Madumduman Mo Bala?

Nasapwan mo bala ang ulihi nga mga guwa sang Ang Lalantawan nga may praktikal nga kabilihanan para sa imo? Nian ngaa indi pagtilawan ang imo nadumduman paagi sa masunod nga mga pamangkot?

▫ Ngaa ang mga Saksi ni Jehova padayon nga nagaduaw sa ila mga isigkatawo?

Luyag mismo sang mga Saksi ni Jehova ang pagpakamaayo sang Dios paagi sa ginsaad nga Ginharian, kag bangod ginahigugma nila ang ila mga isigkatawo, luyag nila ina man nga pagpakamaayo para sa ila. Sa amo, nagasunod sang halimbawa ni Jesus, ang dimakagod nga gugma nagapahulag sa ila sa pagduaw sa ila mga isigkatawo. (Mateo 6:​9, 10; 22:​37-39)​—⁠8/15, pahina 8, 9.

▫ Ngaa ang pagpati sa ebolusyon isa ka butang sang pagtuo?

Wala gid makakita ang mga sientipiko sing mga mutation​—⁠bisan sing mapuslanon nga mga mutation​—⁠nga nagpatubas sing bag-o nga mga porma sang kabuhi, apang nagasiling ang mga ebolusyunista nga nag-abot ang bag-o nga mga espesyi paagi sini. Wala masaksihi sang mga ebolusyunista ang natural nga pagtuhaw sang kabuhi, apang nagainsister sila nga nagsugod ang kabuhi paagi sa sini.​—⁠9/1, pahina 5.

▫ Paano naton labing maayo nga malandas ang mga pagpaluya nga resulta sang mga pagdumili sa kabuhi?

Ano man ang aton kahimtangan, kon ginahunahuna naton sing maayo kon ano ang aton mahimo sa baylo nga mabalaka sa kon ano ang aton indi mahimo, ang kabuhi mangin makaalayaw, kag makasapo kita sing kalipay sa pag-alagad sa Dios. (Salmo 126:​5, 6)​—⁠9/1, pahina 28.

▫ Ano ang mga benepisyo sang pagpatawad?

Ang pagpatawad sa iban nagapasanyog sing maayo nga kaangtanan (Efeso 4:32); nagadala ini indi lamang sing paghidait upod sa isigkatawo kundi sing nasulod nga paghidait man (Roma 14:19; Colosas 3:​13-15); ang pagpatawad sa iban nagapaposible para mapatawad ang aton mga kasal-anan (Mateo 6:14); subong man, nagabulig ini sa aton sa pagdumdom nga kita mismo nagakinahanglan sing kapatawaran. (Roma 3:23)​—⁠9/15, pahina 7.

▫ Paano ang halimbawa ni manalagna Amos nagabulig sa aton sa aton pagbantala nga hilikuton?

Kaangay ni Amos, wala naton ginabag-o ukon ginabuhinan ang mensahe sang Dios. Sa baylo, matinumanon nga ginapahayag naton ini walay sapayan sang reaksion sang aton mga tagpalamati.​—⁠9/15, pahina 17.

▫ Anong mga kinaiya sang Dios ang dapat naton ilugon?

Ang duha ka importante nga mga kinaiya amo ang ikasarang ni Jehova sa pag-organisar kag ang iya kalipay. (1 Corinto 14:33; 1 Timoteo 1:11) Ining mga kinaiya sang Dios balanse, agod ang isa ka kinaiya wala ginapadaku sa kahalitan sang isa pa ka kinaiya.​—⁠10/1, pahina 10.

▫ Anong pila ka positibo nga mga tikang ang ginhimo sang mga ginikanan agod buligan ang ila mga kabataan sa pag-alagad kay Jehova?

Ang importante nga paagi amo ang pagsugod sing maaga pa. Ang mga pagtudlo kag mga leksion nga natun-an sang lanubo pa magapadayon sa bug-os nga kinabuhi. (Hulubaton 22:⁠6) Importante nga tudluan sila sang pagkamatinumanon kag pagtahod kay Jehova kag sang pagsimba sa iya sa tanan nga miting. Ang madinalag-on nga mga ginikanan nakatuon nga makita ang sayop nga mga huyog, kag ginbuligan nila ang ila mga anak nga tadlungon ini. (Hulubaton 22:15) Sa katapusan, magsugod sing maaga pa sa pagpahamtang sing teokratikong mga tulumuron nga masarangan lab-uton sang inyo anak.​—⁠10/1, pahina 27-8.

▫ Anong pinasahi nga kinaiya sang pagpatawad ni Jehova ang dapat naton tinguhaan nga ipakita?

Si Jehova nagapatawad kag nagalimot. (Jeremias 31:34) Mabudlay ini himuon sang tawhanon nga mga tinuga. Ginpadaku ni Jesus ang importansia nga himuon ini, subong sang narekord sa Mateo 6:​14, 15.​—⁠10/15, pahina 25-6.

▫ Ano ang tatlo nga nagasablag agod kita mangin mainawaon?

Bangod sang aton makasasala tawhanon nga kinaugali, ang mga balatyagon sang pagkahisa mahimo nga manggamot. Kon mahisa kita sa iban, paano naton sia matamod nga may mapinalanggaon nga pagkaawa? Ang dikinahanglanon nga pagkanadayag sa kasingki isa pa ka sablag. Nagahimo ini sa aton nga walay pasunaid sa pag-antos sang iban. Dugang pa, ang makiiyaiyahon nga tawo mahimo nga kulang sing pagkaawa. (1 Juan 3:17)​—⁠11/1, pahina 19, 20.

▫ Anong mga leksion ang matun-an naton gikan sa Makasulatanhon nga kasaysayan nahanungod kay Job?

Ang kasaysayan ni Job nagasugid sa aton sang mga padugi ni Satanas kag nagabulig sa aton sa paghangop kon paano ang bug-os uniberso nga soberanya ni Jehova ginaangot sa tawhanon nga integridad. Kaangay ni Job, ang tanan nga nagahigugma sa Dios dapat tilawan. Mahimo man kita makabatas kaangay ni Job, mapamatud-an si Satanas nga butigon, kag maagom ang mga pagpakamaayo sang Ginharian sang Dios.​—⁠11/15, pahina 20.

▫ Paano mapakita sang tsirman sang isa ka hubon sang mga gulang ang nagakaigo nga pagkilala sa tagsa ka gulang?

Kon posible ang tsirman dapat mag-aman sing agenda sing abanse agod mahunahuna sing maayo kag sing mapangamuyuon sang iban pa nga mga gulang ang tagsa ka butang nga ginhatag. Sa miting sang mga gulang, indi niya pagtinguhaan nga likawan ang opinyon sang mga gulang kundi palig-unon sila nga ‘magpamulong sing hilway’ sa butang nga ginahambalan. (1 Timoteo 3:13)​—⁠12/1, pahina 30.