Isa Ka Tumalagsahon nga Cristianong Panublion

PANUGIRON NI BLOSSOM BRANDT

Nagaulan sadto sing yelo sa San Antonio, Texas, sang Enero 17, 1923, sang adlaw nga natawo ako. Matugnaw sa guwa sadto, apang gin-abiabi ako sa mainit nga mga butkon sang akon mahigugmaon nga Cristianong mga ginikanan, nga sanday ­Judge kag Helen Norris. Kutob sa akon madumduman sang bata pa ako, ang tanan nga butang nga ginhimo sang akon mga ginikanan nasentro sa ila pagsimba kay Jehova nga Dios.

SANG 1910 sang si Nanay otso anyos, ang iya mga ginikanan nagsaylo halin sa malapit nga Pitts­burgh, Penn­syl­vania, padulong sa isa ka uma sa guwa sang Alvin, Texas. Didto nalipay sila nga mahibaluan ang mga kamatuoran sang Biblia gikan sa isa ka kaingod. Ginhinguyang ni Nanay ang nabilin nga bahin sang iya kabuhi sa pagtinguha nga mangin interesado ang mga tawo sa paglaum sa Ginharian. Ginbawtismuhan sia sang 1912 sa tapos magsaylo ang ila pamilya sa Houston, Texas.

Una nga nakilala ni Nanay kag sang iya mga ginikanan si Charles T. Russell, ang una nga presidente sang Watch Tower Bible and Tract Society, sang magduaw sia sa ila kongregasyon sa Houston. Masami nga ginaabiabi sang ila pamilya sa ila puluy-an ang nagalakbay nga mga tiglawas sang Sosiedad, nga sadto gintawag nga mga peregrino. Pila ka tuig sang ulihi, nagsaylo si Nanay upod sa iya mga ginikanan sa Chicago, Illinois, kag ginaduaw man ni Utod Russell ang kongregasyon didto.

Sang 1918, nagmasakit si Lola sing trangkaso Espanyol kag bangod sang makapaluya nga epekto sini sa iya panglawas, ginrekomendar sang mga doktor nga magpuyo sia sa mainit-init nga klima. Sanglit nagatrabaho sadto si Lolo sa Pull­man nga kompanya sang tren, nangabay sia sang 1919 nga isaylo sia pabalik sa Texas. Didto, sa San Antonio, nakilala ni Nanay ang isa ka lamharon kag makugihon nga katapo sang kongregasyon nga si ­Judge Norris. Nagluyagay sila sa gilayon, kag sang ulihi nagpakasal sila, kag si ­Judge nangin tatay ko.

Natun-an ni Tatay ang Kamatuoran sang Biblia

Si ­Judge [Hukom] ginhatagan sang iya tumalagsahon nga ngalan sang matawo sia. Sang una sia nga makita sang iya tatay, nagsiling sia: “Ina nga lapsag daw subong ka serioso sa isa ka hukom,” kag nangin amo sina ang iya ngalan. Sang 1917, sang 16 anyos si Tatay, ginhatagan sia sing mga tract nga Where Are the Dead? kag What Is the Soul? nga gin-imprinta sang Watch Tower Bible and Tract Society. Ang amay ni Tatay napatay sang nagligad nga duha ka tuig, kag ang mga tract naghatag sa iya sing mga sabat nga ginapangita niya nahanungod sa kahimtangan sang mga patay. Wala madugay sa tapos sadto nagsugod sia sa pagtambong sa mga miting sang mga Bible Students, subong amo sadto ang pagkakilala sa mga Saksi ni Jehova.

Luyag sa gilayon ni Tatay makigbahin sa mga hilikuton sang kongregasyon. Nangayo sia sing teritoryo nga iya mabantalaan, kag sa tapos sang buhi sa eskwelahan nagasakay sia sa iya bisikleta agod managtag sing mga tract. Nawili gid sia sa pagpaambit sang paglaum sa Ginharian, kag sang Marso 24, 1918, ginsimbuluhan niya ang iya dedikasyon kay Jehova paagi sa pagpabawtismo sa tubig.

Sang nagsunod nga tuig sang magsaylo si Nanay sa San Antonio, nabalani sa gilayon si Tatay sa ginsiling niya nga amo “ang pinakamatam-is nga yuhum kag pinakaasul nga mga mata” nga iya nakita. Ginpahibalo nila wala magdugay nga luyag nila magpakasal, apang binudlayan sila sa pagkombinsi sa mga ginikanan ni Nanay. Apang, sang Abril 15, 1921, ginkasal sila. Sila nga duha lunsay naghandum sang bug-os tion nga ministeryo.

Maaga nga Pagsugod sa Ministeryo

Sang masako si Nanay kag si Tatay sa pagplano nga magtambong sa kombension sa Cedar Point, Ohio, sang 1922, natukiban nila nga si Nanay nagamabdos. Wala madugay sa tapos ako matawo, sang si Tatay 22 anyos lamang, gintangdo sia subong direktor sang pag-alagad sang kongregasyon. Nagakahulugan ini nga sia ang magahimo sang tanan nga kahimusan para sa pag-alagad sa latagon. Pagligad lamang sang pila ka semana nga natawo ako, gindala na ako ni Nanay sa pamalaybalay nga ministeryo. Ang matuod amo, luyag man sang akon lolo kag lola nga dalhon ako sa ministeryo.

Sang dos anyos lamang ako, nagsaylo sa Dallas, Texas, ang akon mga ginikanan, kag ginsugdan nila ang bug-os tion nga ministeryo subong mga payunir didto pagligad sang tatlo ka tuig. Kon gab-i nagatulog sila sa isa ka teheras sa tupad sang dalan kag ginabutang nila ako sa likod nga pulungkuan sang awto. Sa pagkamatuod, nagdumdom ako nga makalilipay yadto, apang wala magdugay nangin maathag nga indi pa sila handa para sa pagkabuhi subong mga payunir. Gani nagbukas si Tatay sing negosyo. Sang ulihi, naghimo sia sing diutay nga trail­er bilang paghanda agod magsugod liwat sa pagpayunir.

Bisan sa wala pa ako nagaeskwela, gintudluan na ako ni Nanay sa pagbasa kag pagsulat, kag makahibalo na ako magpamuad sing tubtob sa apat ka numero. Ang sentro sang iya igtalupangod amo pirme ang pagbulig sa akon nga makatuon. Ginapatindog niya ako sa isa ka bangko sa tupad niya agod pamalhon ang mga pinggan sa tapos niya ini mahugasan, kag ginatudluan niya ako sa pagsaulo sing mga kasulatan kag sa pagkanta sing mga ambahanon sang Ginharian, ukon ginatawag namon sadto nga mga himno.

Pag-alagad sa Dios Upod sa Akon mga Ginikanan

Sang 1931 nagtambong kami tanan sa makakulunyag nga kombension sa Columbus, Ohio, diin nabaton namon ang ngalan nga mga Saksi ni Jehova. Bisan pa otso anyos lamang ako, ginkabig ko yadto subong pinakamatahom nga ngalan nga nabatian ko. Wala madugay sa tapos kami makapauli, nasunog ang negosyo ni Tatay, kag ginhangop ini ni Tatay kag ni Nanay subong “kabubut-on sang Dios” nga magsugod sila liwat sa pagpayunir. Sa amo, sugod sang tig-ilinit sang 1932, madamo nga tinuig ang ginhinguyang namon sa bug-os tion nga ministeryo.

Ang akon mga ginikanan nagpayunir sa sentral Texas agod malapit sila sa mga ginikanan ni Nanay, nga nagapuyo gihapon sa San Antonio. Ang paghalinhalin sing mga teritoryo nagkahulugan nga masami man ako nagahalinhalin sing eskwelahan. Kon kaisa ang indi mapatugsilingon nga mga abyan nagasiling, “Ngaa indi kamo magpahimunong sa isa ka lugar kag mangita sing puluy-an para sa sina nga bata,” nga subong bala wala ako ginaatipan sing nagakaigo. Apang para sa akon makakulunyag ang amon pagkabuhi kag ginabuligan ko si Tatay kag si Nanay sa ila ministeryo. Ang matuod, ginahanas ako kag ginahanda para sa akon mangin kaugalingon nga estilo sang pagkabuhi sa ulihi.

Sa sulod sang mga binulan gin-ingusan ko si Tatay kag si Nanay nga luyag ko magpabawtismo, kag pirme nila ako ginahambal nahanungod sini. Luyag nila masigurado nga nahangpan ko kon daw ano ka serioso ang akon desisyon. Sang Disiembre 31, 1934, nag-abot ang adlaw para sa sining indi malipatan nga hitabo sa akon kabuhi. Apang, sang gab-i antes sadto, ginpat-od ni Tatay nga nakapangamuyo ako kay Jehova. Nian ginhimo niya ang isa ka matahom nga butang. Ginpaluhod niya kami tanan, kag nangamuyo sia. Ginsugiran niya si Jehova kon daw ano gid sia ka malipayon nahanungod sa desisyon sang iya gamay nga anak nga babayi nga idedikar ang iya kabuhi sa Iya. Husto ikaw, sa tanan nga dag-on nga magaabot, indi ko gid malipatan yadto nga gab-i!

Paghanas Gikan sa Akon Lolo kag Lola

Sa ulot sang 1928 kag 1938, pirme ako nagaduaw sa akon lolo kag lola sa San Antonio. Ang rutina upod sa ila pareho lang upod sa akon mga ginikanan. Si lola isa ka col­por­teur, subong amo sadto anay ang pagtawag nila sa mga payunir, kag dayon nangin part-time nga payunir. Si lolo gintangdo nga payunir sang Disiembre 1929, gani ang pag-alagad sa latagon amo pirme ang regular nga ginahimo sa adlaw-adlaw.

Ginakugos ako ni Lolo kon gab-i kag ginatudluan ako sing mga ngalan sang mga bituon. Ginabinalaybayan niya ako sang iya saulado nga binalaybay. Masunson ako nagaupod sa iya sa Pullmans nga iya ginaobrahan para sa riles sang tren. Sia anay ang akon dalangpan kon may problema ako; ginapaumpawan niya ako kag ginapahiran ang akon mga luha. Apang, kon gindisiplina ako bangod nagtinonto ako kag magkadto ako sa iya agod magpauloulo, magasiling lamang sia (mga pulong nga wala ko mahangpi sadto, apang ang tono sini tuman kaathag): “Pangga, kon ang isa nakasala, dapat sia mag-antos.”

Mga Tinuig sang Paghingabot

Sang 1939, ang Inaway Kalibutanon II nagsugod, kag ang katawhan ni Jehova nag-antos sing paghingabot kag pagpamintas sang akig nga mga guban. Sang talipuspusan sang 1939, nagmasakit sing grabe si Nanay kag sang ulihi dapat nga operahan sia, gani nagbalik kami sa San Antonio.

Ang akig nga mga grupo nagatipon samtang nagatanyag kami sing mga magasin sa mga kalye sang San Antonio. Apang kada semana, subong isa ka pamilya, didto kami, ang tagsa sa amon yara sa duog nga gintangdo sa iya. Pirme ako nagatan-aw samtang ginadala nila si Tatay sa presinto sang pulis.

Gintinguhaan ni Tatay nga magpadayon sa pagpayunir bisan pa si Nanay dapat mag-untat. Apang, kulang ang iya ginakita sa iya part-time nga trabaho, gani dapat man sia mag-untat. Nakatapos ako sa hayskol sang 1939, kag nagtrabaho man ako.

Ang ngalan nga ­Judge (Hukom) ni Tatay nangin mapuslanon sadtong mga tinuig. Halimbawa, ang isa ka grupo sang mga abyan nagkadto sa isa ka banwa sa aminhan lamang sang San Antonio agod manaksi, apang ginpamilanggo sila tanan sang serip. Mga 35 ang nadakop niya, lakip ang akon lolo kag lola. Ginpahibalo nila si Tatay, kag gani nagkadto sia didto. Nagsulod sia sa opisina sang serip kag nagsiling: “Ako si ­Judge Norris nga taga-San Antonio.”

“Huo Sir, ­Judge, ano ang mahimo ko para sa imo?” pamangkot sang serip.

“Nagkari ako agod paguwaon sa bilangguan ining mga tawo,” sabat ni Tatay. Sa sina ginpaguwa sila tanan sang serip nga wala sing piansa​—⁠kag wala sing pulupamangkot!

Luyag ni Tatay magpanaksi sa mga opisina sa down­town, kag luyag niya ilabi na makighambal sa mga hukom kag mga abogado. Amo sini ang ginasiling niya sa re­cep­tion­ist: “Ako si ­Judge Norris, kag nagkari ako agod makighambal kay ­Judge Kuwan.”

Nian, kon makita na niya ang hukom, pirme sia magasiling sini anay: “Antes ko sambiton ang akon katuyuan sa pagduaw, luyag ko ipaathag nga ako mas madugay na nangin Hukom sangsa imo. Hukom ako sa akon bug-os nga kabuhi.” Kag dayon ginapaathag niya kon paano niya natigayon ang iya ngalan. Isa ini ka mainabyanon nga introduksion, kag madamo sia sing naamigo nga mga hukom sadtong mga adlaw.

Mapinasalamaton sa Pagtuytoy sang Akon mga Ginikanan

Yara ako sadto sa magamo nga panahon sang pagkatin-edyer, kag nahibaluan ko nga madamo nga bes nga nagahawathawat ang ginhawa ni Tatay kag ni Nanay samtang nagatan-aw sila kag nagapalibog kon ano ang masunod ko nga himuon. Kaangay sang tanan nga kabataan, madamo nga bes nga gintilawan ko si Tatay kag si Nanay, nagalisensia ako sa ila sa paghimo sing isa ka butang ukon sa pagkadto sa isa ka duog bisan pa nahibaluan ko na nga indi ang isabat nila. Kon kaisa nagahibi ako. Ang matuod, naakig gid ako kuntani kon sila nagsiling sing: “Sige, himua ang luyag mo. Waay kaso sa amon.”

Ang paghibalo nga indi ko sila maimpluwensia­han nga bag-uhon ang ila mga talaksan nagpabatyag sa akon sing kalig-unan. Sa katunayan, bangod sini nga kon nagapanghagad gani ang iban nga mga tin-edyer sa dimaalamon nga kalingawan mahapos ako makasiling: “Indi ako pagtugutan ni Tatay.” Sang 16 ako, ginpat-od ni Tatay nga makatuon ako sa pagmaneho kag makakuha sing lisensia sa pagmaneho. Subong man, sini nga tion ginhatagan niya ako sing yabi sa balay. Nalipay gid ako nga ginsaligan niya ako. Ang pamatyag ko daw hamtong na gid ako kag naghimo ini sa akon nga mangin responsable kag naghandum ako nga indi pagpaslawon ang ila pagsalig sa akon.

Sadtong mga adlaw wala tanto sing laygay para sa pag-asawahay, apang nahibaluan ni Tatay ang Biblia kag ang ginasiling sini nahanungod sa pagminyo “sa Ginuo lamang.” (1 Corinto 7:39) Maathag nga ginpakita niya sa akon nga kon magdala ako sing isa ka kalibutanon nga lalaki sa balay agod ipakilala sa ila, ukon kon magpamensar ako nga makig-date sa isa ka kalibutanon nga lalaki, masubuan gid sia. Nahibaluan ko nga husto sia, kay nakita ko ang kalipay kag paghiusa sa ila pag-asawahay bangod nagminyo sila “sa Ginuo.”

Sang 1941, sang 18 anyos ako, nagdumdom ako nga nagahigugma gid ako sa isa ka pamatan-on nga lalaki sa kongregasyon. Isa sia ka payunir kag nagatuon sing abogasiya. Nakunyag gid ako. Sang ginsugiran namon ang akon mga ginikanan nga luyag namon magpakasal, sa baylo nga indi magsugot ukon mamatok, nagsiling lamang sila: “May ipangabay kami nga isa ka butang sa imo, Blossom. Ginabatyag namon nga bata pa ikaw kaayo, kag ginapangabay namon sa imo nga maghulat ka pa sing isa ka tuig. Kon nagahigugma gid ikaw, ang isa ka tuig indi isa ka daku nga butang.”

Nagapasalamat gid ako nga namati ako sa sadtong maalamon nga laygay. Sa sulod sadto nga tuig, naghamtong ako diutay kag narealisar ko nga wala sa sining pamatan-on nga lalaki ang mga kinaiya sang isa ka maayo nga tiayon. Nagbiya sia sang ulihi sa organisasyon ni Jehova, kag nalikawan ko ang kuntani isa ka kalamidad sa akon kabuhi. Daw ano katahom nga makatigayon sing maalamon nga mga ginikanan nga ang ila desisyon masaligan!

Pagminyo kag Hilikuton sa Paglakbay

Sang tigtulugnaw sang 1946, sa tapos sang anom ka tuig nga pagpayunir kag pagtrabaho sing part-time, ang pinakamaayo nga pamatan-on nga lalaki nga nakilala ko nagsulod sa amon Kingdom Hall. Si Gene Brandt gintangdo subong kaupod sang amon nagalakbay nga alagad para sa kauturan, subong amo anay ang pagtawag sa manugtatap sang sirkito. Nagluyagay kami, kag sang Agosto 5, 1947, ginkasal kami.

Wala madugay, nagbukas si Tatay kag si Gene sing ac­count­ing ­office. Apang ginsilingan ni Tatay si Gene: “Sa adlaw nga ini nga opisina magaupang sa aton sa miting ukon sa isa ka teokratiko nga asaynment, kandaduhan ko ang ganhaan kag ihaboy ang yabi.” Ginpakamaayo ni Jehova ining espirituwal nga pagtamod, kag ang opisina naghatag sing bastante nga kita para sa amon materyal nga mga kinahanglanon kag nagtugot sa amon nga magpayunir. Si Tatay kag si Gene maayo nga mga negosyante, kag madali kami kuntani nagmanggaranon, apang indi gid amo sini ang ila tulumuron.

Sang 1954, gin-agda si Gene sa hilikuton sa sirkito, nga nagkahulugan sing isa ka daku nga pagbag-o sa amon kabuhi. Ano ang reaksion sang amon mga ginikanan? Sa liwat, interesado sila indi sa ila kaugalingon kundi sa mga interes sang Ginharian sang Dios kag sa espirituwal nga kaayuhan sang ila mga anak. Wala gid sila magsiling sa amon: “Ngaa indi ninyo kami paghatagan sing mga apo?” Sa baylo, amo sini pirme: “Ano ang mahimo namon agod mabuligan kamo sa inyo bug-os tion nga pag-alagad?”

Gani sang mag-abot ang adlaw nga malakat na kami, nabaton namon ang mga pulong sang pagpalig-on kag pagkalipay sa amon dungganon nga pribilehiyo. Wala gid nila kami ginpabatyag nga biyaan namon sila kundi pirme nga 100 porsiento nga ginasakdag nila kami. Sang makahalin na kami, masako sila nga nagpayunir sa napulo ka tuig. Gintangdo si Tatay nga manugtatap sang siudad sang San Antonio, nga iya gin-uyatan sa 30 ka tuig. Nalipay sia nga makita ang pag-uswag halin sa isa ka kongregasyon sa siudad sang dekada 20 tubtob sa 71 antes sia mapatay sang 1991.

Para kay Gene kag sa akon, ang kabuhi puno sing kakunyag. Nalipay gid kami nga alagdan ang mahal nga kauturan nga lalaki kag babayi sa kapin sa 31 ka estado kag, ayhan ang pinakadaku sa tanan, amo ang pribilehiyo nga makaeskwela sa ika-19 nga klase sang Watchtower Bible School of Gilead sang 1957. Pagkatapos sadto nagbalik kami sa hilikuton sa sirkito. Sang 1984, pagligad sang 30 ka tuig sa hilikuton sa sirkito kag distrito, maluluy-on nga ginhatagan si Gene sang Sosiedad sing asaynment sa sirkito sa San Antonio, kay ang akon mga ginikanan otsentahon na kag masakiton.

Pag-atipan sa Akon mga Ginikanan

Isa ka tuig kag tunga pa lang kami nga nakabalik sa San Antonio sang si Nanay nagluya kag nangin malipaton kag napatay. Madasig ini nga natabo nga wala ko man lang masugid sa iya ang pila ka butang nga luyag ko ihambal sa iya. Nagtudlo ini sa akon nga pirme sugilanunon si Tatay. Pagligad sang 65 ka tuig nga pag-asawahay, ginapangita gid niya pirme si Nanay, apang didto kami agod magpakita sa iya sing gugma kag pagsakdag.

Ang tubtob-kabuhi nga halimbawa ni Tatay sa pagtambong sa Cristianong miting, pagtuon, kag pag-alagad nagpadayon tubtob sa iya kamatayon. Maluyagon sia magbasa. Bangod isahanon sia samtang nagaalagad kami sa latagon, pagpauli ko, ginapamangkot ko sia, “Ginsubuan ka bala?” Masako gid sia sa pagbasa kag sa pagtuon nga ang panghunahuna nga masubo sia wala man lang nagsulod sa iya hunahuna.

May isa pa ka tubtob-kabuhi nga batasan nga ginpadayon namon. Ginainsister gid pirme anay ni Tatay nga magdungan ang pamilya sa pagkaon, ilabi na kon tigpalamahaw, nga amo ang tion sa pagbinagbinag sang adlaw-adlaw nga teksto sang Kasulatan. Sang bata pa ako, wala gid ako ginatugutan sa paglakat nga indi anay mahimo ini. Kon kaisa nagasiling ako: “Apang Tay, maulihi na ako sa eskwelahan (ukon sa trabaho).”

“Indi ang teksto ang nagapaulihi sa imo; wala ka magbugtaw sing temprano,” amo ang isiling niya. Kag dapat ako magpabilin kag mamati sa sini. Ginpat-od niya nga ining maayong halimbawa nagpadayon tubtob sang katapusan nga mga adlaw sang iya kabuhi. Isa pa ini ka panublion nga ginbilin niya sa akon.

Nagpabilin si Tatay nga alisto sa hunahuna tubtob sang mapatay sia. Ang butang nga nagpahapos sa pag-atipan sa iya amo nga wala gid sia mag-ulibaron ukon reklamador. Ay, kon kaisa ginamuno niya ang iya artraytis, apang ginapahanumdom ko nga ang iya gid masakit amo ang Adanaytis,” kag magakadlaw sia dayon. Samtang si Gene kag ako nagapungko sa tupad niya, malinong nga nagtulog si Tatay sang aga sang Nobiembre 30, 1991.

Kapin na ako sa 70 anyos karon kag nagabenepisyo gihapon ako gikan sa maayong halimbawa sang akon mahigugmaon nga Cristianong mga ginikanan. Kag hanuot nga ginapangamuyo ko nga pamatud-an ang akon bug-os nga apresasyon sa sining panublion paagi sa nagakaigo nga paggamit sini tubtob sa tanan nga dag-on nga magaabot.​—⁠Salmo 71:​17, 18.

[Piktyur sa pahina 5]

Si Nanay upod sa akon

[Mga piktyur sa pahina 7]

1. Ang akon una nga kombension: San Marcos, Texas, Septiembre 1923

2. Ang katapusan nga kombension ni Tatay: Fort Worth, Texas, Hunyo 1991 (Si Tatay nga nagapungko)

[Piktyur sa pahina 9]

Si Gene kag si Blossom Brandt