Report sang mga Manugbantala sang Ginharian

Ang Kamatuoran sang Biblia Nagadala sing Paghiusa kag Kalipay sa Pamilya

ANG isa ka mag-asawa sa India nga mga katapo sang isa ka iglesia sang Cristiandad pirme nga nagaaway. Pirme nga ginasakit sang bana ang iya asawa. Diutayan lang gani sila magpatyanay! Sang isa ka bes naglaga ang babayi sing ghee (sahi sang mantikilya) kag gindala ini sa iya bana nga kuno abi tsa apang ginbasya niya ini sa nawong sang bana. Sang ulihi, ang asawa namat-od nga maghikog.

May makadala bala sing paghiusa kag kalipay sa sining mag-asawa? Madamo ang magasiling sing wala. Apang antes maghikog, nagduaw anay ang asawa sa iya anak nga babayi kag umagad. Nagatuon sila sing Biblia upod sa mga Saksi ni Jehova. Namat-od sia nga mamati, kag ang iya tagipusuon natandog sing daku sang iya nabatian. Sa tapos sang pagtuon, gintu-ad niya sa mga Saksi ang iya mga palaligban. Ginpakita nila sa iya gikan sa Biblia kon ano gid ang iya mga salabton subong isa ka asawa. Ginkadtoan man ang bana kag ang pagtuon sa Biblia ginsugdan upod sa iya. Ang resulta? Paagi sa pag-aplikar sang bana kag sang asawa sang mga prinsipio sang Biblia, ang ila mga palaligban sa pamilya nalandas. Karon ang mag-asawa nag-uswag tubtob sa punto nga gindedikar nila ang ila kabuhi kay Jehova, kag ginbawtismohan sila.

Dimaisip nga iban pa nga mga mag-asawa ang nakasapo nga ang inspirado nga Pulong sang Dios nagaunod sing solusyon sa mga palaligban sang pamilya. Paagi sa pag-aplikar sang laygay sini, subong sang masapwan sa Colosas 3:12-14 kag Efeso kapitulo 5, nalandas nila ining mga palaligban kag nakatigayon sing paghiusa kag kalipay.

◻ Ang isa pa ka halimbawa kon paano ang kamatuoran sang Biblia makapahiusa sang pamilya amo ang sa Lebanon. Sang 1973 nasugdan sang isa sang mga Saksi ni Jehova ang pagtuon sa Biblia upod sa isa ka pamilya sa diutay nga minuro. May duha man ka mag-utod nga babayi gikan sa kaingod nga nagabuylog sa pagtuon. Apang sang mamatok ang lokal nga pari sa pagtuon, gin-untat ini sang pamilya. Ang duha ka mag-utod nga babayi nagpadayon sa pagtuon paagi sa sulat, nga ginagamit ang direksion sang ila bayaw nga babayi. Sa tapos nila maton-an ang mga sulat nga naghalin sa Saksi, ginapasa nila ini sa ila bayaw agod basahon, bisan pa ang iya bana nagapamatok. Kon may mga pamangkot sila, ginapamangkot nila ang Saksi paagi sa sulat.

Apang, ang ila utod nagpadayon sa pagpamatok. Gingisi niya ang mga publikasyon sa Biblia sang iya mga utod nga babayi kag sang iya asawa kag ginsunog pa gani niya ang ila mga Biblia. Apang walay sapayan sang mabaskog nga pagpamatok sang pamilya, sang pari, kag sang iban pa sa minuro, ang mag-utod nagpadayon sa pagtuon. Sang ulihi, nagpabawtismo sila. Ang iban nga mga paryente nagsugod man sa pagtuon sa Biblia kag ginbawtismohan. Ang nagapamatok anay nga utod nga lalaki sang mag-utod nagtuon man sing kamatuoran kag nagpabawtismo. Nagaalagad sia karon subong isa ka ministeryal nga alagad sa kongregasyon, kag isa ka regular nga auxiliary payunir. Sang matapos ang 1985, 23 ka katapo sining pamilya ang nakatuon sing kamatuoran kag nabawtismohan!

Daw ano ka malipayon ang mag-utod nga nag-unong sila sa kamatuoran walay sapayan sang pagpamatok! Daw ano nga kalipay para sa ila nga makita ang paghiusa kag kalipay sang ila pamilya subong resulta sang ila pagbaton sing kamatuoran sang Biblia! Ginapalig-on sini ang mga pulong sang salmista sang magsiling sia: “Malipayon ang katawhan nga ang ila Dios amo si Jehova!”—Salmo 144:15.

◻ May isa pa ka eksperiensia nga naghalin sa Siudad sang Nueva York, E.U.A. Ini nga tawo nagsugod sa paggamit sing mga droga sang 13 anyos sia kag mabaskog nga nagiyan nga indi sia makakaon kon indi sia anay magyupyop sing marijuana! Nagagasto sia kada adlaw sing $100 para sa iya bisyo sa cocaine, kag samtang nagabaliya sing mga droga pirme sia nagadala sing duha ka pusil. Nangasawa sia kag nakatigayon sing apat ka anak. Sang ang iya asawa nangin isa sang mga Saksi ni Jehova, namatok sia. Apang sang ulihi tinak-an sia sa iya pagkabuhi nga pagpahubog sa droga kag pagpatuyang sa panghilahi.

Bangod sang pagpalig-on sang iya asawa kag sang mahigugmaon nga bulig sang mga gulang, nagsugot sia nga magtuon sa Biblia pagligad sang isa ka tuig nga nabawtismohan ang iya asawa. Nakabulig ini sa iya sa paglandas sang daku nga mga palaligban sa withdrawal lakip ang hallucination. Nag-uswag sia tubtob sa punto nga ginbawtismohan sia kag karon nalipay sia nga makita ang iya pamilya nga nahiusa sing malipayon kag ang iya apat ka anak nga nagauswag sa kamatuoran. Bangod malig-on ang iya trabaho kag maayo-ayo ang iya ginakita, sia kag ang iya asawa nagapaabot nga magpakigbahin sa pag-auxiliary payunir.

[Kapsion sa pahina 21]

“Malipayon ang katawhan nga ang ila Dios amo si Jehova!”—Salmo 144:15