“Wala Pa Gid Ako sing Nakita nga Kaangay Sini!”

SANG 1993 ang opisina sang Watch Tower Society sa Ar­gen­ti­na gin-agda nga magpadala sing isa ka libo nga mga delegado sa San­tia­go, Chi­le, para sa apat ka adlaw “Balaan nga Panudlo” Distrito nga Kombension sang Mga Saksi ni Jehova. Una ini nga tion nga ang mga Saksi sa Argentina gin-agda sa paglakbay subong isa ka daku nga grupo sa isa ka kombension sa iban nga pungsod.⁠a Ano ang sabat? Kapin sa 8,500 nga kadamuon sang aplikasyon, diin 1,039 ka delegado ang ginpili.

Katorse tanan ka bus ang gin-arkilahan para sa sining 1,400 kilometros nga paglakbay gikan sa Bue­nos Ai­res tubtob sa San­tia­go. Ang 26-oras nga paglakbay ginpasadya sang makawiwili nga talan-awon. Sa pagtabok sa An­des Moun­tains, ang mga delegado nag-agi malapit sa Acon­ca­gua, sa kataason nga 6,960 metros, ang pinakamataas nga bahin sa Katundan nga Hemisperyo. Ang indi gid malipatan amo ang mataas, nagalikuliko nga dulhugon padulong sa Chi­le. Ginpalakpakan ang mga tsuper bangod sang ila kalantip sa pagmaneho sa sining mabudlay nga dalanon!

Apang, ang pinakamatahom nga talan-awon masapwan sa kombension mismo. Sa isa ka kalibutan nga may pungsudnon nga pagbinangig kag kasingki sa rasa, daw ano ka makapaumpaw nga makita ang isa ka nahiusa nga hubon sang 80,000 nga nagtambong gikan sa 24 ka pungsod​—⁠isa gid ka internasyonal nga paghiliutod! Bangod nasaksihan nila ang paghiusa sang mga kombensionista, ang pila ka tsuper sang bus nagpakita sing interes sa pagtuon sing dugang pa tuhoy sa mga Saksi ni Jehova. “Wala pa gid ako sing nakita nga kaangay sini!” siling sang isa sa ila.

[Mga footnote]