“Ang Paghidait sang Dios nga Nagalabaw sa Tanan nga Panghunahuna”
SA BUG-OS nga maragtas, ang matutom nga mga alagad sang Dios nakaeksperiensia sing mga panag-on sang daku nga kalisang sa emosyon. Matuod gid ini sa karon, kay nagakabuhi kita sa “ital-ital nga mga tion nga mabudlay atubangon”! (2 Timoteo 3:1) Si apostol Pablo naglaygay sa mga Cristiano nga itugyan ang ila mga kabalaka kay Jehova paagi sa pangamuyo. Kag ano ang resulta? “Ang paghidait sang Dios nga nagalabaw sa tanan nga panghunahuna magabantay sang inyo mga tagipusuon kag sang inyo mga ikasarang sa hunahuna paagi kay Cristo Jesus.”—Filipos 4:7.
Ano ining “paghidait sang Dios”? Ini amo ang kalinong nga bunga sang suod nga kaangtanan sa Manunuga. Ina nga pagkasuod nagahatag sa aton sing pagsalig nga, walay sapayan sang aton mga kalisdanan, si Jehova “indi magsikway sang iya katawhan; indi sia magbiya sang mga natungod sa iya.”—Salmo 94:14, Today’s English Version.
Wala ini nagakahulugan nga indi kita naapektuhan sang kapipit-an. “Madamo ang kapipit-an sang matarong,” sulat sang salmista. (Salmo 34:19) Apang ang paghidait sang Dios makahatag sing paumpaw. Paano?
Ang paghidait sang Dios “nagalabaw sa tanan nga panghunahuna,” sulat ni Pablo—ukon subong sang pagbadbad sang Concordant Version, “nagalabaw [ini] sa tagsa ka kahimtangan sa hunahuna.” Ang kabalaka mahimo mangin kabangdanan nga mabatyagan naton ang nanuhaytuhay nga kalisdanan. (Manugwali 7:7) Apang ang paghidait sang Dios makapalig-on sa aton, ilabi na kon nagakinahanglan kita sing “gahom nga labaw sa kinaandan.”—2 Corinto 4:7; 2 Timoteo 1:7.
Dugang pa, ang paghidait sang Dios isa ka pangamlig. “Magabantay [ini] sang inyo mga tagipusuon kag inyo mga ikasarang sa hunahuna,” subong sang ginsulat ni Pablo sa mga taga-Filipos. Ang Griegong tinaga nga ginbadbad nga “magabantay” isa ka tinaga sa militar nga mahimo nagapahanumdom sa mga guwardiya nga padayon nga nagabantay sa adlaw kag gab-i. Sa amo man nga paagi, ang paghidait sang Dios mahimo mangin 24-oras nga bantay sa aton mga tagipusuon kag mga panghunahuna.—1 Corinto 10:13; ipaanggid ang Efeso 4:26.
Nagabinagbinag sang makapahuol nga mga hangkat nga ginaatubang naton karon, indi bala nga ang paghidait sang Dios butang nga dapat naton pasalamatan?—Salmo 18:2; ipaanggid sang Exodo 40:38.