“Subong sang Nagangurob nga Leon”

NAGAPATI ka bala nga nagaluntad si Satanas? Sa karon, madamo ang wala nagapati. Daw ginakabig nila ina nga pagpati subong “disientipiko.” Bisan sadto pa sang 1911, ang Encyclopædia Britannica nagsiling: “Ginpaathag sang siensia ang madamo sang mga proseso sang naguwa nga kinaugali kag sang nasulod nga kabuhi sang tawo agod wala sing ibilin nga hulot para sa Satanikong ahensia.” Ang mga teologo nagapangatarungan nga si Satanas isa lamang ka simbulo, isa ka mito. Ang The World Book Encyclopedia nagasiling: “Madamong modernong teologo ang nagakabig sa Yawa nga simbulo sang gahom sang malaut, sang pinakamalain nga kinaiya sang tawhanon nga kinaugali.”

Apang, ano ang mga katunayan? Kon nagapati ka sa Biblia, dapat ka magpati nga si Satanas matuod. Wala lamang nagpati si Jesus nga nagaluntad sia kundi nagtawag sa iya nga “gumalahom sang kalibutan.” (Juan 14:30) Gintawag ni apostol Pablo si Satanas nga “dios sining sistema sang mga butang.” (2 Corinto 4:4) Kag ang tigulang nga si apostol Juan nagsiling: “Ang bug-os nga kalibutan yara sa gahom sang malauton.”—1 Juan 5:19.

Kon wala ka nagaugyon kay Juan, hunahunaa ang karon lang nga maragtas. Binagbaga ang mga death squad kag paggamit sang mga gobierno sang pagpaantos. Dumduma ang mga inaway kag pagpapas sa isa ka rasa nga nakita sang aton kaliwatan. Kag kumusta ang malaut nga mga krimen nga nangin ulong dinalan sa aton mga pamantalaan—ang tigdamo nga pagpamatay, panglugos, sunod-sunod nga patyanay, seksuwal nga pag-abuso sa mga kabataan, sa pagsambit sang pila lamang? May iban pa bala luwas kay Satanas nga mangin dios sining kalibutan?

Ang Cristiano nga si apostol Pedro nagpaandam: “Magbantay kamo. Ang inyo kaaway, nga Yawa, subong sang nagangurob nga leon nagaluyong, nga nagapangita sang iya tulukbon.” (1 Pedro 5:8) Kon ang leon ginbuy-an sa inyo kasilingan, magabaisay bala kamo kon sia nagaluntad ukon wala? Ukon magadalagan ka bala sa pagpanago?

Patihi nga si Satanas nagaluntad. Wala sia sing kaluoy kag malaut, kag mas makusog sia sang sa aton. Gani magdalagan para sa pangamlig sa Isa nga mas makusog pa. “Ang ngalan ni Jehova torre nga mabakod. Ang matarong nagadalagan pasulod sini kag may pangamlig.” (Hulubaton 18:10) Magdangop kay Jehova nga Dios, kag hibalua nga sa dili madugay ang katawhan pagahilwayon gikan sa impluwensia sinang isa nga malaut, si Satanas. Daw ano ka makalilipay nga paumpaw ina!—Bugna 20:1-3.