Ang Pagtipon sang “Bilidhon nga mga Butang” sa Poland

ANG Poland ginasiling nga isa ka Katoliko nga pungsod. Suno sa opisyal nga estadistika, 93 porsiento sang populasyon mga katapo sang Iglesia Katolika. Apang, ang ulihi nga politikal kag sosyal nga mga pagbalhin nga natabo didto may yara tumalagsahon nga epekto sa mga tawo kag sa ila relihioso nga pagkabuhi. Ginapakita sang mga surbey nga mga 50 porsiento sadtong ginpamangkot ang nagkabig sang ila kaugalingon nga mga Katoliko.

Sang Mayo 1989, ang mga Saksi ni Jehova legal nga ginkilala subong isa ka relihioso nga organisasyon sa Poland. Kutob sadto, mga 11,000 ka bag-uhan ang nagbuylog sa ila subong mga manugbantala sang maayong balita sang Ginharian. Kapin sa 106,000 ka manugbantala sang Ginharian ang nagapakig-upod sa karon sa kapin sa 1,300 ka kongregasyon, kag 200,422 ka tawo ang nagtambong sa 1991 nga pagsaulog sang Memoryal sang kamatayon ni Cristo. Busa, ang gintagna nga pagtipon sa ‘bilidhon nga mga butang sang mga pungsod’ natabo sa Poland. (Hageo 2:7) Sining karon lang, ang nangin pangulong dinalan nga balita nga internasyonal nga mga kombension sang mga Saksi ni Jehova ginhiwat sa Poland. Apang ang pagtan-aw sa pila ka magagmay nga banwa sa pungsod labi na nga nagapakita kon paano ginahimo ang pagtipon nga hilikuton sa sina nga duta.

Ang mga Payunir Nagabukas sang Dalan

Ang Sztum isa ka banwa nga mga 10,000 ang populasyon nga nahamtang malapit sa kon diin nagatabo ang Suba Vistula sa Dagat Baltic. Ining banwa madugay na ginkabig nga mabudlay nga teritoryo kon tuhoy sa pagbantala nga hilikuton. Sang 1987 walo lamang ang mga manugbantala diri. Apang, nagbalhin ang tanan sang ang mga payunir, ukon bug-os tion nga mga manugwali sang Ginharian, nag-abot. Sa ikalima nga miting, nga ginhiwat sa isa ka sinehan, 100 ka interesado ang nagtambong! Pagligad sang duha ka tuig sang mapisan nga panikasog isa ka kongregasyon ang nahuman. Karon ang 90 ka manugbantala may kaugalingon nga Kingdom Hall, kag 150 ka tawo ang nagatambong sa ila mga miting sing tayuyon.

Subong sang ginpaabot, ang Iglesia Katolika nagpamatok sang ulihi. Isa ka “espesyalista” nga madre ang naghatag sing nagapasipala nga hambalanon nahanungod sa mga Saksi, nagasumbong sa ila nga nagatudlo sing butig nga mga doktrina. Apang subong sang pirme nagakatabo, nagbalandra ini. Ang iya pamulongpulong naghimo lamang sa mga tawo nga mag-usisa sang kamatuoran. Madamo sa ila ang nakatuon sang kamatuoran kag mga regular payunir na karon! Siling nila: ‘Samtang nagatuon sang kamatuoran, naghunahuna kami nga ang tanan nga maluyag mangin Saksi dapat mangin kaangay sang nagtudlo sa iya, nga nagakahulugan sang mangin payunir.’ Gani ang espiritu sang pagpayunir nagalapnag sa bug-os nga kongregasyon.

Subong resulta, mga 180 ka pagtuon sa Biblia ang ginahiwat diri. Paagi sa libro nga Mahimu Ka Mabuhi sing Dayon sa Paraiso sa Duta, ang iban gintudluan pa gani sa pagbasa. Sa amo man nga tion, natun-an nila ang kamatuoran. Ang regular nga napulo-ka-minuto nga mga pagtuon sa Biblia ginahiwat upod sa isa ka grupo sang lokal nga mga bilanggo kon maninlo sila sa mga dalan. Ginpangapinan sang isa sa ila ang isa ka Saksi sang ang babayi nga naglabay nagbuyayaw sa Saksi. Nagdalagan sia pakadto sa utod, nag-agaw sang Mahimu Ka Mabuhi nga libro sa iya kamot, nagbayaw sini, kag namangkot sa namuyayaw nga babayi: “Indi ka bala makabasa? Ano ang nasulat diri? Mahimo ka mabuhi sing dayon sa Paraiso sa duta! Nakabati ka na bala sini? Ngaa ginainsultuhan mo ang Dios kag ang mga nagasimba sa iya?”

Ginahinambalan sa Banwa

Ang Kruszwica, bantog nga kapital anay sang Poland, kuta sang Katoliko. Bisan sang tungatunga sang 1990, diutay lamang ang Saksi sa tunga sang 9,300 ka pumuluyo sini. Apang bugana nga ginapakamaayo ni Jehova ang panikasog sang mga manugwali sang Ginharian.

Nakatalupangod sang pagkasalimpapaw sang ila espirituwal nga mga lider, nagadamo kag nagadamo nga tawo—labi na ang mga lamharon—ang nagkadto sa mga Saksi para sa mga sabat. Sa malip-ot katama nga tion, 20 ka pagtuon sa Biblia ang nasugdan. Ang kura paroko naghatag sing malain nga sermon nahanungod sa mga Saksi ni Jehova, apang wala ini magpaluya sa sinsero nga mga tawo nga magtambong sa ila mga miting. Ang mga Saksi nangin pangunang topiko nga ginahinambalan sa mga tindahan kag mga parke kag bisan sa simbahan. Tunga sa tuig sang ulihi, duha ka dalagku nga grupo sa pagtuon sa Biblia ang gintukod. Ang Kruszwica karon may aktibo katama nga kongregasyon sang mga 35 ka sumilimba ni Jehova. Nagadumala sila sing 75 ka pagtuon sa Biblia kag masako nga nagatipon sang “bilidhon nga mga butang” nga nabihag anay sang butig nga relihion.

Ang isa sa ila amo ang 23-anyos nga si Bogdan, katapo sang isa ka debotado Katoliko nga pamilya. Panugiron niya: “Nagainom ako anay, nagasigarilyo, kag nagakabuhi sing imoral. Kilala ako subong punk kag anarkista, kag daw wala sing isa ang nagaulikid. Apang, sang nagsugod ako sa pagtuon sa Biblia, ang akon iloy namahog nga hiluan ang iya kaugalingon. Indi maagwanta ang pag-ipit, gin-utod ko ang tanan nga pagpakig-angot sa mga Saksi. Sang ulihi, bangod sang mahigugmaon nga bulig sang mga espesyal payunir, nauntat ko ang tanan nga malain nga batasan. Nabawtismuhan sa 1991 nga ‘Mga Mahigugmaon sang Kahilwayan’ nga Distrito nga Kombension, ginpili ko ang bug-os tion nga ministeryo subong ang akon tulumuron sa kabuhi kag nag-auxiliary payunir kutob sadto.”

Ang 21-anyos nga si Sławomir nadalahig sa espiritismo kag Satanismo, nga gilayon niya nga ginsikway sang nakita niya nga ginapakamalaut sang Biblia ina nga mga buhat. “Apang namilit si Satanas,” siling niya. “Isa ka gab-i ang tolo karan sang plaka nagsugod sa pagtokar bisan wala ginpaandar, kag nakabati ako sang sataniko nga lanton, bisan pa gindula ko na ang tanan nga may kaangtanan sa pagsimba sa Yawa sa balay. Nangamuyo ako kay Jehova, kag ginbuligan niya ako sa pagtigayon liwat sang espirituwal nga pagkatimbang. Ang isa ka sikyatrista nga ginapakonsultahan ko anay sa sugo sang akon mga ginikanan nakamutik sang hinali nga pag-uswag sa akon kahimtangan kag naghinakop nga maayo ang akon panglawas. Nagsulat sia sa akon tsart: ‘Gin-ayo sang mga Saksi ni Jehova.’”

Pagbatu sa Kalibutanon nga Espiritu

Bagatnan-katundan sang Kruszwica amo ang Środa Śląska. Ang “bilidhon nga mga butang” makita man sa sining diutay nga banwa nga may 9,000 ka tawo. Sang nagligad nga apat ka tuig, isa lamang sang aton espirituwal nga utod nga babayi ang nagapuyo didto. Apang, karon, ang kadamuon sang mga manugbantala sang Ginharian nagsaka sa 47. Madamo sang mga Saksi ang nasiod anay sa siod sang espiritismo, pagkagiyan sa droga, kag imoralidad. Nagabatyag sila nga bangod gid ini sa espirituwal nga pagkawalay unod nga nagaluntad sa simbahan nga makasarang lamang sa pagpakamalaut sa mga tawo sa espirituwal, nga wala nagabulig sa ila. Ang mga Saksi nagatanyag sa mga tawo sing tunay nga paumpaw.

Ang mga pamatan-on sa kongregasyon naghimo sang eskwelahan nga ila personal nga teritoryo para sa pagbantala nga hilikuton. “Masunson ako nga ginasilingan sang akon mga kabutho: ‘Ginauyangan mo lamang ang imo pagkapamatan-on,’” sugilanon sang 18-anyos nga si Kasia. “Apang nalikawan ko ang madamo nga problema, kag ang akon kabuhi nangin mas makahulugan. Nagadumala ako sing madamong pagtuon sa Biblia sa eskwelahan kag wala ko ginapatumbayai ang akon homework ukon ang akon personal nga pagtuon. Ang mga pamatan-on nga nagsiling nga akon ‘ginauyangan ang akon pagkapamatan-on’ mga iloy na, nagapakig-away sa madamong problema.”

Ang mga publikasyon sang Watch Tower nangin popular sa lokal nga mga eskwelahan. Halimbawa, ang isa ka maestra sang Polaco nagsiling sa iya mga estudyante nga sundon ang simple nga pamulong sang aton balasahon nga Magmata! subong modelo sa pagsulat sang ila mga essay. Natukiban sang auxiliary payunir nga si Eva ang brosyur nga School and Jehovah’s Witnesess nga mapuslanon gid. “Ginaapresyar ko gid ini nga publikasyon. Nakahibalo gid sa sini ang akon mga maestra. Wala gid ako mabudlayi sa pagpangayo sing permiso nga mag-absent sa klase agod makatambong sa dalagku nga mga kombension.” Inang maayo nga panimuot sa bahin sang mga pamatan-on nagapahalipay sang tagipusuon ni Jehova.—Hulubaton 27:11.

Ang Mabangis nga mga Priso Nagbag-o

Sa sidlangan sang Środa Śląska amo ang Strzelce Opolskie, diin duha ang bilangguan. Ang isa amo ang ginabantayan sing maayo nga bilangguan para sa indi mabag-o nga mga priso. Tayuyon nga ginaduaw sang mga Saksi ining duha ka bilangguan sa pagdala sang kamatuoran sa mga priso, madamo sa ila mga bihag man anay sang Babilonia nga Daku, ang bug-os kalibutan nga emperyo sang butig nga relihion.—Bugna 18:1-5.

Ang mga Saksi nagatuon sang Biblia upod sa indibiduwal nga mga priso kag sa magagmay nga mga grupo sang mga priso, ang iban sa ila nabawtismuhan na. Bisan pa ginatapos nila ang sentensia sa ila, aktibo sila nga nagabantala sang maayong balita sa iban nga mga priso. Ang isa ka priso nga nagahanda sa pagpabawtismo naghimo sing talalupangdon nga mga pagbag-o amo kon ngaa gintugutan sia sang mga awtoridad sang bilangguan nga magpauli makaisa sa isa ka semana. Ang iban nagsulat sa ila pamilya nga nagapabutyag sang ila determinasyon nga makaguwa sa bilangguan, indi subong mga kriminal, kundi subong mga Saksi ni Jehova.

Ang hepe nga opisyal sang isa sa mga bilangguan nagreklamo nga ang Katolikong mga pari nagkari anay apang wala sing nahimo. Ginpamangkot niya ang mga Saksi: “Ano ang nagbulig sa inyo sa pagpabalhin kag sa pagpabag-o sa ila?” Ang isa ka sulat sang isa ka priso sa iya pamilya nagasabat: “Diri sa bilangguan, ginsugiran ako sang mga Saksi ni Jehova nahanungod sa matahom nga saad sang Dios nahanungod sa bag-ong panguluhan, ang Ginharian ni Jehova, nga magagahom sa dili madugay sa bug-os nga duta. May tion ako diri nga usisaon ang akon anay pagkabuhi sa kapawa sang Biblia. Bangod sang mapait nga mga paghinakop, napuno ako sang makusog nga handum nga mangin hilway nga tawo kag masapwan ang akon kaugalingon nga isa ka sakop sang Ginharian sang Dios. Karon isa ako ka bawtismado nga Saksi ni Jehova.”

Sa pihak nga bilangguan, madamo ang nagapaligad sang 25-ka-tuig nga sentensia tungod sang pagpatay. Isa ka tayuyon nga pagtuon sa Biblia ang ginahiwat sa 12 ka lalaki. Ang isa sa ila nagdedikar sang iya kabuhi kay Jehova kag ginbawtismuhan, kag ang iban nagaplano sa paghimo sining mga tikang. Nagapasalamat sa maayong resulta sa metodo sa pagtudlo nga gingamit sang mga Saksi ni Jehova, ang hepe nga opisyal sang bilangguan nagsiling: “Wala ako sing 12 ka kriminal. May yara ako 600. Buligi ako palihug sa pagpabag-o sa ila. Hatagan ko kamo sang tanan nga ginakinahanglan ninyo, apang palihug handa sang programa. Atipana sila!”

Amo gid sina ang ginhimo sang mga kauturan. Naghatag sila sing programa sa Biblia nga nagahinun-anon sa katuyuan sang kabuhi, sa paglaum para sa palaabuton, kag sa importansia sang pagbiya sang malain nga mga buhat. Nagsugid man sila sang mga eksperiensia sang isa ka priso anay nga nangin isa sang mga Saksi ni Jehova kag sang ulihi gintangdo subong gulang sa kongregasyon. Naghatag man ang mga Saksi sang mga talalupangdon nga punto gikan sa mga sugilanon sang isa ka makawat sang brilyante kag sang nagaabuso sang droga nga nakatuon sang kamatuoran.⁠a Nasapwan sang 20 ka priso nga nagtambong ang programa nga labing makawiwili kag namangkot sing madamo, ang iban nagpangabay sing mga pagtuon sa Biblia.

Ang Pagtuo kag Pagbatas Gintilawan

Ang Lubaczów isa ka diutay nga banwa nga may 12,000 ka tawo malapit sa dulunan sang Ukraine. Ang pag-ebanghelyo nga hilikuton didto nakatigayon sing kusog sang 1988 sang ang mga payunir nagsaylo sa pagbulig sa 12 ka lokal nga manugbantala. Karon may yara 72 ka aktibo nga manugbantala sang Ginharian, kag 150 ang nagtambong sa 1991 nga pagsaulog sang Memoryal sa bag-o ginpatindog nga Kingdom Hall.

Sang Hunyo 1991, si Papa Juan Paulo II nagduaw sa Lubaczów. Apang wala ina makabulig sa pagpapagsik sing matuod nga pagtuo sa mga tawo. Madamo sa ila ang ginatublag sang mga pangduhaduha kag mga pamangkot nahanungod sa katuyuan sang kabuhi kag sa paglaum sa palaabuton. Sang wala sila makabaton sing makaalayaw nga sabat gikan sa klero, nagkadto sila sa mga Saksi ni Jehova. Bisan pa ang mga tawo sa primero ginatublag sang konsiensia bangod sang pagbiya sang ila relihion, ang kamatuoran sa Biblia nga natun-an nila nagabulig sa ila sa pagtan-aw nga nakahimo sila sing husto nga desisyon.

Isa ka halimbawa amo ang eksperiensia ni Honorata, karon isa ka regular payunir. Sang nagligad nga mga isa ka tuig, ginpamangkot niya ang pari sa kompisar kon ano ang ngalan sang Dios. “Ang Dios gugma—amo ina ang iya labing matahom nga ngalan,” sabat sang pari. Pagkatapos, sia nagdugang: “Kaangay ikaw sang isa ka balde sang daw kristal katin-aw nga tubig nga gintuluan sing tinta. Ang mga epekto indi mabaliskad.” Busa natigayon niya ang sabat. “Namat-od ako nian nga mangin isa ka Saksi ni Jehova,” siling ni Honorata. “Indi man ina mabaliskad.”

Halos tanan nga nakatuon sang kamatuoran sa Lubaczów dapat magbatas sang makusog, panatiko pa, nga pagpamatok. Apang wala ini magpugong sa ila gikan sa pagbaton sang kamatuoran sang Biblia kag sa paghimo sang ila tindog dampig kay Jehova.

Si Elżbieta nagasugid: “Sang primero ginahanut ako sang akon mga ginikanan sa balay. Nian nagkadto sa Kingdom Hall ang akon pamilya. . . . Gindala nila ako pauli kag nagsugod sa ‘pagpadapat sang katarungan’ paagi sa ginbulubalighot nga lipak. Ginhanut ako kag ginsipa halin sa ulo tubtob sa dapadapa bangod lamang sang pagpakig-upod sa mga Saksi. Grabe gid ang paghanut sa akon amo kon ngaa kinahanglan ako magpabulong kag gindala sa ospital. Ginbuligan ako ni Jehova, kag nag-ayo ako. Ginsikway ako sang akon pamilya. Sang ginsugid ko ini sa pari, ginmulay niya ako, nga nagasiling: ‘Nagkari ka agod magreklamo bangod lamang sa pila ka tampa?’”

Ang isa pa ka utod nga babayi nagasugid: “Kada tuig nagakadto ako sa Częstochowa agod maglakat nga nagaluhod sa Dalan sang Krus, nga ginkabig ko anay nga isa ka katungdanan para sa tagsa ka sinsero nga Katoliko. May mga pinalian pa gihapon ako sa akon mga tuhod.” Sang mag-18 anyos sia natun-an niya ang kamatuoran kag nagsugid sa pari kag sa iya pamilya nga indi na sia magbalik sa simbahan. Ginsakit sia sing todo—“tuman gid ka grabe nga nagkalong ang akon utok,” sugid niya. “Apang sa ospital nag-ayoayo ako diutay agod makatambong sa ‘Mga Mahigugmaon sang Kahilwayan’ nga Distrito nga Kombension. Nakahibi ako sa kalipay sang nakita ko ang matuod nga paghiusa kag gugma sa tunga sang mga tawo nga wala sing panatisismo—mga butang nga wala ko pa gid makita sa Częstochowa. Daku gid ang akon kalipay nga naagom ko ang kaayo ni Jehova kag natun-an ang magsalig sa iya.” Si Jehova nagapabakud kag nagasakdag sa mga nagatugyan sang ila lulan sa iya.—Salmo 55:22.

Madamong bihag sang Babilonia nga Daku ang nagapamati karon sa panawagan nga “magguwa sa iya” sa sining Katoliko nga pungsod, subong sang sa iban pa nga mga lugar. Kon kabubut-on ni Jehova, ang iya walay kahadlok nga katawhan padayon nga magatipon sang madamo pa nga “bilidhon nga mga butang” nga nagalapta sa Poland. Sa pagkamatuod, madamo pa ang magasabat sa panawagan: “‘Kari!’ Kag ang ginauhaw magkari; ang buot magkuha sang tubig sang kabuhi sa walay bayad.”—Bugna 18:4; 22:⁠17.

[Footnote]

[Mapa sa pahina 24]

(Para sa kabug-usan sang teksto, tan-awa ang publikasyon)

POLAND

Sztum

Poznan

Kruszwica

Warsaw

Środa Śląska

Częstochowa

Strzelce Opolskie

Lubaczów

[Laragway sa pahina 26]

Pagbantala sang mensahe sang Ginharian sa Kruszwica, Poland