Ang mga Saksi ni Jehova sa Bug-os nga Kalibutan—Zambia
MALAPAD kag nagabaludbalod nga kapatagan sa ibabaw sang daku, 1,200-metros-kataas nga plateau—amo ini ang Zambia, ang pungsod sa sentro sang bagatnan-sentral nga Aprika. Sa aminhan-sidlangan, ang Muchinga Mountains nagataas sing tubtob sa 2,100 metros. Ang masulog nga Zambezi River, nga magahod kag madasig nga nagailig sing matahom sa bantog sa kalibutan nga Victoria Falls, nagahuman sang kalabanan sang nabagatnan nga dulunan sining nasulod nga pungsod. Nanarisari ang mga tawo, kag may kapin sa 70 ka lainlain nga etniko nga mga grupo. Walo ka pangunang hambal ang ginapamulong diri, apang may madamo pa nga iban.
Sadtong 1911 isa ka tuhay nga hambal ang ginpasad kag naglapnag sa Zambia. Ang mga dumuluaw nagdala sing mga kopya sang Studies in the Scriptures, kag ang mga Saksi ni Jehova sugod sadto nagpanikasog sa pagpalapnag sang “putli nga hambal” sang kamatuoran sang Biblia sa Zambia. (Sofonias 3:9) Makahalangkat ilabi na amo ang dimakasulatanhon nga mga pagpati nahanungod sa kahimtangan sang mga patay. Sang natun-an sang mga tawo ang kamatuoran kag nahangpan kon paano ang mga disparatis nag-ulipon sa ila, ang epekto makapahilway!—Juan 8:32.
Halimbawa, ang isa ka matutom nga utod nga babayi nagareport: “Sang hinali nga napatay ang akon tiyo, ang akon iloy, nga isa ka matutom nga miembro sang United Church of Zambia, naligban. Pagligad sang isa ka semana nga rito sa paglubong, nagpauli ako sa minuro agod tan-awon kon kamusta sia. Naabtan ko ang isa ka tigulang nga lalaki sa balay, kag sang nakalakat na sia, ginpamangkot ko ang akon lola kon sin-o sia. Nagsiling sia nga sia isa ka siruhano. Tuyo sang akon iloy nga suhulan sia agod itimalos ang pagkapatay sang iya utod nga lalaki agod ang iya kalag makapahuway na. Nagpati sia nga sa karon ini ‘nagalibutlibot lamang,’ subong sang ginsiling niya.
“Ginpaathag sing dugang ni Lola nga ang akon pagduaw isa ka pagpakamaayo bangod nagapangita sing kuwarta ang pamilya agod ibayad sa siruhano. Ginpangabay niya ako nga mag-amot, apang mataktikanhon ko nga ginpaathag nga subong isa ka Cristiano, indi ako mahimo makapakigbahin. Nangatarungan ako sa iya gikan sa Salmo 146:4, nga nagapakita nga ang mga patay wala sing mga panghunahuna—gani wala sing kalag nga ‘nagalibutlibot.’ Ginbinagbinag man namon ang Roma 12:19, nga nagapaathag nga ang pagtimalos iya ni Jehova kag indi aton. Pagkatapos sadto, ginsugiran ko ang akon iloy nahanungod sa paglaum nga pagkabanhaw nga ginpamulong ni Jesus, subong sang narekord sa Juan 5:28, 29. Nagdayaw sia sa akon mabakod nga pagtuo sa mga saad sang Dios. Sang ulihi nagsugod sia sa pagtuon upod sa isa ka Saksi kag madasig nga nag-uswag. Gin-utod niya ang tanan nga kaangtanan sa iya anay relihion kag ginsimbuluhan ang iya dedikasyon sa Dios paagi sa bawtismo. Karon sia isa na sang mga Saksi ni Jehova.”
Ang isa ka utod nga babayi nagareport: “Nagkadto ako sa lubong sang asawa sang akon tiyo. Pag-abot ko, nakita ko ang akon tiyo kag ang akon pakaisa nga ginagutom. Wala sila nakakaon sugod sang napatay ang akon tiya. Sang ginpamangkot ko kon ngaa, nagsabat sila nga suno sa tradisyon, wala sila ginatugutan sa pagsindi sing kalayo agod magluto. Nagboluntaryo ako sa pagluto, apang nahadlok ang pila ka katapo sang pamilya nga kon indi ko pagsundon ining pagano nga kinabatasan, basi ang tanan magabuang!
“Ginpaathag ko nga subong isa sang mga Saksi ni Jehova, ginatahod ko ang ginasiling sang Biblia sa Levitico 18:30 kag wala ginasunod ang dimakasulatanhon nga mga tradisyon. Nian ginpakita ko sa ila ang brosyur nga Mga Espiritu sang Patay. Bangod sina ang tension nag-ugdaw, kag ginpadayon ko ang akon hilimuon kag naghanda sing pagkaon para sa akon tiyo kag sa iban pa nga mga tawo. Ang mga kaparyentehan sang napatay natandog sa akon kaisog kag nagpasugot nga tun-an sing dugang ang Biblia. Dibawtismado nga mga manugbantala na sila, kag ang bug-os nga pamilya nagaplano nga magpabawtismo sa dili madugay.”
Daw ano gid ang aton kalipay kon madaug sang putli nga pagsimba sang kamatuoran ang kagumon sang relihiosong mga kabutigan, ilabi na yadtong madugay na katama nga mga pangatarungan nga nag-ulipon sa walay hinalung-ong nga mga tawo! Paagi sa pagpakamaayo ni Jehova, ang putli nga pagsimba nagalapnag sa Zambia, subong nga sa bug-os nga duta.—2 Corinto 10:4.
[Kahon sa pahina 9]
LARAGWAY SANG PUNGSOD
1994 nga Tuig sang Pag-alagad
KATAASON SANG KADAMUON NGA NAGAPANAKSI: 82,926
RATIO: 1 ka Saksi sa 107
TUMALAMBONG SA MEMORYAL: 363,372
PROMEDYO NGA PAYUNIR NGA MGA MANUGBANTALA: 10,713
PROMEDYO NGA PAGTUON SA BIBLIA: 108,948
KADAMUON NGA NABAWTISMUHAN: 3,552
KADAMUON SANG KONGREGASYON: 2,027
SANGA TALATAPAN: LUSAKA
[Retrato sa pahina 9]
Ang mga pasilidad sang sanga sang Watch Tower sa ilaya sang Lusaka
[Retrato sa pahina 9]
Pagbantala sa Shimabala, bagatnan sang Lusaka