Report sang mga Manugbantala sang Ginharian

Ang Maayong Balita sang Ginharian Pagaibantala

SA SULOD sang mga siglo, ang panguna nga kaaway sang Dios, si Satanas nga Yawa, malalangon nga nagagamit sing politikanhon nga mga panguluhan kag sing butig nga relihion sa iya mga panikasog nga upangan ang paglapnag sang matuod nga Cristianismo. Apang ining mga metodo mapaslawan. Gintagna ni Jesus nga ang “maayong balita sang ginharian pagaibantala [indi, “mahimo pagaibantala” ukon, “sarang mabantala”] sa bug-os napuy-an nga duta subong panaksi sa tanan nga kapungsuran.”​—⁠Mateo 24:⁠14.

Ang kapaslawan ni Satanas napamatud-an sa Gresya. Sa sinang pungsod ang ­Greek Or­tho­dox ­Church nanikasog nga dumilian ang mga Saksi ni Jehova sa pagbantala sing maayong balita sang Ginharian. Apang, subong ginapadaku sa masunod nga eksperiensia, ang kamatuoran sang Biblia nakalab-ot sang ulihi sa bunayag sing tagipusuon nga katawhan walay sapayan sang pagpamatok.

Mga 30 ka tuig na ang nagligad, ang isa ka ­Greek Or­tho­dox nga pari nagbaton sing maayong balita kag naghandum nga mangin isa sang mga Saksi ni Jehova. Apang, ang iya mga himata mabaskog nga nagpamatok sa sini kag gin-ipit sia nga untatan ang pagpakig-upod sa mga Saksi. Agod pahamut-an ang iya pamilya, ginpadayon niya ang iya karera subong isa ka pari; apang, ginakilala niya nga ang mga Saksi ni Jehova amo ang nagbulig sa iya sa paghibalo sing kamatuoran ugaling ginbiyaan niya ini kabaylo sang isa ka mataas nga posisyon sa butig nga relihion.

Walay sapayan, kon mag-utwas ang kahigayunan, nagahambal sia kon kaisa pabor sa mga Saksi ni Jehova. Sa madamo nga okasyon ginlaygayan pa gani niya ang mga tawo nga kon luyag nila mahibaluan ang mga kamatuoran sang Biblia, dapat sila magtuon upod sa mga Saksi. Sa sulod sang mga tuig ginsunod matuod sang iban ang iya panugyan.

Sining karon lang ang pari nagmasakit sing malala kag nakabatyag nga madali na lang sia mapatay. Samtang yara sia sa ospital, ginpatawag niya ang iya kabataan, kag nagtipon sila tanan sa iya kiliran.⁠a Nian ginpaathag niya sa ila nga kon mapatay sia, mahimo nga magakitaay pa sila liwat. Ginsugiran niya sila tuhoy sa panudlo sang Biblia nga ang mga tawo pagabanhawon ni Jehova agod magpuyo sa paraiso sa duta, kag kon luyag nila nga masaksihan ina, dapat nila hibaluon ang kamatuoran gikan sa Biblia kag magbiya gikan sa butig nga relihion. Nangabay sia nga pangitaon nila ang mga Saksi ni Jehova kag hibaluon gikan sa ila kon paano mangin matuod nga mga Cristiano.

Wala madugay pagkatapos sadto, napatay ang pari. Apang, maayo ang resulta sang iya ginpamilinbilin nga laygay sa iya kabataan. Ang iya anak nga babayi, kaangay sang kalabanan sang iya mga himata, nagpamatok anay sing mabaskog sa mga Saksi ni Jehova kag sa ila hilikuton. Apang indi niya masuay ang sinsero nga pangabay sang iya nagahimumugto nga amay, gani ginpangita niya ang mga Saksi ni Jehova kag nagsugod sa pagtuon sa Biblia. Sining karon lang sia mismo nangin isa ka Saksi, nagdedikar sang iya kabuhi kay Jehova nga Dios kag ginsimbuluhan ini paagi sa pagpabawtismo sa tubig.

Sa Gresya kag sa kapin sa 230 ka kadutaan, ang mga Saksi ni Jehova nagasalig sa gahom sang balaan nga espiritu sang Dios. Upod ang bug-os nga pagsakdag sang balaan nga espiritu nagapakig-ambit sila sa pagtuman sang tagna ni Jesus: “Apang magabaton kamo sing gahom kon ang balaan nga espiritu mag-abot sa inyo, kag mangin mga saksi ko kamo sa Jerusalem kag sa bug-os nga Judea kag Samaria kag tubtob sa ukbong sang duta.”​—⁠Binuhatan 1:⁠8.

[Footnote]