Ang Imo Relihion—Isa Bala Ini ka Barko nga Indi Gid Dapat Biyaan?

ANG isa ka barko yara sa tunga sang bagyo. Ang mga tripulante, nga nagatinguha gid sa pagsalbar sa ila barko, dapat magdesisyon sa gilayon: magpabilin bala sa barko ukon biyaan ini kag salbaron ang ila kaugalingon. Nahibaluan mo bala nga ining makahaladlok nga kahimtangan ginagamit subong isa ka teolohiko nga ilustrasyon?

Ang mga teologo, ilabi na ang Katoliko nga mga eskolar, masami nga nagapaanggid sang ila iglesia sa isa ka barko nga nagasulong sa bagyo. Nagasiling sila nga ining barko, nga ginapaandar ni Jesus ukon ni Pedro, nagalaragway sang lamang nga paagi sang kaluwasan. Ang panindugan sang klero amo, ‘Indi gid pagbiyai ang barko. Nakaagi na ang iglesia sing serioso nga mga krisis anay, apang isa ini ka barko nga nakasalbar sa tanan nga bagyo sang maragtas.’ Ang iban nagasiling, ‘Ngaa abi biyaan sia? Ano ang iban pa nga mahimo? Ngaa indi na lang magpabilin kag magbulig sa pagdala sini sa mas malinaw nga bahin sang dagat?’

Nahisanto sa sining malaragwayon nga mga pulong, madamo nga tawo, sa tanan nga sahi sang relihion, ang nagapangatarungan, ‘Nahibaluan ko nga ang akon relihion sayop sa madamo nga butang, apang nagalaum ako nga magbag-o ini. Indi ko luyag biyaan ini. Luyag ko magbulig sa paglubad sang mga problema sini.’ Ini nga sahi sang pangatarungan mahimo nga ginadikta sang sinsero nga gugma sa pinanubli nga relihion sang isa ukon sang kahadlok nga “luiban” ini.

Ang isa ka halimbawa sini amo si Hans Küng, isa ka kilala nga Katolikong rebelde nga teologo, nga nagpamalandong: “Dapat ko bala biyaan ang barko sa tion sang bagyo, kag ibilin sa mga kaupod ko nga naglayag tubtob karon ang responsabilidad nga atubangon ang madlos, sag-ahon ang tubig sa barko, kag ayhan ang pagtinguha nga makasalbar?” Nagsabat sia: “Indi ko pagsikwayon ang akon katutom sa iglesia.” Ang isa pa ka desisyon nga sarang mahimo amo ang “pagbulag sa sining iglesia, bangod sang pagluib sini, para sa gugma sa mas mataas nga mga prinsipio, kag ayhan, agod mangin mas tunay nga mga Cristiano.”​—⁠Die Hoffnung bewahren.

Apang makapabilin bala ang isa ka tawo sa sulod sang barko sang iya iglesia sa paglaum nga ang Dios, sa iya kaluoy, magahatag sa tanan nga relihion sing walay latid nga tion agod magreporma? Isa ina ka importante nga pamangkot. Subong ginpakita sang ilustrasyon, ang madasig nga pagbiya sa may katalagman nga barko paagi sa pagsakay sa walay kasiguruhan nga mga life­boat mangin subong ka makatalagam sa pagpabilin sa malapit na malunod nga barko. Maalamon bala nga magpabilin sa iglesia bisan ano man ang matabo, bisan ano man ang kahimtangan sini? Ano nga mga posibilidad sa pagreporma ang ginatanyag sang mga relihion karon? Tubtob san-o sila tugutan sang Dios sa pagpanghikot batok sa iya kabubut-on?

[Credit Line sang retrato sa pahina 3]

Chesnot/Sipa Press