Mga Pamangkot Gikan sa mga Bumalasa

Sang ginkaon sang mga soldado ni Saul ang karne pati ang dugo, ngaa wala sila pagpatya, kay amo ina ang silot nga ginhatag sang Kasuguan sang Dios?

Ginlapas matuod sining mga lalaki ang kasuguan sang Dios tuhoy sa dugo, apang ginkaluoyan sila bangod may pagtahod sila sa dugo, bisan nga nangin mas makugi sila kuntani tuhoy sa pagpakita sina nga pagtahod.

Binagbinaga ang kahimtangan. Ang mga Israelinhon sa idalom ni Hari Saul kag sang iya anak nga si Jonatan nagapakig-away batok sa mga Filistinhon. Sa isa ka punto nga “ang mga tawo sang Israel nalisdan” sa inaway, si Saul padasudaso nga nagsumpa nga ang iya mga hangaway indi magakaon tubtob malutos ang kaaway. (1 Samuel 14:24) Nagtuga sing ulihi sang problema ang iya sumpa.

Nadaug sang iya mga hangaway ang mabudlay nga inaway, apang ang daku nga panikasog may makahalalit nga resulta. Gingutman sila kag ginkapoy. Ano ang ginhimo nila sa sinang mabudlay nga kahimtangan? “Nagdamhag ang katawhan sa inagaw kag nagkuha sing mga karnero kag mga baka kag mga tinday sang baka kag ginpatay sila sa duta, kag ang katawhan nagkaon sa ila pati ang dugo.”​—⁠1 Samuel 14:⁠32.

Paglapas yadto sa sugo sang Dios nahanungod sa dugo, subong sang ginsiling sang pila sang katawhan ni Saul sa iya, nga nagasiling: “Yari karon! Ang katawhan nakasala batok kay Jehova paagi sa pagkaon nila pati sang dugo.” (1 Samuel 14:33) Huo, ang Kasuguan nagsiling nga kon mag-ihaw sing mga sapat, ang dugo dapat patuluon antes kaunon ang karne. Ang Dios wala nagsugo sing panatiko nga mga paagi sa pagpatulo sang dugo. Paagi sa paghimo sing makatarunganon nga mga tikang sa pagpatulo, mapakita sang iya mga alagad ang pagtahod sa pagkaimportante sang dugo. (Deuteronomio 12:​15, 16, 21-25) Ang dugo sang sapat mahimo magamit sa mahalaron nga paagi sa halaran, apang indi ini dapat pagkaunon. Kamatayon ang silot sa hungod nga paglapas, kay ang katawhan sang Dios ginsugo: “Dili kamo magkaon sang dugo sang bisan ano nga bagay sang unod, kay ang kabuhi sang tanan nga unod amo ang iya dugo. Ang bisan sin-o nga nagakaon sini utdon.”​—⁠Levitico 17:​10-14.

Hungod bala nga ginlapas sang mga soldado ni Hari Saul ang Kasuguan? Nagpakita bala sila sing bug-os nga pagsikway sa diosnon nga kasuguan sa dugo?​—⁠Ipaanggid ang Numeros 15:⁠30.

Indi kita dapat maghinakop sing amo sina. Ginapakita sang rekord nga sila ‘nagpatay sing mga sapat sa duta kag ginkaon pati ang dugo.’ Gani mahimo nga gintinguhaan nila nga patuluon ang dugo. (Deuteronomio 15:23) Apang, bangod sang ila kakapoy kag kagutom, wala nila ginpakabit ang gin-ihaw nga mga sapat kag naghatag sing bastante nga tion para sa normal nga pagtulo sang dugo. Gin-ihaw nila ang mga karnero kag mga baka “sa duta,” nga mahimo nagpakunta sang pagtulo. Kag gilayon nila nga gingulot ang karne gikan sa sapat nga ayhan nabulit sa dugo. Busa, kon ginhunahuna nila ang pagtuman sa kasuguan sang Dios, wala sila nagtuman sa nagakaigo nga mga paagi ukon tubtob sa nagakaigo nga kasangkaron.

Ang resulta amo nga “ang katawhan nagkaon sa ila pati ang dugo,” nga isa ka sala. Nahibal-an ini ni Saul kag nagsugo nga paligiron sa iya ang daku nga bato. Nagsugo sia sa mga soldado: “Dalhan ako diri sang tagsa ka tawo sang iya baka nga lalaki kag sang tagsa ka tawo sang iya karnero, kag ihawon sila diri kag kaunon, kag dili kamo magpakasala kay Jehova sa pagkaon sang dugo.” (1 Samuel 14:​33, 34) Nagtuman ang nakasala nga mga soldado, kag “si Saul nagpatindog sing halaran kay Jehova.”​—⁠1 Samuel 14:⁠35.

Ang pag-ihaw sang mga sapat sa bato ayhan nagpatulo sang bastante nga dugo. Ang karne gikan sa mga sapat mahimo kaunon malayo sa kon diin ini gin-ihaw. Mahimo nga gingamit ni Saul ang ginpatulo nga dugo sa halaran sa pagpangayo sang kaluoy sang Dios para sa mga nakasala. Si Jehova nagpakita sing kaluoy, ayhan bangod nahibaluan niya ang pagtinguha sang mga soldado bisan nga tuman sa ila kakapoy kag kagutom. Ayhan ginbinagbinag man sang Dios nga ang padasudaso nga sumpa ni Saul nagtiklod sa iya mga hangaway sa sadtong desperado nga kahimtangan.

Ginapakita sini nga kasaysayan nga ang isa ka emerhensia nga kahimtangan indi balibad para lapason ang diosnon nga kasuguan. Nagabulig man ini sa aton nga makita ang pagkakinahanglanon sang mahalungon nga paghunahuna antes manumpa, kay ang padasudaso nga sumpa mahimo makatuga sing mga problema sa aton sing personal kag sa iban.​—⁠Manugwali 5:​4-6.