Bilidhon Pa Sangsa mga Korales
Madamo nga mga dumuluaw ang nakunyag sa mga talan-awon kaangay sining katubigan sang Mapula nga Dagat.
Ang dimaisip nga isda nga may balangaw nga mga kolor kag duag makawiwili sa mga nagaisnorkel sa matin-aw nga mga tubig. Apang tan-awa nga sa palibot sang maduagon nga isda nga makita diri, may makagalanyat sa mata nga talan-awon tuhoy sa iban pa nga mga katingalahan sa idalom sang dagat, lakip ang masili sing duag nga mga korales.
Ang matahom nga mga korales makita sa madamo nga korte kag duag. Subong sang mahanduraw mo, bisan sang una nga panahon ang matahom gid nga mga korales ginapakahamili sing daku. Gikan sa sini ginahimo sang mga artisano ang matahom nga mga puni, kag ginsambit sang mga manunulat sang Biblia ang mga korales upod sa bulawan, pilak, kag rubi. (Hulubaton 3:14, 15; Ezequiel 27:16) Apang ginabuligan kita sadtong mga manunulat nga tan-awon ang lampas pa sa katahom kag balor sang mga korales.
Ginpadaku nila ang pila ka butang nga mas bilidhon pa kag dapat naton ini pakabahandion sing daku. Ang maayo, takus nga asawa amo ang isa, kay aton mabasa: “Ang babayi nga takus sin-o bala ang makakita? Ang iya bili labaw pa gid sa mga korales.” (Hulubaton 31:10) May asawa ka bala? Tan-awa liwat ang matahom nga mga korales diri, kag hunahunaa kon bala ginatamod mo ang imo asawa subong sang nagakaigo sa iya.
Lalaki man kita ukon babayi, minyo ukon indi, ang pagtan-aw sa matahom nga mga korales dapat magbulig sa aton sa pag-apresyar sang daku pa nga bili sang diosnon nga kaalam, paghantop, kag ihibalo. Ang Pulong sang Dios nagasiling: “Malipayon ang tawo nga makakita sing kaalam, kag ang tawo nga makaagom sing paghangop, kay ang pagdaug sini maayo pa sangsa pagdaug sang pilak kag ang kapuslanan sini sangsa bulawan nga bus-og. Bilidhon pa ini sangsa mga korales, kag ang tanan iban pa nga imo mahandum indi mapaanggid sa sini.”—Hulubaton 3:13-15; 8:11.
Gani makita man naton sila paagi sa pag-isnorkel ukon paagi sa retrato, ang mga korales sang Mapula nga Dagat dapat magpaalinton sa aton sang katahom kag materyal para sa mapuslanon nga pagbinagbinag.