Kaangay sang mga Mansanas nga Bulawan

MANSANAS​—⁠nagapahalipay gid sa mata kag sa dila! Ginagamit sang Biblia ining manamit nga prutas sa nagapahunahuna nga palaanggiran sang ini nagsiling: “Ang pulong nga napamulong sing nagakaigo kaangay sang mga mansanas nga bulawan sa pinuna nga pilak.” (Hulubaton 25:11) Ano ang kahulugan sini nga pinamulong?

Ang “mga mansanas nga bulawan sa pinuna nga pilak” mahimo nga nagapatuhoy sa pinuna nga butang, subong sang ginpuna nga pilak nga bandehado nga may prutas nga bulawan sa sini. Sanglit ginasambit sang unang mga bersikulo sini nga kapitulo ang pagpalapit sa hari, ini nga bersikulo mahimo nga nagapatuhoy sa mga dulot nga ginhatag sa hari​—⁠bulawan nga mga puni sa dagway sang mga mansanas nga nabutang sa pilak nga mga bandehado. (Hulubaton 25:​6, 7) Matahom gid matuod!

May kaanggid nga katahom sa nagakaigo, talahuron, suno-sa-panahon nga mga tinaga, ginsulat man ukon ginpamulong. Makalilipay ini, makapalig-on, kag mapuslanon sa madamo nga paagi. Ang inspirado sang Dios nga mga kaundan sang Biblia ilabi na nga matahom kaangay sang “mga mansanas nga bulawan sa pinuna nga pilak.”

Subong sang ginlaragway sang maalamon nga pinamulong ni Hari Solomon sa Hulubaton 25:​11, “nagtinguha [sia] sa pagpangita sing mga pulong nga kalahamut-an kag yadto nga napanulat sing matadlong nga mga pulong sang kamatuoran.” (Manugwali 12:10; Hulubaton 25:⁠1) Mga siglo sang ulihi, ang Cristianong apostol nga si Pablo nagsulat: “Ang bug-os nga Kasulatan inspirado sang Dios kag mapuslanon.” (2 Timoteo 3:16) Huo, ang Biblia nagaunod sang mapuslanon nga laygay, mga tagna, mga laragway sa tinaga, kag mga kamatuoran nga may subong nga inggat kag katahom nga nagalabaw ini sing daku sa mga binuhatan sang pinakamaayo nga mga artisano. Dugang pa, ang bisan sin-o nga nakatigayon sing kaalam gikan sa Pulong sang Dios, ang Biblia, nagaagom sing hamili nga pagkabutang kag makapaabot sang paglaum sang kabuhi nga dayon.​—⁠Hulubaton 4:​7-9; Juan 17:⁠3.