Report sang mga Manugbantala sang Ginharian

Espirituwal nga Kahilwayan sa Colombia

KUTOB sang panahon sang Espanyol nga mga konkistadores, ang Katolisismo may relihioso nga impluwensia sa Bagatnan nga Amerika. Sa Colombia madugay na ini nga opisyal nga relihion sang Estado. Sa nagligad nga 105 ka tuig, ang Batikano may kasugtanan upod sa gobierno sang Colombia nga nag-amlig sa simbahan kag naghatag sa sini sing pinasahi nga mga pribilehiyo sa patag sang edukasyon kag pag-asawahay.

Sang Disiembre 1990 ang mga taga-Colombia nagpili sing isa ka komisyon sa paghimo sing bag-ong konstitusyon, nga natapos sang tunga-tunga sang 1991. Ang bag-ong konstitusyon nagbalhin sang relihioso nga kahimtangan sa Colombia. Ang tanan nga relihion may palareho na karon nga mga kinamatarong sa kasuguan, kag ang pagtudlo sang relihion indi mahimo ipilit sa mga kabataan sa publiko nga mga eskwelahan. Ang kasugtanan upod sa Batikano pagarebisahon bangod sining mga pagbalhin sa konstitusyon.

Ining mas daku nga kahilwayan sa relihion magabuhin sang impluwensia sang Iglesia Katolika, nga labi nga nagapahapos para sa mga bunayag sing tagipusuon sa pagtigayon sing ihibalo kag pag-agom sing espirituwal nga kahilwayan.

Bilang paghulat sa sining espirituwal nga kahilwayan, ang 51,000 ka Saksi ni Jehova sa pungsod naghimo sing mga paghanda agod maatipan ang espirituwal nga mga refugee. Ang ila bag-ong mga tinukod sang sanga nga may ginpasangkad nga mga pasilidad, nga nagalakip sa madasig nga de-kolor nga offset press, manugtapos na. Ang temporaryo nga mga espesyal payunir ginpadala sa mas magagmay nga mga banwa sa pagpangita sa nadula nga mga karnero ni Jehova kag nakahimo sila sing dakung hilikuton sa pagtudlo sa Biblia. Sa 63 ka banwa, ang tagsa may mga 10,000 ka pumuluyo, 47 ka bag-ong kongregasyon kag grupo ang natukod.

Samtang ang espiritu ni Jehova padayon nga nagapahulag sa bunayag sing tagipusuon nga katawhan, madamo nga pamatan-on ang nagapamati man. Ang publikasyon nga Questions Young People Ask—Answers That Work napamatud-an nga isa ka hamili nga bulig lunsay sa mga kabataan kag sa ila mga ginikanan. Samtang nagapamalaybalay, ang isa ka Saksi nakasugilanon sa isa ka tawo nga nakabasa na anay sang mga bahin sining libro, ang kopya sini ginpahulam sa iya sang kaingod. Gindayaw gid niya ang praktikal nga kaalam nga ginapakita sini sa paghinun-anon sa mga problema sang pamilya. Ang Kapitulo 4, “Why Did Dad and Mom Split Up?” labi na nga gindayaw niya, kay sia kag ang iya asawa manugbulag. Nagsiling sia nga ginluwas sia sang libro gikan sa daku nga trahedya. Karon sia kag ang iya panimalay nagatuon sang Biblia upod sa mga Saksi ni Jehova kag nagatambong sa tanan nga mga miting sa kongregasyon. Nagapasalamat sila sing daku tungod sa praktikal nga kaalam nga ginaaman ni Jehova paagi sa Biblia kag sa iya organisasyon.

Ining eksperiensia nagailustrar sang espirituwal nga kahilwayan nga nagakatabo sa Colombia samtang ang mga Saksi ni Jehova nagabulig sa mga gutom sa espirituwal sa pagtuon tuhoy sa makatilingala nga mga katuyuan ni Jehova kag sa iya bag-ong kalibutan, nga karon malapit na.—2 Pedro 3:13.