Ang Aton Dungganon nga Manunuga kag ang Iya mga Binuhatan

DAW ano ka dungganon! Ang nagahuganas nga mga busay sang Iguaçú ukon Niagara, ang daku nga mga nalupyakan sang Arizona ukon Hawaii, ang matahom nga mga ­fjord (sanga sang dagat) sang Norway ukon New Zealand​—⁠daw ano nga mga singgit sang pagdayaw ang ginapautwas sining kinaugali nga mga katingalahan! Apang natabuan lamang bala sila nga mga produkto sang ginatawag nga Iloy nga Kinaugali? Indi, kapin pa sila sa sina! Sila ang makapulunaw nga mga binuhatan sang isa ka Dungganon nga Manunuga, isa ka mahigugmaon nga Amay nga tuhoy sa iya ang maalam nga si Hari Solomon nagsulat: “Ang tagsa ka butang ginhimo niya nga matahom sa iya tion. Ginbutang man niya ang wala sing katubtuban sa ila tagipusuon, agod nga ang tawo indi makatungkad sang binuhatan nga ginhimo sang matuod nga Dios kutob sa ginsuguran bisan tubtob sa katapusan.” (Manugwali 3:11) Sa pagkamatuod, wala sing katapusan ang pag-usisa sang mga tawo sa tanan sang mahimayaon nga mga butang nga ginpuno sang aton Manunuga sa uniberso.

Daw ano ka Dungganon nga Manunuga ang aton! Kag daw ano kita ka malipayon nga ining labing gamhanan nga Dios “sa sining ulihi nga mga adlaw naghambal sa aton paagi sa Anak, nga ginhimo niya nga manunubli sang tanan nga butang, kag paagi sa iya man ginhimo niya ang sistema sang mga butang.” (Hebreo 1:⁠2) Gin-apresyar sining Anak, nga si Jesucristo, ang matahom nga mga butang nga gintuga sang iya Amay. Pirme niya ginpatuhuyan ini kon nagailustrar sang mga katuyuan sang iya Amay kag kon nagahambal sing mga pulong sang pagpalig-on sa iya mga manugpalamati. (Mateo 6:​28-30; Juan 4:​35, 36) “Bangod sa pagtuo” madamo ang nakahangop nga ang makatilingala nga mga tinuga “nahimo paagi sa pulong sang Dios.” (Hebreo 11:⁠3) Dapat naton ipakita ina nga pagtuo sa aton adlaw-adlaw nga pagkabuhi.​—⁠Santiago 2:​14, 26.

Dungganon, sa pagkamatuod, ang mga tinuga sang aton Dios. Ginapabanaag nila sing makatilingala ang iya kaalam, iya gahom, iya pagkamatarong, kag iya gugma. Halimbawa, ginpahilay niya ang aton duta kag ginapalibot ini sa adlaw agod nga ang iya palaabuton nga tinuga, ang tawo, makabenepisyo sa makalilipay nga pagbulusbulos sang mga panahon. Ang Dios nagsiling: “Sa nagapadayon ang duta, ang tigtalanum kag ang tig-alani, ang tugnaw kag ang init, ang tingadlaw kag ang tigtulugnaw, ang kaadlawon kag ang kagab-ihon, indi mag-untat.” (Genesis 8:22) Dugang pa, bugana nga ginsangkapan sang Dios ang aton duta sing mapuslanon nga mga mineral. Labi na, nag-aman sia sing bugana nga tubig, nga sa ulihi mangin isa ka kinahanglanon nga elemento kag panakdag sang tanan nga kabuhi sa duta.

Sa isa ka mahim-ong nga pagpaagisod sang anum ka ‘adlaw sang pagpanuga,’ ang tagsa linibo ka tuig sa kalawigon, ginhanda sang “aktibo nga puwersa sang Dios” ang duta agod mangin puluy-an sang tawo. Ang kapawa nga sa amo makakita kita, ang hangin nga aton ginaginhawa, ang mamala nga duta nga aton ginapuy-an, ang talamnunon, ang pagbulusbulos sang adlaw kag gab-i, ang mga isda, ang mga pispis, ang mga sapat​—⁠tanan paagisod nga gintuga sang aton Dungganon nga Manunuga agod mangin bulig kag kalipayan sang tawo. (Genesis 1:​2-25) Sa pagkamatuod, makabuylog kita sa salmista sa pagtuaw: “O Jehova, daw ano kadamo sang imo mga binuhatan! Sa kaalam ginhimo mo sila tanan. Ang duta puno sang imo mga binuhatan.”​—⁠Salmo 104:⁠24.

Ang Obra-maestra nga Tinuga sang Dios

Samtang nagahingapos ang ikan-um nga “adlaw” sang pagpanuga, ginhimo sang Dios ang lalaki kag dayon ang iya kabulig, ang babayi. Daw ano katahom nga talipuspusan sa dutan-on nga pagpanuga, kapin ka makatilingala sa tanan nga pisikal nga mga tinuga nga nauna sa sini! Ang Salmo 115:16 nagapahibalo sa aton: “Ang mga langit mga langit ni Jehova, apang ang duta nahatag niya sa mga anak sang mga tawo.” Sing nagakahisuno, kita nga tawhanon nga mga kalag, gindesinyo ni Jehova agod kalipayan naton kag gamiton ang iya nauna nga mga tinuga sa duta. Dapat kita magpasalamat bangod sa aton mga mata​—⁠kapin kasibod sang sa pinakamatahom nga kamera⁠—​nga makakuha sang maduagon nga kalibutan sa palibot naton! May mga dulunggan kita​—⁠kapin kaayo sang sa bisan anong hinimo sang tawo nga sistema sang tunog⁠—​sa pagbulig sa aton nga malipay sa paghambalanay, sa musika, kag sa malulot nga ambahanon sang mga pispis. May yara kita natukod sa sulod nga mekanismo sa paghambal, lakip ang lantip nga dila. Ang mga pangdimdim sang dila, upod ang aton sentido sa pagpanimaho, nagapahalipay man sa aton sa pagtilaw sa walay katapusan nga bariedad sang mga kalan-on. Kag daw ano ang pag-apresyar naton sa haplos sang isa ka mahigugmaon nga kamot! Sa pagkamatuod mapasalamatan naton ang aton Manunuga, subong sang ginhimo sang salmista nga nagsiling: “Magadayaw ako sa imo kay ginhimo ako sing makahalangawa kag makatilingala. Makatilingala ang imo mga binuhatan, subong nahibaluan sing maayo sang akon kalag.”​—⁠Salmo 139:⁠14.

Ang Mahigugmaon nga Kalulo sang Aton Manunuga

Ang salmista nagsulat: “Magpasalamat kay Jehova, O kamo nga katawhan, kay maayo sia . . . ; sa Manughimo sing dalagku nga mga katingalahan: kay ang iya mahigugmaon nga kalulo tubtob sa walay katubtuban.” (Salmo 136:​1-4) Inang mahigugmaon nga kalulo nagapahulag sa iya karon sa paghimo sing mga katingalahan nga labaw ka dungganon sa tanan nga tinuga nga bag-o lang naton malaragway. Huo, bisan sang nagapahuway sia gikan sa pagpanuga sing materyal nga mga butang, nagapanuga sia sa espirituwal nga paagi. Ginahimo niya ini bilang sabat sa malaut nga panghangkat sa iya. Sa anong paagi?

Ang unang lalaki kag babayi ginbutang sa isa ka mahimayaon nga paraiso, ang Eden. Apang, ang isa ka balingag nga anghel, si Satanas, naghimo sang iya kaugalingon nga isa ka dios kag nagsugyot sa tawhanon nga mag-asawa nga magrebelde kay Jehova. Sing makatarunganon, ginpamatbatan sila sang Dios sing kamatayon, upod ang resulta nga ang ila mga anak, ang bug-os nga kaliwatan sang tawo, ginpanganak sa makasasala kag mamalatyon nga kahimtangan. (Salmo 51:⁠5) Ang kasaysayan sang Biblia tuhoy kay Job nagapakita nga ginhangkat ni Satanas ang Dios, nagapangangkon nga wala sing tawo nga makahupot sing integridad sa Iya sa idalom sang pagtilaw. Apang ginpamatud-an ni Job si Satanas subong isa ka daku nga butigon, subong man sang madamo nga iban pa nga matutom nga mga alagad sang Dios sang panahon sang Biblia kag tubtob sa aton adlaw karon. (Job 1:​7-12; 2:​2-5, 9, 10; 27:⁠5) Si Jesus, subong isa ka himpit nga tawo, nagpakita sing walay tupong nga paghupot sing integridad.​—⁠1 Pedro 2:​21-23.

Sa amo, si Jesus nakasiling, “Ang manuggahom sang kalibutan [si Satanas] wala sing gahom sa akon.” (Juan 14:30) Apang, tubtob sa karon “ang bug-os nga kalibutan yara sa gahom sang isa nga malauton.” (1 Juan 5:19) Bangod ginpamatukan niya ang pagkamatarong sang soberanya ni Jehova, ginhatagan si Satanas sing mga 6,000 ka tuig agod pamatud-an niya kon bala magmadinalag-on ang iya paggahom sa katawhan. Daw ano ka daku ang iya kapaslawan, subong ginapamatud-an gihapon sang nagalain nga mga kahimtangan sa kalibutan! Sa indi madugay, dulaon sang aton mahigugmaon nga Dios, nga si Jehova, ining malaut nga katilingban sang kalibutan bilang pagpabutyag sang iya matarong nga soberanya sa duta. Daw anong makalilipay nga paumpaw ang dalhon sina sa katawhan nga nagakalangkag sa mahidaiton kag matarong nga paggahom!​—⁠Salmo 37:​9-11; 83:​17, 18.

Apang, indi lamang ina! Ang mahigugmaon nga kalulo sang Dios ipasundayag sing dugang pa pasad sa ginsiling ni Jesus sa Juan 3:16: “Kay ginhigugma gid sang Dios ang kalibutan [sang katawhan] sa bagay nga ginhatag niya ang iya bugtong nga Anak, agod nga ang bisan sin-o nga magtuo sa iya indi mawala kundi may kabuhi nga walay katapusan.” Ining pagpasag-uli sang ginalauman nga walay katapusan nga kabuhi sa katawhan sa duta nagadalahig sang pagtuga sing bag-o nga mga butang. Ano ini sila? Paano sila nagahatag sing kaayuhan sa nagaugayong nga katawhan? Isugid ini sang amon masunod nga artikulo.