Ano Gid Bala ang Ebanghelyo?

SA TION sang Paskwa, ang mga tawo sa madamong kadutaan makabati, kag nagahambal pa sing personal nahanungod sa Ebanghelyo. Ang termino kinaandan katama, apang may dugang pa bala ini nga kahulugan sang sa ginahunahuna sang kalabanan? Ang Ebanghelyo nagakahulugan bala sing butang nga maayo gid para sa imo kag sa imo mga hinigugma?

Ang “ebanghelyo” nagakahulugan sing “maayong balita,” kag pat-od gid nga ang maayong balita ginaabiabi indi lamang sa tion sang Paskwa kundi bisan san-o. Apang, ang Ebanghelyo indi lamang bisan anong maayong balita. Isa ini ka espesipiko nga maayong balita halin sa isa ka pat-od nga ginhalinan nahanungod sa isa ka partikular nga butang. Sa katunayan, isa ini ka mensahe nga gintangdo sang Dios nga ipahibalo sa bug-os nga katawhan.

Si Eugênio Salles, arsobispo sa Rio de Janeiro, Brazil, nagpamulong nahanungod sina nga maayong balita sang naglaygay sia: “Dapat kita magpanghikot nahisanto sa Ebanghelyo kag indi sa mga ideolohiya.” Husto ang arsobispo. Apang, agod magpanghikot nahisanto sa Ebanghelyo, kinahanglan nga nahibaluan naton kon ano gid ang Ebanghelyo. Paano naton ina mahibaluan? Kag paano kita mabuligan sang pagpanghikot nahisanto sa Ebanghelyo?

Ano ang Ebanghelyo?

Masunson nga wala mahangpi kon ano ang Ebanghelyo. Sang 1918 ang Federal Council of the Churches of Christ sa Amerika nagpadungog sa nagtaliwan na karon nga Liga de Nasyones subong ang politikal nga ekspresyon sang Ginharian sang Dios sa duta kag nagsiling nga ini “nanggamut sa Ebanghelyo.” Makasulubo gid nga napaslawan yadto nga hubon sa tulumuron sini nga amligan ang paghidait. Sing maathag, ang konsilyo nagsayop. Ang Liga de Nasyones wala sing labot sa Ebanghelyo.

Sining karon lang nga tinuig ang mga promotor sang teolohiya sang kahilwayan hilway nga nagpautwas sang Ebanghelyo kon nagapamulong sila nahanungod sa ila mga ideya para sa politikal ukon sosyal nga repormasyon. Sa paghimo sini ginpatumbayaan nila ang matuod nga Ebanghelyo. Ang magasin nga Veja sa Brazil nagkomento: “Ang Iglesia Katolika nagsugod sa pagpabor sa sosyal nga ginharian, nga wala nagasapak sa espirituwal nga mga kinahanglanon sang iya mga sumilimba. Yadtong nagapangita sang pulong nga Dios sa sermon masami nga nakasapo lamang sing retoriko nga mga argumento batok sa sosyal nga mga inhustisya.”

Ang pag-uswag sa kahimtangan sang pangabuhi ukon pagbalhin sa mga sistema sa politika mahimo nga maayong balita sa iban. Apang, indi ini amo ang maayong balita, ang Ebanghelyo. Nagabaton sang kapaslawan sang iya iglesia sa pagbantala sang matuod nga Ebanghelyo, ang isa ka obispo nagsiling: “Napatumbayaan naton ang espirituwal nga pagtudlo sa aton mga sumilimba kutob sang dekada 1960 bangod sang materyalistiko nga pagpasilabot sa aton doktrina.”

Ang isa ka report sa Time, ang magasin sa balita sang E.U., nagasiling nga ang mga Protestante man napahilayo sa Ebanghelyo. Ang magasin nagasiling: “Indi lamang nga ang tradisyunal nga mga denominasyon napaslawan sa pagpaalinton sang ila mensahe; dugang pa nga indi nila mapat-od kon ano gid ina nga mensahe.” Ano gid bala dapat ang mangin mensahe nila? Ano ang Ebanghelyo?

Pagkilala sa Ebanghelyo

Ang Webster’s Ninth New Collegiate Dictionary nagahatag sing kahulugan sa “Ebanghelyo” subong “ang mensahe nahanungod kay Cristo, sa ginharian sang Dios, kag sa kaluwasan.” Ang tinaga nga “ebanghelyo” nagakahulugan man sing “interpretasyon sang Cristianong mensahe (ang sosyal nga ebanghelyo)”; “ang mensahe ukon mga panudlo sang isa ka relihioso nga manunudlo.” Naaplikar bala ini tanan nga mga kahulugan? Indi, kon ang ginahambalan naton amo ang Ebanghelyo. Ang matuod nga Ebanghelyo napasad sa Biblia; gani, ang nahauna lamang sa tatlo ka kahulugan ang husto. Ang duha nga naulihi nagapakita lamang sa kon paano ang tinaga nga “ebanghelyo” ginagamit karon.

Nahisanto sa sining panghunahuna, ang Vine’s Expository Dictionary of New Testament Words nagasiling nga sa Cristianong Griegong Kasulatan (ang “Bag-ong Testamento”), ang Ebanghelyo “nagakahulugan sing maayo nga balita nahanungod sa Ginharian sang Dios kag sa kaluwasan paagi kay Cristo, nga dapat batunon nga may pagtuo, sa sadsaran sang Iya nagatumbas nga kamatayon.” Importante nga mahangpan ini bangod ang husto nga paghangop sa matuod nga maayong balita may daku nga kahilabtanan sa aton karon nga kaayuhan kag palaabuton nga kalipay.

Isa ka Maathag nga Mensahe

Subong sang ginapakita sang nasambit na nga reperensya, ang Ebanghelyo suod nga naangot kay Jesucristo—amo kon ngaa ang apat ka kasaysayan sa Biblia tuhoy sa kabuhi niya sa duta ginatawag nga apat ka Ebanghelyo. Sugod sa pamuno sang iya tawhanon nga kabuhi, ang balita nahanungod kay Jesus maayong balita. Sang nagapahibalo sang iya pagkabun-ag, ang anghel nagsiling: “Tuluka! Ginatunda ko sa inyo ang maayong balita [ukon, ebanghelyo] sang dakung kalipay nga mangin sa bug-os nga katawhan, kay natawo sa inyo karon nga adlaw ang Manluluwas, nga si Cristo nga Ginuo.”—Lucas 2:10, 11.

Ang bag-ong nabun-ag nga si Jesus magadaku nga mangin ang Cristo, ang ginsaad nga Mesias. Ipakilala niya ang katuyuan sang Dios para sa kaluwasan, ihatag ang iya himpit nga tawhanon nga kabuhi tungod sa katawhan, pagabanhawon, kag nian pilion nga Hari sang Ginharian sang Dios. Maayo gid nga balita! Amo sina kon ngaa ang mensahe nahanungod sa iya ginatawag nga Ebanghelyo.

Sa iya malip-ot nga ministeryo sa duta, si Jesus tuman kakugi sa pagbantala sang maayong balita. Aton mabasa sa Ebanghelyo ni Mateo: “Si Jesus naglibot sa tanan nga siudad kag mga minuro, nga nagapanudlo sa ila mga sinagoga kag nagawali sang maayong balita sang ginharian.” (Mateo 9:35) Ang iya pagbantala indi lamang agod magaayo ang pamatyag sang mga tawo. Si Marcos nagarekord kay Jesus subong nagasiling: “Ang gintalana nga tion natuman na, kag ang ginharian sang Dios malapit na. Hinulsol kamo, kag magtuo sa maayong balita.” (Marcos 1:15) Huo, yadtong namati kag nagtuman sa maayong balita nakasapo nga ginbag-o sini ang ila kabuhi.

Sang napatay si Jesus, ang iya mga sumulunod padayon nga nagbantala sang Ebanghelyo. Wala lamang sila nagpamulong nahanungod sa Ginharian kundi gindugang nila ang makalilipay nga balita nga si Jesus ginbanhaw sa tuo nga kamot sang Dios sa mga langit kag naghalad sang balor sang iya himpit tawhanon nga kabuhi tungod sa katawhan. Subong isa nga pinili sang Dios nga magagahom sa bug-os nga duta subong Hari sang Ginharian sang Dios, sia ang mangin Ahente sang Dios sa paglaglag sa mga kaaway sang Dios kag sa pagpasag-uli sa duta nga isa ka paraiso.—Binuhatan 2:32-36; 2 Tesalonica 1:6-10; Hebreo 9:24-28; Bugna 22:1-5.

Sa karon, ang maayong balita nagalakip sang dugang pa nga elemento. Suno sa tanan nga ebidensia sang katumanan sang tagna, si Jesus nagahari na karon, kag nagakabuhi kita sa katapusan nga mga adlaw sining sistema sang mga butang. (2 Timoteo 3:1-5; Bugna 12:7-12) Ang tion nga ang Ginharian magapanghikot batok sa mga kaaway sang Dios madasig nga nagahinampot. Ano ang maayo pa nga balita?

Makita naton sa masunod nga artikulo kon daw ano ka gamhanan ang Ebanghelyo. Nagbulig ini sa isa ka babayi nga nasiod sa salamangka nga makasapo sing kahilwayan. Nagbulig ini sa isa ka lalaki nga nabilanggo tungod sang pagpangawat nga makasapo sing kalipay. Kag magabulig man ini sa imo sing daku—kon pamatian kag tumanon mo ang maayong balita.