ang dapat nga mangin pagtamod naton nahanungod sa pagpatudlo kay Jehova?

◻ Ngaa ang pagtuman sa sugo sang Dios sa dugo tuman ka importante?

◻ Ngaa importante nga ang mga pamatan-on sarang makapaathag sing maayo kag sing malig-on sang ila kombiksion nahanungod sa dugo?

◻ Paano mabuligan sang Cristianong mga ginikanan ang ila mga kabataan nga matudluan sing maayo sang sugo ni Jehova sa dugo?

[Kahon sa pahina 17]

ANG HUKMANAN NAHAMUOT

Ano ang ginasiling sang desisyon sang hukmanan nahanungod kay D.P., nga ginsambit sa parapo 17?

“Ang Hukmanan nahamuot gid sa intelihensia, kalig-on, dignidad, kag kaisog sining 14-1/2 anyos nga bata. Mahimo sia nasubuan bangod sang pagkatukib nga may yara sia makamamatay nga sahi sang kanser . . . Apang, isa ka hamtong nga pamatan-on ang nagkari sa Hukmanan sa pagpanaksi. Nagkari sia nga nakahugod sing maathag sa mabudlay nga hilikuton nga nagaatubang sa iya. Gintambungan niya ang tanan nga mga sesyon sa paglaygay, nagpasugot sa isa ka plano sang terapiya, nagpalambo sang may kaangtanan nga pilosopiya sa kon paano sia subong isa ka tawo magaatubang sining medikal nga hangkat, kag nagkari sia sa Hukmanan upod ang makatalandog nga pangabay: tahuron ninyo ang akon desisyon . . .

“Dugang sa iya pagkahamtong, si D.P. naghatag sang bastante nga mga rason para sa iya desisyon amo kon ngaa gintahod ini sang Hukmanan. Sa espirituwal, sikolohiko, moral, kag emosyonal mahimo sia mahalitan bangod sang isa ka plano sa pagbulong nga naglakip sang pagtayhon sing dugo. Ang Hukmanan magatahod sang iya ginpili nga plano sa pagbulong.”

[Laragway sa pahina 16]

Ang hukom ukon administrador sang ospital maluyag sa paghibalo kon ano gid ang ginapatihan sang Cristianong pamatan-on, kag kon ngaa