Report sang mga Manugbantala sang Ginharian
Maayong Balita Gikan sa Nasidlangan nga Europa
MADAMO sing makakulunyag nga mga butang ang nagakatabo sa teokratikong latagon sa Nasidlangan nga Europa. Talalupangdon amo ang internasyonal nga kombension sa Zagreb, sang Agosto 16-18 1991, sang ang 7,300 ka mga Saksi naghatag sing tinagipusuon nga pag-abiabi sa ila mga kauturan gikan sa 15 ka pungsod. Sa kabilugan, 14,684 ang nagtambong. Isa gid ka makadalayaw nga pagpakita sing gugma kag paghiusa sa isa ka pungsod nga gintay-ug sang kagamo!
Ang mga Saksi sa Nasidlangan nga Europa masako sa pagsugid sa iban sang maayong balita sang Ginharian ni Jehova, sa diin ginapatihan nila nga amo lamang ang paglaum para sa matuod nga paghidait. Sa iban nga bahin isa ka hangkat para sa ila nga huptan ang ila neutral nga tindog. Walay sapayan, masami nagapamati ang mga tawo, kag ang mga Saksi nagasugid sang madamong maayo nga mga eksperiensia.
Sa isa ka banwa ang isa ka 16 anyos nga lin-ay nakabati sing maayong balita gikan sa nagaisahanon nga Saksi ni Jehova sa amo nga banwa. Nasugdan ang isa ka regular nga pagtuon sa Biblia, kag nagtubo ang iya apresasyon sa kamatuoran. May daku nga handum nga isugid sa iban ang makadalayaw nga mga butang nga iya natun-an, ginsugid niya ini sa iya mga kabutho apang nakasumalang sia sing pagpamatok kag pagyaguta. Isa ka kabutho niya ang labi nga nagpamatok sa iya apang nakibot kag nakadayaw sia sa iya pagkamapainumuron, kay ang pamatan-on nga estudyante sa Biblia wala maakig walay sapayan sang mga pag-insulto. Sang ulihi, ginhimo ang mas maid-id nga panaksi sa sining lin-ay, kag nasapwan niya nga indi maayo ang iya nangin panimuot. Nasugdan ang isa ka pagtuon sang Biblia sa iya, gani ang nauna nga estudyante sa Biblia kag ang iya bag-o nga kaupod nagatinguha nga ipaambit ang ila kalipay sa iban, walay sapayan sang pagpamatok sang ila mga ginikanan, sang ila manunudlo, kag ila mga kabutho.
Subong resulta sang ila pagpanaksi, isa pa ka kabutho nila nga babayi ang nagbaton sing kamatuoran. Karon tatlo na sila sa sulod sang hulot-klasehan, kag maayo sila nga halimbawa sang pagbulig sa iban kag sing pagpakita sang gugma sa tunga nila. Nian isa pa ka lin-ay ang nagbuylog sa ila.
Karon apat na sila nga nagapungko sa isa ka bangko sa laguwerta sang eskwelahan sa diin nagasugilanon sila tuhoy sa Biblia. Kag sa kakibot sang kadam-an, nagdamo sila. Isa pa ka lin-ay sa klase, nga nagdayaw sang ila maayo nga paggawi, ang namat-od nga mag-upod sa pagtuon sa Biblia. Padayon sila nga lima sa pagpangagda sa iban, sa mga estudyante kag mga manunudlo, sa pagbuylog sa ila. Walay sapayan, ang mga lin-ay padayon nga nagaeksperiensia sing daku nga pag-ipit gikan sa ila mga ginikanan. Ginpilit sila sang ila mga ginikanan nga untatan ang ila pagtuon sang Biblia paagi sa pagpanggisi sang ila mga literatura kag pagmaltratar sa ila.
Ano ang resulta sining pagpanaksi nga nagsugod lamang sa isa ka bataon nga interesado? Isa sa mga lin-ay ang ginbawtismuhan sadtong distrito nga kombension sang 1990, kag ang apat sa ila sadtong sirkito nga asambleya sang tigpamulak sang 1991. Isa ini ka rason sang daku nga kalipay! Sa karon, ining lima ka lin-ay nagaalagad tanan subong regular payunir! Didto sa banwa nga natabo ini, may yara na karon sing 11 ka manugbantala, 8 sa ila ang regular payunir.
Ginasakdag kag ginapakamaayo ni Jehova ang iya mga Saksi sa Nasidlangan nga Europa. Maathag nga may yara sing daku nga ikasarang sa pag-uswag sa tunga sing bunayag sang tagipusuon nga mga tawo sa sini nga bahin sang duta.